|
ທີ່ນີ້, ວິທະຍຸສາກົນແຫ່ງປະເທດຈີນ. ສະບາຍດີຕອນຄ່ຳ ທ່ານຜູ້ຟັງທີ່ຮັກແພງ. ຂ້າພະເຈົ້າແມ່ນດາລາວັນ, ດີໃຈຫຼາຍທີ່ບັນດາທ່ານມຫ້ກຽດຮັບຟັງລາຍການນັດພົບໃນວັນອາທິດຕາມນັດ. ໂຈເຈະລຸນ ຊື່ທີ່ນັກຮ້ອງຮ້ອງຫຼົບໄປຫຼົບມາຫຼາຍເທື່ອໃນເພງທີ່ທ່ານພວມຟັງຢູ່ນີ້ກໍແມ່ນພະເອກໃນລາຍການຂອງພວກເຮົາມື້ນີ້.
" ໂຈເຈະລຸນ! ດາລາຊື່ດັງໆ, ຕາຫິບໆ, ເຈົ້າຮູ້ບໍ່ມີເດັກຍິງໄວລຸ້ນຫຼາຍປານໃດຕິດໃຈເຈົ້າ. ດົນຕີຂອງເຈົ້າຈັ່ງແມ່ນພິເສດແທ້, ມີເອກະລັກສະເພາະຂອງຕົນເອງ. ຮາໂລ! ໂຈເຈະລຸນ, ຫວ່າງນີ້ເຈົ້າກໍຄ່ອຍຢູ່ບໍ່. ເຈົ້າແມ່ນລົມໝູນທາງດົນຕີ. ຢູ່ໃນໂຕຂອງເຈົ້າ, ຢູ່ໃນສະໝອງເຈົ້າ, ມີຜີດົນຕີໂຕໜຶ່ງລີ້ຊ່ອນຢູ່. ໃຜກໍວ່າ, ເຈົ້າມີພອນສະຫວັນດົນຕີ. ເພງຂອງເຈົ້າເໝືອນມ້າມະນີກາບເຫາະເຫີນ, ມີເນື້ອໃນກ່ຽວກັບຈີນ ຕ່າງປະເທດ ສະໄໝບູຮານ ສະໄໝປັດຈຸບັນ ເທບນິຍາຍ ນິທານປະລຳປະລາ ເກມແລະກິລາ. ປູ່ ຍ່າ ພໍ່ ແມ່ ເພື່ອນຮຽນແລະເພື່ອນມິດ ເຈົ້າກໍເອົາມາແຕ່ງໃສ່ເພງໝົດ. ໃຜກໍທວາຍວ່າ, ພູມປັນຍາຂອງເຈົ້າມີມື້ສຸດສ້ຽງເປັນບໍ່, ແຕ່ຂ້ອຍຍັງຝາກຄວາມຫວັງໄວ້ນຳເຈົ້າຢູ່ຄືເກົ່າ ໂຈເຈະລຸນ! …." ເພງ ໜີຫາວ, ໂຈເຈະລຸນ ແປວ່າ, "ສະບາຍດີ, ໂຈເຈະລຸນ"ນີ້ໄດ້ວາດພາບທ່ານໂຈເຈະລຸນຢ່າງມີຊີວິດຊີວາຮອບດ້ານ. ເລື່ອງທີ່ຄົນທັງຫຼາຍບໍ່ໄດ້ຄາດຄຶດມາກ່ອນນັ້ນແມ່ນນາງອານອີ້ວຊີໄດ້ມີຊື່ສຽງດັງຂຶ້ນບາດດຽວຍ້ອນຮ້ອງເພງນີ້. ຈາກນີ້ກໍເຫັນໄດ້ວ່າ, ທ່ານໂຈເຈະລຸນມີຊື່ສຽງປານໃດບົນເວທີເພງສະໄໝຂອງຈີນ.
