|
ເຖິງວ່າຢູ່ຈີນມີວິສາຫະກິດຜະລິດຢາປະມານ6ພັນແຫ່ງ,ຫຼາຍທີໜຶ່ງໃນໂລກກໍຕາມ,ແຕ່ຄວາມສາມາດຄົ້ນຄວ້າຜະລິດຢາໃໝ່ພັດບໍ່ແຂງແຮງປານໃດ.ວິສາຫະກິດຈີນສ່ວນຫຼາຍຖືການຜະລິດຕາມຢາຂອງຕ່າງປະເທດທີ່ກາຍກຳນົດສິດທິບັດແລ້ວເປັນຕົ້ນຕໍ,ແຕ່ໜ້ອຍທີ່ສຸດທີ່ຈະຄົ້ນຄວ້າຜະລິດຢາໃໝ່ທີ່ມີສິດຊັບສິນທາງປັນຍາຂອງຕົນເອງ.ເພື່ອຍົກລະດັບຄົ້ນຄວ້າພັດທະນາຂອງວິສາຫະກິດໃຫ້ສູງຂຶ້ນ,ເຮັດໃຫ້ຈີນກ້າວເຂົ້າສູ່ຖັນແຖວກ້າວໜ້າຂອງຂະແໜງການຜະລິດຂອງໂລກໂດຍໄວ,ໃນຫຼາຍປີມານີ້,ຈີນໄດ້ປະຕິບັດມາດຕະການອຸປະຖຳຄ້ຳຊູແລະຊຸກຍູ້ສົ່ງເສີມຢ່າງເປັນລະບົບ,ເພື່ອສະໜັບສະໜູນວິສາຫະກິດຜະລິດຢາຂອງຈີນຄົ້ນຄວ້າຜະລິດພັດທະນາຢາໃໝ່ຢ່າງເປັນເຈົ້າຕົນເອງ.
ສະຖິຕິສະແດງໃຫ້ເຫັນວ່າ,ແຕ່ລະປີ,ກົມຕິດຕາມຄຸ້ມຄອງອາຫານແລະຢຸກຢາແຫ່ງຊາດຈີນພຽງແຕ່ໄດ້ຮັບການແຈ້ງຢາໃໝ່ຫຼາຍສິບຊະນິດທໍ່ນັ້ນ,ທັງນີ້ແມ່ນບໍ່ສົມສ່ວນກັບຈຳນວນວິສາຫະກິດຜະລິດຢາຂອງຈີນ.ທ່ານຢາງເຈີ ຫົວໜ້າພະແນກການປິ່ນປົວແລະຢຸກຢາຂອງ ກົມພັດທະນາຊົນນະບົດແລະສັງຄົມຂອງກະຊວງວິທະຍາສາດເຕັກໂນໂລຊີຂອງຈີນກ່າວວ່າ,ດຽວນີ້,ຜະລິດຕະພັນຢຸກຢາຂອງຈີນຕົ້ນຕໍແມ່ນຜະລິດຕາມຢາຂອງຕ່າງປະເທດທີ່ໄດ້ກາຍກຳນົດສິດທິບັດແລ້ວ,ທ່ານເວົ້າວ່າ:"ອັນທີ່ວ່າຜະລິດຕາມກໍໝາຍຄວາມວ່າ,ສິດທິບັດຂອງຢານີ້ໄດ້ກາຍກຳນົດແລ້ວ,ອາດເວົ້າໄດ້ວ່າ,ພວກເຮົາຈະຜະລິດຕະຫຼອດໄປກໍໄດ້,ແຕ່ຢານີ້ຕ້ອງແມ່ນຢາເກົ່າ,ອາດຈະໄດ້ຜົນບໍ່ດີປານໃດ.ເພາະວ່າ,ເວົ້າທົ່ວໄປແລ້ວ,ຫຼັງຈາກຜະລິດຕະພັນຢາຊະນິດໜຶ່ງສົ່ງປ້ອນຕະຫຼາດໄດ້10ປີແລ້ວຈຶ່ງອາດຈະເອົາໄປຜະລິດຕາມໄດ້."
