|
ສະບາຍດີທ່ານຜູ້ຟັງທີ່ເຄົາລົບ, ແສງແກ້ວຍິນດີຕ້ອນຮັບທ່ານເຂົ້າສູ່ລາຍການຢ່ອນອາລົມໃນວັນເສົາຂອງວິທະຍຸCRI, ໃນລາຍການມື້ນີ້, ແສງແກ້ວຂໍແນະນຳCDຊຸດທຳອິດຂອງນາງໂມ້ອ້ຽນລີນ ນັກຮ້ອງໃໝ່, ເພງຊຸດນີ້ໃຫ້ຊື່ວ່າ"ຢາກເປັນໂສດຕະຫຼອດໄປ".
ນາງໂມ້ອ້ຽນລີນແມ່ນນັກຮ້ອງໃໝ່ຜູ້ດີເດັ່ນທີ່ປະກົດຕົວຂຶ້ນໃນວົງການເພງຂອງແຜ່ນດິນໃຫຍ່ຈີນປີນີ້, ນາງບໍ່ພຽງແຕ່ຮ້ອງເພງມ່ວນ, ແຕ່ງເພງກໍເກັ່ງຫຼາຍ. ໃນ 1996, ນາງໂມ້ອ້ຽນລີນກໍໄດ້ຮ້ອງເພງຢູ່ໃນບາເມືອງອູຮ້ານ, ພຽງສອງປີນາງກໍກາຍເປັນນັກຮ້ອງທີ່ມີຊື່ສຽງກວ່າໝູ່ໃນທ້ອງຖິ່ນ. ປີ 2003, ນາງໂມ້ອ້ຽນລີນໄດ້ແຕ່ງເພງ"ຊົມທະເລ", ເພງນີ້ໄດ້ຈັດເຂົ້າCD ທີ່ຊື່ວ່າ"ລະດູຮ້ອນ"ຊຶ່ງເປັນ CD ຊຸດທຳອິດຂອງນາງໂຈວຊຸ້ນ ນັກຮ້ອງແຜ່ນດິນໃຫຍ່ຈີນ, ທັງເປັນເພງເອກຂອງCDຊຸດນີ້. ຍ້ອນມີເພງນີ້, ນາງໂຈວຊຸ້ນໄດ້ຮັບລາງວັນເພງດີເລີດແລະລາງວັນນັກຮ້ອງໃໝ່ຂອງວົງການເພງຈີນໃນປີນັ້ນ.
ເດືອນມີນາປີນີ້, ນາງໂມ້ອ້ຽນລີນໄດ້ອັດຈຳໜ່າຍCDຊຸດທຳອິດທີ່ໃຫ້ຊື່ວ່າ"ຢາກເປັນໂສດຕະຫຼອດໄປ", ເຊິ່ງເປັນCDຊຸດໃໝ່ຂອງບໍລິສັດທ້າຍເຫີມ້າຍຖຽນໃນປີນີ້. ເພງທີ່ທ່ານພວມຟັງຢູ່ນີ້ແມ່ນເພງdai zou ໜີໄປ, ເພງນີ້ສອນໃຫ້ຄົນຮຽນຮູ້ການລືມເລື່ອງລາວໃນອະດີດ, ໃນເມື່ອທຸກສິ່ງທຸກຢ່າງຕ່າວຄືນບໍ່ໄດ້ແລ້ວ, ດີທີ່ສຸດກໍຈົ່ງປ່ອຍມັນໄປ, ລືມຄວາມໂສກເສົ້າແຫ່ງຄວາມຮັກ, ເອົາມັນຝັງໄວ້ຢູ່ພື້ນທະເລແຫ່ງການເວລາ. ເນື້ອເພງມີຢູ່ວ່າ: "ເຈົ້າຈະບໍ່ມາອີກແລ້ວ, ເໝືອນດັ່ງຄວາມເປົ່າຫວ່າງຢູ່ເທິງທ້ອງຟ້າ, ຄວາມຮັກມີແຕ່ຈົ່ງໄວ້ໃຫ້ຜູ້ລໍຄອຍ, ແຕ່ລໍຄອຍດົນປານໃດກໍບໍ່ມີຄຳຕອບ, ຂ້ອຍຈຶ່ງເຊົາຄອງຄອຍ, ເຊົາໄຟ່ຝັນ, ໃຫ້ຄວາມຊົງຈຳຈົມລົງພື້ນທະເລແຫ່ງການເວລາ."
ໃນCDຊຸດໃໝ່ຂອງນາງໂມ້ອ້ຽນລີນ, ເພງໃດກໍແມ່ນເລື່ອງເລື່ອງໜຶ່ງ, ເປັນການສະແດງຈິດໃຈຢ່າງໜຶ່ງ. ເພງ"ຢາກເປັນໂສດຕະຫຼອດໄປ" ແມ່ນເພງສະແດງອອກເຖິງຊີວິດໃນສະໄໝໃໝ່ຂອງນາງ, ຈະຖືເປັນສານປະກາດຄວາມເປັນໂສດຂອງແມ່ຍິງກໍວ່າໄດ້. ໃນເພງນີ້, ນາງໂມ້ອ້ຽນລີນໄດ້ເລົ່າເລື່ອງຄວາມຮັກທີ່ບໍ່ມີຄວາມໝາຍຕອນໜຶ່ງຢູ່ຟັງ, ນາງຮຽກຮ້ອງໃຫ້ຜູ້ຍິງທີ່ເບື່ອໜ່າຍຄວາມຮັກຄວາມຊັງລະຫວ່າງຍິງຊາຍນັ້ນຜີກໜີອອກຈາກເກມຄວາມຮັກທີ່ບໍ່ແລ້ວບໍ່ທົ່ວ, ເພື່ອສະເຫວີຍຄວາມສຸກທີ່ເປັນໂສດທີ່ບໍ່ມີສິ່ງຜູກມັດແລະຢູ່ຢ່າງອິດສະຫຼະເສລີ.
1 2
|
