ສຽງຂອງອາສາສະໝັກສະພາກາແດງອາເມລິກາ
-----------------------------------------------------------------------------------------------------------------
ຕາມຂ່າວCRI:ຢູ່ພາຍໃນແລະນອກສະໜາມແຂ່ງຂັນຂອງງານກິລາໂອລິມປິກປັກກິ່ງ,ຢູ່ຕາມຖະໜົນຫົນທາງແລະບ່ອນທ່ອງທ່ຽວ,ມີອາສາສະໝັກສະພາກາແດງ5ໝື່ນກວ່າຄົນທີ່ມາຈາກປະເທດແລະເຂດແຄ້ວນຕ່າງໆໃນໂລກ.ທ່ານໄມໂຄ ວັອງ ຊາວຈີນສັນຊາດອາເມລິກາທີ່ມາຈາກຊັນ ຟຼັນຊິສໂກຂອງອາເມລິກາກໍ່ແມ່ນຜູ້ໜຶ່ງ.ໃນໄລຍະງານກິລາໂອລິມປິກ,ສະເລ່ຍແລ້ວ,ພະລາດຊະວັງກູ້ກົ່ງທີ່ເປັນບ່ອນທ່ອງທ່ຽວທີ່ມີຊື່ສຽງທີ່ສຸດຂອງປັກກິ່ງໄດ້ຕ້ອນຮັບນັກທ່ອງທ່ຽວຈີນແລະຕ່າງປະເທດ8-9ໝື່ນຄົນທຸກມື້.ດ້ວຍເຫດນີ້,ສະພາກາແດງຈີນແລະຫໍພິພິທະພັນພະລາດຊະວັງກູ້ກົ່ງໄດ້ພ້ອມກັນສ້າງບ່ອນກອບກູ້ແລະພະຍາບານແຫ່ງໜຶ່ງຢູ່ໃນພະລາດຊະວັງກູ້ກົ່ງ,ເພື່ອປິ່ນປົວຂັ້ນຕົ້ນໃຫ້ນັກທ່ອງທ່ຽວທີ່ມີອາການວິນແດດຍ້ອນອາກາດຮ້ອນຫຼາຍຫຼືວ່າຜູ້ທີ່ເກີດພະຍາດສຸກເສີນຫຼຶເກີດບາດເຈັບຍ້ອນອຸປະຕິເຫດ.ທ່ານໄມໂຄ ວອັງທີ່ອາຍຸ50ກວ່າປີກໍ່ແມ່ນໃຫ້ການບໍລິການດ້ານພາສາອັງກິດໃຫ້ນັກທ່ອງທ່ຽວຕ່າງປະເທດຢູ່ບ່ອນນີ້.
ທ່ານເວົ້າສູ່ຟັງກ່ຽວກັບສະພາກາແດງອາເມລິກາເຂົ້າຮ່ວມງານກິລາໂອລິມປິກປັກກິ່ງ."ສະພາກາແດງອາເມລິກາດີໃຈຫຼາຍທີ່ສາມາດສົ່ງຜູ້ແທນສອງຄົນມາສະໜັບສະໜູນວຽກງານຂອງສະພາກາແດງຈີນໃນໄລຍະງານກິລາໂອລິມປິກປັກກິ່ງ.ພາຍຫຼັງຈີນຮ້ອງຂໍຈັດງານກິລາໂອລິມປິກຢ່າງສຳເລັດຜົນແລ້ວ,ສອງຝ່າຍໄດ້ຕິດຕໍ່ປະສານງານກັນຫຼາຍເທື່ອ.ຍ້ອນວ່າສະພາກາແດງອາເມລິກາມີບົດຮຽນທີ່ໄດ້ເຂົ້າຮ່ວມງານກິລາໂອລິມປິກສາມເທື່ອ,ສະນັ້ນ,ພວກເຮົາສາມາດໃຫ້ການແນະນຳຈຳນວນໜຶ່ງ.ນອກນີ້,ພວກເຮົາຮູ້ເວົ້າພາສາຈີນແລະພາສາອັງກິດພ້ອມກັນ,ຈະສາມາດຊ່ວຍເຫຼືອນັກທ່ອງທ່ຽວໄດ້ເປັນຢ່າງດີ."
