|
ວັນທີ28ກຸມພາແມ່ນມື້ຂຶ້ນປີໃໝ່ຕາມປະຕິທິນຕິເບດ,ຊາວເຜົ່າຕິເບດຜູ່ປາກພາສາອຳໂດ2ລ້ານ6ແສນກວ່າຄົນໄດ້ຮັບຂອງຂວັນອັນຄ້ຳຄ່າ,ນັ້ນກໍຄືລາຍການໂທລະພາບພາສາທ້ອງຖິ່ນຂອງພວກເຂົາເຈົ້າໄດ້ອອກອາກາດຢ່າງເປັນທາງການແລ້ວ.ນີ້ເຮັດໃຫ້ຄວາມຝັນຂອງພີ່ນ້ອງຊາວເຜົ່າຕິເບດຜູ່ປາກພາສາອຳໂດອັນໄພສານທີ່ຢາກເບິ່ງລາຍການໂທລະພາບສາພາທ້ອງຖິ່ນນັ້ນໄດ້ບັນລຸຜົນເປັນຈິງໃນທີ່ສຸດ.
ຢູ່ຈີນມີຊາວເຜົ່າຕິເບດ5ລ້ານກວ່າຄົນ,ໃນນັ້ນ,ມີ2ລ້ານ6ແສນຄົນປາກພາສາອຳໂດເຊິ່ງເປັນພາສາທ້ອງຖິ່ນໜຶ່ງຂອງພາສາຕິເບດ.ໃນນັ້ນ,ຊາວເຜົ່າຕິເບດທີ່ດຳລົງຊີວິດຢູ່ແຂວງຊິງຫາຍ ພາກຕາເວັນຕົກສຽງເໜືອຂອງຈີນແມ່ນປາກພາສາອຳໂດ.
ລູງເຄັດຊູນ ມີອາຍຸ62ປີແລ້ວ,ລູງແມ່ນຊາວລ້ຽງສັດເຜົ່າຕິເບດທີ່ດຳລົງຊີວິດຢູ່ພາກເໜືອແຂວງຊິງຫາຍ.ແຕ່ກ່ອນ,ໝົດຄອບຄົວຂອງລຸງເຄັດຊຸນດຳລົງຊີວິດແບບເຄື່ອນທີ່ສາລະເວລ້ຽງສັດຢູ່ບ່ອນມີນ້ຳມີຫຍ້າ,ຊີວິດແບບນີ້ເຖິງວ່າສະໜຸກສຸກສະບາຍກໍຕາມ,ແຕ່ຄອບຄົວຂອງລູງເໝືອນດັ່ງຫ່າງເຫີນຈາກໂລກພາຍນອກ,ຈົນບໍ່ຮູ້ວ່າໂທລະພາບແມ່ນຫຍັງ.ຊູ່ມື້ນີ້,ຄອບຄົວລູງເຄັດຊູນໄດ້ຕັ້ງຖິ່ນຖານຄົງທີ່ຢູ່ບ້ານຊາວລ້ຽງສັດທີ່ສ້າງໃໝ່.ເມື່ອຍ່າງເຂົ້າໃນຕຶກສອງຊັ້ນທີ່ປຸກໃໝ່ຂອງລູງເຄັດຊູນ,ນັກຂ່າວໄດ້ເຫັນລູງພ້ອມກັບຜູ່ເຖົ້າຜູ່ແກ່ເຜົ່າຕິເບດຫຼາຍຄົນພວມເບິ່ງລາຍການໂທລະພາບພາກພາສາອຳໂດ.ລູງເຄັດຊູນເວົ້າວ່າ:
"ແຕ່ກ່ອນຄອບຄົວຊາວລ້ຽງສັດຈຳນວນໜຶ່ງໃນບ້ານເຮົາກໍມີໂທລະພາບ.ແຕ່ເບິ່ງລາຍການບໍ່ເຂົ້າໃຈ,ເພາະວ່າ,ເລື່ອງເຜົ່າຮັ້ນກໍດີ,ເລື່ອງເຜົ່າຕິເບດກໍດີ,ລ້ວນແຕ່ແມ່ນພາສາຈີນກາງ,ພວກຂ້າພະເຈົ້າຟັງບໍ່ເຂົ້າໃຈ,ມີແຕ່ເດົາເອົາຄວາມໝາຍຕາມພາບເທົ່ານັ້ນ.ສ່ວນດຽວນີ້ຕ່າງເກົ່າແລ້ວ,ພວກຂ້າພະເຈົ້າຮູ້ວ່າໂມງໃດມີລາຍການພາສາຕິເບດ,ເພາະວ່າແມ່ນໃຊ້ພາສາອຳໂດ,ເມື່ອຟັງເຂົ້າໃຈແລ້ວກໍເບິ່ງເຂົ້າໃຈນຳ,ນ້ອຍໃຫຍ່ຍິງຊາຍຜູ່ໃດກໍມັກ.
