ການທ່ອງທ່ຽວ"ງານກິລາໂອລິມປິກ"ຂອງເດັກນ້ອຍຈາກ56ຊົນເຜົ່າ
-----------------------------------------------------------------------------------------------------------------
ການທ່ອງທ່ຽວ"ງານກິລາໂອລິມປິກ"ຂອງເດັກນ້ອຍຈາກ56ຊົນເຜົ່າທີ່ໄດ້ຮັບການເຊີນຈາກຄະນະກຳມະການຈັດຕັ້ງງານກິລາໂອລິມປິກປັກກິ່ງນັ້ນໄດ້ສິ້ນສຸດລົງແລ້ວຢູ່ທີ່ປັກກິ່ງໃນເມື່ອບໍ່ດົນມານີ້." ປັກກິ່ງ2008"ພາກນີ້,ພວກເຮົາຈະໄປຊອກຮູ້ການທ່ອງທ່ຽວເພື່ອສຳຜັດກັບງານກິລາໂອລິມປິກຂອງເດັກນ້ອຍເຫຼົ່ານີ້.
ໃນເດັກນ້ອຍຈາກ56ຊົນເຜົ່າເຫຼົ່ານີ້,ຜູ່ອາຍຸໃຫຍ່ກວ່າໝູ່ແມ່ນ15ປີ, ນ້ອຍທີ່ສຸດແມ່ນ8ປີ,ເຂົາເຈົ້າມາຈາກແຫ່ງຕ່າງໆຂອງຈີນເຊັ່ນແຂວງເສສວນ ເຂດຕິເບດ ເຂດຊິນຈ່ຽງເປັນຕົ້ນ.ໃນເດັກນ້ອຍ56ຄົນນີ້,ມີ49ຄົນເປັນຄົນພິການດ້ານຮ່າງກາຍຫຼືດ້ານຫູ ຕາ.ເຂົາເຈົ້າສ່ວນຫຼາຍແມ່ນໄປປັກກິ່ງເປັນເທື່ອທຳອິດ.ໃນນັ້ນມີເດັກນ້ອຍສອງຄົນແມ່ນມາຈາກກິ່ງແຂວງອາປ້າທີ່ເປັນເຂດປະສົບໄພແຜ່ນດິນໄຫວແຂວງເສສວນ. ເຮືອນຂອງເຂົາເຈົ້າເພພັງໃນແຜ່ນດິນໄຫວຮ້າຍແຮງເມືອງເວີ້ນຊ່ວນແຂວງເສສວນເມື່ອວັນທີ12ພຶດສະພາແລ້ວນີ້,ແຕ່ຢູ່ຕໍ່ໜ້າຄົນອື່ນ,ເຂົາເຈົ້າຍັງມ່ວນຊື່ນແລະກ້າຫານຢູ່ຄືເກົ່າ.ນາງເສີນກູລູ້ ເດັກນ້ອຍ ເຜົ່າຊ່ຽງທີ່ມາຈາກແຂວງເສສວນບອກວ່າ:
ຂ້ອຍຫວັງຢາກຮ່ວມກັບເດັກນ້ອຍທີ່ບໍ່ເຄີຍໄປປັກກິ່ງນັ້ນໄປເບິ່ງພິທີໄຂງານກິລາໂອລິມປິກຢູ່ປັກກິ່ງ."
ເມື່ອໄດ້ທ່ຽວຊົມສະໜາມກິລາຮັງນົກແລ້ວ,ນາງຢາງຊິນຊິນ ເດັກນ້ອຍເຜົ່າຕົ້ງທີ່ມາຈາກແຂວງກຸ້ຍໂຈ່ວກ່າວວ່າ,
"ຂ້ອຍຄິດວ່າສະໜາມກິລາຮັງນົກກໍ່ເໝືອນດັ່ງຮັງທີ່ນົກຄາບກິ່ງໄມ້ເຮັດຂຶ້ນ,ມັນງາມຫຼາຍີ."
