|
ຫວ່າງມໍ່ໆນີ້,ພວກເຮົາໄດ້ຮັບຈົດໝາຍຂອງຜູ້ຟັງຫຼາຍສະບັບໂດຍຂຽນວ່າ,ຫວັງຢາກຊອກຮູ້ກຳແພງຍັກ ມໍລະດົກໂລກຂອງຈີນຕື່ມອີກ.ໃນຈົດໝາຍ,ທ.ສຳລານຈິດ ທີ່ບ້ານໂພນງາມໃຕ້ ເມືອງແປກ ແຂວງຊຽງຂວາງຂຽນວ່າ:"ຂ້າພະເຈົ້າມີຄວາມສົນໃຈກ່ຽວກັບກຳແພງຍັກຂອງເມືອງຈີນ,ສະນັ້ນ,ຂໍໃຫ້ລາຍການCRIເລົ່າສູ່ຟັງແດ່,ເພາະວ່າ,ຂ້າພະເຈົ້າໄດ້ຍິນແຕ່ຊື່,ແຕ່ບໍ່ຮູ້ຈັກວ່າກຳແພງຍັກເປັນແນວໃດ".ແລະຍັງມີຜູ້ຟັງອີກຜູ້ໜຶ່ງ ຄືທ່ານສອນທອງ.ໝອນວິໄລທີ່ເຮັດວຽກຢູ່ຫ້ອງການສຶກສາເມືອງວຽງຄຳ ແຂວງຫຼວງພະບາງຝາກຈົດໝາຍມາຍັງພວກເຮົາຂຽນວ່າ,ກຳແພງຍັກຂອງຈີນມີຄວາມຍາວເທົ່າໃດແມັດ,ບ່ອນທີ່ສູງກວ່າໝູ່ສູງຈາກລະດັບນ້ຳທະເລເທົ່າໃດແມັດ?ທີ່ຈິງແລ້ວ,ກ່ອນໜ້ານີ້,ພວກເຮົາເຄີຍແນະນຳກຳແພງຍັກໃນຫຼາຍລາຍການແລ້ວ,ທ່ານອາດຈະບໍ່ໄດ້ຟັງ,ບໍ່ເປັນຫຍັງດອກ,ໃນລາຍການພາກນີ້,ພວກເຮົາຂໍແນະນຳກຳແພງຍັກຂອງຈີນສູ່ທ່ານຟັງອີກ,ຫວັງວ່າທ່ານຄົງຈະຕິດຕາມຮັບຟັງ,ຢ່າພາດໂອກາດເທື່ອນີ້ອີກກໍແລ້ວກັນ.ກຳແພງຍັກຂອງຈີນແມ່ນສິ່ງກໍ່ສ້າງທີ່ຍິ່ງໃຫຍ່ກວ່າໝູ່ແຫ່ງໜຶ່ງໃນປະຫວັດສີວິໄລຂອງມວນມະນຸດ,ກຳແພງຍັກເລິ່ມສ້າງໃນສະໄໝຊຸ່ນຊິ່ວຍຸດທະຈັກເມື່ອ2000ກວ່າປີກ່ອນ,ພາຍຫຼັງລາຊະວົງຊີນໄດ້ທ້ອນໂຮມຈີນເປັນເອກະພາບກັນແລ້ວກໍ່ໄດ້ເຊື່ອມຕໍ່ກຳແພງຍັກຕອນຕ່າງໆເຂົ້າເປັນກຳແພງຍັກໝື່ນລີ້.ແລະໃນສະໄໝລາຊະວົງຮ້ານແລະລາຊະວົງມີງກໍ່ເຄີຍກໍ່ສ້າງກຳແພງຍັກຢ່າງຂະໜາດໃຫຍ່.ການກໍ່ສ້າງໂຄງການທີ່ໃຫຍ່ໂຕມະໂຫຖານທັງສະຫງ່າຜ່າເຜີຍ,ສາມາດເອີ້ນເປັນເລື່ອງມະຫັດສະຈັນຂອງໂລກ.ຮ້ອຍພັນປີໄດ້ຜ່ານພົ້ນໄປແລ້ວ,ປັດຈຸບັນ,ເມື່ອທ່ານປິນຂຶ້ນກຳແພງຍັກສະໄໝບູຮານ,ບໍ່ພຽງແຕ່ສາມາດເຫັນທ່າທາງທະນົງອົງອາດຂອງກຳແພງເມືອງຈີນທີ່ເຈືອລະເນືອຢູ່ເທິງພູຜາຕ່າງໆເທົ່ານັ້ນ,ຍັງສາມາດສຳນຶກຮູ້ເຖິງສະຕິປັນຍາທີ່ສະຫຼາດສະຫຼຽວແລະຄວາມອົງອາດກ້າຫານຂອງປະຊາຊາດຈີນໃນການສ້າງປະຫວັດສາດ
