ຂ້າພະເຈົ້າໄດ້ເຫັນງານໂອແລັມປິກທີ່ຈົບງາມຄັ້ງໜຶ່ງ
-----------------------------------------------------------------------------------------------------------------
ວັນທີ 19 ສິງຫານີ້ ລາຍການຍົກນ້ຳໜັກຂອງງານກິລາໂອແລັມປິກ2008ໄດ້ສິ້ນສຸດລົງ, ໃນມື້ນັ້ນ ທ່ານທາມາສ ອະຈັນ ປະທານສະຫະພັນຍົກນ້ຳໜັກສາກົນໄດ້ຕ້ອນຮັບການສຳພາດຂອງນັກຂ່າວວິທະຍຸCRI ພວກເຮົາໂດຍສະເພາະ. ທ່ານອະຈັນກ່າວວ່າ,ວຽກງານຈັດຕັ້ງການແຂ່ງຂັນທັງໝົດເຊິ່ງລວມທັງລາຍການຍົກນ້ຳໜັກຂອງງານກິລາໂອແລັມປິກປັກກິ່ງລ້ວນແຕ່ສຳເລັດຜົນທີ່ສຸດ,ນີ້ແມ່ນງານກິລາໂອແລັມປິກທີ່ຈົບງາມຄັ້ງໜຶ່ງທີ່ທ່ານເຄີຍເຫັນ.
ການແຂ່ງຂັນຂອງລາຍການຍົກນ້ຳໜັກຂອງງານໂອແລັມປິກ2008ແມ່ນຈັດຂຶ້ນຢູ່ສະໜາມກິລາມະຫາວິທະຍາໄລການບິນແລະການບິນອະວະກາດປັກກິ່ງ, ໃນນາມທີ່ເປັນຜູ້ນຳຂອງສະຫະພັນຍົກນ້ຳໜັກສາກົນ ທ່ານທາມາສ ອະຈັນ ທີ່ເປັນຊາວຮຸງກາລີໄດ້ບັນຊາຢູ່ໃນສະໜາມເກືອບທຸກມື້ເລີຍ. ແຕ່ກ່ອນ ທ່ານອະຈັນເປັນນັກກິລາອາຊີບ,ເທື່ອນີ້ ທ່ານໄດ້ສຳຫຼວດວຽກງານຈັດຕັ້ງແລະອຸປະກອນຕ່າງໆຂອງການແຂ່ງຂັນຍົກນ້ຳໜັກຈາກວິຊາສະເພາະ. ແຕ່ວ່າ,ທ່ານທີ່ມີຄວາມຮຽກຮ້ອງສູງຫຼາຍນັ້ນພັດບໍ່ໄດ້ພົບເຫັນຂໍ້ບົກຜ່ອງຫຍັງເລີຍ,ເພາະທ່ານເຫັນວ່າ,ງານໂອແລັມປິກປັກກິ່ງແມ່ນງານໂອແລັມປິກທີ່ຈົບງາມຄັ້ງໜຶ່ງ.
"ຂ້າພະເຈົ້າເຫັນວ່າ,ໃນງານກິລາໂອແລັມປິກສະໄໝປັດຈຸບັນ,ຄັ້ງທີ່ຈັດຢູ່ປັກກິ່ງ2008ແມ່ນມີຂະໜາດໃຫຍ່ກວ່າໝູ່ແລະຈັດຕັ້ງໄດ້ສຳເລັດຜົນທີ່ສຸດ,ເພື່ອກະກຽມຈັດງານໂອແລັມປິກທີ່ຈົບງາມ,ຄະນະຈັດຕັ້ງຂອງປັກກິ່ງໄດ້ເຮັດທຸກສິ່ງທຸກຢ່າງ. ຂ້າພະເຈົ້າຮູ້ສຶກດີໃຈທີ່ສຸດ,ຢູ່ບ່ອນນີ້ ບໍ່ມີບັນຫາມົນລະພິດສິ່ງແວດລ້ອມຄືຜູ້ອື່ນເວົ້າ,ບໍ່ມີຄົນເວົ້າເຖິງປະກົດການທີ່ບໍ່ກົມກຽວກັນໃນການສົ່ງຕໍ່ທວນໄຟ,ຄົນທັງຫຼາຍມີແຕ່ສົນໃຈນຳຜົນການແຂ່ງຂັນແລະຊົມເບິ່ງການແຂ່ງຂັນອັນໜ້າຊົມ."
