ຂ້ອຍແມ່ນຄົນປັກກິ່ງຜິວດຳ
-----------------------------------------------------------------------------------------------------------------
ຕາມຂ່າວCRI:ດຽວນີ້ປັກກິ່ງໄດ້ເຂົ້າສູ່ໄລຍະຕົ້ນລະດູໃບໄມ້ຫຼົ່ນແລ້ວ,ໃນຕອນຄ່ຳ, ຍ່າງຕາມຖະໜົນຫົນທາງຮູ້ສຶກເຢັນສະບາຍໜ້ອຍໜຶ່ງ,ແຕ່ຄວາມກະຕືລືລົ້ນຂອງຜູ້ຊົມປະເທດຕ່າງໆທີ່ມີຕໍ່ງານກິລາໂອລິມປິກຍັງຟົດຟື້ນຢູ່.ຊາວໜຸ່ມມັກເຕົ້າໂຮມກັນຢູ່ໃນບາ,ທັງດື່ມເຫຼົ້າທັງເບິ່ງການແຂ່ງຂັນໃນໂທລະພາບຢ່າງມ່ວນຊື່ນ.
ຮ້ານກິນດື່ມ"ປິລິປິລິ"ແມ່ນຮ້ານກິນດື່ມອາຟະລິກາແຫ່ງທຳອິດຢູ່ປັກກິ່ງ,ໃນໄລຍະງານກິລາໂອລິມປິກປັກກິ່ງ,ນັກສຶກສາອາຝະລິກາທີ່ມາຮຽນຢູ່ປັກກິ່ງໄດ້ຈັດກິດຈະກຳທີ່ຊື່ວ່າ"ຄ່ຳຄືນອາຟະລິກາ"ຢູ່"ປິລິປິລິ",ເພື່ອເຊຍໃຫ້ນັກກິລາອາຟະລິກາ,ແຮ່ງ ເຊຍໃຫ້ງານກິລາໂອລິມປິກປັກກິ່ງ.ສ່ວນຜູ້ທີ່ຮັບຜິດຊອບປ່ອຍດົນຕີໃນ"ປິລິປິລິ"ແມ່ນພາໂຄ,ຜູ້ທີ່ຈະໄດ້ຮັບການສຳພາດໃນລາຍການມື້ນີ້.ພາໂຄແມ່ນຜູ້ບ່າວເຈົ້າຊູ້ຜູ້ໜຶ່ງທີ່ມາຈາກກີເນເອກົວເຕິຣິອານ,ພາໂຄເວົ້າດ້ວຍພາສາຈີນທີ່ຫ່ຼຽນໄຫຼດີຢ່າງພາກພູມໃຈວ່າ ລາວແມ່ນຄົນປັກກິ່ງແທ້ໆ,ມາຮຽນຢູ່ປັກກິ່ງໃນປີ1995,ຢູ່ປັກກິ່ງ10ກວ່າປີແລ້ວ.ພາໂຄກ່າວວ່າ:"ຂ້ອຍໄດ້ຢູ່ຈີນ10ກວ່າປີແລ້ວ,ເຄີຍໄປຫຼາຍບ່ອນ,ແຕ່ຂ້ອຍມັກປັກກິ່ງທີ່ສຸດ,ຂ້ອຍກໍ່ບໍ່ຮູ້ຍ້ອນຫຍັງ.ຄືວ່າ ເມື່ອຂ້ອຍໄປບ່ອນອື່ນແລ້ວກັບຄືນປັກກິ່ງ,ເມື່ອດົມອາກາດຂອງປັກກິ່ງແລ້ວ,ກໍ່ຮູ້ສຶກວ່າ ໄດ້ກັບບ້ານແລ້ວ.ນີ້ແມ່ນຄວາມຮູ້ສຶກທີ່ອະທິປາຍຍາກ."
ພາໂຄມັກຄົນຈີນທີ່ສຸດ,ລາວບໍ່ຮູ້ສຶກວ່າຕົນເອງມີຄວາມແຕກຕ່າງກັນກັບຄົນຈີນ,ເມື່ອແລກປ່ຽນກັບຄົນຈີນກໍ່ບໍ່ມີອຸປະສັກຫຍັງ.ພາໂຄບອກນັກຂ່າວວ່າ: "ເວົ້າສຳລັບຂ້ອຍແລ້ວ,ຄົນຈີນກັບຄົນອາຝະລິກາຄືພີ່ນ້ອງຮ່ວມຄອບຄົວ.ເມື່ອມາຢູ່ຈີນ,ຂ້ອຍປະກົດເຫັນວ່າ ມີຫຼາຍເລື່ອງບໍ່ຕ້ອງອະທິປາຍກໍ່ເຂົ້າໃຈໂລດ.ຖ້າວ່າຢູ່ເອີລົບ,ຂ້ອຍກໍ່ຕ້ອງຄິດວ່າ ເລື່ອງນີ້ຍ້ອນຫຍັງເປັນແນວນັ້ນແນວນີ້?ແລ້ວຄົນເອີລົບກໍ່ຈະອະທິປາຍໃຫ້ຂ້ອຍຟັງວ່າ ແມ່ນຍ້ອນສາເຫດປະຫວັດສາດບາງຢ່າງ.ແຕ່ວ່າຢູ່ຈີນ,ເຖິງວ່າວັດທະນະທຳຂອງຈີນແລະອາຝະລິກາບໍ່ຄືກັນກໍ່ຕາມ,ແຕ່ຂ້ອຍເຂົ້າໃຈງ່າຍ."
