|
ສະບາຍດີທ່ານຜູ່ຟັງທີ່ໂຄລົບ, ຍິນດີຕ້ອນຮັບທ່ານເຂົ້າສູ່ລາຍການອາລະຍະທຳຈີນ. ນະຄອນລາຊາ ເທດສະບານເຂດຕິເບດປົກຄອງຕົນເອງຂອງຈີນແມ່ນເມືອງພູພຽງທີ່ມີເອກະລັກພິເສດ, ແລະກໍ່ແມ່ນພຸດທະສາຖານທີ່ສັກກາລະບູຊາທີ່ສົມຊື່ທີ່ສຸດ. ໃນເມືອງລາຊາ, ບໍ່ພຽງແຕ່ມີວັງປູ້ຕາລ່າທີ່ມີຊື່ສຽງດົ່ງດັງໃນໂລກທໍ່ນັ້ນ, ຍັງມີບູຮານນະສະຖານທີ່ບັນທຶກການໄປມາຫາສູ່ກັນລະຫວ່າງເຂດຕິເບດກັບເຂດໃນຈີນຫຼາຍແຫ່ງ, ຕົວຢ່າງຄື ສີລາຈາລຶກຜູກສາຍສຳພັນທະມິດລະຫວ່າງລາຊະວົງຖາງກັບເຂດຕິເບດແລະສີລາຈາລຶກກະສັດຄ່າງຊີ່ເປັນຕົ້ນ. ໃນນັ້ນ, ເລື່ອງທີ່ກະຕຸ້ນໃຈຄົນທີ່ສຸດນັ້ນແມ່ນນິທານກ່ຽວກັບເຈົ້າຍິງເວິນເສິງຂອງລາຊະວົງຖາງເຂົ້າຕິເບດ. ໃນລາຍການອາລະຍະທຳຈີນພາກນີ້, ຂ້າພະເຈົ້າຈະສະເໜີເລື່ອງກ່ຽວກັບເຈົ້າຍິງເວິນເສິງແຕ່ງດອງກັບຊົ່ງຈ້ານກ່ານປູ້ ລາຊາເຜົ່າຕິເບດສູ່ທ່ານຟັງ.
ຮູບສະຫຼັກເຈົ້າຍິງເວິນເສິງ
ລາຊະວົງຖາງທີ່ປົກຄອງຈີນແຕ່ສະຕະວັດທີ 7 ຮອດສະຕະວັດທີ 10 ນັ້ນ ແມ່ນລາຊະວົງໜຶ່ງທີ່ມີອິດທິພົນກວ່າໝູ່ໃນປະຫວັດສາດຈີນ, ລາຊະວົງຖາງມີກຳລັງແຫ່ງຊາດເຂັ້ມແຂງທີ່ສຸດ, ມີອິດທິພົນຫຼາຍສົມຄວນຢູ່ທົ່ວພາກພື້ນອາຊີຕາເວັນອອກ. ໃນລາຊະວົງຖາງຕອນຕົ້ນ, ຊົ່ງຈ້ານກ່ານປູ້ ຫົວໜ້າກົກເຫຼົ່າພາກຕາເວັນຕົກສຽງໃຕ້ຂອງຈີນໄດ້ທ້ອນໂຮມພູພຽງຕິເບດແລະສ້າງຕັ້ງລາຊະວົງຖູໂພ່ຫຼືຕິເບດ. ໃນໄລຍະຄອງອຳນາດ, ຊົ່ງຈ້ານກ່ານປູ້ໄດ້ສ້າງລະບອບຢ່າງເປັນລະບົບ, ພະຍາຍາມພັດທະນາເສດຖະກິດ, ຕັ້ງໜ້າລິເລີ່ມສ້າງພາລະກິດວັດທະນະທຳ. ນອກນີ້, ຊົ່ງຈ້ານກ່ານປູ້ຍັງສະແຫວງຫາສ້າງການພົວພັນທີ່ສະໜິດແໜ້ນກັບລາຊະວົງຖາງ, ຕັ້ງໜ້າຖອດຖອນຮໍ່າຮຽນເອົາເຕັກນິກການຜະລິດແລະວັດທະນະທຳການເມືອງອັນກ້າວໜ້າຂອງລາຊະວົງຖາງ, ຊົ່ງຈ້ານກ່ານປູ້ເຄີຍແຕ່ງທູດໄປຂໍກ່ຽວດອງກັບລາຊະວົງຖາງສອງເທື່ອ.
