ຜູ້ຊະນະເລີດມາລາທອນລ້າງຄວາມອັບປະຍົດໃນປະຫວັດສາດ
-----------------------------------------------------------------------------------------------------------------
ທ່ານຜູ້ຟັງທີ່ເຄົາລົບ, ງານກິລາໂອລິມປິກແມ່ນງານມະໂຫລານຂອງນັກກິລາທົ່ວໂລກ, ບັນດານັກກິລາພະຍາຍາມເອົາຊະນະຕົນເອງຢ່າງບໍ່ຢຸດຢັ້ງເພື່ອກ້າວໄປສູ່ເປົ້າໝາຍ "ສູງກວ່າເກົ່າ, ໄວກວ່າເກົ່າ, ແຂງກວ່າເກົ່າ", ຜູ້ພົ້ນເດັ່ນກວ່າໝູ່ຈະກາຍເປັນບຸກຄົນທີ່ປະຊາຊົນປະເທດຕົນແລະປະຊາຊົນທົ່ວໂລກເຄົາລົບນັບຖືແລະຈື່ຈຳໄວ້ໃນໃຈ. ທ່ານຮວາງຢົງໂຈ ນັກກິລາຂອງສ.ເກົາຫຼີໃນການແຂ່ງຂັນມາລາທອນເພດຊາຍໃນງານກິລາໂອລິມປິກບາເຊໂລນາປີ 1992 ກໍ່ແມ່ນບຸກຄົນແບບນີ້, ລາວໄດ້ລ້າງຄວາມອັບປະຍົດໃນປະຫວັດສາດງານກິລາໂອລິມປິກຂອງສ.ເກົາຫຼີດ້ວຍຜົນສຳເລັດຂອງຕົນ. ໃນລາຍການປັກກິ່ງ 2008 ນີ້, ເຊີນຟັງບົດແຈ້ງຂ່າວກ່ຽວກັບເລື່ອງນີ້ທີ່ນັກຂ່າວ CRI ປະຈຳສ.ເກົາຫຼີສົ່ງມາ.
ທ່ານຮວາງຢົງໂຈ ຄູເຝິກຂອງທິມມາລາທອນສະມາຄົມພັດທະນາກິລາປະຊາຊົນສ.ເກົາຫຼີໃນປະຈຸບັນເປັນຄົນຮູບຮ່າງບໍ່ສູງປານໃດ, ເບີ່ງແລ້ວທຳມະດາຫຼາຍ, ແຕ່ໃບໜ້າແລະການເວົ້າມີຄວາມໝັ້ນໃຈທີ່ສຸດ. ທ່ານໄດ້ຫວນຄືນເຫດການທີ່ທ່ານໄດ້ເປັນຜູ້ຄອງຊະນະເລີດໃນການແຂ່ງຂັນມາລາທອນໃນງານກິລາໂອລິມປິກບາເຊໂລນາປີ 1992.
"ຢູ່ສ.ເກົາຫຼີ, ມາລາທອນແມ່ນໂຄງການກິລາທີ່ມີຄວາມໝາຍປະຫວັດສາດ. ໃນງານກິລາໂອລິມປິກແບັກແລັງປີ 1936, ຊົນກີຈຸງ ນັກກິລາສ.ເກົາຫຼີໄດ້ຮັບຫຼຽນຄຳຂອງການແຂ່ງຂັນມາລາທອນເພດຊາຍ, ແຕ່ຍ້ອນໃນເວລານັ້ນ, ແຫຼມເກົາຫຼີຖືກຍີ່ປຸ່ນຍຶດຄອງ, ຊົນກີຈຸງທີ່ຖືກບັງຄັບໃຫ້ໃຊ້ຊື່ຍີ່ປຸ່ນຂໍເປັນຕ້ອງນຸ່ງຊຸດທີ່ພິມທຸງຊາດຍີ່ປຸ່ນໄປເຂົ້າຮ່ວມການແຂ່ງຂັນແລະຂຶ້ນຮັບຫຼຽນຄຳ. ຫຼັງຈາກນັ້ນ 56 ປີ, ໃນງານກິລາໂອລິມປິກປີ 1992, ຂ້າພະເຈົ້າໄດ້ເອົາຊະນະນັກກິລາຍີ່ປຸ່ນ, ໄດ້ຮັບຫຼຽນຄຳ, ໄດ້ຊົດເຊີຍຄວາມກິນແໜງແລະຄວາມເຈັບໃຈຂອງທ່ານຊົນກີຈຸງ, ເຮັດໃຫ້ປະຊາຊົນສ.ເກົາຫຼີມີຄວາມສຸກແລະກະຕຸ້ນໃຈຫຼາຍກວ່າເກົ່າ."
ທ່ານຊົນກີຈຸງທີ່ທ່ານຮວາງຢົງໂຈເວົ້າເຖິງນັ້ນ, ມີກຽດສູງຫຼາຍໃນໃຈຂອງປະຊາຊົນສ.ເກົາຫຼີ. ທ່ານຮວາງຢົງໂຈເວົ້າວ່າ, ໃນໃຈຂອງລາວ, ທ່ານຊົນກີຈຸງແມ່ນວິລະຊົນຕະຫຼອດໄປ.