ນອກຈາກສະໜາມກິລາຮັງນົກແລະກ້ອນນ້ຳສີ່ຫຼ່ຽມແລ້ວ,ເດັກນ້ອຍທັງຫຼາຍຍັງໄປທັດສະນະສຶກສາແລະແລກປ່ຽນບົດຮຽນນຳກັນຢູ່ສູນຄຸ້ມຄອງກິລາໂອລິມປິກຄົນພິການຈີນ ຢູ່ນະຄອນຫຼວງປັກກິ່ງ.ຢູ່ສະໜາມຝຶກຂອງງານກິລາໂອລິມປິກຄົນພິການທີ່ກວ້າງຂວາງ,ເດັກນ້ອຍທີ່ມັກມ່ວນມັກເຕັ້ນເຫຼົ່ານີ້ສະແດງໃຫ້ເຫັນຄວາມກະຕືລືລົ້ນຕໍ່ກິລາຢ່າງສຸດໃຈ.ນັກກິລາບານເຕະປາກືກແລະຫູໜວກທີ່ພວມຝຶກຊ້ອມກຽມງານກິລາໂອລິມປິກຄົນພິການນັ້ນໄດ້ຮ່ວມກັບເດັກນ້ອຍເຫຼົ່ານີ້ ແຂ່ງຂັນບານເຕະມິດຕະພາບ,ແລະ ສອນເຂົາເຈົ້າຍິງປະຕູ ສົ່ງບານແລະເຕັກນິກພື້ນຖານອື່ນໆດ້ວຍໂຕຕໍ່ໂຕ.
ເຖິງວ່າເດັກນ້ອຍເຫຼົ່ານີ້ສ່ວນຫຼາຍພິການທາງຮ່າງກາຍກໍ່ຕາມ,ແຕ່ມັນກໍ່ບໍ່ໄດ້ເປັນອຸປະສັກຕໍ່ຄວາມມັກຮັກກິລາຂອງເຂົາເຈົ້າມັກການກິລາ.ທ້າວດານີຢາຣ ຊາວເຜົ່າອຸຍອູ ເປັນຕາເຝື້ອ,ແຕ່ເມື່ອນັກຂ່າວຖາມລາວວ່າມັກ ກິລາປະເພດໃດ,ລາວເວົ້າອອກມາຫຼາຍປະເພດໃນບາດດຽວ:
"ບານບ້ວງ ເຕັ້ນເຊືອກ ເຊືອກໃຫຍ່ ເຊືອກນ້ອຍ ບານເຕະ"
ຢູ່ ອາຄານຄະນະກຳມະການຈັດ ງານກິລາໂອລິມປິກປັກກິ່ງທີ່ເປັນສູນບັນຊາການຂອງງານກິລາໂອລິມປິກປັກກິ່ງແລະງານກິລາໂອລິມປິກຄົນພິການປັກກິ່ງ,ເດັກນ້ອຍຂອງແຕ່ລະຊົນເຜົ່າລ້ວນແຕ່ໄດ້ຮັບເຄື່ອງລະລຶກຊຸດໜຶ່ງຄືຕຸກກະຕາຝູວາທີ່ເປັນສັດນຳໂຊກຂອງງານກິລາໂອລິມປິກ.ນາງຕົ່ວເຈຊາມູ ເດັກຍິງເຜົ່າຕິເບດອາຍຸ13ປີໄດ້ຕາງໜ້າເມືອງຕ່ານປ່າແຂວງເສສວນມອບຜ້າຮາດາທີ່ຂ່າວສະອາດໃຫ້ຜູ່ຮັບຜິດຊອບງານກິລາໂອລິມປິກຄົນພິການປັກກິ່ງ,ແລະມອບຜ້າແສ່ວທີ່ມີຊື່ວ່າ"ໂລກດຽວຄວາມຝັນດຽວ"ທີ່ສອງເອື້ອຍນ້ອງພິການ ແສ່ວດ້ວຍຕີນນັ້ນໃຫ້ງານກິລາໂອລິມປິກຄົນພິການປັກກິ່ງ.ເດັກນ້ອຍເຜົ່າອີທີ່ມາຈາກແຂວງເສສວນແລະເດັກນ້ອຍເຜົ່າລື້ທີ່ມາຈາກແຂວງຢຸນນານກໍ່ໄດ້ມອບຂອງຂວັນຂອງຕົນເພື່ອສະແດງຄວາມອວຍພອນຕໍ່ງານກິລາໂອລິມປິກປັກກິ່ງ.
