ໂອລິມປິກຂອງປະຊາຊົນ1ຕື້300ລ້ານຄົນ
-----------------------------------------------------------------------------------------------------------------
"ຜູ່ໄດ້ສິດເປັນເຈົ້າພາບຈັດງານກິລາໂອລິມປິກຄັ້ງທີ29ໄດ້ແກ່"ປັກກິ່ງ"
ວັນທີ13ກໍລະກົດ2001,ກອງປະຊຸມຄົບຄະນະເທື່ອທີ112ຂອງຄະນະກຳມະການໂອລິມປິກສາກົນໄດ້ຈັດຂຶ້ນຢູ່ມົສກູ ນະຄອນຫຼວງຂອງຣັດເຊຍ.ທ່ານຊາມາລານສ ປະທານຄະນະກຳມະການໂອລິມປິກສາກົນປະກາດວ່າ,ປັກກິ່ງໄດ້ຮັບສິດເປັນເຈົ້າພາບຈັດງານກິລາໂອລິມປິກ2008.
ຕາມທ່ານລິວເວີນຈ່າວ ຜູ່ຊ່ຽວຊານຈີນເຫັນວ່າ,ເທື່ອນີ້,ຄະນະກຳມະການໂອລິມປິກສາກົນຄັດເລືອກຈີນແມ່ນເລື່ອງທີ່ສົມເຫດສົມຜົນ.ທ່ານກ່າວວ່າ:"ຕໍ່ການພັດທະນາຂອງຈີນນັ້ນປະເທດສ່ວນໃຫຍ່ແລະປະຊາຊົນສ່ວນຫຼາຍໃນໂລກເຫັນວ່າແມ່ນທ່າອຽງທີ່ປ່ຽນແປງບໍ່ໄດ້ແລະຂັດຂວາງບໍ່ໄດ້."
ເມື່ອຮ້ອງຂໍເປັນເຈົ້າພາບຈັດງານກິລາໂອລິມປິກສຳເລັດຜົນ,ຈີນກໍ່ສະເຫຼີມສະຫຼອງກັນຢ່າງສຸດໃຈຍ້ອນຄວາມຝັນບັນລຸຜົນເປັນຈິງ, ບັດນັ້ນ,ຄົນຈີນກໍ່ເລີ່ມຄົ້ນຄິດວ່າ,ເຮັດແນວໃດຈິ່ງຈະຈັດງານກິລາໂອລິມປິກທີ່ໄດ້ມາບໍ່ງ່າຍຄັ້ງນີ້ໃຫ້ສຳເລັດຜົນເປັນຢ່າງດີ.
ໃນໄລຍະກຽມຈັດງານກິລາໂອລິມປິກ7ປີ,ສະໜາມກິລາແຫ່ງຕ່າງໆເຊັ່ນຮັງນົກ, ກ້ອນນ້ຳສີ່ຫຼ່ຽມໄດ້ສ້າງຕັ້ງຂຶ້ນ,ປັກກິ່ງຍິ່ງສວຍງາມກວ່າເກົ່າ,ສະອາດກວ່າເກົ່າແລະທັນສະໄໝກວ່າເກົ່າ.
ພາຍຫຼັງມາຮອດປັກກິ່ງແລ້ວ,ທ້າວໂຢເຊັຟ ອັບດີ ນັກກິລາແລ່ນ ຂ້າມສິ່ງກີດຂວາງ 3000ແມັດຂອງອົສຕຼາລີມີຄວາມຮູ້ສຶກອັນແທ້ຈິງ,ລາວບອກວ່າ:
"ໃນເວລາຍົນຫາກໍ່ລົງຈອດ,ຂ້ອຍກໍ່ຮູ້ສຶກຕື່ນຕົກໃຈຍ້ອນສະໜາມບິນສາກົນນະຄອນຫຼວງປັກກິ່ງທີ່ໃໝ່ອ່ຽມ,ສະໜາມບິນທັງກວ້າງທັງສະຫງ່າງາມ,ມີບັນຍາກາດທັນສະໄໝຫຼາຍ.ເສັ້ນທາງຕ່າງໆໃນເມືອງແລະເສັ້ນທາງໄປຮອດບ້ານໂອລິມປິກລ້ວນແຕ່ສະດວກຫຼາຍ.ຂ້ອຍບໍ່ເຂົ້າໃຈເລີຍວ່າເປັນຫຍັງນັກຂ່າວຕ່າງປະເທດບາງຄົນຈິ່ງມັກຕຳນິຕິຕຽນປັກກິ່ງ, ຂ້ອຍວ່າປັກກິ່ງ,ເກັ່ງຫຼາຍ."