ມີຄົນເວົ້າວ່າ, ທ່ານໂຈເຈະລຸນແມ່ນເທບນິຍາຍໃນວົງການດົນຕີຈີນ. ທ່ານຊ່າງແຕ່ງເນື້ອຮ້ອງ ແຕ່ງທຳນອງເພງແລະເສບເຄື່ອງດົນຕີເກັ່ງໝົດສູ່ຢ່າງ. ທ່ານບໍ່ພຽງແຕ່ໄດ້ສ້າງສິ່ງອັດສະຈັນທີ່ໄດ້ຮັບຄວາມນິຍົມແລະເປັນແຊມປຽນໃນການຈຳໜ່າຍແຜ່ນ CD ທໍ່ນັ້ນ, ຍັງໄດ້ນຳໜ້າລົດນິຍົມໃໝ່ແລະເອກະລັກໃໝ່ອີກດ້ວຍ. ທ່ານໂຈເຈະລຸນແມ່ນຜູ່ລິເລີ່ມແຕ່ງເພງຈີນທີ່ຟື້ນຮີດບູຮານບົນເວທີເພງສະໄໝ. ປັດຈຸບັນ, ຄົນນັບມື້ນັບຫຼາຍໄດ້ເອົາທ່ານໂຈເຈະລຸນເຊື່ອມຕໍ່ກັບວັດທະນະທຳຈີນ. ແມ່ນແທ້, ທ່ານໂຈເຈະລຸນໄດ້ຮັບຜົນສະທ້ອນຈາກດົນຕີຂອງຊາວຜິວດຳຢູ່ຕ່າງປະເທດມາແຕ່ຍາມຍັງນ້ອຍ, ແຕ່ຄວາມເຂົ້າໃຈແລະຄວາມຊຳນານຂອງທ່ານຕໍ່ວັດທະນະທຳຈີນກໍບໍ່ດ້ອຍຈັກເມັດ. ໃນເພງຂອງທ່ານໄດ້ມີສິ່ງຍອດຢ້ຽມຂອງວັດທະນະທຳຈີນແຝງຊ້ອນຢູ່ຢ່າງຫຼວງຫຼາຍ. ເພງຕົ່ງເຟິ່ງພໍ້ກໍແມ່ນເພງດີເລີດທີ່ສຸດ.
ທ່ານຜູ່ຟັງທີ່ຮັກແພງ, "ຕົ່ງເຟິ່ງພໍ້"ແມ່ນຮູບການໜຶ່ງໃນກາບກອນຈີນສະໄໝບູຮານ. ໃນເພງຂອງທ່ານໂຈເຈະລຸນເພງນີ້, ພວກເຮົາຈະໄດ້ຟັງທຳນອງດົນຕີແບບບູຮານທີ່ເສບດ້ວຍກະຈັບປີ່"ພີພາ"ຂອງຈີນ, ແລະຍັງຈະຊອກເຫັນພາບທີ່ບັນລະຍາຍໃນນິທານສຸພາສິດແລະໃນກາບກອນຈີນ ຄື, ຊີງເໝີຍຈູໝ້າ ຊຶ່ງມີຄວາມໝາຍວ່າ, ສອງຄົນຮັກກັນມາແຕ່ນ້ອຍ ແລະ ກູຕ້າວຊີເຟິ່ງ ແປວ່າ, ລົມລະດູໃບໄມ້ຫຼົ່ນຢູ່ທາງບູຮານ. ເພງນີ້ມີເນື້ອຮ້ອງວ່າ, "ແມ່ນໃຜພວມດີດເພງຕີຕົ່ງເຟິ່ງພໍ້ດ້ວຍກະຈັບປີ່, ເວລາຜ່ານໄປເໝືອນດັ່ງຝາກຳແພງໂຂະລົງ, ຂ້ອຍຍັງຈື່ໄດ້ຄາວເຮົາຍັງນ້ອຍ, ມາດຽວນີ້, ສຽງກະຈັບປີ່ອ້ອຍອິ່ນ, ເຈົ້າບໍ່ຮູ້ຂ້ອຍູພວມຄອງຄອຍ. ໃຜເສບເພງຕົ່ງເຟິ່ງພໍ້, ເຈືອສີນິທານຈົນແດງ, ຂ້ອຍຈູງແຂນເຈົ້າຍ່າງຜ່ານທາງບູຮານຢູ່ນອກຮົ້ວ, ໃນຍາມບ້ານເມືອງເຮື້ອຮ້າງວ່າງເປົ່າ, ເຮົາໄດ້ແຍກກັນໄປຢ່າງມິດງຽບ……"
1 2
|
