|
|
 |
| (GMT+08:00)
2006-07-06 10:09:40
|
 |
|
ວັດຈີ້ຕູ--ວັດເທບນະທີໃຫຍ່ກວ່າໝູ່ຂອງຈີນ
cri
Author: da
ເມື່ອເບິ່ງຫໍບັນທົມຂອງເທບນະທີແລະຍອດແມ່ນ້ຳຈີ້ສຸຍແລ້ວ,ດາລາວັນຈະພາທ່ານໄປເບິ່ງສິ່ງກໍ່ສ້າງສະໄໝບູຮານໃນວັດຈີ້ຕູ.ເອກະລັກພິເສດໃຫຍ່ອັນໜຶ່ງຂອງວັດຈີ້ຕູກໍແມ່ນ ໄດ້ຮັກສາສິ່ງກໍ່ສ້າງລາຊະວົງຊົ້ງ ລາຊະວົງຢວນ ລາຊະວົງມິງແລະລາຊະວົງຊິງຂອງຈີນໄວ້,ສິ່ງກໍ່ສ້າງທີ່ສ້າງໄວກວ່າໝູ່ມີປະຫວັດພັນກວ່າປີແລ້ວ,ຕົວຢ່າງຄືຫໍບັນທົມຂອງເທບນະທີທີ່ກ່າວມາຂ້າງເທິງນີ້.ສິ່ງກໍ່ສ້າງສະໄໝບູຮານໃນວັດຈີ້ຕູມີຊື່ສຽງຍ້ອນເປັນສິ່ງກໍ່ສ້າງທີ່ສ້າງດ້ວຍໄມ້,ເອກະລັກພິເສດຂອງສິ່ງກໍ່ສ້າງໃນແຕ່ລະລາຊະວົງລ້ວນແຕ່ຈະແຈ້ງທີ່ສຸດ.
ທ່ານໂກ່ສຽວເຄີ່ ນັກທ່ອງທ່ຽວທີ່ມາຈາກປັກກິ່ງເວົ້າວ່າ:
"ວັດຈີ້ຕູແມ່ນຫໍພິພິທະພັນປະຫວັດສາດສິ່ງກໍ່ສ້າງທີ່ໃຫຍ່ສົມຄວນ,ຢູ່ໃນນີ້ມີສິ່ງກໍ່ສ້າງຂອງທຸກສະໄໝ.ສິລະປະສິ່ງກໍ່ສ້າງສະໄໝບູຮານຂອງຈີນໄດ້ເຊີດຊູກຳລັງໃຈຫຼາຍ,ສາມາດຮູ້ສຶກເຖິງການສືບທອດວັດທະນະທຳຂອງຈີນ.ແຫ່ງນີ້ບໍ່ພຽງແຕ່ແມ່ນສະຖານທີ່ທ່ອງທ່ຽວທີ່ມີຊື່ສຽງທໍ່ນັ້ນ,ຫາກຍັງມີຄວາມໝາຍວັດທະນະທຳຢ່າງຫຼວງຫຼາຍຢູ່ໃນຫັ້ນ."
ປະຕູວັດຈີ້ຕູມີອົງປະກອບພິລຶກຫຼາຍ,ແມ່ນເສົາ 4 ຕົ້ນຄ້ຳຊູຫຼັງຄາໃຫຍ່ສາມຫ້ອງທີ່ລວງກວ້າງໃຫຍ່,ຜ່ານເວລາມາ 500 ກວ່າປີແລ້ວ.ເມື່ອຍ່າງໄປຮອດຍອດແມ່ນ້ຳຈີ້ສຸຍ,ຈະເຫັນປະຕູຫຼິນຢ່ວນ,ນີ້ແມ່ນສິ່ງກໍ່ສ້າງລາຊະວົງຢວນ,ມີປະຫວັດປະມານ 700 ກວ່າປີແລ້ວ.ສາລາມັງກອນ ເຊິ່ງເປັນສາລາສະໄໝບູຮານທີ່ຕັ້ງຢູ່ຂ້າງຍອດແມ່ນ້ຳຈີ້ສຸຍມີມູນຄ່າສິລະປະສູງສົມຄວນ,ໄດ້ໃຊ້ເອກະລັກພິເສດຂອງສິ່ງກໍ່ສ້າງຂອງຫຼາຍລາຊະວົງ,ເຊັ່ນ:ພື້ນຫີນສາລາມັງກອນແມ່ນສ້າງໃນລາຊະວົງຊົ້ງ,ມີປະຫວັດພັນກວ່າປີແລ້ວ;ເສົາສ້າງໃນລາຊະວົງຢວນເມື່ອ 700 ກວ່າປີກ່ອນ;ສ່ວນຫຼັງຄາແມ່ນສ້ອມແປງໃໝ່ໃນລາຊະວົງມິງ,ມີປະຫວັດ 400-500 ປີແລ້ວ.
ຮາວຫີນຢູ່ຂ້າງຍອດແມ່ນ້ຳຈີ້ສຸຍ ຍິ່ງແມ່ນຂອງປະເສີດລະດັບຊາດ,ນີ້ແມ່ນຮາວຫີນຄວັດຂອງລາຊະວົງຊົ້ງທີ່ຖືກຮັກສາໄວ້ເປັນຢ່າງດີພຽງແຫ່ງດຽວຢູ່ຈີນ,ມີປະຫວັດພັນກວ່າປີແລ້ວ.ຢູ່ເທິງຮາວຫີນໄດ້ຄວັດຮູບແກ້ວປະເສີດແລະໜັງສືຈີນ"ວ້ານ"ໃສ່,ເຊິ່ງເປັນຮູບຂອງພຸດທະສາສະໜາ,ປະກົດຕົວຢູ່ໃນວັດຈີ້ຕູ ເຊິ່ງເປັນສະຖານທີ່ສາສະໜາເຕົ໋າ,ໄດ້ສ່ອງແສງໃຫ້ເຫັນປະກົດການທີ່ພຸດທະສາສະໜາແລະສາສະໜາເຕົ໋າເຊື່ອມໂຍງເຂົ້າກັນໃນປະຫວັດສາດ.
