|
|
 |
| (GMT+08:00)
2008-04-18 13:23:12
|
 |
|
ວົງການຕ່າງໆຂອງໄທຄອງຄອຍການສົ່ງຕໍ່ທວນໄຟສັກສິດງານກິລາໂອລິມປິກປັກກິ່ງຢູ່ບາງກອກ
cri
ວັນທີ19ເມສານີ້,ຈະມີການສົ່ງຕໍ່ທວນໄຟງານກິລາໂອລິມປິກປັກກິ່ງຢູ່ບາງກອກ.ປັດຈຸບັນ,ຢູ່ນະຄອນຫຼວງບາງກອກ,ວຽກງານກະກຽມທຸກດ້ານໄດ້ກຽມພ້ອມແລ້ວ,ວົງການຕ່າງໆຂອງໄທຄອງຄອຍການມາເຖິງຂອງໄຟສັກສິດງານກິລາໂອລິມປິກດ້ວຍຄວາມກະຕືລືລົ້ນຢ່າງເຕັມປ່ຽມ.
ພິທີສົ່ງຕໍ່ທວນໄຟງານກິລາໂອລິມປິກຢູ່ທີ່ບາງກອກຈະເລີ່ມຕົ້ນຢ່າງເປັນທາງການໃນເວລາປະມານ15ໂມງຂອງວັນທີ19ເມສານີ້,ລວມມີຜູ່ສົ່ງຕໍ່ທວນໄຟ80ຄົນເຂົ້າຮ່ວມ.ທ່ານຈ່ານຊື້ຊ່າງ ກຳມະການຄະນະກຳມະການໂອລິມປິກໄທແຈ້ງໃຫ້ຊາບວ່າ:
ໃນຜູ່ສົ່ງຕໍ່ທວນໄຟ80ຄົນນັ້ນ,ນອກຈາກນັກກິລາແລ້ວ,ທີ່ຍັງເຫຼືອລ້ວນແຕ່ແມ່ນຜູ່ອາຍຸສູງສົມຄວນ,ແຕ່ວ່າ,ເຂົາເຈົ້າໄດ້ມີການກະກຽມດ້ານຈິດໃຈແລ້ວ,ກ່ອນຈະແລ່ນສົ່ງຕໍ່ທວນໄຟ,ເຂົາເຈົ້າຈະມີການຝຶກຫັດແບບລວມໝູ່.
ທ່ານສຽນເຟິງ ນັກປະພັນສຳຄັນອັນດັບໜຶ່ງທັງເປັນຫົວໜ້າສຳນັກໜັງສືພິມຊື້ເຈຢື້ປ້າວສະບັບພາສາຈີນຂອງໄທແມ່ນນັກສົ່ງຕໍ່ທວນໄຟຜູ່ໜຶ່ງທີ່ສະເໜີຊື່ໂດຍສະຖານທູດຈີນປະຈຳໄທ.ໃນເວລາໃຫ້ສຳພາດຕໍ່ນັກຂ່າວ,ທ່ານກ່າວວ່າ,ຄວາມໄຝ່ຝັນຈັດງານກິລາໂອລິມປິກໃນ100ປີທີ່ຜ່ານມາຂອງປະຊາຊາດຈີນໄດ້ບັນລຸເປັນຈິງແລ້ວ,ທ່ານຮູ້ສຶກພາກພູມໃຈເພື່ອປະເທດຊາດ.ທ່ານກ່າວວ່າ:
"ຂ້າພະເຈົ້າເອງມີກຽດທີ່ໄດ້ຮັບການສະເໜີຊື່ຈາກສະຖານທູດຈີນປະຈຳໄທ,ຈິ່ງໄດ້ກາຍເປັນໜຶ່ງໃນຜູ້ສົ່ງຕໍ່ທວນໄຟ80ຄົນ.ຂ້າພະເຈົ້າຮູ້ສຶກມີກຽດຫຼາຍ,ນີ້ກໍ່ເປັນກຽດສັກສິທີ່ປະເທດຊາດມອບໃຫ້ແກ່ຊາວຈີນຕ່າງດ້າວຄືພວກຂ້າພະເຈົ້າ."
