|
|
 |
| (GMT+08:00)
2008-04-18 13:23:12
|
 |
|
ວົງການຕ່າງໆຂອງໄທຄອງຄອຍການສົ່ງຕໍ່ທວນໄຟສັກສິດງານກິລາໂອລິມປິກປັກກິ່ງຢູ່ບາງກອກ
cri
ໃນຖານະທີ່ເປັນເພື່ອນເກົ່າຂອງປະຊາຊົນຈີນ,ທ່ານຊະວະລິດ ຍົງໃຈຍຸດ ອະດີດນາຍົກລັດຖະມົນຕີໄທກໍ່ໄດ້ສະແດງຄວາມສະໜັບສະໜູນງານກິລາໂອລິມປິກປັກກິ່ງເຊັ່ນດຽວກັນ.ໃນເວລາໃຫ້ສຳພາດຕໍ່ນັກຂ່າວ,ທ່ານກ່າວວ່າ,
"ງານກິລາໂອລິມປິກປັກກິ່ງແມ່ນເຫດການໃຫຍ່ໂຕມະໂຫລານຂອງປະຊາຊົນທົ່ວໂລກ,ແມ່ນກິດຈະກຳທີ່ສາມາດເພີ່ມຄວາມສາມັກຄີຂອງມວນມະນຸດ,ຢູ່ບາງປະເທດໄດ້ເກີດມີການກະທຳທີ່ຂັດຂວາງການສົ່ງຕໍ່ທວນໄຟ,ນີ້ແມ່ນເລື່ອງທີ່ເຂົ້າໃຈຍາກ.ປັກກິ່ງຈັດງານກິລາໂອລິມປິກ,ບໍ່ພຽງແຕ່ແມ່ນຄວາມພາກພູມໃຈຂອງປະຊາຊົນຈີນ,ຍັງແມ່ນຄວາມທະນົງໃຈຂອງປະຊາຊົນອາຊີອີກດ້ວຍ.ຂ້າພະເຈົ້າເອງອອກແຮງສຸດຂີດສະໜັບສະໜູນງານກິລາໂອລິມປິກປັກກິ່ງຈັດຂຶ້ນດ້ວຍຜົນສຳເລັດອັນຈົບງາມ."
ທ່ານຊະວະລິດຍົງໃຈຍຸດ ຍັງກ່າວວ່າ,ງານກິລາໂອລິມປິກປັກກິ່ງສົ່ງຕໍ່ຢູ່ນອກດິນຈີນ,ເຮັດໃຫ້ປະເທດແລະເຂດແຄວ້ນຫຼາຍກວ່າເກົ່າແບ່ງປັນຄວາມມ່ວນຊື່ນທີ່ງານກິລາໂອລິມປິກນຳມາໃຫ້.ທ່ານກ່າວວ່າ,ປະເທດໄທພວມຊຸກຍູ້ໃຫ້ມີຄົນຫຼາຍກວ່າເກົ່າໄດ້ເຂົ້າຮ່ວມພິທີໄຂງານກິລາໂອລິມປິກປັກກິ່ງ.
ເສັ້ນທາງສົ່ງຕໍ່ທວນໄຟງານກິລາໂອລິມປິກຢູ່ບາງກອກແມ່ນເສັ້ນທາງທ່ອງທ່ຽວທີ່ດີເດັ່ນ.ປີນີ້ ພໍດີແມ່ນປີທ່ອງທ່ຽວຂອງໄທ,ລັດຖະບານໄທຫວັງຢາກໃຊ້ໂອກາດສົ່ງຕໍ່ທວນໄຟເພື່ອສະແດງສິ່ງກໍ່ສ້າງທີ່ເປັນສັນຍະລັກຂອງບາງກອກຕໍ່ຊາວໂລກ.ທ່ານວີລະສັກໂຄວະສຸລັດ ລັດຖະມົນຕີວ່າການກະຊວງການທ່ອງທ່ຽວແລະການກິລາໄທໃຫ້ສຳພາດຕໍ່ນັກຂ່າວໃນຫວ່າງມໍ່ໆນີ້ວ່າ:
"ການສົ່ງຕໍ່ທວນໄຟຈະເລີ່ມຈາກຖະໜົນຢາວຮວາເລັກຄຸ້ມໄຊນາທາວຂອງເມືອງເກົ່າບາງກອກ,ຜ່ານພະລາຊະວັງຫຼວງ,ຖະໜົນລາຊະດຳເນີນ,ພະລາຊະວັງຈິດລັດດາລະໂຫຖານທີ່ເປັນທີ່ຢູ່ຂອງເຈົ້າຊີວິດໄທປັດຈຸບັນໄປສຸດຢູ່ຕໍ່ໜ້າຮູບປັ້ນກະສັດລາມາທິບໍດີທີ5.ຂ້າພະເຈົ້າເອງຈະເຂົ້າຮ່ວມກິດຈະກຳສົ່ງຕໍ່ທວນໄຟ.ຂ້າພະເຈົ້າເຊື່ອວ່າ,ປະຊາຊົນໄທລ້ວນແຕ່ຍິນດີຕ້ອນຮັບທວນໄຟທີ່ຈະມາເຖິງຢ່າງເບີກບານມ່ວນຊື່ນທີ່ສຸດ,ນີ້ແມ່ນໄຟສັກສິດງານກິລາໂອລິມປິກມາໄທເທື່ອທຳອິດ."
