ງານໂອລິມປິກຄັ້ງທີ29ອັດລົງຢູ່ທີ່ປັກກິ່ງຢ່າງສຳເລັດຜົນ
-----------------------------------------------------------------------------------------------------------------
ຕາມຂ່າວສານຊິນຮວາ: ຕອນຄ່ຳວັນທີ24 ສິງຫານີ້, ພິທີອັດງານກິລາໂອລິມປິກຄັ້ງທີ29ໄດ້ຈັດຂຶ້ນຢູ່ສະໜາມກິລາແຫ່ງຊາດຈີນ ຫຼືຮັງນົກ, ພາຍໃນບັນຍາກາດທີ່ສາມັກຄີ,ມ່ວນຊື່ນ ແລະ ກົມກຽວກັນ,ນັກກິລາ,ຄູເຝິກ ແລະ ແຂກທີ່ມາຈາກ204ປະເທດ ແລະ ເຂດແຄວ້ນຕ່າງໄດ້ພ້ອມກັນສະຫຼອງງານໂອລິມປິກປັກກິ່ງໄດ້ຮັບຜົນສຳເລັດຢ່າງຈົບງາມ.
ທ່ານຫູຈິນທາວ ປະທານປະເທດຈີນ, ທ່ານຊາກ ຣົກເກ ປະທານຄະນະກຳມະການໂອລິມປິກສາກົນ, ທ່ານຊາມາຣານສ໌ ປະທານກິຕະມະສັກຂອງຄະນະກຳມະການໂອລິມປິກສາກົນ ພ້ອມທັງ ຜູ່ນຳ ແລະ ແຂກຜູ່ມີກຽດທີ່ມາຈາກແຫ່ງຕ່າງໆທົ່ວໂລກໄດ້ເຂົ້າຮ່ວມພິທີອັດງານ.
ໃນເວລາກ່າວຄຳປາໄສຢູ່ໃນພິທີອັດງານ, ທ່ານລີວຊີ ປະທານຄະນະຈັດຕັ້ງໂອລິມປິກປັກກິ່ງກ່າວວ່າ, ໄຟສັກສິດໂອລິມປິກໄດ້ດັບມອດລົງແລ້ວ, ແຕ່ຄວາມເປັນມິດກັບໂລກຂອງປະຊາຊົນຈີນຈະລຸກຮຸ່ງແຈ້ງສະຫວ່າງຕະຫຼອດໄປ, ພວກເຮົາອວຍພອນຢ່າງຈິງໃຈໃຫ້ກິລາໂອລິມປິກສືບຕໍ່ຂະຫຍາຍຕົວຢ່າງບໍ່ຢຸດຢັ້ງ.
ໃນເວລາກ່າວຄຳປາໄສຢູ່ໃນພິທີອັດງານ,ທ່ານຊາກ ຣົກເກ ປະທານຄະນະກຳມະການໂອລິມປິກສາກົນກ່າວວ່າ, ນີ້ແມ່ນງານກິລາໂອລິມປິກຄັ້ງໜຶ່ງທີ່ບໍ່ມີອັນທຽບໄດ້, 16ມື້ທີ່ສະຫງ່າລາສີຈະຈາລຶກໃນໃຈຂອງພວກເຮົາຕະຫຼອດໄປ. ທ່ານຕາງໜ້າຄະນະກຳມະການໂອລິມປິກສາກົນ, ຂອບໃຈປະຊາຊົນຈີນ, ຂອບໃຈອາສາສະໝັກທີ່ດີເດັ່ນ ທັງຫຼາຍ,ຂອບໃຈຄະນະຈັດຕັ້ງໂອລິມປິກປັກກິ່ງ. ສຸດທ້າຍ,ທ່ານຊາກ ຣົກເກກໍ່ປະກາດອັດງານກິລາໂອລິມປິກ, ແລະ ຮຽກຮ້ອງໃຫ້ຄົນທັງຫຼາຍໄປເຕົ້າໂຮມກັນໃນງານໂອລິມປິກຄັ້ງທີ30ທີ່ຈະຈັດຂຶ້ນຢູ່ນະຄອນລອນດອນໃນ4ປີຂ້າງໜ້າ.
ງານໂອລິມປິກປັກກິ່ງແມ່ນງານມະຫາກຳກິລາທີ່ສະຫງ່າລາສີໃນປະຫວັດສາດກິລາຂອງໂອລິມປິກ. ໃນ16ມື້ທີ່ຜ່ານໄປນັ້ນ, ນັກກິລາ1ໝື່ນກວ່າຄົນທີ່ມາຈາກ204ປະເທດ ແລະ ເຂດແຄວ້ນໄດ້ຕໍ່ສູ້ກັບສິ່ງທ້າທາຍ ແລະ ສ້າງສະຖິຕິໃໝ່,ທຳລາຍສະຖິຕິໂລກ38ລາຍການ ແລະ ສະຖິຕິງານໂອລິມປິກ85ລາຍການ, ມີຫຼາຍປະເທດ ແລະ ເຂດແຄວ້ນສາມາດຊີງໄດ້ຫຼຽນຄຳ ແລະ ຫຼຽນອື່ນໆໃນງານໂອລິມປິກ. ໃນຖານະທີ່ເປັນເຈົ້າພາບ, ຄະນະນັກກິລາຈີນໄດ້ຮັບຫຼຽນຄຳ51ຫຼຽນ, ຫຼຽນລາງວັນ100ຫຼຽນ, ເປັນທີໜຶ່ງໃນລາຍຊື່ຫຼຽນຄຳຂອງງານໂອລິມປິກ, ໄດ້ສ້າງຜົນງານດີກວ່າໝູ່ ນັບແຕ່ຄະນະນັກກິລາຈີນໄດ້ເຂົ້າຮ່ວມງານໂອລິມປິກມານີ້.
