ກຸ້ຍຢາງ ເມືອງແຫ່ງອາກາດເຢັນສະບາຍ(1)
-----------------------------------------------------------------------------------------------------------------
ຍົນໂບອີງ737-300ຂອງສາຍການບິນ"ແອໄຊນາ"ໄດ້ພາຄະນະພວກເຮົາ ເຫີນຟ້າຈາກນະຄອນຫຼວງປັກກິ່ງທີ່ຕັ້ງຢູ່ທາງພາກເໜືອຂອງປະເທດມຸ້ງໜ້າລົງໃຕ້ສູ່ນະຄອນກຸ້ຍຢາງທີ່ຕັ້ງຢູ່ທິດຕາເວັນຕົກສຽງໃຕ້ຂອງຈີນໃຊ້ເວລາ 2 ຊົ່ວໂມງກັບ 40 ນາທີ. ພວກເຮົາຮອດສະໜາມບິນກຸ້ງຢາງທີ່ບໍ່ໃຫຍ່ປານໃດແຕ່ທັນສະໄໝສະອາດງາມຕາໃນຕອນບ່າຍຂອງວັນພະຫັດ,ທີ 28 ສິງຫາ 2008. ພໍແຕ່ກ້າວຂາອອກຈາກປະຕູຍົນ,ສາຍລົມຄ່ອຍໆພັດໂຊຍມາສຳຜັດໃບໜ້າ,ເຮັດໃຫ້ຮູ້ສຶກເຢັນສະບາຍ,ຮູ້ສຶກໄດ້ເຖິງຄວາມບໍລິສຸດສົດໃສຂອງອາກາດຢູ່ທີ່ນີ້.
ກຸ້ຍຢາງເປັນເມືອງທີ່ຂຽວອຸ່ມທຸ່ມໄປດ້ວຍຕົ້ນໄມ້ໃບຫຍ້າ; ທ້ອງຟ້າທີ່ພວກເຮົາເຫັນໃນມື້ນີ້ ກໍມີເມກບາງສະລັບກັບແສງແດດອັນອົບອຸ່ນ; ອຸນຫະພູມປະມານ 20 ອົງສາຕົ້ນໆ. ເມືອງນີ້ແປກຫຼາຍສຳລັບຜູ້ຂຽນ ເພາະເປັນເມືອງທີ່ມີຕຶກອາຄານເກົ່າແລະຕຶກໃໝ່ທີ່ທັນສະໄໝຕັ້ງຢູ່ຕາມຫວ່າງໜ່ວຍພູນ້ອຍທີ່ຂຽວງາມດ້ວຍໄມ້ປ່ອງນາໆຊະນິດແລະຕົ້ນໄມ້ນາໆພັນ. ນັ່ງລົດຈາກສະໜາມບິນເຂົ້າສູ່ໃຈກາງເມືອງກໍໃຊ້ເວລາປະມານ 10 ກວ່ານາທີກໍເຖິງແລ້ວ. ຢູ່ອ້ອມຮອບຕົວເມືອງກໍເຕັມໄປດ້ວຍສາຍພູທັງນ້ອຍແລະໃຫຍ່ ແຕ່ເປັນພູທີ່ບໍ່ສູງຫຼາຍຄືຢູ່ພາກເໜືອຂອງປະເທດລາວ.
ໃນປີ2006 ສະມາຄົມປົກປ້ອງສະພາບແວດລ້ອມອາຊີ-ປາຊິຟິກຂອງຈີນໄດ້ຈັດໃຫ້ກຸ້ງຢາງເປັນ 1 ໃນ 10 ເມືອງທີ່ດີທີ່ສຸດສຳລັບການພັກຜ່ອນຕາກອາກາດໃນລະດູຮ້ອນຂອງຈີນ; ກຸ້ຍຢາງກໍຄ້າຍໆກັບຄຸນໝິງຂອງແຂວງຢູນນານ,ຄືຈະເປັນເມືອງແຫ່ງລະດູບານໃໝ່ຕະຫຼອດປີເລີຍ; ມີແຕ່ຄວາມສົດຊື່ນ ມີແຕ່ຄວາມຂຽວຮົ່ມເຢັນຕະຫຼອດປີ; ກຸ້ຍຢາງເກືອບວ່າມີເມກແລະຝົນຕົກຕະຫຼອດປີ ສະລັບກັບແສງແດດທີ່ອົບອຸ່ນ. ແຫຼ່ງທ່ອງທ່ຽວທຳມະຊາດ,ວັດຖຸບູຮານແລະຮີດຄອງປະເພນີຊົນເຜົ່າກໍບໍ່ຢູ່ໄກຈາກໃຈກາງເມືອງພໍເທົ່າໃດ,ສະດວກສະບາຍຫຼາຍສຳລັບການເດີນທາງ. ແຕ່ສຳລັບບົດນີ້ ຂໍພໍເທົ່ານີ້ກ່ອນ; ບົດຕໍ່ໄປເຫັນຫຍັງດີໆງາມໆປະທັບໃຈ ຈະເອົາມາຂຽນໃຫ້ອ່ານມ່ວນໆນຳກັນຕໍ່.
