|
|
 |
| (GMT+08:00)
2006-11-02 20:32:29
|
 |
|
ຄວາມປອດໄພໃນເວລາໃຊ້ຢາຢູ່ເຮືອນ
cri
ນອກຈາກບັນຫາຕ້ອງກຽມຢາຊະນິດໃດແລ້ວ,ຍັງມີຫຍັງແດ່ທີ່ພວກເຮົາຄວນເອົາໃຈໃສ່?
ກ່ອນອື່ນ,ຕ້ອງເອົາໃຈໃສ່ການປ່ຽນຢາໃນຕູ້,ຕາມປົກກະຕິ,ທຸກໆ3ເດືອນຮອດ6ເດືອນຄວນກວດຕູ້ຢາເທື່ອໜຶ່ງ,ດີກວ່ານັ້ນຄວນກວດເລື້ອຍໆ,ຢາບາງຊະນິດທີ່ໝົດກຳນົດຫຼືເສຍຄຸນແລ້ວຕ້ອງເອົາອອກ,ແລ້ວປ່ຽນອັນໃໝ່.
ສຳລັບບ່ອນມ້ຽນຢາກໍຕ້ອງເບິ່ງໃຫ້ດີ.ໄວ້ໃນກັບເຈ້ຍຫຼືລີ້ນຊັກບໍ່ເໝາະສົມປານໃດ,ໄວ້ໃນກັບເຈ້ຍມັກຖືກອາກາດຊຸ່ມ,ສ່ວນລີ້ນຊັກອັດບໍ່ແຈບ,ມັກຖຶກຂີ້ຟຸ່ນຈັບ, ເຮັດໃຫ້ຢາຖືກເປັນພິດ.ເຄື່ອງບັນຈຸທີ່ດີຕ້ອງອັດແຈບ,ຕົວ ຢ່າງຄືເຄື່ອງສະແຕັນເຫຼດຫຼືເຄື່ອງບັນຈຸປຼາສຕິກກໍໄດ້.ບ່ອນວາງຕູ້ຢາຄວນນ້ອຍແລະມີອາກາດລ່ວງ ດີ,ຫຼີກລ່ຽງບໍ່ໃຫ້ຖືກແດດ.ຢາພິເສດຈຳນວນໜຶ່ງຕ້ອງແຊ່ເຢັນ,ນອກນີ້,ຖ້າແມ່ນຢາບໍ່ມີການຫຸ້ມຫໍ່,ຄວນວາງໄວ້ໃນແກ້ວອັດແຈບສີນ້ຳຕານ.ສຳຄັນກວ່ານັ້ນຕ້ອງເອົາໄວ້ຢູ່ບ່ອນສູງທີ່ເດັກນ້ອຍຢື້ບໍ່ເຖິງ.
ນອກນີ້,ໃນເວລາຮັກສາຢາ,ບາງຄົນເພື່ອປະຢັດຊ່ອງຫວ່າງໃນຕູ້ຢາ,ມັກເອົາເຈັ້ຍຫຸ້ມຫໍ່ແລະໃບກຳກັບຢາຖິ້ມ,ທີ່ຈິງແລ້ວ,ເຮັດແນວນີ້ແມ່ນບໍ່ຖືກ.ມັນບໍ່ມີຜົນດີຕໍ່ຄວາມປອດໄພໃນເວລາໃຊ້ຢາ.ໃບກຳກັບຢາມີບົດບາດສຳຄັນ ໃນການແນະນຳການໃຊ້ຢາຂອງຄົນເຈັບ.ພ້ອມກັນນັ້ນ,ມັນຍັງມີລັກສະນະກົດໝາຍອັນແນ່ນອນ,ສະນັ້ນ,ເວລາກິນຢາຕ້ອງກິນຕາມໃບກຳກັບຢາ.ໂດຍສະເພາະແມ່ນຢາຕາມແພດສັ່ງບາງຊະນິດ,ໃບກຳກັບຢາໄດ້ໃຫ້ຄຳອະທິບາຍການໃຊ້ຢ່າງລະອຽດທີ່ສຸດ.ນາງໂຈ່ວຊູມິງ ນາຍໝໍຂອງໂຮງໝໍໃຫຍ່ທະຫານເຂດປັກກິ່ງເວົ້າວ່າ:ຄົນເຮົາຄວນສ້າງຄວາມຊິນເຄີຍທີ່ອ່ານໃບກຳກັບຢາໃຫ້ຄັກແນ່ກ່ອນກິນຢາ.
"ຄວນສ້າງໃຫ້ມີຄວາມຊິນເຄີຍທີ່ກິນຢາຕາມໃບກຳກັບຢາ.ຄົນເຮົາໃຜໆກໍຮູ້ວ່າ,ປັດຈຸບັນ,ຢາມີຫຼາຍຊື່.ຢາຊະນິດໜຶ່ງມັກມີຫຼາຍຊື່,ຖ້າທ່ານຮູ້ແຕ່ຊື່ອັນໃດອັນໜຶ່ງ,ບໍ່ຮູ້ວ່າຢານີ້ມີສ່ວນປະກອບຫຍັງ,ກໍມັກກິນຢາຊ້ຳເກົ່າຫຼືກິນຢ່າງຜິດພາດ."