ທ່ານອິກໍ ກຼຸດິນ ນັກກິລາເອກຂອງທິມບານບ້ວງເພດຍິງຣັດເຊຍເຫັນວ່າ: "ວຽກງານການຈັດຕັ້ງຂອງຈີນດີຫຼາຍ, ອາສາສະໝັກ ພະນັກງານຈັດຕັ້ງ ການແຂ່ງຂັນແລະຜູ້ຊົມທັງໝົດລ້ວນແຕ່ເຮັດໃຫ້ຂ້າພະເຈົ້າປະທັບໃຈຢ່າງເລິກເຊິ່ງ. ພວກເຮົາຍັງມີບ້ານໂອລິມປິກທີ່ສວຍງາມ. ຍ້ອນການບໍລິການແລະເງື່ອນໄຂພື້ນຖານໂຄງລ່າງອັນດີເລີດດັ່ງກ່າວ, ນັກກິລາທັງຫຼາຍກໍໄດ້ສ້າງຜົນງານດີເດັ່ນຫຼາຍ.
ຖ້າວ່າທ່ານເຄີຍໄປທ່ອງທ່ຽວແຫ່ງຕ່າງໆຂອງຈີນ, ທ່ານກໍສາມາດເຫັນວ່າ, ງານໂອລິມປິກທີ່ຈັດຂຶ້ນຢູ່ປັກກິ່ງໄດ້ກາຍເປັນງານໂອລິມປິກຂອງປະຊາຊົນຈີນ 1 ຕື້ 300 ລ້ານຄົນແຕ່ດົນແລ້ວ. ຄົນຈີນນັບແຕ່ເດັກນ້ອຍຮອດຜູ້ເຖົ້າຜົມຫງອກ, ລ້ວນແຕ່ລົມກັນກ່ຽວກັບງານໂອລິມປິກ, ລ້ວນແຕ່ຢາກເຮັດສິ່ງໃດສິ່ງໜຶ່ງປະກອບສ່ວນໃຫ້ແກ່ງານໂອລິມປິກ. ໃນເວລາທວນໄຟໂອລິມປິກສົ່ງຕໍ່ຢູ່ 110 ຕົວເມືອງຂອງຈີນ, ບ່ອນສົ່ງຕໍ່ທວນໄຟມີຄົນເຕັມໄປໝົດ, ກາຍເປັນການສົ່ງຕໍ່ທວນໄຟທີ່ມີຜູ້ເຂົ້າຮ່ວມຫຼາຍທີ່ສຸດໃນປະຫວັດງານໂອລິມປິກ. ອີກດ້ານໜຶ່ງ, ຈຳນວນອາສາສະໝັກຂອງງານໂອລິມປິກປັກກິ່ງຫຼາຍຊ່ຳນີ້ກໍແມ່ນຫາຍາກໃນງານໂອລິມປິກທຸກຄັ້ງທີ່ຜ່ານມາ.
ໃນພິທີອັດງານໂອລິມປິກ, ທ່ານຊາກຣົກເກ ປະທານຄະນະກຳມະການງານໂອລິມປິກສາກົນຕີລາຄ່າວ່າ:
"ໂດຍຜ່ານງານໂອລິມປິກເທື່ອນີ້, ໂລກໄດ້ຮູ້ຈັກຈີນຫຼາຍກວ່າເກົ່າ, ຈີນກໍໄດ້ຮູ້ຈັກໂລກຫຼາຍກວ່າເກົ່າ. ນີ້ແມ່ນງານໂອລິມປິກຢ່າງແທ້ຈິງແລະດີເດັ່ນເປັນພິເສດ!"
