|
ສະບາຍດີ, ທ່ານຜູ່ຟັງທີ່ເຄົາລົບ. ຂ້າພະເຈົ້າແມ່ນດາລາວັນ, ຊົມເຊີຍທ່ານຮັບຟັງລາຍການນັດພົບໃນວັນອາທິດ. ຄຽງຄູ່ກັບວັນອາທິດຄັ້ງທີສາມເດືອນມິຖຸນາວຽນມາເຖິງ, ກໍຮອດວັນພໍ່ອີກແລ້ວ. ໃນລາຍການພາກນີ້, ພວກເຮົາໄດ້ຈັດເພງປະມວນໜຶ່ງຂໍມອບໃຫ້ຜູ່ເປັນພໍ່ທຸກໆຄົນໃນໂລກ,ອວຍພອນໃຫ້ພວກເພິ່ນຈົ່ງສະບາຍດີວັນພໍ່!
ທ່ານຜູ່ຟັງທີ່ຮັກແພງ, ເພງ"ຈີຊຽງຊ່ານປາວ" ແປວ່າ, "ຂອງປະເສີດສິລິມຸງຄຸນສາມຢ່າງ" ແມ່ນເພງທີ່ທ່ານປູ້ເຢີນປາຢາເອີ ເພື່ອນຮ່ວມງານພະແນກພາສາມົງໂກນຂອງວິທະຍຸ CRI ພວກເຮົາແຕ່ງໃຫ້ລູກສາວຮ້ອງ. ເພງນີ້ມີເນື້ອຮ້ອງງ່າຍໆແລະໜ້າຮັກ, ຜູ່ໜຶ່ງຖາມຜູ່ໜຶ່ງຕອບ, ສາມຄົນໃນຄອບຄົວຂຶ້ນເວທີຮ້ອງເພງນີ້ນຳກັນ, ເຕັມໄປດ້ວຍຄວາມກົມກຽວແລະສຸກສັນ. ເພງນີ້ຫຼັງຈາກໄດ້ນຳອອກສະແດງໃນງານລາຕີອັນໃຫຍ່ໂຕໃນບຸນກຸດຈີນປີ 2006 ແລ້ວກໍໄດ້ຮັບຄວາມນິຍົມຊົມເຊີຍທີ່ສຸດໃນທົ່ວປະເທດ. ເພງນີ້ມີເນື້ອຮ້ອງວ່າ,
"ພໍ່ເອີ້ຍ. ເຈົ້າ. ເມື່ອຕາເວັນໂພ່ຂຶ້ນແລ້ວ, ດວງຈັນກໍເມືອບ້ານບໍ່?ແມ່ນແລ້ວ. ຊັ້ນໝູ່ດາວອອກມາແລ້ວ, ຕາເວັນໄປໃສ? ຢູ່ເທິງຟ້າ! ເປັນຫຍັງລູກຊອກຫາບໍ່ເຫັນ? ມັນເມືອບ້ານແລ້ວ. ດວງຕາເວັນ ດວງດາວແລະດວງຈັນກໍແມ່ນຄອບຄົວທີ່ສິລິມຸງຄຸນ.
ແມ່ເອີ້ຍ. ເຈົ້າ. ໃບໄມ້ຂຽວແລ້ວ, ຍາມໃດມັນຈຶ່ງອອກດອກ? ຕ້ອງຖ້າຮອດລະດູຮ້ອນພຸ້ນລູກ. ເມື່ອດອກແດງແລ້ວໄປເດັດເອົາໝາກມັນໄດ້ບໍ່? ຕ້ອງຖ້າຮອດລະດູໃບໄມ້ຫຼົ່ນພຸ້ນລູກ. ເອົາໝາກມັນມາປູກໃສ່ດິນມັນອອກໜໍ່ບໍ່? ເຈົ້າ, ມັນຈະເຕີບໃຫຍ່ຂຶ້ນ. ດອກ ໃບແລະໝາກກໍແມ່ນຄອບຄົວທີ່ສິລິມຸງຄຸນ.
ລູກເອີ້ຍ. ໂດຍ. ພໍ່ກໍຄືກັບດວງຕາເວັນສ່ອງແສງໃຫ້ແມ່. ຊັ້ນແມ່ເດ້? ແມ່ກໍຄືກັບໃບຂຽວເສີມດອກໄມ້ແດງ. ຊັ້ນລູກເດ້? ລູກຄືກັບແນວປູກພວມອອກໜໍ່ຈໍ່ໃບ. ພໍ່ ແມ່ແລະລູກກໍແມ່ນຄອບຄົວທີ່ສິລິມຸງຄຸນ……"
ເພງ "ຂອງປະເສີດສິລິມຸງຄຸນສາມຢ່າງ" ທີ່ທ່ານຟັງມານັ້ນອາດຈະແມ່ນຂອງຂວັນທີ່ປະເສີດທີ່ສຸດທີ່ພໍ່ມອບໃຫ້ລູກສາວ. ໃນຊີວິດຕົວຈິງ, ຜູ່ເປັນພໍ່ສ່ວນຫຼາຍເປັນຄົນບໍ່ມັກປາກມັກເວົ້າ, ແຕ່ເຖິງເພິ່ນບໍ່ປາກບໍ່ເວົ້າປານໃດ, ຜູ່ເປັນລູກກໍສາມາດຮູ້ສຶກເຖິງຄວາມຮັກຂອງພໍ່. ຕໍ່ໄປ, ເຊີນຟັງເພງ "ຟູ້ຊິ້ນ, ໜີຊຶ້ອານເຈິ້ນເຕິ" ແປວ່າ"ພໍ່ທີ່ຢູ່ມິດໆ" ເຊິ່ງຂັບຮ້ອງໂດຍນາງຈ່ຽງເໝີຍຊີ.
"ໂລກພາຍນອກພວມສົນລະວົນູ, ຄວາມຝັນຍັງຝັນຕໍ່ໄປ. ລູກຄຶດຮອດຄຶດເຖິງູ, ພໍ່ຍັງເຝົ້າຮັກສາຢູ່. ເພງຍັງຮ້ອງຢູ່ຕໍ່ໄປ, ແຕ່ໂລກໄດ້ປ່ຽນແລ້ວ. ລູກຍ່າງໄປບ່ອນໄກແລ້ວ, ແຕ່ພໍ່ຍັງມິດງຽບຢູ່. ຈາກນັ້ນ, ລູກຈຶ່ງເຂົ້າໃຈວ່າ, ຄວາມມິດງຽບກໍແມ່ນກຳລັງ, ເພາະວ່າພໍ່ແມ່ນຜູ່ໜູນຫຼັງຂອງລູກຕະຫຼອດມາ. ເຖິງຈະໄດ້ຮັບຄວາມສົມໃຈຂອທົ່ວໂລກ, ໃນໃຈຂອງລູກ, ພໍ່ຍັງຄົງແມ່ນຜູ່ທີ່ ລູກເພິ່ງອີງ…… "
1 2
|
