|
|
 |
| (GMT+08:00)
2006-06-13 18:18:19
|
 |
|
ທ່ານຮວງຈັນກັບດົນຕີປະກອບຮູບເງົາແລະເລື່ອງໂທລະພາບຂອງທ່ານ
cri
Author: mo
|
ສະບາຍດີທ່ານຜູ້ຟັງທີ່ເຄົາລົບ, ຍິນດີຕ້ອນຮັບທ່ານຮັບຟັງລາຍການຢ່ອນອາລົມໃນວັນເສົາ. ຂ້າພະເຈົ້າແມ່ນແສງແກ້ວ. ໃນລາຍການມື້ນີ້, ຂ້າພະເຈົ້າຂໍແນະນຳທ່ານຮວງຈັນ ພ້ອມກັບເພງທີ່ປະກອບໃນຮູບເງົາແລະເລື່ອງໂທລະພາບຂອງທ່ານ.
ທ່ານຮວງຈັນແມ່ນນັກແຕ່ງເພງທີ່ມີຊື່ສຽງຂອງຮົງກົງ, ເກີດຢູ່ເມືອງກວາງໂຈວ ພາກໃຕ້ຂອງຈີນເມື່ອປີ 1941, ປີ 1949 ໄດ້ຍ້າຍໄປຢູ່ຮົງກົງກັບພໍ່ແມ່, ປີ 1963 ຮຽນຈົບຈາກຂະແໜງວິຊາພາສາຈີນຂອງມະຫາວິທະຍາໄລຮົງກົງ, ເຄີຍເຮັດວຽກໂຄສະນາສິນຄ້າ ຖ່າຍຮູບເງົາແລະແຕ່ງເພງ, ເຄີຍເປັນພິທີກອນຂອງສະຖານີໂທລະພາບແລະວິທະຍຸກະຈາຍສຽງຮົງກົງ, ທ່ານຮວງຈັນພ້ອມກັບທ່ານຈິ່ນຢົ່ງ ທ່ານນີຄ່ວງແລະທ່ານຊ້າຍລານມີຊື່ສຽງຮຽງນາມເປັນ"ນັກວັນນະຄະດີຜູ້ດີເດັ່ນທັງ 4 ຂອງຮົງກົງ", ແລະໄດ້ຊື່ເປັນ"ຜູ້ຊ່າງປາກເວົ້າທັງ 3 ຂອງຮົງກົງ"ພ້ອມກັບທ່ານນີຄ່ວງແລະນາງຊ້າຍລານ. ວັນທີ 24 ພະຈິກປີ 2004, ທ່ານຮວງຈັນເຖິງແກ່ກຳຍ້ອນເປັນພະຍາດປອດອັກເສບ. ໃນຕະຫຼອດຊີວິດຂອງທ່ານ, ທ່ານໄດ້ແຕ່ງເພງ 2000 ກວ່າເພງ, ໂດຍສະເພາະແມ່ນເພງປະກອບຮູບເງົາແລະໂທລະພາບ, ມາຮອດປັດຈຸບັນ, ມີຫຼາຍໆເພງຍັງມີຄົນນິຍົມກັນຢູ່, ສະນັ້ນ, ທ່ານຮວງຈັນຈຶ່ງໄດ້ນາມມະຍົດເປັນ"ຄົນເກັ່ງອະມະຕະ".
ທີ່ທ່ານພວມຟັງຢູ່ນີ້ແມ່ນເພງ"shang hai tan" ຫາດຊຽງໄຮ້ ແຕ່ງເນື້ອຮ້ອງໂດຍທ່ານຮວງຈັນ ແຕ່ງທຳນອງໂດຍທ່ານກູ້ເຈ່ຍຮຸ່ຍ, ນາງເຢ້ລີ້ອີ ເປັນຜູ້ຂັບຮ້ອງ. ນີ້ແມ່ນເພງເອກໃນໂທລະພາບເລື່ອງ"shang hai tan" ຫາດຊຽນໄຮ້. ເນື້ອເພງມີຄວາມໝາຍວ່າ:"ກະແສນ້ຳໄຫຼຜາດໆ, ບໍ່ເຫືອດບໍ່ເຊົາ. ຊຸລ້າງທຸກສິ່ງໃນເມືອງມະນຸດຈົດສຸດສ້ຽງ, ກະແສນ້ຳໄຫຼຜາດໆ ແມ່ນເລື່ອງໂຊກ? ຫຼືເລື່ອງໂສກ? ໃນກະແສນ້ຳ ຈຳແນກບໍ່ໄດ້ວ່າ ອັນໃດແມ່ນເລື່ອງດີ? ອັນໃດແມ່ນເລື່ອງຮ້າຍ? ອັນໃດສຳເລັດຜົນ? ອັນໃດລົ້ມແຫຼວ?" ເພງນີ້ເຕັມໄປດ້ວຍຄວາມອົງອາດສະຫງ່າແລະຄວາມລະມ່ອມລະໄມຂອງຂອງວິລະຊົນ, ເປັນເພງທີ່ນິຍົມກັນທີ່ສຸດໃນຊຸມປີ 80 ສະຕະວັດທີ່ແລ້ວແລະເຜີຍແຜ່ກັນມາຈົນມາຮອດປັດຈຸບັນ, ໄດ້ເກີດຜົນສະທ້ອນຕໍ່ຄົນຮຸ້ນໜຶ່ງຂອງຈີນ.
ແຕ່ປີ 1965 ເປັນຕົ້ນມາ, ທ່ານຮວງຈັນໄດ້ເລີ່ມເຂົ້າຮ່ວມການແຕ່ງຄຳໂຄສະນາສິນຄ້າແລະແຕ່ງເນື້ອເພງ, ໄດ້ຮັບນາມມະຍົດເປັນ"ນາຍຊ່າງແຕ່ງເນື້ອເພງສະໄໝນິຍົມ", ແມ່ນຕົວແທນຂອງວັດທະນະທຳສະໄໝນິຍົມຮົງກົງ, ທ່ານແມ່ນນັກດົນຕີທີ່ຮ່ວມມືກັບທ່ານສີເຄີ້ ຜູ້ກຳກັບການສະແດງຮູບເງົາຫຼາຍກວ່າໝູ່. ເພງຂອງທ່ານຮວງຈັນສະຫງ່າອົງອາດທັງນິ້ມນວນອອນຊອນ, ສອດຄ່ອງກັບທັດສະນະຄະຕິການແຕ່ງເພງຂອງທ່ານສີເຄີ້ທີ່ສຸດ, ການຮ່ວມມືຂອງພວກເພີ່ນທັງສອງໄດ້ຈົ່ງບົດປະພັນສິລະປະວັນນະຄະດີອັນດີເລີດໄວ້ໃຫ້ຄົນທັງຫຼາຍ, ເພງຮູບເງົາທີ່ມ່ວນໆຄືເພງqian nv you hun ວິນຍານສາວງາມ, ເພງliu guang fei wu ກະແສເວລາໄຫຼຜ່ານປານສາດແສງ, ແລະເພງnan er dang zi qiang ລູກຜູ້ຊາຍຄວນເຂັ້ມແຂງ ເປັນຕົ້ນ, ລ້ວນແຕ່ແມ່ນທ່ານຮວງຈັນເປັນຜູ້ແຕ່ງ.
1 2
|
|
|
