ແຟນໂອລິມປິກສະແດງໃຫ້ເຫັນຄວາມຢາກສະແດງຕົນເອງທີ່ອັດສະຈັນຂອງຄົນຈີນ
-----------------------------------------------------------------------------------------------------------------
ສະບາຍດີທ່ານຜູ້ຟັງ, ງານໂອລິມປິກປັກກິ່ງບໍ່ພຽງແຕ່ມີອາສາສະໝັກເປັນລ້ານຄົນ, ຍັງມີແຟນໂອລິມປິກທີ່ຫຼົງໄຫຼໂອລິມປິກຢ່າງໜັກໜ່ວງຈຳນວນໜຶ່ງ. ຫຼາຍພັນປີມານີ້, ຊາວຈີນລ້ວນແຕ່ເປັນຄົນບໍ່ມັກສະແດງຕົນເອງ. ແຕ່ວ່າ, ແຟນໂອລິມປິກຂອງແຫ່ງຕ່າງໆທົ່ວປະເທດພັດໄດ້ຢັ້ງຢືນໃຫ້ຊາວໂລກເຫັນວ່າ ຄົນຈີນກໍ່ມີນິດໃສທີ່ຢາກສະແດງຕົນເອງຢ່າງແຮງກ້າທີ່ສຸດ. ໃນລາຍການບົດບັນທຶກປະຈຳວັນຂອງແສງທອງມື້ນີ້, ແສງທອງຈະເລົ່າເລື່ອງຂອງເຂົາເຈົ້າສູ່ທ່ານຟັງ.
ທ້າວຊຸນຕິ້ງໂກ ອາຍຸ 29 ປີ, ຢູ່ໜ້າເອິກຂອງລາວໄດ້ສັກລາຍເປັນຮູບ 5 ບ້ວງແລະກາປະທັບຈີນ, ຫຼັງແລະສອງແຂນໄດ້ສັກລາຍຮູບ 32 ລາຍການກິລາໂອລິມປິກ, ແມ່ນແຟນໂອລິມປິກຮ້ອຍສ່ວນຮ້ອຍ. ທ້າວຊຸນຕິ້ງໂກມີຊື່ຫຼີ້ນວ່າ"ອ້າຍອ່າເປີ້ຍ", ໄດ້ຊື່ມາຈາກສັດນຳໂຊກ"ຝູວາເປີ້ຍເປີ້ຍ".
"ຂ້ອຍແມ່ນອ້າຍອ່າເປີ້ຍ, ຂີ່ລົດຖີບມາປັກກິ່ງ, ເພື່ອໂຄສະນາໂອລິມປິກ, ໃຫ້ຄົນທັງຫຼາຍມາເຊຍ". ສຽງເພງນີ້ດັງຢູ່ນອກ"ກ້ອນນ້ຳ 4 ຫຼ່ຽມ", ເພງນີ້ແມ່ນທ້າວຊຸນຕິ້ງໂກແຕ່ງເອງ.
ວັນທີ 22 ກໍລະກົດ 2007, ຍ້ອນໄດ້ຮັບການສະໜັບສະໜູນຈາກພໍ່ທີ່ຕາບອດ, "ອ້າຍອ່າເປີ້ຍ"ໄດ້ຈາກນະຄອນຫາງໂຈວເດີນທາງໄປປັກກິ່ງ, ພາຫະນະເດີນທາງຂອງລາວແມ່ນສາມລໍ້ຖີບຄູ່ໃຈ.
ປັດຈຸບັນ, ການແຂ່ງຂັນກິລາໂອລິມປິກພວມດຳເນີນໄປຢ່າງດຸເດືອດ, ຫຼາຍມື້ມານີ້, "ອ້າຍອ່າເປີ້ຍ"ໄດ້ນັ່ງຖ້າຢູ່ເຂດອ້ອມແອ້ມ"ກ້ອນນ້ຳ 4 ຫຼ່ຽມ", ເພື່ອຂໍລາຍເຊັນສະໜັບສະໜູນໂອລິມປິກຈາກຜູ້ຊົມຊາວຈີນແລະຕ່າງປະເທດ, ຈຸດປະສົງຂອງລາວແມ່ນໜ້າງຶດງໍ້ຫຼາຍ, ລາວເວົ້າວ່າ, "ຂ້ອຍຢາກຂໍລາຍເຊັນ 3 ແສນ ກວ່າລາຍເຊັນ, ເພື່ອມອບໃຫ້ຄະນະກຳມະການຈັດງານໂອລິມປິກປັກກິ່ງ."
ສິ່ງທີ່ເຮັດໃຫ້"ອ້າຍອ່າເປີ້ຍ"ດີໃຈນັ້ນແມ່ນ, ຫຼາຍມື້ກ່ອນ, ລາວໄດ້ຮັບການສຳພາດໂດຍຈຳເພາະຈາກບໍລິສັດBBCອັງກິດ. ສື່ມວນຊົນອັງກິດຈຳນວນໜຶ່ງຍັງເຊີນລາວໄປເຂົ້າຮ່ວມການໂຄສະນາໂອລິມປິກລອນດອນ. ລາວເວົ້າວ່າ, "ຂ້ອຍຢາກສົ່ງຕໍ່ນ້ຳໃຈໂອລິມປິກປັກກິ່ງໄປຮອດງານໂອລິມປິກຄັ້ງໜ້າ".
