|
ເມື່ອພາກສ່ວນແພດສາດຈີນໄດ້ພະຍາຍາມມາເປັນເວລາ10ກວ່າແລ້ວ,ຫວ່າງກ່ອນນີ້ບໍ່ດົນ,ທະນາຄານຈຸລັງທີ່ບໍ່ຕາຍຂອງຊົນເຜົ່າຕ່າງກັນລະດັບຊາດຂະໜາດອ່າວໃຫຍ່ແລະຄົບຖ້ວນໂດຍທຽບຖານແຫ່ງໜຶ່ງໄດ້ປະກາດສ້າງຕັ້ງຂຶ້ນຢູ່ນະຄອນຄຸນມິງເທສະບານແຂວງຢຸນນານ ພາກຕາເວັນຕົກສຽງໃຕ້ຂອງຈີນ.ທະນາຄານຈຸລັງດັ່ງກ່າວຈະສະໜອງຕົວແບບໃຫ້ແກ່ການຄົ້ນຄວ້າແຊນຂອງບັນດາຊົນເຜົ່າຈີນອີກຫຼາຍຮ້ອຍປີຂ້າງໜ້າ.
ທ່ານສາສະດາຈານສູ້ເຈຍໂຢວແມ່ນຫົວໜ້າສະຖາບັນຄົ້ນຄວ້າຊີວະສາດດ້ານແພດສາດສະພາບັນດິດແພດສາດວິທະຍາສາດຈີນ,ພ້ອມທັງເປັນຜູ່ຮັບຜິດຊອບຕົ້ນຕໍຂອງທະນາຄານຈຸລັງທີ່ບໍ່ຕາຍຂອງຊົນເຜົ່າຕ່າງກັນຂະໜາດໃຫຍ່.ທ່ານກ່າວວ່າ,ຈີນມີຊັບພະຍາກອນກຳມະພັນມະນຸດອຸດົມສົມບູນ,56ຊົນເຜົ່າລ້ວນແຕ່ມີເຂດຕັ້ງພູມລຳເນົາຢູ່ໂຮມສູນຂອງຕົນ.ຊົນເຜົ່າຕ່າງໆຕ່າງມີຈຸດພິເສດຂອງແຫຼ່ງກຳເນີດ,ລັກສະນະກຳມະພັນຂອງຊົນເຜົ່າຕົນ.ຝູງຄົນຊົນເຜົ່າຕ່າງໆຂອງຈີນແມ່ນຊັບພະຍາກອນອັນອຸດົມສົມບູນສຳລັບການຄົ້ນຄວ້າຄວາມຫຼາກຫຼາຍຂອງກຳມະພັນມະນຸດ.
ແຕ່ວ່າ,ໃນຫຼາຍປີມານີ້,ຄຽງຄູ່ກັບສັງຄົມໄດ້ກ້າວໜ້າຢ່າງບໍ່ຢຸດຢັ້ງ,ຊາວເຜົ່າຈຳນວນໜຶ່ງໄດ້ສ້າງຄອບຄົວກັບຊາວເຜົ່າອື່ນໆແລະເລີ່ມຍ້າຍໄປດຳລົງຊີວິດຢູ່ແຫ່ງອື່ນ.ນີ້ກໍໄດ້ເຮັດໃຫ້ໝວດແຊນທີ່ບໍລິສຸດໂດຍທຽບຖານຂອງຊົນເຜົ່າເຫຼົ່ານີ້ປະສົບຄວາມອັນຕະລາຍທີ່ຈະສູນເສຍໄປ.ສະນັ້ນ,ການສ້າງຕັ້ງທະນາຄານຈຸລັງທີ່ບໍ່ຕາຍຂອງຊົນເຜົ່າສ່ວນໜ້ອຍ,ມັນບໍ່ພຽງແຕ່ໄດ້ຮັກສາຊັບພະຍາກອນກຳມະພັນມະນຸດທີ່ຫາຍາກງວດໜຶ່ງໃຫ້ແກ່ຈີນແລະປະເທດອື່ນໆໃນໂລກດຳເນີນການຄົ້ນຄວ້າສຸຂະພາບ,ແຊນຂອງມະນຸດເປັນຕົ້ນທໍ່ນັ້ນ,ຍັງສາມາດສະໜອງຕົວແບບໃຫ້ແກ່ການຄົ້ນຄວ້າແຊນຂອງບັນດາຊົນເຜົ່າຈີນໃນອີກຫຼາຍຮ້ອຍປີຂ້າງໜ້າ.ທ່ານສາສະດາຈານສູ້ເຈຍໂຢວ ວິເຄາະວ່າ:
"ຈຸລັງທີ່ບໍ່ຕາຍຂອງຊົນເຜົ່າທີ່ຕ່າງກັນແມ່ນຂໍ້ມູນລ້ຳຄ່າທີ່ສຸດໃນການຄົ້ນຄວ້າພະຍາດຂອງມະນຸດແລະວິທະຍາໝວດແຊນຢຸກຢາຈຳນວນໜຶ່ງ.ຖ້າວ່າປັດຈຸບັນ,ພວກເຮົາບໍ່ໃຊ້ມາດຕະການ,ຊັບພະຍາກອນເຫຼົ່ານີ້ກໍອາດຈະສູນຫາຍໄປ,ກໍໝາຍຄວາມວ່າພວກເຮົາຕ້ອງອະນຸລັກຊັບພະຍາກອນກຳມະພັນເຫຼົ່ານີ້.ຈີນພວມບູລະນະກົດຂໍ້ກຳນົດກ່ຽວກັບການຄຸ້ມຄອງຊັບພະຍາກອນກຳມະພັນມະນຸດໃຫ້ສົມບູນຂຶ້ນ.ພວກເຮົາກໍສຸດທີ່ຫວັງຢາກດຳເນີນການຮ່ວມມືຢູ່ພາຍໃນປະເທດແລະຮ່ວມມືກັບຕ່າງປະເທດ.ທີ່ຈິງ,ພວກເຮົາກໍໄດ້ເຮັດວຽກດ້ານນີ້ແລ້ວ."
