|
ກຳແພງຍັກທີ່ສ້າງໃນລາຊະວົງຊີນຍັງເຫຼືອແຕ່ຊາກເທົ່ານັ້ນ.ເພື່ອສ້າງກຳແພງຍັກ,ກະສັດຈິນຊີຮ້ອງເຕ້ໄດ້ໃຊ້3ແສນຄົນ,ໄດ້ສ້າງສິ່ງ ມະຫັດສະຈັນໃນປະຫວັດສາດສະຖາປະນິກ.ການສ້າງກຳແພງຍັກໄດ້ເສີມຂະຫຍາຍບົດບາດອັນຕັ້ງໜ້າໃນການປ້ອງກັນຊົນເຜົ່າຊົງໜູບໍ່ໃຫ້ຮຸກຮານລົງສູ່ທິດໃຕ້ແລະປົກປ້ອງເສດຖະກິດວັດທະນະທຳພາກກາງຂອງຈີນໃຫ້ພັດທະນາຢ່າງພາວະວິໄສ.
ລາຊະວົງຮ້ານສືບຕໍ່ສ້າງກຳແພງຍັກ.ແຕ່ກະສັດຮ້ານເວີນເຕ້ຈົນຮອດກະສັດຮ້ານຊ່ວນເຕ້,ໄດ້ສ້າງກຳແພງຍັກສາຍໜຶ່ງທີ່ເລິ່ມແຕ່ເມືອງເອີສີ່ກົກຕ້າຫວັນຢູ່ທິດຕາເວັນຕົກ,ຮອດຝັ່ງເໜືອຂອງແມ່ນ້ຳເຮີ່ຍລົງຈ່ຽງຢູ່ທິດຕາເວັນອອກ,ຍາວເກືອບ1ໝື່ນກິໂລແມັດ,ໄລຍະທາງເຄິ່ງໜຶ່ງຂອງເສັ້ນທາງຜ້າໄໝບູຮານກໍ່ແມ່ນລຽບຕາມກຳແພງຍັກສາຍນີ້,ແມ່ນກຳແພງຍັກທີ່ຍາວກວ່າໝູ່ໃນປະຫວັດສາດ.ເມື່ອຮອດສະໄໝລາຊະວົງມີງ,ເພື່ອປ້ອງກັນການຮຸກຮານລົບກວນຂອງເຜົ່າຕ໋າຕ໋າແລະເຜົ່າຫວາລ້າ,ບໍ່ເຄີຍຢຸດສ້າງກຳແພງຍັກຈັກເທື່ອ,ແຕ່ກະສັດຮົງອູຮ້ອງເຕ້ຮອດກະສັດວ້ານລີ້ຮ້ອງເຕ້,ໃນໄລຍະນີ້,ໂດຍຜ່ານການສ້າງຢ່າງຂະໜາດໃຫຍ່20ເທື່ອ,ໄດ້ສ້າງກຳແພງຍັກສາຍໜຶ່ງທີ່ເລີ່ມແຕ່ດ່ານຈ່າຢູ່ກ່ວນຂອງແຂວງກ່ານຊູທີ່ຢູ່ພາກຕາເວັນຕົກ ເຖິງພູຫຼາວຫູຊ່ານທີ່ຢູພາກຕາເວັນອອກ,ມີລ່ວງຍາວ6350ກິໂລແມັດ.ແຕ່ຕາມລາຍງານຂ່າວ,ເຄື່ອງນັບໄລຍະທາງຢ່າງຂອງຄົນຈີນຜູ້ໜຶ່ງທີ່ຍ່າງໝົດທົ່ວກຳແພງຍັກໃນປີ1990ນັ້ນໄດ້ສະແດງວ່າແມ່ນ6700ກ.ມ.