ໃນມື້ສຸດທ້າຍຂອງກິດຈະກຳການທ່ອງທ່ຽວງານກິລາໂອລິມປິກປັກກິ່ງ,ຝ່າຍເຈົ້າພາບໄດ້ຈັດພິທີອັດກິດຈະກຳເພື່ອການທ່ອງທ່ຽວງານກິລາໂອລິມປິກປັກກິ່ງຂອງເດັກນ້ອຍຈາກ56ຊົນເຜົ່າ.ໃນພິທີດັ່ງກ່າວ,ເດັກນ້ອຍເຫຼົ່ານີ້ພາກັນນຸ່ງເຄື່ອງທີ່ສວຍງາມຂອງຊົນເຜົ່າຕົນ,ພ້ອມກັນຟ້ອນລຳທຳເພງ,ແລະຟ້ອນຊົນເຜົ່າເພື່ອສະແດງຄວາມຖະໜຸຖະໜອມຕໍ່ຊີວິດ,ໃຊ້ສຽງ ທີ່ໜຸ່ມນ້ອຍເພື່ອສະແດງຄວາມໃຝ່ຝັນຂອງຕົນ.ໃນພີທີດັ່ງກ່າວ,ນາງຕົ່ງຟ່າງ ເດັກນ້ອຍຈາກເຜົ່າກີໂນໄດ້ຮ້ອງເພງໜຶ່ງທີ່ແມ່ສອນໃຫ້ຄືເພງ"ບ້ານເຜົ່າກີໂນຍິນດີຕ້ອນຮັບທ່ານ",ນາງຍັງເຊີນເພື່ອນໃໝ່ທີ່ຮູ້ຈັກກັນຢູ່ປັກກິ່ງໄປເປັນແຂກຢູ່ບ້ານນາງ.ນາງບອກວ່າ:
"ທ່ຽວຢູ່ປັກກິ່ງມາຫຼາຍມື້ ມ່ວນຫຼາຍ,ຍັງໄດ້ຮູ້ຈັກກັບໝູ່ເພື່ອນທີ່ດີຫຼາຍຄົນ,ຂ້ອຍຫວັງວ່າໝູ່ເພື່ອນທີ່ດີເຫຼົ່ານີ້ຈະໄປທ່ຽວບ້ານເຜົ່າກີໂນພວກເຮົາ."
ວັນທີ23ມີຖຸນາແລ້ວນີ້,ການທ່ອງທ່ຽວງານກິລາໂອລິມປິກປັກກິ່ງຂອງເດັກນ້ອຍຈາກ56ຊົນເຜົ່າໄດ້ສິ້ນສຸດລົງຢ່າງເປັນທາງການແລ້ວ,ນີ້ແມ່ນການທ່ອງທ່ຽວທີ່ເຮັດໃຫ້ຄວາມຝັນຂອງບັນດາເດັກນ້ອຍປະກົດຜົນເປັນຈິງແລະກໍ່ແມ່ນການທ່ອງທ່ຽວແຫ່ງຄວາມຮັກແພງ.ໃນກິດຈະກຳເທື່ອນີ້,ນັກຂ່າວເຫັນພະນັກງານເອົາໃຈໃສ່ແລະຫ່ວງໃຍຕໍ່ພວກເດັກນ້ອຍ,ເດັກນ້ອຍທັງຫຼາຍກໍ່ຮັກແພງກັນດີ.ນາງຕົ່ວເຈຊາມູ ເດັກນ້ອຍເຜົ່າຕິເບດອາຍຸ13ປີທີ່ມາຈາກເມືອງຕ່ານປ່າກິ່ງແຂວງກ່ານຈື່ແຂວງເສສວນແຕ່ເດີມເປັນຄົນບໍ່ມັກເວົ້າ,ແຕ່ໃນກິດຈະກຳຫຼາຍມື້ທີ່ຜ່ານມາ,ມີຮອຍຍິ້ມເທິງໃບໜ້າຂອງນາງຫຼາຍຂຶ້ນ,ແລະກໍຍິນດີລົມກັບຄົນອື່ນ.ນາງເວົ້າວ່າ:
"ພວກເຮົາຜ່ານຈາກການແນະນຳຕົວເອງແລ້ວໄດ້ຮູ້ຈັກກັບໝູ່ເພື່ອນຫຼາຍຄົນ,ໃນນັ້ນມີສາວນ້ອຍຜູ່ໜຶ່ງຊື່ວ່າເສີນກູລູ້.ມືທັງສອງຂອງນາງພິການ,ແຕ່ນາງເຕັມໄປດ້ວຍຄວາມໝັ້ນໃຈຕໍ່ຊີວິດ.ຂ້ອຍຖາມນາງວ່າ ເຈົ້າພິການທັງສອງມື,ເຈົ້າຮູ້ສຶກທໍ້ຖ້ອຍໃຈບໍ່ໃນເວລາທີ່ເຮັດຫຍັງກໍ່ບໍ່ສະດວກ.ນາງເສີນກູລູ້ບອກຂ້ອຍຢ່າງເດັດດ່ຽວວ່າ"ບໍ່, ມືຂວາຂ້ອຍຍັງຂຽນໜັງສືໄດ້,ຂໍພຽງແຕ່ຂ້ອຍຕັ້ງໃຈຮ່ຳຮຽນ ດຸໝັ້ນຂະຫຍັນພຽນ,ໃນພາຍໜ້າ,ເຕັກນິກການແພດພັດທະນາຕື່ມແລ້ວ,ກໍ່ສາ
ມາດປົວມືທັງສອງໃຫ້ຫາຍດີໄດ້,ແລ້ວຂ້ອຍຈະທ້ອນເງິນໃຫ້ຫຼາຍໆເພື່ອຊ່ວຍເຫຼືອເດັກນ້ອຍທີ່ຕ້ອງການຄວາມຊ່ວຍເຫຼືອ."