ໄມໂຄວັອງເກີດຢູ່ຮົງກົງ,ເພິ່ນເຄີຍເປັນຕຳຫຼວດຮົງກົງ.ພາຍຫຼັງຍ້າຍໄປຢູ່ອາເມລິກາແລ້ວ,ຕາມຈິງ, ຫຼັງອອກບຳນານ ,ເພິ່ນສາມາດດຳລົງຊີວິດ ຢ່າງສະບາຍ,ແຕ່ເພິ່ນໄດ້ເລືອກເອົາການເຂົ້າຮ່ວມວຽກງານສາທາລະນະປະໂຫຍດຢ່າງຕັ້ງໜ້າ.ປັດຈຸບັນ,ເພິ່ນແມ່ນຜູ່ອຳນວຍການພະແນກອົບຮົມຄົນເຊື້ອສາຍອາຊີຂອງສະພາກາແດງຢູ່ເຂດອ່າວຊານຟຼານຊີສໂກ.ທ່ານກ່າວວ່າ,ຢູ່ເມືອງຊານຟຼານຊິສໂກທີ່ທ່ານຢູ່ນັ້ນມີຊາວຈີນຈຳນວນຫຼວງຫຼາຍ,ທ່ານສາມາດ ໃຊ້ທ່າແຮງດ້ານພາສາຂອງຕົນ,ເຮັດວຽກອົບຮົມຢູ່ສະພາກາແດງແຫ່ງນັ້ນ.ທ່ານກ່າວວ່າ:"ຂ້ອຍແມ່ນພະນັກງານຂອງສະພາກາແດງເຂດອ່າວຊານຟຼານຊິສໂກອາເມລິກາທີ່ ຮັບໃຊ້ຊຸມຊົນຊາວຈີນໂດຍສະເພາະ,ຢູ່ແຫ່ງນັ້ນບໍ່ໄດ້ຈັດໃຫ້ຮຽນພາສາຈີນ,ສະນັ້ນ,ຂ້ອຍໄດ້ແປເອກະສານຢ່າງຫຼວງຫຼາຍເພື່ອເປັນເອກະສານອົບຮົມການປະຖົມພະຍາບານສະບັບພາສາຈີນໃຫ້ແກ່ຊາວຈີນ."
ພາຍໃຕ້ການລະດົມຂອງມະຫາຄອບຄົວຄະນະກຳມະການສະພາກາແດງສາກົນ,ເທື່ອນີ້,ທ່ານໄມໂຄວັອງໄດ້ມາຮອດປັກກິ່ງເພື່ອຈຸດປະສົງທີ່ຢາກລົງເລິກການຮ່ວມມືກັບສະພາກາແດງຈີນ.ນັບແຕ່9ໂມງຈົນຮອດ16-17ໂມງ ທຸກໆມື້,ທ່ານ ພ້ອມກັບໝູ່ຮ່ວມງານຜັດປ່ຽນກັນໃຫ້ການບໍລິການດ້ານການປິ່ນປົວ ໃຫ້ຄຳປຶກສາແລະການແປພາສາຢູ່ສະຖານີຊ່ວຍເຫຼືອສຸກເສີນຢູ່ວັງກູ້ກົ່ງແລະສະຖານີທີ່ບໍລິການສະພາກາແດງຂອງງານໂອລິມປິກທີ່ຢູ່ໃນແລະນອກສະໜາມກິລາຕ່າງໆ.ນອກນີ້,ທ່ານຍັງພວມຮ່ວມມືກັບບຸກຄົນທີ່ກ່ຽວຂ້ອງຂອງສະພາກາແດງຈີນ,ດຳເນີນການແປພາສາແລະຮຽບຮຽງຄູ່ມືອົບຮົມການຊ່ວຍເຫຼືອສຸກເສີນສະບັບພາສາອັງກິດ.ເຖິງຈະເມື່ອຍແລະລຳບາກຫຼາຍແດ່ກໍ່ຕາມ,ແຕ່ຄວາມໝັ້ນໃຈຂອງທ່ານພັດບໍ່ໄດ້ຈາງຫາຍລົງ,ທ່ານກ່າວວ່າ,ທ່ານສາມາດມີສ່ວນຮ່ວມເຂົ້າໃນການບໍລິການງານກິລາໂອລິມປິກປັກກິ່ງ,ທ່ານກໍ່ຮູ້ສຶກເປັນກຽດຫຼາຍແລ້ວ."ຂ້ອຍຕື່ນເຕັ້ນຫຼາຍ,ແຕ່ກ່ອນ,ຂ້ອຍມີແຕ່ຊົມງານກິລາໂອລິມປິກຢູ່ເຮືອນ,ແຕ່ດຽວນີ້,ຂ້ອຍໄດ້ມີສ່ວນຮ່ວມໂດຍຕົນເອງ,ມີໂອກາດຊ່ວຍເຫຼືອສະພາກາແດງຈີນ.ໃນນາມເປັນຄົນຈີນ,ສາມາດປະກອບສ່ວນເພື່ອງານກິລາໂອລິມປິກ,ຂ້ອຍດີໃຈຫຼາຍ."
