|
ທີ່ຈິງແລ້ວ,ການປ່ຽນແປງທີ່ທາງລົດໄຟຊິງໄຫຕິເບດນຳມາໃຫ້ມວນຊົນຕິເບດນັ້ນບໍ່ສະເພາະແຕ່ສອງຕົວຢ່າງທີ່ກ່າວມາຂ້າງເທິງນັ້ນ.ທ່ານວາງຕ້າຍຢວນ ຮອງຫົວໜ້າສະຖາບັນເສດຖະກິດສະພາບັນດິດວິທະຍາສາດສັງຄົມຕິເບດເຫັນວ່າ,ທາງລົດໄຟຊິງໄຫຕິເບດແລ່ນລົດໄດ້ຈະຊຸກຍູ້ວັດທະນະທຳຕິເບດດັ້ງເດີມໄປສູ່ແນວໜ້າແຫ່ງການໄຂປະຕູສູ່ພາຍນອກ,ມີຫວັງຈະປ່ຽນແປງແບບແຜນດຳລົງຊີວິດຂອງຊາວຕິເບດຫຼາຍກວ່າເກົ່າ.
"ທາງລົດໄຟເປີດໃຫ້ແລ່ນລົດໄດ້ທັບມ້າງສະພາບວັດທະນະທຳທີ່ປິດປະຕູ,ອຸກອັ່ງໃນພັນປີມານີ້.ວັດທະນະທຳໃນເຂດຕິເບດສາມາດແລກປ່ຽນກັບວັດທະນະທຳຊົນເຜົ່າອື່ນຢູ່ນອກເຂດຕິເບດດີກວ່າເກົ່າແລະໄວກວ່າເກົ່າ,ຈົນກະທັ້ງຈະປະກົດມີສະພາບວັດທະນະທຳຊົນເຜົ່າເຊື່ອມໂຍງເຂົ້າກັນໃນລະດັບໃດໜຶ່ງ.ໂດຍສະເພາະແມ່ນຄຽງຄູ່ກັບຄົນເຂົ້າອອກເຂດຕິເບດໄດ້ຫຼາຍຂຶ້ນ,ທັດສະນະຄະຕິ,ແນວຄິດແລະຄ່ານິຍົມຂອງປະຊາກອນທີ່ມາຈາກຕ່າງຖິ່ນຕ່າງແຂວງອາດຈະສ້າງຜົນສະທ້ອນອັນແນ່ນອນຕໍ່ແບບແຜນດຳລົງຊີວິດ,ຮູບການສະແດງວັດທະນະທຳສັງຄົມທີ່ຖືຄວາມເຊື່ອຖືສາສະໜາທີ່ມີຢູ່ແຕ່ເດີມເປັນແກນກາງຂອງປະຊາຊົນພາຍໃນເຂດຕິເບດ."
ຢູ່ສະຖານີລົດໄຟຊີນິງ,ຄົນທັງຫຼາຍລຽນແຖວຄອຍຖ້າຊື້ປິ້ລົດໄຟໄປເຂດຕິເບດ
ພ້ອມກັນນັ້ນ,ຜູ່ຊ່ຽວຊານຜູ່ນີ້ຊີ້ອອກວ່າ,ຄຽງຄູ່ກັບທາງລົດໄຟເປີດໃຫ້ແລ່ນລົດ,ຈຳນວນຄົນທີ່ມາທ່ຽວຢູ່ຕິເບດຈະຫຼາຍຂຶ້ນຢ່າງໄວວາ.ປັດຈຸບັນ,ແຕ່ລະມື້ມີລົດໄຟ4ຂະບວນເຂົ້າເຂດຕິເບດ,ແຕ່ລະຂະບວນມີຜູ່ໂດຍສານປະມານ1000ຄົນ,ເທົ່າກັບວ່າ,ແຕ່ລະມື້ເຂດຕິເບດມີຄົນເພີ່ມປະມານ4000ຄົນ,ບວກກັບຍົນ,ມື້ໜຶ່ງກໍມີປະມານ5000ຄົນ.ນີ້ໝາຍຄວາມວ່ານັກທ່ອງທ່ຽວທີ່ເຂດຕິເບດຕ້ອນຮັບນັ້ນໄດ້ເພີ່ມຂຶ້ນຄົບເທົ່າ.ໃຕ້ສະພາບການນີ້,ຈະອະນຸລັກບູຮານນະສະຖານຂອງເຂດຕິເບດໃຫ້ດີແນວໃດ,ພວມກາຍເປັນບັນຫາທີ່ໄດ້ຮັບຄວາມເອົາໃຈໃສ່ຫຼາຍ.
1 2 3 4 5
|