ໃນກິດຈະກຳເທື່ອນີ້,ເດັກນ້ອຍໄດ້ນຸ່ງຊຸດຊົນເຜົ່າຕະຫຼອດ,ເຫັນໄດ້ວ່າເຂົາເຈົ້າໃຫ້ຄວາມສຳຄັນຫຼາຍທີ່ສຸດແກ່ການທ່ອງທ່ຽວງານກິລາໂອລິມປິກເທື່ອນີ້.ນາງກູນຈາມາຣີ ທີ່ເປັນຊາວເຜົ່າຕາຊັກ ບອກວ່າ,
"ເທື່ອນີ້ຂ້ອຍຕາງໜ້າເຜົ່າຕາຊັກມາປັກກິ່ງ,ຂ້ອຍພະຍາຍາມຮຽນເອົາຄວາມຮູ້ກ່ຽວກັບງານກິລາໂອລິມປິກໃຫ້ຫຼາຍເທົ່າທີ່ຈະຫຼາຍໄດ້,ແລ້ວຈະບອກຄົນໃນບ້ານເກີດນ້ອຍວ່າງານກິລາໂອລິມປິກມັນດີຫຼາຍ,ໃຫ້ເຂົາເຈົ້າມີສ່ວນຮ່ວມໃນງານກິລາໂອລິມປິກ ສະໜັບສະໜູນແລະເຂົ້າຮ່ວມງານກິລາໂອລິມປິກ."
ເຖິງວ່າການທ່ອງທ່ຽວງານກິລາໂອລິມປິກໄດ້ສິ້ນສຸດແລ້ວ,ແຕ່ມັນໄດ້ສ້າງພາບປະທັບໃຈອັນເລິກເຊິ່ງໃຫ້ແກ່ເດັກນ້ອຍທັງຫຼາຍ.ໄປປັກກິ່ງເທື່ອທຳອິດ,ທ່ຽວຊົມ ສະໜາມກິລາຮັງນົກແລະກ້ອນນ້ຳສີ່ຫຼ່ຽມເປັນເທື່ອທຳອິດ,ເບິ່ງການຊັກທຸງຊາດຢູ່ສະໜາມຫຼວງທຽນອ່ານເມີນເປັນເທື່ອທຳອິດ,ກິນແມັກໂດໂນເປັນເທື່ອທຳອິດ,ຍ້ອນວ່າມີເທື່ອທຳອິດຫຼາຍຢ່າງ,ເຊື່ອວ່າການທ່ອງທ່ຽວທີ່ສົມຄວາມປາຖະໜາເທື່ອນີ້ຈະເປັນຄວາມຊົງຈຳອັນປະເສີດໃນຊີວິດຂອງເຂົາເຈົ້າ.ພວກເຮົາຂໍອວຍພອນໃຫ້ເຂົາເຈົ້າດຳລົງຊີວິດຢ່າງເບີກບານມ່ວນຊື່ນຕະຫຼອດໄປ.