ກຳແພງຍັກຕັ້ງຢູ່ພາກເໜືອຂອງຈີນ,ເລີ່ມສ້າງແຕ່ດ່ານຊ່ານໄຫກ່ວນຢູ່ພາກຕາເວັນອອກເຈືອລະເນືອໄປເຖິງດ່ານຈ່າຢູ້ກ່ວນ,ທີ່ຢູ່ພາກຕາເວັນຕົກຍາວປະມານ6700ກິໂລແມັດ,ສະນັ້ນຈິ່ງເອີ້ນວ່າກຳແພງຍັກໝື່ນລີ້.ກຳແພງຍັກໄດ້ກໍ່ສ້າງຢ່າງຕໍ່ເນື່ອງກັນເປັນເວລາ2000ກວ່າປີເປັນລຳດັບ,ຕາມການບັນທຶກໄວ້ໃນປະຫວັດສາດ,ແຕ່ກົກສູໄດ້ກໍ່ສ້າງ"ກຳແພງສີ່ຫຼຽມ"ໃນສະຕະວັດທີ7ກ່ອນຄ.ສ.,ຈົນຮອດສະໄໝລາຊະວົງມີງທີ່ປົກຄອງເມືອງຈີນແຕ່ຄ.ສ.ປີ1368ຊ1644,ລວມມີກົກເຫຼົ່າແລະລາຊະວົງສັກດິນາ20ກວ່າລາຊະວົງເຄີຍສ້າງກຳແພງຍັກ,ໃນນັ້ນ,ກຳແພງຍັກຂອງລາຊະວົງຊີນ,ລາຊະວົງຮ້ານແລະລາຊະວົງມີງລ້ວນແຕ່ຍາວເກີນ5000ກິໂລແມັດ.ຖ້າເອົາກຳແພງຍັກທີ່ສ້າງຂຶ້ນໃນທຸກສະໄໝມາບວກເຂົ້າກັນ,ຄວາມຍາວທັງໝົດຈະລື່ນກາຍ5ໝື່ນກິໂລແມັດ,ຖ້າເອົາດິນຈີ່ຂອງກຳແພງຍັກມາສ້າງກຳແພງໃຫຍ່ທີ່ໜາ1ແມັດແລະສູງ5ແມັດ,ກຳແພງສາຍນີ້ຈະສາມາດອ້ອມໜ່ວຍໂລກຮອບໜຶ່ງຍັງມີເຫຼືອ.
ໂຄງການຫຼັກຂອງກຳແພງຍັກແມ່ນກຳແພງສູງໃຫຍ່ທີ່ເຈືອລະເນືອເປັນໝື່ນລີ້,ສ່ວນຫຼາຍສ້າງຢູ່ບ່ອນສູງສຸດຂອງພູຜາ,ເຈືອລະເນືອຕາມສັນພູ ເມືອນມັງກອນໂຕໃຫຍ່ທີ່ສະຫງ່າຜ່າເຜີຍໂຕໜຶ່ງ,ກາຍເປັນສັນຍະລັກຂອງປະຊາຊາດຈີນ.ຢູ່ເທິງກຳແພງຍາວໝຶ່ນລີ້ນັ້ນ,ມີດ່ານເປັນຮ້ອຍແຫ່ງ,ມີປ້ອມຍິງສັດຕູແລະປ້ອມສັນຍານໄຟເປັນພັນເປັນໝື່ນແຫ່ງ,ໄດ້ປ່ຽນແປງຄວາມຈືດຈາງຂອງກຳແພງ,ເຮັດໃຫ້ພູມສັນຖານທີ່ຫຼຸບໆໂນນໆເບິ່ງແລ້ວຮູ້ສຶກສູງສະຫງ່າກວ່າເກົ່າ,ເຕັມໄປດ້ວຍສະເໜີສິລະປະອັນໃຫຍ່ຫຼວງ.ໃນກຳແພງຍັກຢູ່ແຫ່ງຕ່າງໆຂອງຈີນ,ກຳແພງຍັກຕອນປ່າຕາຫຼີງໄດ້ກໍ່ສ້າງຢ່າງໝັ້ນຄົງທີ່ສຸດ,ແລະຮັກສາຢ່າງຄົບຖ້ວນກວ່າໝູ່,ແມ່ນບ່ອນທີ່ດີທີ່ສຸດສຳລັບທ່ຽວຊົມກຳແພງຍັກ.