ຄ.ສ. ປີ 640, ຫຼີຊື້ໝິນ ກະສັດລາຊະວົງຖາງໄດ້ຊົງເຫັນດີຄຳຮ້ອງຂໍກ່ຽວດອງຂອງຊົ່ງຈ້ານກ່ານປູ້, ເຫັນດີໃຫ້ເຈົ້າຍິງເວິນເສິງແຕ່ງດອງກັບຊົ່ງຈ້ານກ່ານປູ້. ບົນເສັ້ນທາງເຈົ້າຍິງເວິນເສິງໄປເຂດຕິເບດ ເຄີຍໄດ້ສ້າງນິທານພື້ນສືບທີ່ຈົບງາມຢ່າງຫຼວງຫຼາຍ, ໃນນັ້ນນິທານມີຊື່ສຽງກວ່າໝູ່ແມ່ນຄວາມເປັນມາຂອງໜອງຊິ່ງໄຫ. ໃນພື້ນສືບຂອງເຜົ່າຕິເບດ, ເພື່ອບໍ່ໃຫ້ເຈົ້າຍິງເວິນເສິງຄິດຮອດບ້ານເກີດເກີນໄປ, ກະສັດລາຊະວົງຖາງໄດ້ພະລາຊະທານແວ່ນວິເສດອັນໜຶ່ງໃຫ້ເຈົ້າຍິງ, ບໍ່ວ່າເຈົ້າຍິງໄປຮອດບ່ອນໃດ, ໃນແວ່ນວິເສດນີ້ກໍ່ສາມາດສ່ອງແສງໃຫ້ເຫັນພາບເມືອງສາງອ່ານ ລາຊະທານີຂອງລາຊະວົງຖາງ. ເມື່ອເຈົ້າຍິງເວິນເສິງໄປຮອດຊາຍແດນລະຫວ່າງລາຊະວົງຖາງກັບເຂດຕິເບດ, ເພື່ອສາມາດຜ່ານມື້ຜ່ານວັນຢ່າງໃຈຈົດໃຈຈໍ່ໃນອະນາຄົດ, ເຈົ້າຍິງເບິ່ງພາບບ້ານເກີດໃນແວ່ນວິເສດອີກເທື່ອໜຶ່ງ, ແລ້ວກໍໄດ້ປະແວ່ນວິເສດຢູ່ແຫ່ງນັ້ນ, ພາຍຫຼັງມາ ແວ່ນວິເສດໄດ້ກາຍເປັນໜອງຊິ່ງໄຫທີ່ສວຍງາມໃນປັດຈຸບັນ.
ເມື່ອຊົ່ງຈ້ານກ່ານປູ້ໄດ້ຂ່າວວ່າເຈົ້າຍິງເວິນເສິງເຂົ້າເຂດຕິເບດແລ້ວກໍ່ຊົງປື້ມພະໄທທີ່ສຸດ, ແລະນຳພາກອງທະຫານໄປຕ້ອນຮັບເຈົ້າຍິງເວິນເສິງຢູ່ຍອດແມ່ນ້ຳເຫຼືອງເຊິ່ງເປັນຊາຍແດນລະຫວ່າງລາຊະວົງຖາງກັບຕິເບດໂດຍພະອົງເອງ. ເມື່ອເຈົ້າຍິງເວິນເສິງໄປຮອດເມືອງລາຊາ ໄດ້ຮັບການຕ້ອນຮັບຢ່າງຟົດຟື້ນຈາກປະຊາຊົນເຂດຕິເບດ.
ຮູບສະຫຼັກຊົ່ງຈ້ານກ່ານປູ້
ເຈົ້າຍິງເວິນເສິງເຂົ້າເຂດຕິເບດ, ໄດ້ຊຸກຍູ້ໃຫ້ເສດຖະກິດທ້ອງຖິ່ນມີການພັດທະນາ, ໄດ້ສົ່ງເສີມວັດທະນະທຳສາສະໜາພຸດ, ໄດ້ຮັດແໜ້ນການພົວພັນລະຫວ່າງລາຊະວົງຖາງກັບເຂດຕິເບດ. ເຈົ້າຍິງເວິນເສິງໄດ້ນຳເອົາລົດ ມ້າ ລໍແລະອູດເປັນຕົ້ນຂອງລາຊະວົງຖາງໄປເຂດຕິເບດ, ໄດ້ຊຸກຍູ້ໃຫ້ສັງຄົມທ້ອງຖິ່ນມີຄວາມກ້າວໜ້າ. ໃນສະໄໝລາຊະວົງຖາງ ຄົນທັງຫຼາຍເຊື່ອຖືສາສະໜາພຸດ, ໃນຖານະເປັນພຸດທະສາສະນິກກະຊົນທີ່ສັດທາ, ເຈົ້າຍິງເວິນເສິງໄດ້ນຳເອົາພະທາດ ທຳມະຄຳພີແລະພະພຸດທະຮູບໄປເຂດຕິເບດ. ຊົ່ງຈ້ານກ່ານປູ້ຊົງຮັບເຫັນດີນຳຂໍ້ສະເໜີຂອງເຈົ້າຍິງເວິນເສິງກ່ຽວກັບການສ້າງວັດວາອາຮາມເພື່ອເຜີຍແຜ່ສາສະໜາພຸດ, ສັ່ງໃຫ້ສ້າງວັດຕ້າຈ່າວຢູ່ເມືອງລາຊາ, ພະພຸດທະຮູບສາກະຍະມູນີທີ່ປະດິດສະຖານຢູ່ໃນວັດຕ້າຈ່າວໃນຊູ່ມື້ນີ້, ກໍ່ແມ່ນເຈົ້າຍິງເວິນເສິງນຳເອົາໄປເຂດຕິເບດຈາກເມືອງສາງອ່ານໃນຄາວນັ້ນ.
1 2
|
