|
|
 |
| (GMT+08:00)
2006-07-06 10:09:40
|
 |
|
ວັດຈີ້ຕູ--ວັດເທບນະທີໃຫຍ່ກວ່າໝູ່ຂອງຈີນ
cri
Author: da
|
ວັດຈີ້ຕູທີ່ຢູ່ເມືອງຈີ້ຢວນແຂວງເຫີນານພາກກາງຂອງຈີນມີປະຫວັດ 1400 ກວ່າປີແລ້ວ,ແມ່ນວັດທີ່ບູຊາເທບນະທີທີ່ມີຂະໜາດໃຫຍ່ກວ່າໝູ່ແລະຮັກສາໄວ້ໄດ້ຄົບຖ້ວນກວ່າໝູ່ຂອງຈີນຈົນຮອດປະຈຸບັນ,ຍັງແມ່ນຫົວໜ່ວຍອະນຸລັກວັດຖຸບູຮານຈຸດໜັກຂອງລັດ.ຢູ່ໃນວັດຈີ້ຕູ ບໍ່ພຽງແຕ່ມີຮູບຄວັດເທບນະທີທີ່ມີປະຫວັດພັນກວ່າປີທໍ່ນັ້ນ,ຍັງຮັກສາສິ່ງກໍ່ສ້າງຕົວແທນຂອງຫຼາຍລາຊະວົງໄວ້,ຖືກຜູ້ຊ່ຽວຊານຍ້ອງຍໍເປັນຫໍພິພິທະພັນສິ່ງກໍ່ສ້າງບູຮານຂອງຈີນ.ມື້ນີ້,ດາລາວັນຈະພາທ່ານໄປທ່ຽວວັດຈີ້ຕູ.
ຈາກເມືອງເຈີ້ງໂຈ່ວ ເທດສະບານແຂວງເຫີນານ ຂີ່ລົດໄຟໜຶ່ງຊົ່ວໂມງເຄິ່ງ,ກໍໄປຮອດວັດຈີ້ຕູທີ່ຕັ້ງຢູ່ຊານເມືອງຈີ້ຢວນ.ວັດຈີ້ຕູທີ່ຖືກຮັກສາໄວ້ໃນປະຈຸບັນກວມເນື້ອທີ່ປະມານ 8 ໝື່ນກວ່າຕາລາງແມັດ.ສ່ວນໜ້າຂອງວັດເປັນຮູບສີ່ຫຼ່ຽມ ທາງຫຼັງເປັນຮູບວົງມົນ,ໄດ້ສ່ອງແສງໃຫ້ເຫັນຄວາມເຂົ້າໃຈຂອງຄົນບູຮານທີ່ມີຕໍ່ຈັກກະວານ,ຄົນບູຮານເຫັນວ່າ ທ້ອງຟ້າເປັນຮູບວົງມົນ,ແຜ່ນດິນເປັນຮູບສີ່ຫຼ່ຽມ.
ທ່ານຕ້ວນໂປ່ ຜູ່ນຳທ່ຽວໄດ້ແນະນຳຄວາມເປັນມາຂອງວັດຈີ້ຕູສູ່ຟັງວ່າ:
"ຄຳວ່າ"ຕູ"ແມ່ນໝາຍຄວາມວ່າ"ແມ່ນ້ຳສາມດຽວໄຫຼເຂົ້າທະເລ",ຄົນບູຮານເຫັນວ່າ ຢູ່ຈີນມີແຕ່ແມ່ນ້ຳຢາງເຊ ແມ່ນ້ຳເຫຼືອງ ແມ່ນ້ຳຮວຍເຫີ ແລະແມ່ນ້ຳຈີ້ສຸຍສອດຄ່ອງກັບເງື່ອນໄຂດັ່ງກ່າວນີ້,ສະນັ້ນ ວັດທີ່ບູຊາເທບນະທີຈີ້ສຸຍຈິ່ງຖືກເອີ້ນເປັນ"ວັດຈີ້ຕູ".ການບູຊາເທວະດາຕູແມ່ນລະດັບສູງສຸດໃນການບູຊາເທບນະທີໃນສະໄໝບູຮານຂອງຈີນ,ວັດທີ່ຖືກຮັກສາໄວ້ດີກວ່າໝູ່ນັບມາຮອດປະຈຸບັນກໍແມ່ນວັດຈີ້ຕູແລ້ວ."
