|
|
 |
| (GMT+08:00)
2006-05-31 11:06:36
|
 |
|
ຊິມອາຫານໂອຊາຂອງເຜົ່າເກົາຫຼີ
cri
ທ່ານນາງວາງພິງຍັງບອກນັກຂ່າວວ່າ,ນອກຈາກຂະໜົມຕຳແລ້ວ,ໝີ່ເຢັນກໍແມ່ນອາຫານຫຼັກຊະນິດໜຶ່ງຂອງເຜົ່າເກົາຫຼີ.ໝີເຢັນເຜົ່າເກົາຫຼີສ່ວນຫຼາຍເຮັດດ້ວຍແປ້ງເຂົ້າສານລ່ຽມ,ໃນເວລາກິນໝີ່ເຢັນຕ້ອງໃສ່ແກງຊີ້ນງົວຫຼືແກງຊີ້ນໄກ່ທີ່ແຊ່ ເຢັນໄວ້ກ່ອນແລ້ວ.ນາງແນະນຳວ່າ,ໝີ່ເຢັນມີລົດທັງສົ້ມທັງຫວານ,ສົດຊື່ນແລະຖືກປາກ,ຊາວເຜົ່າເກົາຫຼີບໍ່ວ່າຍິງຊາຍນ້ອຍໃຫຍ່ກໍມັກກິນໝົດທຸກຄົນ.
ກ່ຽວກັບໝີ່ເຢັນ,ໃນໝູ່ຊາວເຜົ່າເກົາຫຼີຍັງໄດ້ເລົ່າລືກັນວ່າ,ເມື່ອວັນທີ4ເດືອນ ມັງກອນຕາມຈັນທະຄະຕິຈີນ,ທະແນມແຕ່ກິນໝີ່ເຢັນເສັ້ນຍາວແລ້ວ,ກໍຈະມີອາຍຸ ໝັ້ນຂວັນຍືນ.ສະນັ້ນ,ໝີ່ເຢັນກໍຖືກຊາວເຜົ່າເກົາຫຼີເອີ້ນເປັນໝີ່ໝັ້ນຍືນ.ແຕ່ວ່າ,ປັດຈຸບັນ,ນອກຈາກກິນໝີ່ເຢັນໃນວັນທີ4ມັງກອນແຕ່ລະປີແລ້ວ,ການກິນໝີ່ເຢັນໃນລະດູຮ້ອນກໍໄດ້ກາຍເປັນອາຫານດີສຳລັບແກ້ຄວາມຮ້ອນເຍື່ອງໜຶ່ງຂອງຊາວເຜົ່າເກົາຫຼີແລະເຜົ່າອື່ນໆ.
ນອກຈາກຂະໜົມຕຳແລະໝີ່ເຢັນທີ່ພວກເຮົາໄດ້ກ່າວມາຂ້າງເທິງນັ້ນແລ້ວ,ອາຫານຫຼັກທີ່ຊາວເຜົ່າເກົາຫຼີມັກກິນທີ່ສຸດຍັງແມ່ນເຂົ້າຈ້າວ,ຜັກດອງທີ່ເຮັດດ້ວຍຜັກກາດຂາວຫຼືຫົວຜັກກາດນັ້ນໄດ້ເປັນຂອງແກ້ມທີ່ຊາວເຜົ່າເກົາຫຼີນິຍົມທີ່ສຸດ.ຄົນທັງຫຼາຍເກືອບວ່າຂາດມັນບໍ່ໄດ້ໃນເວລາກິນເຂົ້າ.ກໍຄືດັ່ງທ່ານຈິ່ນເຕີໂກວ ຊາວເຜົ່າເກົາຫຼີທີ່ມາຈາກແຂວງໄຮລົງຈ່ຽງທາງພາກຕາເວັນອອກສຽງເໜືອຈີນເວົ້າວ່າ:"ຜັກດອງເວົ້າສຳລັບເຜົ່າເກົາຫຼີແລ້ວມັນສຳຄັນທີ່ສຸດ,ທຳມະດາແລ້ວ,ຊາວ ເຜົ່າເກົາຫຼີພວກເຮົາຄັນບໍ່ມີຜັກດອງກໍຮູ້ສຶກວ່າກິນເຂົ້າບໍ່ແຊບ."