"ໃນເວລາຍັງນ້ອຍ, ຂ້າພະເຈົ້າໄດ້ຮຽນເລື່ອງລາວຂອງທ່ານຊົນກີຈຸງ. ທ່ານຊົນກີຈຸງໄດ້ຮັບຫຼຽນຄຳໃນງານກິລາໂອລິມປິກ, ແມ່ນຜົນສຳເລັດອັນຍິ່ງໃຫຍ່ໃນປະຫວັດກິລາຂອງສ.ເກົາຫຼີ, ແມ່ນເຫດການປະຫວັດສາດ. ຫຼຽນຄຳທີ່ຂ້າພະເຈົ້າໄດ້ຮັບແມ່ນຫຼຽນຄຳລາຍການແລ່ນແລະລານຂອງງານກິລາໂອລິມປິກຫຼຽນທຳອິດນັບແຕ່ ສ.ເກົາຫຼີສ້າງຕັ້ງຂຶ້ນໃນປີ 1948 ເປັນຕົ້ນມາ. ດຽວນີ້, ຂ້າພະເຈົ້າກັບທ່ານຊົນກີຈຸງໄດ້ກາຍເປັນບຸກຄົນທີ່ຖືກຈັດເຂົ້າໃນປື້ມແບບຮຽນແລ້ວ."
ເມື່ອເວົ້າເຖິງວ່າເປັນຫຍັງທ່ານຈຶ່ງກາຍເປັນນັກກິລາມາລາທອນແລະສູດລັບຂອງການໄດ້ຮັບໄຊຊະນະ, ທ່ານຮວາງຢົງໂຈທີ່ຄົນທັງຫຼາຍເອີ້ນວ່າ "ຜູ້ທີ່ມີພອນສະຫວັນໃນດ້ານມາລາທອນ" ບອກວ່າ:
"ຂ້າພະເຈົ້າເລີ່ມເຝິກມາລາທອນໃນໂຮງຮຽນມັດທະຍົມຕອນປາຍ, ແຕ່ກ່ອນຂ້າພະເຈົ້າຍັງເຄີຍເຝິກລາຍການແຂ່ງລົດຖີບ. ມາລາທອນແມ່ນໜຶ່ງໃນບັນດາໂຄງການກິລາທີ່ສຳຄັນກວ່າໝູ່, ກໍ່ແມ່ນໂຄງການທີ່ເຝິກຍາກກວ່າໝູ່. ເພື່ອສູ້ກັບຕົວເອງ, ຂ້າພະເຈົ້າໄດ້ເລືອກມາລາທອນ. ເຝິກມາລາທອນ, ນອກຈາກໝັ່ນເຝິກຊ້ອມແລ້ວ, ບໍ່ມີສູດລັບອື່ນ. ເພື່ອເຝິກມາລາທອນ, ເຈົ້າຕ້ອງສະຫຼະຫຼາຍສິ່ງຫຼາຍຢ່າງ, ເຊັ່ນ: ການຄົບຄ້າສະມາຄົມແລະການບັນເທີງເປັນຕົ້ນ. ນີ້ແມ່ນຂໍກະແຈທີ່ເຮັດໃຫ້ຂ້າພະເຈົ້າໄດ້ຮັບຜົນສຳເລັດ."
ເມື່ອທ່ານຮວາງຢົງໂຈໄດ້ກາຍເປັນຜູ້ຊະນະເລີດໃນງານກິລາໂອລິມປິກແລ້ວ, ເພື່ອຍ້ອງຍໍການປະກອບສ່ວນຂອງທ່ານທີ່ມີຕໍ່ວຽກງານກິລາຂອງປະເທດ, ເມືອງກາງວົນໂດ ບ້ານເກີດຂອງທ່ານຮວາງຢົງເຈໄດ້ສ້າງຫໍແລະສວນສາທາລະນະລະລຶກທ່ານຮວາງຢົງໂຈ, ໃນຫໍແລະສວນສາທາລະນະລະລຶກໄດ້ຕັ້ງຮູບປັ້ນທອງສຳລິດຂອງທ່ານຮວາງຢົງໂຈທີ່ປັ້ນໂດຍທ່ານຄີມເຊນກູ ນັກປັ້ນຮູບທີ່ມີຊື່ສຽງຂອງສ.ເກົາຫຼີ. ເມື່ອທ່ານສິ້ນສຸດຊີວິດຂອງການເປັນນັກກິລາແລ້ວ, ທ່ານສືບຕໍ່ປະກອບສ່ວນເພື່ອຄວາມກ້າວໜ້າຂອງວຽກງານກິລາແລະລາຍການມາລາທອນຂອງສ.ເກົາຫຼີ. ທ່ານຮວາງຢົງໂຈເວົ້າວ່າ:
"ຢູ່ສ.ເກົາຫຼີ, ກິລາແລ່ນມາລາທອນໄດ້ຮັບຄວາມນິຍົມຫຼາຍສົມຄວນ. ປະຈຸບັນ, ຄຽງຄູ່ກັບລະດັບຊີວິດການເປັນຢູ່ຂອງປະຊາຊົນຍົກສູງຂຶ້ນ, ປະຊາຊົນນັບມື້ນັບຫຼາຍກວ່າເກົ່າເອົາໃຈໃສ່ຕໍ່ສຸຂະພາບຂອງຕົນດ້ວຍການ, ແລ່ນອອກກຳລັງກາຍ. ຢູ່ສ.ເກົາຫຼີ, ແຕ່ລະປີໄດ້ມີການຈັດການແຂ່ງຂັນແລ່ນມາລາທອນ 450 ເທື່ອ, ໄດ້ດຶງດູດປະຊາຊົນເຂົ້າຮ່ວມຢ່າງຫຼວງຫຼາຍ."