ພວກເຮົາໄປເບິ່ງຫໍບັນທົມຂອງເທບນະທີກ່ອນສາ.ຈາກປະຕູວັດຍ່າງຊື່ເຂົ້າໄປ,ຜ່ານປະຕູໄມ້ຫຼາຍປະຕູ,ຍ່າງຜ່ານທາງຫີນທີ່ເກົ່າແກ່ 200 ກວ່າແມັດ,ກໍໄປຮອດຫ້ອງນອນຂອງເທບນະທີ ເຊິ່ງເປັນພາກສ່ວນຫົວກະທິຂອງວັດຈີ້ຕູ.ຫໍບັນທົມກວມເນື້ອທີ່ 100 ກວ່າຕາລາງແມັດ,ສ້າງດ້ວຍໄມ້ໝົດ,ເສົາໄມ້ຫຼາຍເສົາໄດ້ຄ້ຳຊູທົ່ວຫໍໄວ້.ຮູບຄວັດເທບນະທີຈີ້ສຸຍມີສີໜ້າເມດຕາ,ຮ່າງກາຍສູງໃຫຍ່,ນອນຫຼັບຢູ່ເທິງຕຽງໄມ້ທີ່ຄວັດລວດລາຍດອກໄມ້,ໜວດດຳຍາວຢ່ອນຢູ່ຂ້າງໝອນ.ຮູບຄວັດຂອງພັນລະຍາສາມຄົນຂອງເພິ່ນຢືນຢູ່ໜ້າປະຕູ,ເໝືອນດັ່ງບໍ່ໃຫ້ແຂກເຂົ້າມາລົບກວນຄວາມຝັນຂອງເທບນະທີ.
ທ່ານຕ້ວນໂປ່ ຜູ້ນຳທ່ຽວບອກນັກຂ່າວວ່າ:
"ສາສະໜາຢູ່ຈີນ ລວມທັງສາສະໜາພຸດ ສາສະໜາຄຼິສຕຽນເປັນຕົ້ນ,ສ່ວນຫຼາຍບໍ່ໄດ້ບູຊາເທວະດາໃນທ່ານອນ,ແຕ່ວ່າໃນສາສະໜາເຕົ໋າ,ພັດມີວັດບູຊາເທວະດາຈີ້ຕູໃນທ່ານອນໂດຍຈຳເພາະ.ເທວະດາຈີ້ຕູນອນຫຼັບຢູ່ແຫ່ງນີ້ຢ່າງບໍ່ເປັນຫ່ວງເປັນໃຍຫຍັງ,ນອນຢູ່ຂ້າງແມ່ນ້ຳຈີ້ສຸຍ,ຊີວິດການເປັນຢູ່ຂອງມະຫາຊົນກໍສະຫງົບທີ່ສຸດ,ສາມາດຢູ່ເຢັນເປັນສຸກ."
ຢູ່ທາງຫຼັງຫໍບັນທົມຂອງເທບນະທີ,ແມ່ນຍອດແມ່ນ້ຳຈີ້ສຸຍ.ນີ້ແມ່ນພາບມະຫັດສະຈັນ,ຄື:ຢູ່ທົ່ງພຽງ,ມີນ້ຳພຸຫຼາຍບໍ່ໄຫຼຜາດໆຢ່າງບໍ່ຢຸດຢັ້ງເປັນພັນເປັນຮ້ອຍປີ.ນ້ຳບໍ່ໄຫຼໄປສູ່ທິດຕາເວັນອອກ,ໄຫຼຜ່ານແຂວງເຫີນານແລະແຂວງຊ່ານຕຸ່ງ,ຍາວຢຽດໄປພັນກວ່າກີໂລແມັດແລ້ວໄຫຼລົງສູ່ທະເລ.ຜູ້ຊ່ຽວຊານເວົ້າວ່າ,ກໍແມ່ນຍ້ອນນ້ຳໃຈທີ່ບໍ່ຢຸດບໍ່ຢ່ອນຂອງແມ່ນ້ຳຈີ້ສຸຍ,ຈຶ່ງເຮັດໃຫ້ປະຊາຊົນບູຊາເທບນະທີຈີ້ສຸຍກາຍເປັນນ້ຳໃຈຢ່າງໜຶ່ງ,ຄືນ້ຳໃຈສ້າງຕົນເອງໃຫ້ບໍລິສຸດທີ່ລູກຫຼານປະຊາຊາດຈີນສະແຫວງຫາຕະຫຼອດຊີວິດ,ນີ້ກໍແມ່ນສາເຫດສຳຄັນທີ່ມີສາສະນິກະຊົນມາບູຊາຢູ່ວັດຈີ້ຕູຢ່າງຫຼວງຫຼາຍນັບເປັນພັນເປັນຮ້ອຍປີມານີ້.
1 2
|
|
|