ຫວ່າງມໍ່ໆນີ້,ຢູ່ທີ່ປັກກິ່ງ,ທ່ານອູຊຽນລິນ ເອກອັກຄະລັດຖະທູດມຽນມາປະຈຳຈີນກ່າວວ່າ,ເຖິງວ່າປີ2008,ຈີນໄດ້ປະສົບໄພລົມພາຍຸຫິມະຕົກໜັກແລະແຜ່ນດິນໄຫວຮ້າຍແຮງກໍ່ຕາມ,ແຕ່ປະຊາຊົນຈີນສາມັກຄີກວ່າເກົ່າ,ນ້ຳໃຈປະຊາຊາດເຊີດຊູຢ່າງໃຫຍ່ໂດຍບໍ່ເຄີຍມີມາກ່ອນ.ເຊື່ອວ່າງານກິລາໂອລິມປິກປັກກິ່ງຍ່ອມຈະຈັດຂຶ້ນຢ່າງສຳເລັດຜົນໂດຍຢູ່ພາຍໃຕ້ການສະໜັບສະໜູນຂອງປະຊາຄົມໂລກ.ໃນເວລາໃຫ້ສຳພາດຕໍ່ນັກຂ່າວວິທະຍຸພວກເຮົາ,ທ່ານອູຊຽນລິນກ່າວວ່າ,
"ປະຊາຊາດຈີນເວລາໃດກໍ່ບໍ່ ຍອມຈຳນົນຕໍ່ຄວາມຫຍຸ້ງຍາກ,ບໍ່ວ່າຈະປະສົບຄວາມຫຍຸ້ງຍາກໃດກໍ່ລ້ວນແຕ່ຈະກ້າວໄປໜ້າຢ່າງກ້າຫານຈົນໄດ້ຮັບໄຊຊະນະໃນທີ່ສຸດ.ຂ້າພະເຈົ້າເຊື່ອວ່າພາຍໃຕ້ຄວາມພະຍາຍາມຂອງ່ລັດຖະບານແລະປະຊາຊົນຈີນ,ງານກິລາໂອລິມປິກປັກກິ່ງຍ່ອມຈະໄດ້ຮັບຜົນສຳເລັດຢ່າງຈົບງາມ,ກາຍເປັນຄວາມພາກມູມໃຈຂອງທົ່ວອາຊີ"
ທ່ານຊູດຼາຈັດ ເອກອັກຄະລັດຖະທູດອິນໂດເນເຊຍປະຈຳຈີນກ່າວຢູ່ປັກກິ່ງວ່າ,ພາຍໃນ7ປີຫຼັງຈາກປັກກິ່ງໄດ້ຮ້ອງຂໍເປັນເຈົ້າພາບຈັດງານກິລາໂອລິມປິກຢ່າງສຳເລັດຜົນ,ວົງການຕ່າງໆຂອງຈີນໄດ້ທຳການກະກຽມຢ່າພຽງພໍເພື່ອງານກິລາໂອລິມປິກ,ງານກິລາໂອລິມປິກປັກປັກກິ່ງຈັດຂຶ້ນຢ່າງສຳເລັດຜົນແມ່ນຄວາມປາຖະໜາຮ່ວມຂອງປະຊາຊົນບັນດາປະເທດ.
ໃນເວລາໃຫ້ສຳພາດຕໍ່ນັກຂ່າວວິທະຍຸພວກເຮົາ,ທ່ານຊູດຼາຈັດກ່າວວ່າ,
"ຂໍອວຍພອນໃຫ້ງານກິລາໂອລິມປິກປັກກິ່ງໄດ້ຮັບຜົນສຳເລັດຢ່າງເຕັມເມັດເຕັມໜ່ວຍ,ນີ້ແມ່ນຄວາມປາຖະໜາຮ່ວມຂອງປະຊາຊົນບັນດາປະເທດ.ຈີນຜ່ານຈາກການປະຕິຮູບແລະໄຂປະຕູສູ່ພາຍນອກເປັນເວລາ30ປີ່,ໄດ້ກາຍເປັນປະເທດພວມພັດທະນາທີ່ກ້າວໜ້າ.ທົ່ວໂລກລ້ວນແຕ່ເອົາໃຈໃສ່ນຳປັກກິ່ງ.ງານກິລາໂອ
ລິມປັກກິ່ງຈັດຂຶ້ນຢ່າງສຳເລັດຜົນຈະກາຍເປັນຂີດໝາຍທີ່ບັນລຸ"ໂລກດຽວ ຄວາມຝັນດຽວ".