ເມື່ອກີ້ນີ້,ພວກເຮົາໄດ້ແນະນຳກຳແພງຍັກຕອນປ່າຕາຫຼີງແມ່ນກຳແພງຍັກຕອນໜຶ່ງຂອງລາຊະວົງມີງທີ່ຮັກສາທີ່ດີທີ່ສຸດຈົນເຖິງປັດຈຸບັນ,ແລະກໍ່ແມ່ນກຳແພງຍັກຕອນທີ່ມີລັກສະນະຕົວແທນທີ່ສຸດ.ກຳແພງຍັດຕອນນີ້ສ້າງດ້ວຍຫີນກຼານິດກ້ອນໃຫຍ່ແລະດິນຈີ່ກ້ອນໃຫຍ່,ຕົວກຳແພງທັງສູງທັງໝັ້ນຄົງ,ຄືສູງ8,5ແມັດ,ຖານກວ້າງ6,5ແມັດ,ເທິງກຳແພງກວ້າງ5,7ແມັດ,ສາມາດໃຫ້ມ້າ5ໂຕຫຼື10ຄົນໄປພ້ອມກັນໄດ້.ມັນສ້າງຕາມສັນພູ,ຫຼຸບໆໂນນໆຕາມເປີ້ນພູ,ສະຫງ່າຜ່າເຜີຍທີ່ສຸດ.ກຳແພງຍັກຕອນປ່າຕາຫຼີງແມ່ນແນວໜ້າຂອງດ່ານຈູ່ຢົງກ່ວນ ດ່ານສຳຄັນຂອງກຳແພງຍັກໝື່ນລີ້,ຢູ່ພຸ້ນ ມີຈອມພູສູງສອງໜ່ວຍຢູ່ທິດເໜືອແລະທິດໃຕ້,ບ່ອນສູງກວ່າລະດັບນ້ຳທະເລຫຼາຍທີ່ສຸດມີປະມານ1000ແມັດ.ຢືນຢູ່ເທິງຈອດກຳແພງຍັກ,ເບິ່ງໄປສູ່ທາງໄກ ມີພູຜາສະຫຼັບສັບຊ້ອນກັນ,ເຈືອລະເນືອກັນໄປ,ເໝືອນດັ່ງກຳແພງຍັກກໍ່ຄືມັງກອນໂຕໜຶ່ງ,ບິນລົງມາຈາກບ່ອນເລິກຂອງເມກ,ແລ້ວບິນໄປສູ່ທ້ອງຟ້າ,ເຫັນຫົວບໍ່ເຫັນຫາງ.ຈັ່ງແມ່ນສວຍງາມແລະສະຫງ່າຜ່າເຜີຍແທ້ໆ.
ກຳແພງຍັກຕອນປ່າຕາຫຼີງຕັ້ງຢູ່ເມືອງນ້ອຍອຽນຊີ້ງ,ຫ່າງຈາກໃຈກາງນະຄອນປັກກິ່ງ70ກວ່າກິໂລແມັດ,ສ້າງໃນສະໄໝລາຊະວົງມີງ,ແມ່ນດ່ານສຳຄັນຢູ່ປັກກິ່ງຂອງກຳແພງຍັກລາຊະວົງມີງ.ຢູ່ທິດຕາເວັນອອກແລະທິດຕາເວັນຕົກມີສອງປະຕູ,ຕ່າງເອີ້ນວ່າ"ເມືອງນອກດ່ານຈຸ່ຍຢົ່ງ"ແລະ"ລູກກະແຈປະຕູເໜືອ".ຍ້ອນວ່າທິດໃຕ້ສາມາດໄປສູ່ນະຄອນປັກກິ່ງ,ທິດເໜືອສາມາດໄປຮອດເມືອງນ້ອຍອຽນຊີ້ງ,ທິດຕາເວັນອອກສາມາດໄປສູ່ເມືອງຢົງນີງແລະເມືອງຊື້ຫາຍ,ທິດຕາເວັນຕົກສາມາດໄປສູ່ເມືອງຊ່ວນຮວ້າແລະເມືອງຕ້າທົງ,ດັ່ງນັ້ນຈິ່ງຕັ້ງຊື່ວ່າ"ດ່ານປ່າຕາຫຼີງ",ໝາຍຄວາມວ່າດ່ານທີ່ເນັ່ງໄປສູ່ທຸກສາລະທິດ.ກຳແພງຍັກຕອນນີ້ປະກອບດ້ວຍດ່ານ,ກຳແພງ,ຫໍຄອຍແລະປ້ອມສັນຍານ,ເນັ່ງຄົດລ້ຽວຕາມສັນພູ,ຄືມັງກອນ ໃຫຍ່ໂຕໜຶ່ງເຫາະເຫີນຢູ່ລະຫວ່າງພູຜາ.