ຍ້ອນຫຍັງວິສາຫະກິດຈີນຈຶ່ງຄົ້ນຄວ້າຜະລິດຢາໃໝ່ຍາກປານນີ້?ຕາມແນະນຳວ່າ,ບໍ່ວ່າຄົ້ນຄວ້າຜະລິດຢາໃໝ່ຊະນິດໃດລ້ວນແຕ່ຍາກທີ່ສຸດ,ບໍ່ພຽງແຕ່ຕ້ອງການລົງທຶນຈຳນວນຫຼວງຫຼາຍທໍ່ນັ້ນ,ຍັງຕ້ອງຜ່ານເວລາດົນນານອີກດ້ວຍ.ທຳມະດາແລ້ວ,ການຄົ້ນຄວ້າຜະລິດຢາໃໝ່ຊະນິດໜຶ່ງຕ້ອງກິນເວລາ8ປີຫາ10ປີ,ສະເລ່ຍແລ້ວຕ້ອງລົງທຶນຫຼາຍຮ້ອຍລ້ານໂດລາສະຫະລັດ,ແຕ່ໃນທີ່ສຸດ,ຍັງບໍ່ແນ່ວ່າຈະໄດ້ຮັບປະສິດທິຜົນເສດຖະກິດດີຊ່ຳໃດ.ຕາມສະຖິຕິ,ປະຈຸບັນນີ້,ຢູ່ໃນໂລກ,ສະເລ່ຍແລ້ວ,ໃນຢຸກຢາແຕ່ລະ10ຊະນິດທີ່ສົ່ງເຂົ້າປະເມີນຜົນການປິ່ນປົວພະຍາດນັ້ນ,ໃນທີ່ສຸດອາດຈະມີແຕ່ຊະນິດດຽວຈະເຂົ້າສູ່ຕະຫຼາດໄດ້.
ວິສາຫະກິດຜະລິດຢາຂອງຈີນໄດ້ຂະຫຍາສຍຕົວພຽງແຕ່ບໍ່ທໍ່ໃດສິບປີທໍ່ນັ້ນ,ເມື່ອທຽບໃສ່ບໍລິສັດໃຫຍ່ຂອງຕ່າງປະເທດທີ່ມີປະຫວັດຮ້ອຍກວ່າປີແລ້ວ,ວິສາຫະກິດຂອງຈີນຍັງອ່ອນຫຼາຍ,ບໍ່ວ່າໃນດ້ານຂະໜາດ ເງິນທຶນແລະເຕັກນິກເປັນຕົ້ນ.ການລົງທຶນກ້ອນໃຫຍ່ ຄວາມສ່ຽງສູງແລະຮອບໝູນວຽນຂອງການຄົ້ນຄວ້າຜະລິດທີ່ຂ້ອນຂ້າງຍາວເຮັດໃຫ້ຫຼາຍ ວິສາຫະກິດຜະລິດຢາຂອງຈີນບໍ່ກ້າໄປເຮັດ.
ໂດຍແນໃສ່ສະພາບດັ່ງກ່າວ,ເພື່ອຊຸກຍູ້ການຂະຫຍາຍຕົວຂອງວິສາຫະກິດຜະລິດຢາຂອງຈີນ,ຍົກລະດັບຂອງຂະແໜງການຜະລິດຢາຂອງຈີນໃຫ້ສູງຂຶ້ນ,ໃນບໍ່ທໍ່ໃດປີມານີ້,ລັດຖະບານຈີນໄດ້ໃຊ້ມາດຕະການອຸປະຖຳຄ້ຳຊູແລະຊຸກຍູ້ສົ່ງເສີມຢ່າງເປັນລະບົບ.