ເມື່ອຍາມເກັບກ່ຽວໃນລະດູໃບໄມ້ຫຼົ່ນ,ແມ່ຍິງເຜົ່າເກົາຫຼີທັງຫຼາຍກໍເລີ່ມເຮັດຜັກດອງເພື່ອແຮໄວ້ຜ່ານລະດູໜາວ.ພວກເຂົາເຈົ້າຊື້ຜັກກາດຂາວແລະຫົວຜັກກາດຂາວ ຫົວກາລົດຈຳນວນຫຼາຍສົມຄວນ,ລ້າງໃຫ້ສະອາດແລ້ວແຊ່ນ້ຳເກືອ,ແນ່ນອນແລ້ວ,ສິ່ງທີ່ຂາດເຂີດບໍ່ໄດ້ແມ່ນເຄື່ອງປຸງເຊັ່ນໝາກເຜັດ,ຫົວຜັກທຽມ,ຜັກບົ່ວຫອມເປັນຕົ້ນ.ເອົາວັດຖຸດິບເຫຼົ່ານີ້ໃສ່ເຂົ້າໃນໄຫ,ສະສົມໄວ້.ເມື່ອຫຼາຍເດືອນຜ່ານໄປ ຄືຮອດລະດູໜາວ,ກໍສາມາດກິນໄດ້ແລ້ວ.
ແນ່ນອນແລ້ວ,ນອກຈາກອາຫານເຈແລ້ວ,ຊາວເຜົ່າເກົາຫຼີກໍໄດ້ກິນອາຫານຊີ້ນຈຳນວນໜຶ່ງຢ່າງເໝາະສົມ,ຕົວຢ່າງຄືຊີ້ນປີ້ງ.ແກງກໍແມ່ນສິ່ງທີ່ຂາດບໍ່ໄດ້ໃນອາຫານປະຈຳວັນຂອງເຜົ່າເກົາຫຼີ,ຄົນທັງຫຼາຍມັກໃສ່ຊີ້ນໜ້ອຍໜຶ່ງໃນແກງ.ແກງຊີ້ນໝາແມ່ນແກງຍອດຢ້ຽມ.ເພາະວ່າ,ຊາວເຜົ່າເກົາຫຼີເຫັນວ່າໃນແກງຊີ້ນໝາມີທາດໂບຼຕິນອຸດົມສົມບູນ,ມີໄຂມັນໜ້ອຍມີຜົນດີຕໍ່ສຸຂະພາບຄົນເຮົາ.ທ່ານຈິ່ນເຕີໂກວ ຊາວເຜົ່າເກົາຫຼີເວົ້າວ່າ,ແຕ່ກ່ອນ,ທຳມະດາແລ້ວ,ຊາວເຜົ່າເກົາຫຼີມັກກິນຊີ້ນໝາໃນລະດູຮ້ອນ.
"ແຕ່ກ່ອນ,ຊາວເຜົ່າເກົາຫຼີພວກເຮົາມັກກິນແກງຊີ້ນໝາໃນຍາມອາກາດຮ້ອນກວ່າໝູ່ໃນແຕ່ລະປີ,ຍາມນັ້ນຄົນອອກເຫື່ອຫຼາຍ,ຮ່າງກາຍອ່ອນເພຍ,ກິນແກງຊີ້ນໝາບຳລຸງຮ່າງກາຍແມ່ນດີທີ່ສຸດ,ແກງຊີ້ນໝາມີທາດບຳລຸງຫຼາຍກິນແລ້ວຮູ້ສຶກມີແຮງຫຼາຍ,ອາກາດຍິ່ງຮ້ອນກໍຍິ່ງຕ້ອງກິນແກງຮ້ອນ"
ສູ່ມື້ນີ້,ບໍ່ວ່າຈະແມ່ນລະດູໜາວຫຼືແມ່ນລະດູຮ້ອນ,ແກງຊີ້ນໝາທີ່ມີທາດບຳລຸງອຸດົມສົມບູນນັ້ນໄດ້ກາຍເປັນອາຫານໂອຊາລົດທີ່ຂາດເຂີນບໍ່ໄດ້ໃນພາເຂົ້າຄອບຄົວຊາວເຜົ່າເກົາຫຼີ.ກິນແກງຊີ້ນໝາ,ທັງກິນເຂົ້າກັບຜັກດອງ,ຕາມຊາວເຜົ່າເກົາຫຼີເຫັນວ່າມັນເປັນເລື່ອງທີ່ສະບາຍໃຈທີ່ສຸດ.
ນອກຈາກຂະໜົມຕຳ,ໝີ່ເຢັນ,ຜັກດອງແລະແກງຊີ້ນໝາທີ່ພວກເຮົາໄດ້ແນະນຳສູ່ຟັງແລ້ວ,ເຜົ່າເກົາຫຼີຍັງມີອາຫານໂອຊາລົດຫຼາຍເຍື່ອງຫຼາຍແນວ,ຖ້າມີໂອກາດ,ຍ້ອນດີຕ້ອນຮັບທ່ານມາຈີນຊິມເບິ່ງເອົາເອງແດ່!
1 2
|
|
|
