|
|
 |
| (GMT+08:00)
2006-06-15 11:21:04
|
 |
|
ເອກະລັກຕ່າງໝູ່ຂອງຖະໜົນເສີງຮວງມ້ຽວເກົ່າຢູ່ເມືອງຊຽງໄຮ້
cri
Author: da
|
ຢູ່ໃຈກາງເມືອງຊຽງໄຮ້,ມີບ່ອນພິເສດບ່ອນໜຶ່ງ ມີສວນອຸທິຍານທີ່ມິດງຽບໜ້າໄປທ່ຽວ,ທັງມີຖະໜົນການຄ້າທີ່ຈະເລີນຟົດຟື້ນ,ມີຮ້ານກິນດື່ມ ຮ້ານນ້ຳຊາແລະຮ້ານຄ້າເກົ່າທີ່ມີປະຫວັດຮ້ອຍປີຢ່າງຫຼວງຫຼາຍ,ນີ້ກໍແມ່ນ"ຖະໜົນເສີງຮວງມ້ຽວເກົ່າ",ມັນໄດ້ກາຍເປັນນາມບັດຂອງເມືອງຊຽງໄຮ້ແລ້ວ.ມື້ນີ້,ພວກເຮົາຈະພາທ່ານໄປເລາະທ່ຽວ"ເມືອງເສີງຮວງມ້ຽວເກົ່າ"ຢູ່ຊຽງໄຮ້.
"ເສີງຮວງມ້ຽວ",ໃນເມື່ອກ່ອນແມ່ນສານເຈົ້າທີ່ສາສະໜາເຕົ໋າຂອງຈີນບູຊາເທວະດາປ້ອງກັນຕົວເມືອງ.ແຕ່"ເສີງຮວງມ້ຽວເກົ່າ"ທີ່ພວມເຮົາກ່າວນີ້ມີຄວາມໝາຍຕ່າງຫາກ.ຢູ່ແຫ່ງນີ້ມີສານເຈົ້າເສີງຮວງມ້ຽວທີ່ສ້າງຕັ້ງຂຶ້ນເມື່ອຕົ້ນສະຕະວັດທີ 15 ນັ້ນແທ້,ແຕ່ໃນຫຼາຍຮ້ອຍປີທີ່ຜ່ານມາ,ສານເຈົ້າເສີງຮວງມ້ຽວຫຼັງນີ້ແລະເຂດອ້ອມແອ້ມໄດ້ເຕົ້າໂຮມຮ້ານຄ້າຢ່າງຫຼວງຫຼາຍ,ແມ່ນເຂດການຄ້າທີ່ຄຶກຄື້ນທີ່ສຸດຕະຫຼອດມາ.ປະຈຸບັນ,ເມື່ອຊາວຊຽງໄຮ້ເວົ້າເຖິງ ເສີງຮວງມ້ຽວ,ແມ່ນໝາຍເຖິງເຂດຄຸ້ມເກົ່າທີ່ຢູ່ແຖບເສີງຮວງມ້ຽວ,ຊາວຊຽງໄຮ້ເອີ້ນເປັນ"ເສີງຮວງມ້ຽວເກົ່າ"ຢ່າງສະໜິດສະໜົມ.
ຢູ່"ເສີງຮວງມ້ຽວເກົ່າ",ສິ່ງທີ່ພາດບໍ່ໄດ້ນັ້ນແມ່ນເຂົ້າໜົມທີ່ມີຈຸດພິເສດຂອງຊຽງໄຮ້ຊະນິດຕ່າງໆ.ຢູ່ແຫ່ງນີ້ມີຖະໜົນຍາວຫຼາຍສິບແມັດເສັ້ນໜຶ່ງ,ມີຮ້ານຂາຍຂອງກິນຫຼາຍຫຼັງ,ໄດ້ເຕົ້າໂຮມເຂົ້າໜົມທີ່ມິຈຸດພິເສດຂອງເມືອງຊຽງໄຮ້ເກືອບໝົດທຸກຊະນິດ,ແມ່ນ"ອະນາຈັກເຂົ້າໜົມ"ທີ່ສົມຊື່.ໃນນັ້ນ ຮ້ານທີ່ມີຊື່ສຽງທີ່ສຸດແມ່ນ"ຮ້ານມານໂຖນານຊຽງ",ຢູ່ໜ້າຮ້ານມັກມີຄົນລຽງແຖວຍາວຢູ່ເລື້ອຍໆ.ໃນເວລາຢ້ຽມຢາມຊຽງໄຮ້,ພະລາຊີນີ ເອລີຊາເບດລາຊະການທີ 2 ຂອງອັງກິດກໍເຄີຍມາຮ້ານຂາຍຂອງກິນແຫ່ງນີ້.