ໃນນາມເປັນຄົນປັກກິ່ງ,ພາໂຄກໍ່ສົນໃນນຳງານໂອລິມປິກທີ່ຈັດຂຶ້ນຢູ່ໜ້າປະຕູບ້ານຂອງຕົນທີ່ສຸດ.ຕັ້ງແຕ່ກິດຈະກຳສົ່ງຕໍ່ທວນໄຟງານກິລາໂອລິມປິກປັກກິ່ງຢູ່ທົ່ວໂລກເລີ່ມດຳເນີນ,ງານກິລາໂອລິມປິກກໍ່ໄດ້ກາຍເປັນພາກສ່ວນປະກອບທີ່ສຳຄັນໃນຊີວິດຂອງລາວ.ຈາກການສົ່ງຕໍ່ທວນໄຟຕະຫຼອດຮອດການແຂ່ງຂັນຕ່າງໆຂອງງານໂອລິມປິກ,ພາໂຄລ້ວນແຕ່ເອົາໃຈໃສ່ທີ່ສຸດ.ສ່ວນກິລາທີ່ລາວມັກທີ່ສຸດແມ່ນປິ່ງປ່ອງທີ່ຖືກເອີ້ນເປັນບານແຫ່ງຊາດຂອງຈີນ.ນາງວາງນານ ນັກກິລາປິ່ງປ່ອງທີ່ມີຊື່ສຽງຂອງຈີນແມ່ນດາວກິລາທີ່ລາວມັກທີ່ສຸດ.
"ຂ້ອຍມັກ ວາງນານຫຼາຍ, ຂ້ອຍກໍ່ບໍ່ຮູ້ວ່າຍ້ອນຫຍັງຈິ່ງມັກນາງປານນີ້,ໃນເວລານາງຕີປິ່ງປ່ອງຄືວ່າມີການສື່ສານກັບຜູ່ອື່ນ,ນາງຈະສະແດງໃຫ້ເຫັນອາລົມຈິດ."
ການທີ່ງານກິລາໂອລິມປິກປັກກິ່ງໄຂຂຶ້ນເຮັດໃຫ້ພາໂຄມີໂອກາດເປັນພິຍານທີ່ໄດ້ເຫັນນາງວາງນານທີ່ຍາດໄດ້ຫຼຽນຄຳ ໝູ່ຄະນະຫຼຽນ ທຳອິດໃນປະຫວັດສາດຢູ່ປັກກິ່ງ.ເວົ້າສຳລັບປາໂຄທີ່ຕ້ອງຂີ່ລົດເມແລະລົດຕັກຊີເຂົ້າການເລີກການແລ້ວ,ການທີ່ງານກິລາໂອລິມປິກໄຂຂຶ້ນເຮັດໃຫ້ການເຮັດວຽກແລະຊີວິດການເປັນຢູ່ຂອງລາວຍິ່ງສະດວກກວ່າ.
ລາວບອກວ່າ:
"ປັກກິ່ງມີການປ່ຽນແປງໃຫຍ່ຫຼາຍ! ເວົ້າແນວໃດແນະ？ ອັນທີໜຶ່ງກໍຄືຄົມມະນາ ຄົມ, ປະຈຸບັນເຈົ້າສາມາດຂີ່ລົດໄຟໃຕ້ດິນໄປສະໜາມບິນເລີຍ, ຍັງໄດ້ເພີ່ມສາຍລົດໄຟໃຕ້ດິນຈຳນວນໜຶ່ງ, ນີ້ແມ່ນການປ່ຽນແປງໃຫຍ່ຫຼາຍ, ໄດ້ເຮັດໃຫ້ພາກໃຕ້ແລະພາກເໜືອຂອງປັກກິ່ງເຊື່ອມຕໍ່ກັນ."
ໃນສາຍຕາຂອງອ້າຍບ່າວອາຝຼິການີ້, ງານໂອລິມປິກບໍ່ພຽງແຕ່ໄດ້ເຮັດໃຫ້ປັກກິ່ງເກີດມີການປ່ຽນແປງໃຫຍ່ກໍຕາມ, ຍັງໄດ້ສ້າງໂອກາດຫາຍາກທີ່ດູດດຶງສາຍຕາຂອງທົ່ວໂລກໃຫ້ຈີນ, ລາວເວົ້າວ່າ:
"ໂດຍຜ່ານງານໂອລິມປິກເທື່ອນີ້, ທົ່ວໂລກລ້ວນແຕ່ຈະເອົາໃຈໃສ່ນຳຈີນ, ເອົາໃຈໃສ່ທຸກດ້ານຂອງຈີນໂດຍຜ່ານເວລາສອງອາທິດ, ບໍ່ພຽງແຕ່ແມ່ນວັດທະນະທຳ ເສດຖະກິດຂອງຈີນ, ຍັງຈະເບິ່ງຊີວິດການເປັນຢູ່ຂອງປະຊາຊົນຈີນ."
ພາໂຄກ່າວວ່າ, ເຖິງວ່າບໍ່ໄດ້ໃສ່ເສື້ອຍືດສີຟ້າທີ່ສວຍງາມ, ແຕ່ລາວກໍແມ່ນອາສາສະໝັກໂອລິມປິກຜູ້ໜຶ່ງ.
"ຂ້ອຍແມ່ນສະໜັບສະໜູນງານໂອລິມປິກເບື້ອງຫຼັງ, ຂ້ອຍແມ່ນອາສາສະໝັກເບື້ອງຫຼັງຂອງງານໂອລິມປິກປັກກິ່ງ! ຂ້ອຍຮູ້ສຶກພາກພູມໃຈຕໍ່ງານໂອລິມປິກປັກກິ່ງ！"