****** ******* ******
"ຂ້ອຍຊື່"ມິສ໌ເຕີຍິ້ມ", ທ້າວລິວຢູ້ຕົ່ງຂອງແຂວງຊ່ານຕົ່ງຢືນຢູ່ໜ້າສູນລອຍນ້ຳ"ກ້ອນນ້ຳ 4 ຫຼ່ຽມ", ທັກທາຍສະບາຍດີກັບໝົດທຸກຄົນທີ່ຍ່າງຜ່ານ. ລາວເຫັນວ່າ, ຊີວິດໃນປັດຈຸບັນສະບາຍຫຼາຍ, ຄວນຍິ້ມແຍ້ມແຈ່ມໃສ, ສະນັ້ນຈຶ່ງຕັ້ງຊື່ຂອງຕົນວ່າ"ມິສ໌ເຕີຍິ້ມ".
ລາວຂໍຖ່າຍຮູບກັບແສງທອງ, ແລະຮ້ອງສຽງດັງທັກທາຍກັບຄົນຕ່າງປະເທດທີ່ຍ່າງຜ່ານວ່າ: wellcome to Beijing ,one world,one dreamd. ທ້າວລິວຢູ້ຕົ່ງບອກນັກຂ່າວວ່າ, ທີ່ຈິງແລ້ວ, ລາວຮູ້ພາສາອັງກິດພຽງປະໂຫຍກທີ່ກ່າວມານັ້ນ.
ທ້າວລິວຢູ້ຕົ່ງຍັງມີຫຼາຍວິທີຢອກໃຫ້ຄົນທີ່ຍ່າງຜ່ານຫົວ, ຕົວຢ່າງຄື: ຫັນຫຼັງສະແດງຊົງຜົມໂອລິມປິກຂອງລາວ. ງ່ອນຂອງລາວຍ້ອມເປັນຮູບ 5 ບ້ວງໂອລິມປິກ, ດຶງດູດສາຍຕາຄົນຫຼາຍ.
ລົດຖີບຂອງ"ມິສ໌ເຕີຍິ້ມ"ຍັງໄດ້ແຂວນປ້າຍເຈ້ຍແຜ່ນໜຶ່ງ, ຂຽນກາບກອນໃສ່ຊື່ວ່າ"ເພງສັນຕິພາບຂອງພິທີໄຂ". ລາວມັກຍິ້ມ, ມັກຮ້ອງເພງ, ຈິ່ງໄດ້ດູດດຶງສາຍຕາຂອງຄົນທີ່ຍ່າງຜ່ານໄປມາ.
********** *****
ທ້າວສິນເຊິ້ງຈຸ່ນ ທີ່ເຮັດວຽກດ້ານຈັກສານມາ 20 ກວ່າປີ, ກໍ່ແມ່ນແຟນໂອລິມປິກຜູ້ໜຶ່ງ. ເມື່ອໄດ້ເຫັນຂ່າວຄາວກ່ຽວກັບ"ຮັງນົກ"ຈາກສື່ມວນຊົນແລ້ວ, ລາວໄດ້ຊອກຫາຂໍ້ມູນຢ່າງຫຼວງຫຼາຍ, ແຕ່ເດືອນກັນຍາປີ 2007 ກໍ່ເລີ່ມລົງມືສານ"ຮັງນົກ", ໃນທີ່ສຸດ, ໄດ້ໃຊ້ແຖມຜ້າສີຍາວ 8 ພັນແມັດສານເປັນ"ຮັງນົກສີຄຳ"ທີ່ເຮັດໃຫ້ຄົນງຶດງໍ້. ຢູ່ນອກ"ຮັງນົກ"ຍັງມີມັງກອນ 2 ໂຕແລະນົກຍາງຫຼາຍໂຕທີ່ເປັນສັດສິລິມຸງຄຸນ.
ທ້າວສິນເຊີ້ງຈູ່ນບອກວ່າລາວມີເງິນບໍ່ຫຼາຍ. ໃນໄລຍະໂອລິມປິກ, ກາງເວັນ, ລາວໄດ້ຍ່າງສະແດງ"ຮັງນົກນ້ອຍ"ຂອງລາວຢູ່ນອກ"ສະໜາມກິລາຮັງນົກ", ຕອນຄ່ຳນອນຕາມເດີ່ນໃກ້ໆບໍລິເວັນນັ້ນເລີຍ. ລາວຍັງບອກແສງທອງວ່າ, ຫຼາຍມື້ກ່ອນ, ເຄີຍມີຄົນໃຊ້ເງິນ 4 ໝື່ນຢວນເພື່ອຊື້"ຮັງນົກ"ຂອງລາວ, ແຕ່ລາວບໍ່ຍອມຂາຍ, ຄວາມປາຖະໜາສູງສຸດຂອງແມ່ນ"ຮັງນົກຂອງຕົນຖືກຄະນະກຳມະການຈັດງານໂອລິມປິກຫຼືຫໍພິພິທະພັນແຫ່ງຊາດຈີນສະສົມໄວ້.
(ຈົບ)