ກຳແພງຍັກຂອງຈີນແມ່ນກິຈະການປ້ອງກັນທາງການທະຫານແຫ່ງຊາດທີ່ໃຊ້ເວລາກໍ່ສ້າງດົນກວ່າໝູ່ແລະມີປະລິມານກິດຈະການຫຼາຍກວ່າໝ່ຂອງໂລກູໃນສະໄໝອາວຸດໜາວ,ໄດ້ໂຮມສູນເລືອດເນື້ອເຫື່ອແຮງແລະສະຕິປັນຍາຂອງບັນພະບຸລຸດຈີນ,ແມ່ນສັນຍະລັກແລະຄວາມພາກພູມໃຈຂອງປະຊາຊາດຈີນ.
ຕາມການບັນທຶກໃນປະຫວັດສາດ,ແຕ່ສະໄໝຍຸດທະຈັກມານີ້,ມີກົກເຫຼົ່າແລະລາຊະວົງສັກດິນາ20ກວ່າລາຊະວົງເຄີຍສ້າງກຳແພງຍັກ.ກ່ອນໝູ່ແມ່ນກົກສູ,ເພື່ອປ້ອງກັນຊົນເຜົ່າທ່ຽວລ້ຽງສັດແລະປະເທດສັດຕູຂອງພາກເໜືອ,ຈິ່ງເລິ່ມສ້າງກຳແພງຍັກ,ຫຼັງຈາກນັ້ນ,ກົກຊີ,ກົກອ້ຽນ,ກົກເວີ້ຍ,ກົກຈ້າວແລະກົກຊີນເປັນຕົ້ນກໍ່ເລິ່ມສ້າງກຳແພງຍັກຂອງຕົນເນື່ອງຈາກຈຸດປະສົງອັນດຽວກັນ.ເມື່ອກົກຊີນໄດ້ທ້ອນໂຮມຫຼົກກົກເປັນເອກະພາບກັນແລ້ວ,ກະສັດຈິນຊີຮ້ອງເຕ້ໄດ້ແຕ່ງໃຫ້ນາຍພົນເໝີງຖຽນທີ່ມີຊື່ສຽງຂຶ້ນໄປທິດເໜືອໂຈມຕີຊົນເຜົ່າຊົງໜູ,ສ້າງໃຫ້ກຳແພງຍັກຂອງທຸກກົກເຊື່ອມຕິດກັນ,ທິດຕາເວັນຕົກສ້າງແຕ່ລິນທາວ,ທິດຕາເວັນອອກເຖິງລຽວຕົ່ງ,ເຈືອລະເນືອເປັນໝື່ນກວ່າລີ້,ສະນັ້ນຈິ່ງເອີ້ນວ່າກຳແພງຍັກໝື່ນລີ້,ນີ້ກໍ່ແມ່ນຄວາມເປັນມາຂອງຊື່"ກຳແພງຍັກໝື່ນລີ້".ແຕ່ກຳແພງຍັກທີ່ພວກເຮົາເຫັນໃນປັດຈຸບັນນີ້ສ່ວນຫຼາຍແມ່ນສ້າງໃນສະໄໝລາຊະວົງມີງ.
1 2
|