ເຄີຍມີຄົນຜູ່ໜຶ່ງເຈັບແຂ້ວ,ໄດ້ກິນຢາ4-5ຊະນິດທີ່ມີຊື່ຕ່າງກັນພາຍໃນຊົ່ວໂມງດຽວ.ແຕ່ຍ້ອນບໍ່ໄດ້ອ່ານໃບກຳກັບຢາ,ຈິ່ງບໍ່ຮູ້ວ່າຢາເຫຼົ່ານີ້ມີສ່ວນປະກອບສຳຄັນອັນດຽວກັນຄືຢາບັນເທົາອາການເຈັບ.ໃນທີ່ສຸດ,ຄົນເຈັບຜູ່ນີ້ໄດ້ເປັນພະຍາດໝາກໄຂ່ຫຼັງຫຼົ້ມແຫຼວກະທັນຫັນຍ້ອນກິນຢາບັນເທົາອາການເຈັບເກີນກຳນົດ.
ນອກຈາກຄວາມຮູ້ດ້ານການຮັກສາຢາແລ້ວ,ໃນເວລາໃຊ້ຢາ,ຄົນເຮົາຍັງມີຫຼາຍສິ່ງຕ້ອງເອົາໃຈໃສ່ນຳ.ກ່ອນອື່ນ,ກ່ອນຈະກິນຢາ,ຕ້ອງສັງເກດໃຫ້ຄັກແນ່.ຢາຈຳນວນໜຶ່ງຍັງບໍ່ທັນກາຍ ກຳນົດ,ແຕ່ວ່າລົດແລະສີປ່ຽນແລ້ວ,ຢາແບບນີ້ແມ່ນກິນບໍ່ໄດ້.
ເວລາໝົດອາຍຸຂອງຢາແມ່ນເວລາຈຳກັດທີ່ທາງໂຮງງານຜະລິດຢາກຳນົດໄວ້,ເມື່ອກາຍເວລາກຳນົດແລ້ວຈະກິນບໍ່ໄດ້ເດັດຂາດ.ຄັນຊັ້ນ,ພາຍໃນເວລາກຳນົດມັນຈະກິນໄດ້ແນ່ນອນຫຼືບໍ່?ມັນກໍ່ບໍ່ແນ່ນອນຄືກັນ.ເພາະວ່າຢານີ້ ຮອດມື້ທີ່ທ່ານກິນນັ້ນ,ອາດຈະເສຍຄຸນແລ້ວຍ້ອນຮັກສາບໍ່ດີ,ຂົນສົ່ງບໍ່ເໝາະສົມ.ສະນັ້ນ,ພວກເຮົາກໍຕ້ອງຮຽນຮູ້ປ້ອງກັນຕົນເອງ.ຕົວຢ່າງຄື,ໃບໝາຍເຫດຕິດແກ້ວຢາໄດ້ມາດຖານຫຼືບໍ່?ແກ້ວຢາອັດແຈບດີຫຼືບໍ່?,ສີຂອງເມັດຢາໄດ້ຕົກຫຼືເປື່ອຍຊຶມຫຼືຕົກໂໝກຫຼືບໍ່?ເມື່ອປະກົດມີກໍລະນີແນວນີ້,ເຖິງວ່າຍັງບໍ່ທັນຮອດເວລາກຳນົດກໍບໍ່ຄວນກິນ.
ນອກນີ້,ເມື່ອກິນຢາແລ້ວບໍ່ຄວນດື່ມເຫຼົ້າຫຼືສູບຢາ,ເພາະວ່າຢາມີບົດບາດຕໍ່ກ່າງຮາຍຕົ້ນຕໍແມ່ນຜ່ານຈາກວັດຖຸຊະນິດໜຶ່ງທີ່ຊື່ວ່າເຊື້ອແຟັກມັງ(Ferment), ທາດແອນກໍຮໍແລະນິໂກຕີນມັກປ່ຽນລັກສະນະຂອງເຊື້ອແຟັກມັງ,ມັນຈະພາໃຫ້ຢາເສຍຄຸນຫຼືເປັນພິດ,ໂດຍສະເພາະແມ່ນເມື່ອກິນຢານອນຫຼັບແລ້ວຫ້າມບໍ່ໃຫ້ດື່ມເຫຼົ້າເດັດຂາດ.ດີທີ່ສຸດແມ່ນໃຫ້ກິນຢາດ້ວຍນ້ຳຕົ້ມ,ຢ່າກິນດ້ວຍນ້ຳຫວານ,ນ້ຳຊາຫຼືນົມ.ເພາະວ່າທາດເທຍຟີລິນTheophyllineໃນນ້ຳຊາ,ທາດໂປຼຕິນຂອງນົມ,ແລະທາດສົ້ມໃນນ້ຳຫວານລ້ວນແຕ່ຈະເກີດປະຕິກິລິຍາກັບຢາ,ແລ້ວເຮັດໃຫ້ປະສິດທິຜົນຂອງຢາເກີດມີການປ່ຽນແປງ.
1 2
|
|
|
