|
|
 |
| (GMT+08:00)
2006-06-07 16:31:19
|
 |
|
ທ່ານໂຈເຈະລຸນ ນັກຮ້ອງທີ່ມີພອນສະຫວັນພິເສດ (ສຽງ)
cri
Author: huachunmei
ຄວາມຮັກບໍ່ໝາຍເຖິງຄວາມຄຶດຮອດ, ແຕ່ຄວາມເສົ້າໝອງໃນຊາດກ່ອນພັດບໍ່ໄດ້ເຢັນລົງຈັກເມັດຄຽງຄູ່ກັບຄວາມເຍືອກເຢັນຂອງລົມລະດູໃບໄມ້ຫຼົ່ນ. ດົນຕີເສບຕົ້ນດັງຂຶ້ນຊ້າໆ, ທຳນອງອ່ອນໂຍນ, ບວກກັບການເວົ້າສະຫຼັບຕາມໃຈແບບທ່ານໂຈເຈະລຸນເອງ, ຄືເຫັນຢູ່ຕໍ່ໜ້າມີສຸພາບບຸລຸດຜູ່ໜຶ່ງທີ່ຄຸມເສື້ອຕູ້ມເດີນທາງໃນຍາມກາງຄືນ, ຖືອາກກອກດີອົງ, ຮ້ອງເພງ ສຽງທຸ້ມໆຢູ່ຮ່ອມພູ. ບໍ່ເຫັນໜ້າຂອງເຂົາ, ແຕ່ພັດຮູ້ສຶກວ່າ, ເຂົາພວມ ນ້ຳຕາຜ່າໜ່ວຍ……ທ່ານໂຈເຈະລຸນໄດ້ໃຊ້ສຽງເພງວາດພາບຄວາມໂສກເສົ້າໂລມັງຕິກຢ່າງດີທີ່ສຸດ, ມັນຊູນເຖິງບ່ອນທີ່ອ່ອນແອທີ່ສຸດໃນດວງໃຈຂອງຜູ່ຟັງທັງຫຼາຍ. ເມື່ອຮອດບ່ອນສຸດເຊິ່ງ, ທ່ານຈະປະກົດເຫັນວ່າ, ສຽງທີ່ດັງຢູ່ຂ້າງຫູເຮົານັ້ນບໍ່ພຽງແຕ່ແມ່ນເພງເພງໜຶ່ງ, ຫາກແມ່ນຄຳເຕືອນກ່ຽວກັບຄວາມຮັກທີ່ເກົ່າແກ່ບູຮານ.
ທ່ານຜູ່ຟັງທີ່ຮັກແພງ, ເພງລາຕີແມ່ນໄດ້ຊື່ມາຈາກດົນຕີເຊເລີນເນດທີ່ມີຊື່ສຽງຂອງທ່ານໂຊແປງ ມະຫາອາຈານດົນຕີທີ່ລືຊາໃນໂລກ. ທ່ານໂຈເຈະລຸນຍັງເລືອກເອົາວັນລະລຶກທ່ານໂຊແປງເປັນວັນກະຈາຍເພງໃໝ່ນີ້ຂອງຕົນຄັ້ງທຳອິດ. ທັງລະລຶກມະຫາອາຈານດົນຕີ, ທັງປອບໃຈຜູ່ສູນເສຍຄວາມຮັກທັງຫຼາຍ.
ການແຕ່ງເພງດີໆບໍ່ຍາກ, ຍາກແຕ່ແຕ່ງໃຫ້ໄດ້ດີໝົດຊູ່ເພງ, ແລະມີເອກະລັກຕ່າງກັນຊູ່ເພງ.
ໃນເພງ ຊ່ວງເຈຍະກຸ້ນ ຄ້ອນສອງຂໍ້, ທ່ານໂຈເຈະລຸນໄດ້ໃຊ້ສຳນວນສັບຄືສຽງທີ່ລັ່ນອອກໄວໆຄືໃນເວລາສູ້ກັນໃນກົງຟູຈີນ, ເຖິງວ່າກໍຖືກຕິວ່າ,ເວົ້າບໍ່ແຈ້ງ, ແຕ່ກໍຍັງໄດ້ຮັບຄວາມນິຍົມຈາກຊາວໜຸ່ມຫຼວງຫຼາຍ, ເຄີຍກະຈາຍເລື້ອຍໆຢູ່ວິທະຍຸກະຈາຍສຽງແຫ່ງຕ່າງໆຂອງຈີນ.
ໃນເພງ ວໍເຕີຕີ້ຜານ ຂອບເຂດອິດທິພົນຂອງຂ້ອຍ ໄດ້ໃຊ້ສຽງງໍລິ້ນ ຄື, ສຽງ"ເອີ"ໃນພາສາຈີນຢ່າງຫຼວງຫຼາຍຢູ່ຫຼັງສັບສຸດທ້າຍຂອງປະໂຫຍກ, ເມື່ອຟັງແລ້ວ, ຮູ້ສຶກແປກດີ, ແລະມີຈຸດພິເສດຕ່າງໝູ່.
