|
ປັດຈຸບັນ,ການແຂ່ງຂັນບານເຕະຊີງຂັນໂລກພວມຈັດຂຶ້ນຢູ່ເຢຍລະມັນຢ່າງອຶດກະທຶກຟົດຟື້ນ,ບໍ່ຮູ້ວ່າທ່ານໄດ້ເບິ່ງບໍ່?ຫວ່າງມໍ່ໆນີ້,ທ່ານຄຳແພງທີ່ແຂວງຫຼວງພະບາງໄດ້ຝາກຈົດໝາຍມາຍັງພວກເຮົາ,ຕັ້ງຄຳຖາມກ່ຽວກັບໜ່ວຍໂລກ, ທ່ານກ່າວວ່າທ່ານຢາກຊອກຮູ້ຄວາມເປັນມາຂອງໜ່ວຍໂລກ.ໃນລາຍການມື້ນີ້,ພວກເຮົາຈຶ່ງຂໍແນະນຳສະພາບກ່ຽວກັບໜ່ວຍໂລກຈໍ່ຕົວຂຶ້ນແນວໃດສູ່ທ່ານຟັງ.
ກ່ຽວກັບບັນຫາຄວາມເປັນມາຂອງໜ່ວຍໂລກ,ໄດ້ຄົ້ນຄວ້າຫາລືມາເປັນປະຫວັດສາດຍາວນານແລ້ວ.ໃນສະໄໝບູຮານ,ຄົນທັງຫຼາຍກໍ່ເຄີຍຄົ້ນຄວ້າຫາລືບັນຫາຈໍ່ຕົວຂຶ້ນຂອງທຸກສິ່ງທຸກຢ່າງເຊິ່ງລວມທັງໜ່ວຍໂລກ,ໃນໄລຍະນີ້,ໄດ້ຄ່ອຍໆເກີດມີ"ສົມມຸດຕິຖານສ້າງໂລກ"ກ່ຽວກັບຄວາມເປັນມາຂອງທຸກສິ່ງທຸກຢ່າງ.ໃນນັ້ນ,ທີ່ແຜ່ຜາຍຢ່າງກວ້າງຂວາງກວ່າໝູ່ແມ່ນສົມມຸດຕິຖານສ້າງໂລກໃນຄຳພີໄບເບີນ.ໃນປະຫວັດສາດຂອງມຸນມະນຸດ,ສົມມຸດຕິຖານດັ່ງກ່າວເຄີຍຄອງຖານະປົກຄອງເປັນເວລາຍາວນານສົມຄວນ.
ປີ1543,ທ່ານໂຄເພີນີເຄີສ໌ ນັກດາລາສາດໂປໂລຍໄດ້ສະເໜີສົມມຸດຖານກ່ຽວກັບຕາເວັນເປັນໃຈກາງຫຼັງຈາກນັ້ນ,ການຫາລືວິວັດທະນາການຂອງດາວດາລາຈິ່ງໄດ້ບຸກທະລຸການຜູກຂາດຂອງເທວະວິທະຍາ,ເລິ່ມດຳເນີນການຄົ້ນຄວ້າວິທະຍາສາດຢ່າງແທ້ຈິງຕໍ່ບັນຫາຄວາມເປັນມາຂອງໜ່ວຍໂລກແລະລະບົບສຸລິຍະ.ປີ1644,ໃນປື້ມ"ຫຼັກມູນປັດຊະຍາ"ຂອງ,ທ່ານເດສ໌ຄາຕິສໄດ້ສະເໜີສົມມຸດຕິຖານກ່ຽວກັບຄວາມເປັນມາລະບົບສຸລິຍະເປັນເທື່ອທຳອິດ,ທ່ານເຫັນວ່າ,ຕາເວັນ,ດາວພະເຄາະແລະດາວບໍລິວານແມ່ນຈໍຕົວຂຶ້ນໃນເຝືອນນ້ອຍໃຫຍ່ຕ່າງກັນທີ່ຈໍ່ຕົວຂຶ້ນໃນການເຄື່ອນໄຫວແບບເຝືອນຂອງວັດຖຸຈັກກະວານ.ຫຼັງຈາກນັ້ນໜຶ່ງສະຕະວັດຄື,ໃນປີ1745,ໃນປື້ນ"ປະຫວັດສາດທຳມະຊາດສາມັນແລະວິສາມນ"ຂອງທ່ານບູຟົນໄດ້ສະເໜີສົມມຸດຕິຖານທີສອງ,ເຫັນວ່າ,ວັດຖຸມະຫາສານໜ່ວຍໜຶ່ງ,ສົມມຸດວ່າແມ່ນດາວຫາງ,ເຄີຍຕຳກັບຕາເວັນ,ເຮັດໃຫ້ວັດຖຸຂອງຕາເວັນແຕກອອກເປັນກ້ອນນ້ອຍໆແລ້ວບິນໄປສູ່ອະວະກາດ,ຈິ່ງຈໍ່ຕົວເປັນໜ່ວຍໂລກແລະດາວພະເຄາະ.ຫັຼງຈາກນັ້ນ,ຄົນທັງຫຼາຍກໍ່ໄດ້ສະເໜີສົມມຸດຕິຖານຫຼາຍຢ່າງ,ສົມມຸດຕິຖານເຫຼົ່ານີ້ສ່ວນຫຼາຍເຫັນດີເຫັນພ້ອມນຳ"ທິດສະດີກົກເຄົ້າດຽວ"ຂອງທ່ານເດສ໌ຄາຕິສ,ຄືຕາເວັນແລະດາວພະເຄາະແມ່ນເຕົ້າເຂົ້າກັນຈາກເມກອາຍດຶກດຳບັນອັນດຽວກັນ,ນອກນີ້ກໍ່ມີທິດສະດີກົກເຄົ້າສອງຢ່າງ,ຄືເຫັນວ່າວັດຖຸດາວພະເຄາະແມ່ນແຍກອອກຈາກຕາເວັນ.ປີ1755,ທ່ານແຄມທ໌ ຜູ້ລິເລິ່ມສ້າງປັດຊະຍາດັ້ງເດີມທີ່ມີຊື່ສສຽງຂອງເຢຍລະມັນໄດ້ສະເໜີ"ສົມມຸດຕິຖານເມກດາວ".ປີ1796,ໃນປື້ນ"ລະບົບຈັກກະວານ",ຂອງທ່ານລາບລາສ໌ ນັກຄະນິດສາດແລະນັກດາລາສາດທີ່ມີຊື່ສຽງຂອງຝຣັ່ງໄດ້ສະເໜີສົມມຸດຕິຖານເມກດາວກ່ຽວກັບຄວາມເປັນມາຂອງລະບົບສຸລິຍະອີກຊະນິດໜຶ່ງຢ່າງເປັນອິດສະລະ.ຍ້ອນວ່າສົມມຸດຕິຖານຂອງທ່ານລາບລາສ໌ແລະທ່ານແຄນທ໌ເປັນເອກະສັນກັນໃນດ້ານຄວາມເຫັນພື້ນຖານ,ສະນັ້ນ,ຄົນຮຸ່ນຫຼັງເອີ້ນສົມມຸດຕິຖານຂອງສອງທ່ານດັ່ງກ່າວເປັນ"ສົມມຸດຕິຖານແຄນທ໌-ລາບລາສ໌".ໃນທົ່ວສະຕະວັດທີ19,ໃນດາລາສາດ,ສົມມຸດຕິຖານດັ່ງກ່າວໄດ້ຄອງຖານະປົກຄອງໂດຍຕະຫຼອດ.
1 2
|