ໃນງານກິລາໂອແລັມປິກຄັ້ງນີ້,ທິມຍົກນ້ຳໜັກຈີນໄດ້ຮັບຜົນງານດີເດັ່ນຄືໄດ້ຮັບ 8 ຫຼຽນຄຳແລະ 1 ຫຼຽນເງິນ. ທ່ານອະຈັນກໍໄດ້ເຫັນການສະແດງທີ່ດີເດັ່ນຂອງທິມຈີນ,ໃນສາຍຕາຂອງເພີ່ນ,ການທີ່ທິມຍົກນ້ຳໜັກຂອງຈີນໄດ້ຮັບຜົນງານດີແນວນີ້ບໍ່ແມ່ນສິ່ງມະຫັດສະຈັນດອກ,ເພາະວ່າທ່ານອະຈັນໄດ້ຕິດຕາມແລະສົນໃຈນຳການພັດທະນາຂອງລາຍການຍົກນ້ຳໜັກຂອງຈີນໃນຫຼາຍປີມານີ້ມາໂດຍຕະຫຼອດ. ທ່ານກ່າວວ່າ,ການຮ່ວມມືຂອງໝົດທິມຍົກນ້ຳໜັກຂອງຈີນໄດ້ຝາກພາບປະທັບໃຈອັນເລິກເຊິ່ງໄວ້ໃຫ້ທ່ານ,ທ່ານກ່າວວ່າ:
"ການແຂ່ງຂັນກິລາໃນຍຸກປັດຈຸບັນແມ່ນເອົາໃຈໃສ່ນຳການຮ່ວມມືຂອງໝົດທິມ,ໃນການກະກຽມການແຂ່ງຂັນ,ການຮ່ວມມືຂອງທິມມີບົດບາດສຳຄັນທີ່ສຸດ. ຄູເຝິກ, ນາຍໝໍແລະພະນັກງານເຕັກນິກອື່ນໆຂອງທິມຍົກນ້ຳໜັກຈີນລ້ວນແຕ່ເຮັດວຽກໄດ້ດີ,ນີ້ກໍແມ່ນສາເຫດທີ່ເຮັດໃຫ້ຂ້າພະເຈົ້າດີໃຈ. ທິມຍົກນ້ຳໜັກຈີນໄດ້ຮັບຫຼຽນຄຳຫຼາຍປານນີ້ ຂ້າພະເຈົ້າເຫັນວ່າແມ່ນເລື່ອງທີ່ສົມເຫດສົມຜົນ"ທ່ານອະຈັນບອກນັກຂ່າວວ່າ,ທ່ານກັບເຈົ້າໜ້າທີ່ເຕັກນິກຂອງສະຫະພັນຍົກນ້ຳໜັກສາກົນເຄີຍໄປຢ້ຽມຢາມໂຮງຮຽນຍົກນ້ຳໜັກແຫ່ງໜຶ່ງຂອງຈີນທີ່ຕັ້ງຢູ່ເຂດຊຸ້ນອີ້ນະຄອນປັກກິ່ງ,ຢູ່ແຫ່ງນັ້ນ ທ່ານອະຈັນໄດ້ປະກົດເຫັນພື້ນຖານຂອງການພັດທະນາລາຍການຍົກນ້ຳໜັກຂອງຈີນໃນອະນາຄົດ,ທ່ານກ່າວວ່າ
"ຂ້າພະເຈົ້າກັບເຈົ້າໜ້າທີ່ເຕັກນິກໄດ້ໄປວິທະຍາໄລກິລາແຫ່ງໜຶ່ງຂອງຈີນ,ນັກກິລາຢູ່ແຫ່ງນັ້ນລ້ວນແຕ່ມີພື້ນຖານທີ່ດີ.ມີຊາວໜຸ່ມນັບເປັນພັນຄົນຝຶກແອບທຸກມື້,ເຂົາເຈົ້າມີການຮັບປະກັນທີ່ດີໃນດ້ານໂພສະນາການ,ອາຫານແລະການປິ່ນປົວ.