ທ່ານຖາວເຫວີນຈ່າວ ນັກວິຊາການທີ່ມີຊື່ສຽງຍັງໄດ້ເຫັນປະກົດການໜຶ່ງທີ່ໜ້າສົນໃຈຢ່າງໜຶ່ງ: ນັ້ນກໍຄືໃນທິມກິລາຈີນຫຼາຍທິມ, ມີຄູຝຶກທີ່ມາຈາກຕ່າງປະເທດ.
"ຕົວຢ່າງທີ່ເດັ່ນຊັດທີ່ສຸດແມ່ນນາງລາງພີງ,ນາງເຄີຍເປັນນັກກິລາບານສົ່ງທີ່ຊື່ດັງຂອງຈີນ, ແຕ່ດຽວນີ້ເປັນຄູຝຶກຂອງທິມບານສົ່ງອາເມລິກາ,ແລະນຳພາທິມອາເມລິກາເອົາຊະນະທິມ ຈີນໃນງານກິລາໂອລິມປິກຄັ້ງນີ້."
ທ່ານທາວເວີນຈ່າວກ່າວວ່າ,ເລື່ອງແບບນີ້ຖ້າວ່າຢູ່ໃນ20ປີກ່ອນຫຼືວ່າ30ປີກ່ອນ, ຄົນຈີນແມ່ນບໍ່ອາດຮັບເອົາໄດ້.ແຕ່ດຽວນີ້,ຈິດໃຈຂອງຄົນຈີນເປີດກວ້າງກວ່າເກົ່າແລ້ວ,ການທີ່ນັກກິລາຂອງຈີນໄປປະເທດອື່ນ,ແມ່ນເປັນເລື່ອງປົກກະຕິທີ່ປະເທດຕ່າງກັນແລະວັດທະນະທຳຕ່າງກັນແລກປ່ຽນກັນແລະຊ່ວຍເຫຼືອກັນ.ນີ້ກໍ່ແມ່ນຈຸດປະສົງທີ່ພວກເຮົາຢາກບັນລຸໂດຍຜ່ານກິລາແລະງານໂອລິມປິກ.ຈິດໃຈທີ່ເປີດກວ້າງຂອງຄົນຈີນໄດ້ສະ ແດງໃຫ້ເຫັນເປັນຢ່າງດີໃນງານກິລາໂອລິມປິກຄັ້ງນີ້.
ທ່ານຈິ່ນຢວນຜູ ຜູ້ຊ່ຽວຊານຊື່ດັງຂອງຈີນກ່າວວ່າ:"ເທື່ອນີ້ຈີນສະເໜີອອກມາວ່າ ຄວາມປອງດອງ ຄວາມຮັກແພງແລະຄວາມສະໜິດສະໜົມ,ແມ່ນຢາກໃຊ້ຄວາມປອງດອງທີ່ເປັນຈິດໃຈຝ່າຍຕາເວັນອອກຂອງຈີນມາເປັນການຄ້ຳຊູຍູ້ໜູນຕໍ່ຈິດໃຈໂອລິມປິກທີ່ວ່າ "ສູງກວ່າເກົ່າ ໄວກວ່າເກົ່າແລະແຂງແຮງກວ່າເກົ່າ"."
ແຕ່ງານກິລາໂອລິມປິກຂອງຄົນຜູ້ດຽວຂະຫຍາຍຮອດງານກິລາໂອລິມປິກຂອງ1ຕື້300ລ້ານຄົນ,ນີ້ແມ່ນຂະບວນການທີ່ຈີນຍ່າງເຂົ້າໃກ້ກັບໂອລິມປິກແລະຍ່າງໄປສູ່ໂລກ.ເຖິງວ່າງານກິລາໂອລິມປິກປັກກິ່ງໄດ້ອັດງານຢ່າງຈົບງາມແລ້ວກໍ່ຕາມ,ແຕ່ຈີນຍັງຈະເຊື່ອມໂຍງເຂົ້າກັບໂອລິມປິກແລະປະເຊີນໜ້າກັບໂລກດ້ວຍຈິດໃຈທີ່ເປີດກວ້າງ.