ເພງທີ່ພິເສດກວ່າໝູ່ອາດຈະແມ່ນເພງ ອົ່ວນິວ ຫອຍເດື່ອ ທີ່ແຕ່ງເນື້ອຮ້ອງແລະທຳນອງໂດຍທ່ານໂຈເຈະລຸນ. ເນື້ອຮ້ອງມີຄວາມໝາຍວ່າ, "ທ້ອງຟ້ານ້ອຍໆແຕ່ມີຄວາມໄຝຝັ່ນໃຫຍ່ໆ, ຢູ່ໃນເປືອກໜັກໆແຕ່ມີຄວາມຄອງຄອຍງ່າຍໆ. ຂ້ອຍຈະໄຕ່ຂຶ້ນໄປເທື່ອລະກ້າວ, ແລະຈະບິນຈາກຈຸດສູງສຸດໃນຍາມກາງຄືນ. ໃຫ້ລົມພັດນ້ຳຕາຈົນແຫ້ງ, ຫາກຈະມີມື້ໃດມື້ໜຶ່ງ, ຂ້ອຍຈະມີທ້ອງຟ້າຂອງຂ້ອຍເອງ….."ອາດຈະແມ່ນຍ້ອນນ້ຳໃຈທີ່ບໍ່ຍອມເປັນຄົນທຳມະດາສາມັນ, ແລະຈິດໃຈບຸກໜ້າບືນຕົວໃນເພງ, ເພງນີ້ຈຶ່ງໄດ້ຈັດເຂົ້ານສາລະບານເພງລັດທິຮັກຊາດສຳລັບນັກຮຽນມັດທະຍົມນະຄອນຊຽງໄຮ້. ນີ້ແມ່ນບໍ່ຄ່ອຍມີໃນວົງການເພງສະໄໝຂອງຈີນ.
ແຕ່ໃດມາ, ຫຼາຍຄົນນຶກວ່າ, ທ່ານໂຈເຈະລຸນມັກເຮັດແນວທີ່ຕ່າງໝູ່ຢູ່ພໍປານນັ້ນ, ແຕ່ເມື່ອໄດ້ຟັງເພງ ຊ່ານຮູໄຫ ທະເລຫີນປະກາລັງ ທີ່ຮ້ອງຄູ່ ໂດຍສຽງຍິງຊາຍແລ້ວ, ຈຶ່ງຮູ້ວ່າ, ການຂັບຮ້ອງອັນຊັດເຈນແບບເພງສະໄໝມະຫາຊົນຂອງທ່ານໂຈເຈະລຸນກໍເຕັມໄປດ້ວຍອາລົມອັນສຸດເຊິ່ງກະຕຸ້ນໃຈຄົນຄືກັນ.
ທ່ານຜູ້ຟັງທີ່ຮັກແພງ, ມ້ວນທ້າຍລາຍການມື້ນີ້ ເຊີນຟັງເພງ"ຊື້ເຈ້ຍມໍ້ຢື້" ແປວ່າ, ວັນໂລກາວິນາດ ທີ່ຂັບຮ້ອງໂດຍທ່ານໂຈເຈະລຸນ. ບໍ່ຮູ້ວ່າ, ຖ້າບໍ່ມີດົນຕີ, ບໍ່ມີທ່ານເປັນເພື່ອນ, ຄວາມຮູ້ສຶກຈະເປັນແນວໃດ, ມັນບໍ່ແມ່ນຄືກັບຮອດວັນໂລກາວິນາດແລ້ວຫວາ. ບໍ່ວ່າພວກເຮົາຈະປະສົບກັບຄວາມລົ້ມແຫຼວແນວໃດຫຼືເລື່ອງບໍ່ດີໃຈປານໃດ, ກໍຈົ່ງຢ່າໂສກເສົ້າໝົດຫວັງຄືຈັ່ງວ່າ, ຈະຮອດວັນໂລກາວິນາດແລ້ວ. ເພາະວ່າ, ຈັ່ງໃດກໍຕາມ, ມື້ອື່ນກໍແມ່ນມື້ໃໝ່ອີກ. ໃນອາທິດໃໝ່ຕໍ່ໄປ, ຂໍໃຫ້ທ່ານຈົ່ງມີຈິດໃຈມ່ວນຊື່ນ.
ຂ້າພະເຈົ້າ ດາລາວັນຂໍຕາງໜ້ານາງກຸຫຼາບ ຜູ່ຮຽບຮຽງຂອບໃຈທ່ານທີ່ຮັບຟັງ, ພົບກັນໃໝ່ໃນລາຍການໜ້າ ສະບາຍດີ.
1 2
|
|
|