 "ມານໂຖນ້ອຍ"ຂອງຮ້ານນີ້ ທີ່ຈິງແລ້ວແມ່ນກະລາເປົ໋ານ້ອຍຊະນິດໜຶ່ງ,ແຕ່ຊາວຊຽງໄຮ້ມັກເອີ້ນກະລາເປົ໋າເປັນມານໂທວ.ຈຳນວນຄົນໄປກິນກະລາເປົ໋າໃນຮ້ານນີ້ຫຼາຍໂພດ,ຢາກຫາໄດ້ບ່ອນນັ່ງໃນເວລາສັ້ນບໍ່ແມ່ນເລື່ອງງ່າຍ,ສະນັ້ນ ຄົນສ່ວນຫຼາຍມັກໄປຈັດລຽງແຖວຊື້ກະລາເປົ໋າຢູ່ໜ້າຮ້ານ,ແລ້ວໃສ່ກັບເຈ້ຍຖືໄວ້ກິນ.ທ່ານສະຕີຟ ໂອມາຣາ ຄົນການາດາແມ່ນຂາປະຈຳຂອງຮ້ານນີ້ແລ້ວ,ທ່ານເວົ້າວ່າ,ມີເທື່ອໜຶ່ງ ເພິ່ນໄດ້ລຽງແຖວຕັ້ງໜຶ່ງຊົ່ວໂມງຈິ່ງຊື້ກະລາເປົ໋າໄດ້.ທ່ານເວົ້າວ່າ:
"ຂ້າພະເຈົ້າຍິນດີລໍຖ້າດົນປານນີ້ ແມ່ນຍ້ອນກະລາເປົ໋າຂອງຮ້ານນີ້,ມີຊື່ສຽງຫຼາຍຢູ່ຊຽງໄຮ້,ເປັນໜ້າລໍຖ້າ,ແມ່ນກະລາເປົ໋າທີ່ແຊບທີ່ສຸດ.ຂ້າພະເຈົ້າເຄີຍກິນຫຼາຍເທື່ອແລ້ວ,ຂ້າພະເຈົ້າຮູ້ສຶກວ່າ ແຊບຫຼາຍ."
ກະລາເປົ໋ານ້ອຍຂອງຮ້ານນານຊຽງມີປະຫວັດ100ກວ່າປີແລ້ວ,ມີຊື່ລືນາມຍ້ອນເປືອກບາງ ໄສ້ຫຼາຍແລະລົດຊາດແຊບນົວ.ກະລາເປົ໋າຊະນິດນີ້ມີຮູບນ້ອຍໆຄືກັບທາດ.ເອົາກະລາເປົ໋າກ້ອນໜຶ່ງໃສ່ໃນຈານ,ແທງໃຫ້ແກງໄຫຼອອກມາ,ຫອມຫຼາຍຈົນນ້ຳລາຍໄຫຼ.
ໃນຮ້ານກະລາເປົ໋ານານຊຽງ ມີກະລາເປົ໋າຊະນິດໜຶ່ງເອີ້ນວ່າ"ກະລາເປົ໋າເຊ້ເຝີນ"ທີ່ຄົນທັງຫຼາຍນິຍົມທີ່ສຸດ.ອັນທີ່ວ່າ"ເຊ້ເຝີນ"ໝາຍເຖິງຊີ້ນປູນ້ຳຈືດ.ກະລາເປົ໋າທີ່ໃສ່ຊີ້ນປູຢູ່ໃນໄສ້ນັ້ນ,ມີລົດຊາດແຊບນົວທີ່ສຸດ,ໃນເວລາກິນຍັງຕ້ອງມີຂີງຊອຍບາງໆແລະນ້ຳສົ້ມຫອມກິນພ້ອມກັນ,ມັນຄືກັບຂອງແກ້ມທີ່ຄົນຈີນມັກແກ້ມໃນເວລາກິນປູ.ຮ້ານນີ້ຍັງຂາຍ"ກະລາເປົ໋າໃສ່ແກງ"ທີ່ໃຊ້ໄຂ່ປູເປັນໄສ້,ເພື່ອໃຫ້ແຂກສະເຫວີຍລົດຊາດແຊບນົວທີ່ບອກບໍ່ຖືກຂອງກະລາເປົ໋າຊະນິດນີ້,ທາງຮ້ານຍັງໄດ້ໃສ່ຫຼອກດູດກະລາເປົ໋າສຳລັບໃຫ້ແຂກ ດູດກິນແກງໃນກະລາເປົ໋າກ່ອນ.
1 2
|
|
|
