|
ສະບາຍດີທ່ານຜູ່ຟັງທີ່ໂຄລົບ, ຍິນດີຕ້ອນຮັບທ່ານເຂົ້າສູ່ລາຍການອາລະຍະທຳຈີນ. ໂຄມໄຟນ້ຳກ້າມແມ່ນຮູບແບບສິລະປະພື້ນເມືອງທີ່ມີມາແຕ່ດົນນານຊະນິດໜຶ່ງທີ່ແຜ່ຫຼາຍຢູ່ພາກເໜືອຈີນ. ຍ້ອນທ່າແຮງດ້ານພູມສາດ, ສາມາດເວົ້າໄດ້ວ່າ ແຂວງເຮິຍລົງຈ່ຽງແມ່ນບ່ອນເຮັດໂຄມໄຟນ້ຳກ້າມກ່ອນໝູ່. ຕາມເລົ່າລືກັນວ່າ, ແຕ່ກີ້ແຕ່ກ່ອນ, ເມື່ອຮອດຕອນຄ່ຳໃນລະດູໜາວ, ຢູ່ທົ່ງພຽງທີ່ກວ້າງສຸດສາຍຕາ, ຄົນທັງຫຼາຍມັກເຫັນມີຊາວກຳສິກອນແລະຊາວຫາປາເປັນໝູ່ໆພວມເອົາຫຍ້າໃຫ້ມ້າກິນແລະຫາປາຢ່າງບໍ່ຟ້າວບໍ່ຝັ່ງ, ພາຫະນະໃຫ້ຄວາມສະຫວ່າງທີ່ພວກເຂົາເຈົ້າໃຊ້ນັ້ນກໍແມ່ນໂຄມໄຟທີ່ໃຊ້ນ້ຳກ້າມມາເຮັດ. ແລະມັນກໍແມ່ນໂຄມໄຟນ້ຳກ້າມທີ່ໄດ້ເຮັດກ່ອນໝູ່. ກຳມະວິທີເຮັດໂຄມໄຟນ້ຳກ້າມໃນຄາວນັ້ນງ່າຍດາຍທີ່ສຸດ, ຄື ເອົານ້ຳລົງໃສ່ຖັງໄມ້ ໃຫ້ມັນຈັບເປັນກ້ອນນ້ຳກ້າມ, ແລ້ວເຈາະສ່ວນກາງໃຫ້ເປັນຊ່ອງ, ໃສ່ຕະກຽງເຂົ້າໄປທາງໃນ, ໃຊ້ເພື່ອໃຫ້ແສງສະຫວ່າງ, ຍ້ອນມີໂປະນ້ຳກ້າມບັງຢູ່ທາງນອກກັ້ນລົມແຮງໃນລະດູໜາວ, ໃນເວລາກາງຄືນຈຶ່ງມີໂຄມໄຟໃຫ້ຄວາມຮຸ່ງແຈ້ງໂດຍບໍ່ຖືກລົມພັດດັບຈັກເທື່ອ, ໂຄມໄຟນ້ຳກ້າມໄດ້ກາຍເປັນສິ່ງທີ່ຂາດບໍ່ໄດ້ໃນຊີວິດປະຈຳວັນຂອງຄົນທັງຫຼາຍ. ພາຍຫຼັງມາ, ເມື່ອຮອດຄ່ຳຄືນບຸນກຸດຈີນ, ຄົນທັງຫຼາຍກໍປະດັບປະດາໂຄມໄຟນ້ຳກ້າມໃຫ້ມັນງາມຕາ, ໂຄມໄຟນ້ຳກ້າມເລີຍກາຍເປັນຮູບແບບສະແດງສິລະປະທີ່ມີສີສັນພິເສດເພື່ອໃຫ້ຄົນທັງຫຼາຍໄດ້ເບິ່ງໄດ້ຊົມ. ໜັງສືປະຫວັດສາດໃນລາຊະວົງຊິ່ງຂອງຈີນໄດ້ບັນທຶກໄວ້ຢ່າງລະອຽດກ່ຽວກັບການເຮັດໂຄມໄຟນ້ຳກ້າມ.
ເມືອງຮາເອີປິ່ນຖືວ່າເປັນບ່ອນກຳເນີດສິລະປະນ້ຳກ້າມຂອງຈີນ, ໂຄມໄຟນ້ຳກ້າມເມືອງຮາເອີປິ່ນມີຊື່ສຽງດົງດັງຢູ່ຈີນແລະຕ່າງປະເທດ. ເມືອງຮາເອີປິ່ນເຮັດແລະສະແດງໂຄມໄຟນ້ຳກ້າມຢ່າງຂະໜາດໃຫຍ່ແລະມີການຈັດຕັ້ງແມ່ນເລີ່ມແຕ່ປີ 1963, ຄົນທັງຫຼາຍເອົານ້ຳໃສ່ເບົ້າທີ່ງ່າຍດາຍ ເຊັ່ນ ອ່າງລ້າງໜ້າແລະຖັງເປັນຕົ້ນ, ເມື່ອນ້ຳຈັບເປັນນ້ຳກ້າມແລ້ວຈຶ່ງແກະສະຫຼັກນ້ຳ ກ້າມໃຫ້ເປັນໂຄມໄຟທີ່ມີຫຼາຍຮູບຫຼາຍແບບພັນກວ່າໜ່ວຍແລະດອກນ້ຳກ້າມຫຼາຍສິບດອກ, ວາງສະແດງຢູ່ສວນສາທາລະນະໃນມື້ບຸນຂະໜົມບົວລອຍ, ແລະມີຄວາມຟົດຟື້ນໄປທົ່ວເມືອງ. ຈົນຮອດຊູ່ມື້ນີ້, ຊາວເມືອງຮາເອີປິ່ນຍັງຈື່ຈຳພາບອັນມະໂຫລານນັ້ນເປັນຢ່າງດີ, ແລະຍັງຮູ້ສຶກຕື້ນຕັນໃຈທີ່ສຸດ. ນີ້ກໍ່ແມ່ນງານທ່ຽວຊົມໂຄມໄຟນ້ຳກ້າມທີ່ມີການຈັດຕັ້ງຄັ້ງທຳອິດຂອງຈີນ. ໃນຄາວນັ້ນມີຄົນໄດ້ຂຽນບົດກະວີມາພັນລະນາຄວາມອັດສະຈັນຂອງງານວາງສະແດງໂຄມໄຟນ້ຳກ້າມດັ່ງກ່າວ.
1 2
|