ເດືອນທັນວາປີ1987,ກຳແພງຍັກຖືກຈັດເຂົ້າໃນ"ລາຍຊື່ມໍລະດົກໂລກ",ຈີນໄດ້ສ້າງຫໍພິພິທະພັນກຳແພງຍັກຢູ່ກຳແພງຍັກຕອນປ່າຕາຫຼີງແລ້ວ.
ກຳແພງຍັກຂອງຈີນມີຄຸນຄ່າດ້ານທັດສະນາຈອນທ່ອງທ່ຽວແລະຄວາມໝາຍປະຫວັດສາດວັດທະນະທຳສູງທີ່ສຸດ.ປັດຈຸບັນ,ເມື່ອໄດ້ພັດທະນາແລະສ້ອມແປງຢ່າງພຽງໃຈແລ້ວ,ກຳແພງຍັກຕອນຊ່ານຫາຍກ່ວນ,ກຳແພງຍັກຕອນຈູ່ຢົງກ່ວນ,ກຳແພງຍັກຕອນປ່າຕາຫຼີງ,ກຳແພງຍັກຕອນມູ້ທຽນຢູ້ແລະກຳແພງຍັກຕອນຈ່າຢູ້ກ່ວນເປັນຕົ້ນໄດ້ກາຍເປັນແຫຼ່ງທ່ອງທ່ຽວທີ່ມີຊື່ສຽງທັງພາຍໃນຈີນແລະຢູ່ຕ່າງປະເທດແລ້ວ.ປີນຂຶ້ນໄປຮອດບ່ອນສູງແລ້ວເບິ່ງໄປທາງໄກ,ພາບສູ້ລົບກັນໃນສະໜາມລົບບູຮານກໍ່ຄືຈັ່ງວ່າປະກົດຢູ່ຕໍ່ໜ້າຕໍ່ຕາ.ປັດຈຸບັນ,ກຳແພງຍັກຂອງຈີນກັບທາດປີລະມິດຂອງເອຢິບ,ສະໜາມສູ້ສັດຂອງໂຣມແລະຫໍງ່ຽງປີຊາຂອງອີຕາລີເປັນຕົ້ນຖືກເອີ້ນເປັນ7ສິ່ງມະຫັດສະຈັນຂອງໂລກ,ແມ່ນອະນຸສອນຂອງວັດທະນະທຳເກົ່າແລະໝາກຜົນແຫ່ງສະຕິປັນຍາຂອງວັດທະນະທຳເກົ່າແກ່ຂອງປະຊາຊາດຈີນ,ເປັນສັນຍະລັກຂອງການສືບສາຍເລືອດແລະຈິດໃຈແຫ່ງຊາດຂອງປະຊາຊາດຈີນ.
ຖ້າວ່າທ່ານຍັງຢາກຊອກຮູ້ສະພາບໃນດ້ານອື່ນໆ,ກໍ່ຍິນດີຕ້ອນຮັບທ່ານຝາກຈົດໝາຍມາບອກໃຫ້ພວກເຮົາຮູ້.ສຸດທ້າຍ,ພວກເຮົາຂໍຈັດເພງມ່ວນໆເພງໜຶ່ງສູ່ທ່ານຟັງ,ເພງນີ້ຊື່ວ່າ"ມີງທ່ຽນເຕີສ່ຽງເກີຫຼີລາ",ແປວ່າ"ແຊງກະລີລາໃນມື້ອື່ນ".
1 2
|