ໃນຫ້ອງທົດລອງຂອງສະຖາບັນຄົ້ນຄວ້າຊີວະສາດດ້ານແພດສາດສະພາບັນດິດແພດສາດວິທະຍາສາດຈີນທີ່ຕັ້ງຢູ່ນະຄອນຄຸນມິງແຂວງຢຸນນານ,ທ່ານນາງຫວງສຽວສິນ ພະນັກງານທີ່ເຂົ້າຮ່ວມໂຄງການທະນາຄານຈຸລັງໄດ້ໃສ່ສົບມື,ໄຂປະຕູຕູ້ເຢັນນີໂຕຼແຊນທາດແຫຼວ,ແລ້ວເອົາກັບທີ່ເກັບມ້ຽນໄວ້ຢ່າງມີລະບຽບໃຫ້ນັກຂ່າວເບິ່ງ,ໃນກັບເຫຼົ່ານີ້ມີຫຼອດເຢັນ100ຫຼອດ,ໃນແຕ່ລະຫຼອດມີຕົວແບບຈຸລັງຢູ່ໃນຫັ້ນ.ສ່ວນຢູ່ຝານອກຫຼອດໄດ້ຕິດຊື່,ຊົນເຜົ່າ,ເວລາເກັບຕົວແບບຈຸລັງຂອງຜູ່ສະໜອງ.ທ່ານນາງຫວງສຽວສິນແນະນຳວ່າ,ຕົວແບບຈຸລັງທຸກຫຼອດລ້ວນແຕ່ແມ່ນເກັບມາຈາກເຂດຊົນເຜົ່າທີ່ຫ່າງໄກຂອງບັນດາແຂວງ,ນະຄອນແລະເຂດປົກຄອງຕົນເອງຂອງຈີນ,ເມື່ອໄດ້ຊຳລະແລ້ວຈິ່ງແຊ່ເຢັນໄວ້.ໜ່ວຍງານໂຄງການທະນາຄານຈຸລັງໄດ້ປະຕິບັດມາດຖານເກັບຕົວແບບຈຸລັງຢ່າງເຂັ້ມງວດ,ທຳມະດາແມ່ນເກັບຢູ່ເຂດຫ່າງໄກສອກຫຼີກທີ່ສຸດຂອງຈີນ,ຄົນ3ລຸ້ນຄືປູ່,ພໍ່ແລະເຈົ້າຂອງຈຸລັງຕ້ອງສອດຄ່ອງກັບເງື່ອນໄຂທີ່ບໍ່ໄດ້ແຕ່ງງານກັບຄົນຊົນເຜົ່າອື່ນ.ທ່ານນາງຫວງສຽວສິນກ່າວວ່າ:
"ຜູ່ສະໜອງຈຸລັງສ່ວນຫຼາຍແມ່ນຊາວກະສິກອນໃນຊົນນະບົດ,ນັກຮຽນປະຖົມແລະມັດທະຍົມກໍມີ,ກ່ອນອື່ນ,ພວກຂ້າພະເຈົ້າໄດ້ບັນລະຍາຍຈຸດປະສົງແລະຄວາມໝາຍຂອງການເກັບຕົວແບບຈຸລັງໃຫ້ນາຍບ້ານ,ເຊິ່ງລວມທັງໂຮງໝໍຂັ້ນເທິງຫຼືພາກສ່ວນສາທາລະນະສຸກຊາບຢ່າງຈະແຈ້ງ,ຕໍ່ຈາກນັ້ນ,ພວກເຂົາເຈົ້າກໍບອກໃຫ້ພໍ່ແມ່ຂອງລູກຮູ້.ເມື່ອພໍ່ແມ່ຂອງລູກເຫັນດີແລ້ວ,ພວກເຂົາເຈົ້າຈິ່ງເຊັນໜັງສືເຫັນດີແລະໃບຮູ້ສະພາບການ,ແລ້ວປະສານສົມທົບກັບພວກຂ້າພະເຈົ້າເກັບເລືອດ."
1 2
|