ນອກຈາກເຈົ້າໜ້າທີ່ທາງການ ສະແດງທ່າທີແລ້ວ,ມວນຊົນໄທກໍ່ປ່ຽມລົ້ນໄປດ້ວຍຄວາມຄອງຄອຍຕໍ່ທວນໄຟງານກິລາໂອລິມປິກປັກກິ່ງທີ່ຈະສົ່ງມາເຖິງ,ແລະສະແດງຄວາມສະໜັບສະໜູນງານກິລາໂອລິມປິກຢ່າງຈູບຈ້າວຫ້າວຫັນ.ນາງນິດ ຄົນບາງກອກບອກວ່າ:
"ພວກເຮົາກໍເໝືອນດັ່ງອ້າຍເອື້ອຍນ້ອງ,ຢູ່ໄທ,ທ່ານຈະໄດ້ເຫັນຄົນຈີນຫຼາຍໆຄົນມາດຳລົງຊີວິດຢູ່ໄທກໍກາຍເປັນຄົນໄທ,ຢູ່ໄທບໍ່ມີການຈຳແນກເຊື້ອຊາດ.ຄົນຈີນເຫຼົ່ານີ້ໄດ້ປະກອບສ່ວນເປັນຢ່າງດີໃຫ້ແກ່ສັງຄົມຂອງໄທ.ຂ້ອຍເຄີຍໄປຈີນປະມານ10ກວ່າປີກ່ອນ.ຂ້ອຍໄດ້ເຫັນສະພາບຂອງຈີນຢູ່ທາງໂທລະພາບ,ຮູ້ສຶກຕື່ນເຕັ້ນທີ່ສຸດ.ຂ້ອຍຄອງຄອງຈະມີໂອກາດໄປຈີນອີກ,ໂດຍສະເພາະແມ່ນໃນເວລາປັກກິ່ງຈັດງານກິລາໂອລິມປິກ,ຫວັງຢາກໄປທີ່ສຸດ."
ນາງຢາງປາວຈຸ່ນແມ່ນນັກສຶກສາໄທທີ່ພວມຮຽນຢູ່ມະຫາວິທະຍາໄລ,ບັນພະບູລຸດຂອງນາງແມ່ນມາຈາກແຂວງຟູຈ້ຽນຂອງຈີນ,ແມ່ນລຸ້ນທີ3ຂອງເຊື້ອສາຍຊາວຈີນ,ຮຽນພາສາຈີນໄດ້ປະມານ7ປີແລ້ວ.ນາງບອກວ່າ:
"ງານກິລາໂອລິມປິກປັກກິ່ງແມ່ນເວທີສະແດງລະດັບໂລກ.ໃນຖານະເປັນຄົນຮຸ່ນຫຼັງຂອງຊາວຈີນ,ຂ້າພະເຈົ້າຄິດວ່າງານກິລາໂອລິມປິກປັກກິ່ງແມ່ນເລື່ອງທີ່ກ່ຽວພັນເຖິງຊາວຈີນທົ່ວໂລກ.ອົງການປົກຄອງປັກກິ່ງແລະປະຊາຊົນພ້ອມດ້ວຍຝ່າຍຕ່າງໆລ້ວນແຕ່ໄດ້ທຳຄວາມພະຍາຍາມເພື່ອງານກິລາໂອລິມປິກ.ຂ້ອຍໄດ້ເບິ່ງຈາກໂທລະພາບວ່າ,ຢູ່ປັກກິ່ງບໍ່ວ່າແມ່ນຜູ່ເຖົ້າຫຼືວ່າເດັກນ້ອຍລ້ວນແຕ່ພວມຮຽນພາສາອັງກິດ,ໃຫ້ຊາວໂລກໄດ້ເຫັນປັກກິ່ງໃໝ່,ແລ້ວຊາວໂລກຈະເບິ່ງປັກກິ່ງດ້ວຍສາຍຕາໃໝ່,ຂ້ອຍຂໍອວຍພອນໃຫ້ງານກິລາໂອລິມປິກປັກກິ່ງຈົ່ງໄດ້ຮັບຜົນສຳເລັດໃນທຸກດ້ານ."
1 2
|
|
|