ຖ້າວ່າທິມຈີນໄດ້ຫຼຽນຄຳອີກຫຼາຍຫຼຽນ,ຂ້າພະເຈົ້າກໍ່ບໍ່ຮູ້ສຶກແປກປະຫຼາດ,ເພາະນັກກິລາຈີນມີແຜນການຝຶກແອບທີ່ຈົບງາມ,ຂ້າພະເຈົ້າເຊື່ອວ່າເຂົາເຈົ້າຈົນກະທັ້ງໄດ້ກຽມພ້ອມແລ້ວເພື່ອເຂົ້າຮ່ວມງານກິລາໂອລິມປິກລອນດອນປີ2012"
ນອກຈາກຜົນງານທີ່ດີເດັ່ນຂອງນັກກິລາຈີນແລ້ວ,ທ່ານທາມາສ ອາຈັນ ຍັງຮູ້ສຶກງຶດງໍ້ຫຼາຍຕໍ່ຜູ່ຊົມຈີນທີ່ໄປເບິ່ງການແຂ່ງຂັນຍົກນ້ຳໜັກຢູ່ສະໜາມກິລາມະຫາວິທະຍາໄລການບິນອະວະກາດປັກກິ່ງ,ທ່ານເຫັນວ່າ,ຜູ່ຊົມຈີນບໍ່ພຽງແຕ່ມີຄວາມກະຕືລືລົ້ນຢ່າງເຕັມປ່ຽມເທົ່ານັ້ນ,ແລະຍັງໄດ້ປະຕິບັດຕໍ່ນັກກິລາປະເທດຕ່າງໆຢ່າງຍຸດຕິທຳ.ທ່ານກ່າວວ່າ:
"ຂ້າພະເຈົ້າຢາກບອກທ່ານວ່າ,ໃນຫຼາຍມື້ຜ່ານມາ,ຂ້າພະເຈົ້າດີໃຈຫຼາຍທີ່ໄດ້ເຫັນມີຜູ່ຊົມຈີນຫຼານປານນັ້ນໄປຊົມການແຂ່ງຂັນຍົກນ້ຳໜັກຢູ່ສະໜາມກິລາ,ຂ້າພະເຈົ້າຍັງຢາກເຊື້ອເຊີນຜູ່ຄົນຫຼາຍກວ່ານັ້ນໄປຊົມການແຂ່ງຂັນນີ້,ເຂົາເຈົ້າເຊຍໃຫ້ນັກກິລາທຸກຄົນ,ບໍ່ພຽງແຕ່ເຊຍໃຫ້ນັກກິລາຈີນເທົ່ານັ້ນ,ຍັງໄດ້ເຊຍໃຫ້ນັກກິລາປະເທດອື່ນຢ່າງທ່ຽງທຳອີກດ້ວຍ,ຈັ່ງແມ່ນດີຫຼາຍ."
ໃນຕອນທ້າຍຂອງການສຳພາດ,ທ່ານອາຈັນໄດ້ຜ່ານຈາກວິທະຍຸສາກົນແຫ່ງປະເທດຈີນສົ່ງຄວາມອວຍພອນໄປຍັງຜູ່ຟັງທຸກຄົນ,ທ່ານກ່າວວ່າ:
"ຂ້າພະເຈົ້າຊື່ວ່າທາມາສ ອາຈັນ, ແມ່ນກຳມະການຂອງຄະນະກຳມະການໂອລິມປິກສາກົນ,ປະທານຂອງສະຫະພັນຍົກນ້ຳໜັກສາກົນ,ຂ້າພະເຈົ້າຂໍຝາກຄວາມອວຍພອນທີ່ດີທີ່ສຸດໄປຍັງມິດລາຍການຂອງCRI,ຂໍໃຫ້ທຸກໆຄົນຈົ່ງມີຄວາມສຸກ,ຄວາມສະບາຍດີໝົດທຸກຄົນ!"