ກິລາແລ່ນມາລາທອນກໍ່ແມ່ນລາຍການກິລາທີ່ສ.ປ.ປເກົາຫຼີທີ່ຕັ້ງຢູ່ແຫຼມເກົາຫຼີຮ່ວມກັນກໍ່ມີຄວາມຊຳນານ. ກ່ຽວກັບການແລກປ່ຽນລະຫວ່າງທິມມາລາທອນລະຫວ່າງສອງເກົາຫຼີ, ທ່ານຮວາງຢົງໂຈມີຄວາມເຫັນວ່າ:
"ປີກາຍນີ້, ຂ້າພະເຈົ້າພາທິມແລ່ນມາລາທອນຂອງສ.ເກົາຫຼີໄປສ.ປ.ປເກົາຫຼີ, ເຂົ້າຮ່ວມການແຂ່ງຂັນມາລາທອນສາກົນຢູ່ພຽງຢາງ, ນີ້ແມ່ນເທື່ອທຳອິດທີ່ນັກກິລາສ.ເກົາຫຼີເຂົ້າຮ່ວມການແຂ່ງຂັນແລ່ນມາລາທອນຢູ່ສ.ປ.ປເກົາຫຼີ. ຫຼັງຈາກນັ້ນ, ທິມມາລາທອນຂອງສອງເກົາຫຼີຍັງໄດ້ດຳເນີນການເຝິກຊ້ອມຢູ່ນະຄອນຂຸ່ນມິງຂອງຈີນຮ່ວມກັນ. ຂ້າພະເຈົ້າເຫັນວ່າ, ດຳເນີນການແລກປ່ຽນກິລາສຳຄັນຫຼາຍ, ເພາະກິລາບໍ່ຈຳແນກຄວາມຄິດ, ການແລກປ່ຽນກິລາມີຜົນດີຕໍ່ຄວາມປອງດອງກັນລະຫວ່າງສອງຝ່າຍ."
ເວົ້າສຳລັບງານກິລາໂອລິມປິກປັກກິ່ງທີ່ໃກ້ຈະມາເຖິງ, ທ່ານຮວາງຢົງໂຈເຕັມໄປດ້ວຍຄວາມຄອງຄອຍ, ພ້ອມກັນນັ້ນ, ທ່ານກໍ່ຫວັງໃຫ້ນັກກິລາສ.ເກົາຫຼີຈະໄດ້ຮັບຜົນສຳເລັດທີ່ດີໃນງານກິລາໂອລິມປິກປັກກິ່ງ.
"ປະຈຸບັນ, ຄວາມສາມາດຂອງນັກກິລາແລ່ນມາລາທອນອາຊີບຂອງສ.ເກົາຫຼີຍັງບໍ່ສູງປານໃດ, ແຕ່ວ່າຂໍແຕ່ໝັ່ນເຝິກຊ້ອມ, ກໍ່ຈະມີຄວາມຫວັງໄດ້ຮັບຜົນງານທີ່ດີຢູ່ປັກກິ່ງ, ຈົນອາດຈະເຖິງຂັ້ນໄດ້ຫຼຽນລາງວັນ. ສ.ເກົາຫຼີກັບຈີນໃກ້ກັນຫຼາຍ, ປະຊາຊົນສ.ເກົາຫຼີຫຼາຍຄົນກໍ່ຈະໄປປັກກິ່ງເພື່ອເຊຍນັກກິລາຂອງຕົນ, ນີ້ມີຜົນດີເພື່ອຊຸກຍູ້ນັກກິລາໃຫ້ໄດ້ຮັບຜົນງານທີ່ດີ. ໃນໄລຍະຈັດງານກິລາໂອລິມປິກປັກກິ່ງ, ຂ້າພະເຈົ້າຈະໄປປັກກິ່ງ, ຈະເຂົ້ມຮ່ວມງານກິລາໂອລິມປິກປັກກິ່ງດ້ວຍຖານະທີ່ເປັນແຂກບັນຍາຍໃຫ້ໂທລະພາບສ.ເກົາຫຼີ."