ກໍຄືດັ່ງລູງເຄັດຊູນເວົ້ານັ້ນ,ຄຽງຄູ່ກັບແບບແຜນດຳລົງຊີວິດທີ່ສາລະເວລ້ຽງສັດຂອງຊາວລ້ຽງສັດເຜົ່າຕິເບດອັນໄພສານໃນແຂວງຊິງຫາຍໄດ້ຫັນມາສູ່ການຕັ້ງຖິ່ນຖານ,ບວກກັບໃນຫຼາຍປີມານີ້,ລັດຖະບານຈີນໄດ້ຄ້ຳຊູເຂດຊົນເຜົ່າຕິເບດ,ໂດຍສະເພາະແມ່ນການຈັດຕັ້ງປະຕິບັດໂຄງການໃຫ້ທຸກໆບ້ານຟັງວິທະຍຸແລະເບິ່ງໂທລະພາບໄດ້,ເຮັດໃຫ້ຄອບຄົວລ້ຽງສັດທີ່ມີເງື່ອນໄຂຈຳນວນໜຶ່ງແລະຊາວລ້ຽງສັດທີ່ຍ້າຍໄປຕັ້ງຖິ່ນຖານຄົງທີ່ຢູ່ມໍ່ຕົວເມືອງນັ້ນໄດ້ມີເຄື່ອງຮັບສັນຍານໂທລະພາບຈາກດາວທຽມຫຼືມີໂທລະພາບໃຊ້ສາຍ.
ແຕ່ວ່າພວກຊາວລ້ຽງສັດເຜົ່າຕິເບດທີ່ມີໂທລະພາບໂດຍສະເພາະແມ່ນຊາວເຜົ່າຕິເບດຜູ່ປາກພາສາອຳໂດພັດບໍ່ສາມາດຮັບເອົາຄວາມມ່ວນຊື່ນຈາກລາຍການໂທລະພາບໄດ້.ທ່ານຊາງເຢ ຫົວໜ້າພະແນກຕິເບດສຶກສາຂອງມະຫາວິທະຍາໄລຊົນເຜົ່າຊິງຫາຍແມ່ນຜູ່ຊ່ຽວຊານຕິເບດສຶກສາ,ທ່ານບອກນັກຂ່າວວ່າ,ພາສາຕິເບດມີ3ພາສາທ້ອງຖິ່ນ,ຄືພາສາລາຊາ,ພາສາອຳໂດແລະພາສາຄາມບາ.ກ່ອນໜ້ານີ້,ເຖິງວ່າສະຖານີໂທລະພາບຢູ່ບາງເຂດເຜົ່າຕິເບດໄດ້ຈັດລາຍການພາສາຕິເບດກໍຕາມ,ແຕ່ລ້ວນແຕ່ແມ່ນໃຊ້ພາສາລາຊາຫຼືພາສາຄາມບາ,ສ່ວນລາຍການພາສາອຳໂດພັດບໍ່ມີ.ທ່ານຊາງເຢແນະນຳວ່າ:
"ພາສາຕິເບດມີ3ພາສາທ້ອງຖິ່ນຄືພາສາລາຊາ,ພາສາອຳໂດແລະພາສາຄາມບາ,ເຖິງວ່າໃຊ້ຕົວໜັງສືຄືກັນ,ແຕ່ຍ້ອນມູນເຫດປະຫວັດສາດ,ພາສາທ້ອງຖິ່ນຕ່າງໆໄດ້ມີຄວາມແຕກຕ່າງກັນໃນການຜັນສຽງ.ຜູ່ປາກພາສາລາຊາສ່ວນຫຼາຍດຳລົງຊີວິດຢູ່ເມືອງລາຊາ,ເມືອງຊີກາເຈເປັນຕົ້ນ,ພາສານີ້ມີສຽງອ່ອນໂຍນແລະມີຈັງຫວະ,ຜູ່ປາກພາສາອຳໂດສ່ວນຫຼາຍດຳລົງຊີວິດຢູ່ແຂວງຊິງຫາຍພ້ອມດ້ວຍເຂດອ້ອມແອ້ມ,ສ່ວນຜູ່ປາກພາສາຄາມບາດຳລົງຊີວິດຢູ່ເມືອງຊາມໂດພ້ອມທັງເຂດອ້ອມແອ້ມຂອງເຂດຕິເບດ,ເມື່ອຜູ່ປາກພາສາທ້ອງຖິ່ນຕ່າງກັນພົບໜ້າກັນ,ເກືອບວ່າແມ່ນບໍ່ເຂົ້າໃຈຄວາມເວົ້າຂອງກັນ."
1 2
|