ລັດຖະບານໄທໃຫ້ຄວາມສຳຄັນຫຼາຍຕໍ່ການສົ່ງຕໍ່ທວນໄຟງານກິລາໂອລິມປິກທີ່ບາງກອກ,ທ່ານສະໝັກສຸນທໍລະເວດ ນາຍົກລັດຖະມົນຕີໄທບອກວ່າ,ໄດ້ສ້າງຕັ້ງຄະນະກຳມະການເພື່ອການສົ່ງຕໍ່ທວນໄຟງານກິລາໂອລິມປິກທີ່ບາງກອກໂດຍມີທ່ານສະໜັ່ນຂະຈອນປະສາດຮອງນາຍົກລັດຖະມົນຕີໄທເປັນປະທານ,ທ່ານວີລະສັກໂຄວະສຸລັດ ລັດຖະມົນຕີວ່າການກະຊວງການທ່ອງທ່ຽວແລະການກິລາໄທເປັນຮອງປະທານ.
ໃນເວລາໃຫ້ສຳພາດຕໍ່ນັກຂ່າວໃນຫວ່າງມໍ່ໆນີ້,ທ່ານສະໜັ່ນ ຂະຈອນປະສາດ ຮອງນາຍົກລັດຖະມົນຕີໄທກ່າວວ່າ,ການສົ່ງຕໍ່ທວນໄຟງານກິລາໂອລິມປິກແມ່ນກິດຈະກຳສຳຄັນທີ່ສຸດ,ໃນຖານະເປັນປະເທດໜຶ່ງທີ່ຈັດການສົ່ງຕໍ່ທວນໄຟ,ປະຊາຊົນໄທຮູ້ສຶກທະນົງໃຈທີ່ສຸດ.ທ່ານກ່າວວ່າ,ຝ່າຍຕ່າງໆຂອງປະເທດໄທພວມເພີ່ມທະວີການປະສານງານກັນ,ອອກແຮງສຸດຂີດເພື່ອຈັດກິດຈະກຳສົ່ງຕໍ່ທວນໄຟໃຫ້ສຳເລັດຜົນ.ທ່ານກ່າວວ່າ:
"ໂດຍຕາງໜ້າໃຫ້ຄົນໄທ,ຂ້າພະເຈົ້າສາມາດາສະແດງຄວາມສະໜັບສະໜູນຂອງພວກຂ້າພະເຈົ້າທີ່ມີຕໍ່ການສົ່ງຕໍ່ທວນໄຟແລະຕໍ່ປັກກິ່ງຈັດງານກິລາໂອລິມປິກ.ບາງຄົນມີຄວາມເຫັນຕ່າງກັນ,ນີ້ແມ່ນບັນຫາຫຍຸ້ງຍາກອັນໜຶ່ງ.ໃນຖານະເປັນຜູ່ຈັດຕັ້ງການສົ່ງຕໍ່ທວນໄຟ,ພວກຂ້າພະເຈົ້າຮຽກຮ້ອງວ່າບໍ່ຄວນໃຫ້ເກີດມີຄວາມບໍ່ສະດວກແນວນີ້,ໃນເວລາສົ່ງຕໍ່ທວນໄຟຢູ່ໄທ,ພວກຂ້າພະເຈົ້າກໍ່ຫວັງວ່າບໍ່ຢາກໃຫ້ເກີດເຫດການໃດໆ.ຂ້າພະເຈົ້າສາມາດເວົ້າໄດ້ວ່າ,ປະຊາຊົນໄທສະໜັບສະໜູນງານກິລາໂອລິມປິກປັກກິ່ງ.ທຸກສິ່ງທຸກຢ່າງໄດ້ກຽມພ້ອມແລ້ວ."
1 2
|
|
|