ປະຈຸບັນ ຢູ່ໃນວັດຈີ້ຕູມີອາຈານໃຫຍ່ 10 ກວ່າອົງ,ຮັບຜິດຊອບວຽກງານບູຊາປະຈຳວັນຂອງວັດຈີ້ຕູ.ອາຈານໃຫຍ່ອົງໜຶ່ງທີ່ມີນາມສະກຸນຈາງບອກນັກຂ່າວວ່າ:
"ທຳມະດາແລ້ວ ເມື່ອເຂົ້າວັດຈີ້ຕູ ຄົນທັງຫຼາຍຈະມາຈູດທູບບູຊາເທບນະທີ,ເພື່ອຂໍພອນໃຫ້ເທວະດາປ້ອງກັນໃຫ້ປອດໄພ.ຢູ່ແຫ່ງນີ້ ພວກຂ້າພະເຈົ້າຍັງຈັດການເຄື່ອນໄຫວບູຊາທຸກປີ,ທຳພິທີຈຳສິນພາວະນາເປັນຕົ້ນ."
ມື້ອອກໃໝ່ 6 ຄ່ຳເດືອນຍີ່ຕາມຈັນທະຄະຕິຈີນແຕ່ລະປີ ແມ່ນວັນກຳເນີດຂອງເທບນະທີຈີ້ສຸຍ.ໃນມື້ນັ້ນ,ຢູ່ໃນວັດຈີ້ຕູຈະຈັດການເຄື່ອນໄຫວບູຊາທີ່ຄຶກຄັກຟົດຟື້ນທີ່ສຸດ.ຕາມເລົ່າກັນວ່າ ແຕ່ກ່ອນ ໃນຍາມເຮືອງອຳນາດທີ່ສຸດຂອງວັດຈີ້ຕູ,ການບູຊາວັນເກີດຂອງເທບນະທີຕ້ອງໃຊ້ໝູແລະແກະຕັ້ງໝື່ນໂຕ.ຂະໜາດການບູຊາໃນປະຈຸບັນເຖິງວ່າບໍ່ໃຫຍ່ຄືເມື່ອກ່ອນແລ້ວກໍຕາມ,ແຕ່ນັກທ່ອງທ່ຽວຍັງສາມາດຊົມເບິ່ງປະຊາຊົນໃນອະດີດບູຊາເທບນະທີແນວໃດ,ຈາກນັ້ນກໍສາມາດຮູ້ສຶກເຖິງຄວາມສະຫງ່າລາສີຂອງວັດຈີ້ຕູໃນອະດີດ.
ການໄປທ່ຽວວັດຈີ້ຕູໃນປະຈຸບັນ,ທ່ານຈະສາມາດຊົມເບິ່ງຮູບຄວັດເທບນະທີຈີ້ສຸຍແລະສິ່ງກໍ່ສ້າງຍອດຢ້ຽມໃນວັດຢ່າງມິດໆ.ວັດຈີ້ຕູແມ່ນເປີດໃຫ້ນັກທ່ອງທ່ຽວມາທ່ຽວໃນບໍ່ທໍ່ໃດປີກ່ອນຫຼັງຈາກປະຕິສັງຂອນແລ້ວ.ໃນເວລາຍ່າງທ່ຽວໃນວັດຈີ້ຕູທີ່ມິດງຽບ,ຟັງຜູ່ນຳທ່ຽວເລົ່ານິທານຄວາມເປັນມາຂອງວັດ,ທ່ານຈະສາມາດຫວນຄືນເຖິງອະດີດ.
ການທ່ຽວວັດຈີ້ຕູໃຫ້ໝົດຕ້ອງການເວລາປະມານເຄິ່ງມື້.ຫຼັງຈາກນັ້ນ,ທ່ານສາມາດໄປທ່ຽວ ບູຮານນະສະຖານອີກສອງແຫ່ງຢູ່ເມືອງຈີ້ຢວນຄື:ວັດເຟີ້ງຊ່ຽນກວ້ນເຊິ່ງເປັນວັດສາສະໜາເຕົ໋າບູຮານແລະວັດຕ້າມິງຊື້ ເຊິ່ງເປັນວັດສາສະໜາພຸດບູຮານ.ພູທ້າຍຫາງແລະພູວັງອູ່ທີ່ມໍ່ກັບເມືອງຈີ້ຢວນ,ມີຕົ້ນໄມ້ຂຽວອຸ່ມທຸ່ມ,ມີສິ່ງກໍ່ສ້າງສະໄໝບູຮານຢ່າງຫຼວງຫຼາຍ,ແມ່ນສະຖານທີ່ທ່ອງທ່ຽວທີ່ມີຊື່ສຽງຢູ່ພາກກາງຂອງຈີນ.ນອກນີ້ໝີ່ຂົ້ວຢູ່ແຫ່ງນັ້ນກໍແຊບຫຼາຍ,ທ່ານຕ້ອງຊອກຫາເວລາໄປຊີມເບິ່ງເດີ້,ລົດຊາດແຊບ ລາຄາກໍຖືກ.
1 2
|
|
|