ກ່ອນອື່ນ,ໄດ້ສັບຊ້ອນທິດຊີ້ນຳຂອງນະໂຍບາຍ,ຕົວຢ່າງຄື ໄດ້ດັດແກ້ແລະປັບປຸງກົດໝາຍກົດບັນຍັດຕ່າງໆ ເຊັ່ນ ກົດໝາຍວ່າດ້ວຍການຄຸ້ມຄອງຢຸກຢາແລະກົດໝາຍວ່າດ້ວຍສິດທິບັດເປັນຕົ້ນ,ໄດ້ມີການຈຳກັດບາງຢ່າງຕໍ່ຮຽນແບບຜະລິດຢາຕ່າງປະເທດ,ຊັກນຳວິສາຫະກິດຜະລິດຢາເດີນຕາມເສັ້ນທາງຄົ້ນຄວ້າຜະລິດຢາໃໝ່.
ຖັດມາ,ລັດຖະບານຈີນຍັງໄດ້ເພີ່ມການລົງທຶນເຂົ້າໃນການຄົ້ນຄວ້າຜະລິດຢາໃໝ່.ຫຼາຍບໍລິສັດໃຫຍ່ທີ່ຜະລິດຢາໃນໂລກລ້ວນແຕ່ມີສູນຄົ້ນຄວ້າພັດທະນາຂອງຕົນ,ແຕ່ສະພາບຂອງຈີນມີອັນຕ່າງກັນ.ຍ້ອນຄວາມຕ້ອງການຂອງໂຄງປະກອບເສດຖະກິດແຜນການໃນເມື່ອກ່ອນແລະການຈຳກັດໃນດ້ານຂະໜາດຂອງວິສາຫະກິດ,ວຽກງານຄົ້ນຄວ້າຢຸກຢາສ່ວນຫຼາຍແມ່ນສະຖາບັນຄົ້ນຄວ້າວິທະຍາສາດຂະໜາດໃຫຍ່ລະດັບຊາດເປັນຜູ້ຫາບແບກ.ລັດຖະບານຈີນຜ່ານຈາກການເພີ່ມທຶນເຂົ້າໃນການຄົ້ນຄວ້າຜະລິດຢາໃໝ່ໃຫ້ສະຖາບັນຄົ້ນຄວ້າ,ແລ້ວຊັກນຳໃຫ້ວິສາຫະກິດລົງທຶນຄົ້ນຄວ້າຜະລິດຢາໃໝ່.ທ່ານຊຸ່ນຮົງ ຮອງຫົວໜ້າກົມພັດທະນາຊົນນະບົດແລະສັງຄົມຂອງກະຊວງວິທະຍາສາດເຕັກໂນໂລຊີຂອງຈີນເວົ້າວ່າ:"ໃນຫ້າປີທີ່ຜ່ານມາ,ກະຊວງວິທະຍາສາດເຕັກໂນໂລຊີຂອງຈີນໄດ້ລົງທຶນພຽງແຕ່900ລ້ານຢວນທໍ່ນັ້ນ,ເພື່ອຄົ້ນຄວ້າພັດທະນາຢາໃໝ່,ແຕ່ຈາກການລົງທຶນດັ່ງກ່າວສາມາດລະດົມຂົນຂວາຍໃຫ້ວິສາຫະກິດຈຳນວນໜຶ່ງລົງທຶນ.ອີກບັນຫາໜຶ່ງກໍແມ່ນ,ການລົງທຶນໃນດ້ານນີ້ຂອງພວກເຮົາ,ບໍ່ລວມທັງຄ່າແຮງງານ,ໃນການລົງທຶນຈຳນວນໜຶ່ງຂອງຕ່າງປະເທດມີປະມານ40%ແມ່ນຄ່າໃຊ້ຈ່າຍດ້ານແຮງງານ,ຄວນເວົ້າວ່າ,ການລົງທຶນຂອງພວກເຮົາແມ່ນໃຊ້ເຂົ້າໃນການຄົ້ນຄວ້າພັດທະນາລ້ວນໆ."
1 2
|
