ໃນນ້ຳມີປາໃນນາມີເຂົ້າ(3)
-----------------------------------------------------------------------------------------------------------------
ຂຽນໂດຍ: ສັງຂານ ຈູມຄຳພັນ, ຊ່ຽວຊານຂອງພະແນກພາສາລາວ
ຖ້າເວົ້າເຖິງຕົວເລກທີ່ເປັນສີລິມົງຄຸນແລ້ວ, ຄົນຈີນເຊື່ອວ່າເລກ 8 ແມ່ນເລກແຫ່ງຄວາມໂລກດີ. ໂອລິມປິກປັກກິ່ງກໍ່ໄຂຂຶ້ນໃນວັນທີ 8 ສີງຫາ 2008. ໄປກຸ້ຍຢາງເທື່ອນີ້ຜູ້ຂຽນກໍ່ຈິ່ງຮູ້ສຶກວ່າເລກ 8 ເປັນເລກແຫ່ງຄວາມໂຊກດີອີ່ຫຼີເພາະວ່າຄະນະນັກຂ່າວຕ່າງປະເທດຂອງCRIເດີນທາງໄປຮອດກຸ້ຍຢາງ, ເມືອງຕາກອາກາດໃນລະດູຮ້ອນທີ່ດີທີ່ສຸດຂອງຈີນກໍແມ່ນວັນທີ 28 ສີງຫາ 2008. ເປັນຫຍັງຈິ່ງວ່າໂຊກດີ? ກໍ່ເພາະໄດ້ມີບຸນວາດສະໜາໄດ້ມາສຳພັດກັບນະຄອນທີ່ມີເໜ່ທາງທຳມະຊາດປະຫວັດສາດ ຮີດຄອງປະເພນີວັດທະນະທຳທີ່ອຸດົມສົມບູນແທ້ໆ. ຜູ້ຂຽນຂໍຂະໜານນາມໃຫ້ເມືອງນີ້ຕາມທັດສະນະສ່ວນຕົວວ່າ"ຖິ່ນງາມ ຄົນນ້ຳໃຈດີ".
ມື້ນີ້(ວັນເສົາ, ທີ30ສີງຫາ)ອາກາດຢູ່ນະຄອນກຸ້ຍຢາງຍິ່ງຊຸ່ມເຢັນເພາະຜ່ານມາມີຝົນແຮງແລະສືບຕໍ່ຕົກລິນຄ່ອຍໆເປັນບາງຄັ້ງຄາວຕະຫຼອດມື້ນີ້, ທຸກຄົນຕ້ອງຖືຄັນຮົ່ມຕິດຕົວ. ມື້ນີ້ເຈົ້າພາບພາອອກໄປທ່ຽວໄກກວ່າເກົ່າເພື່ອໄປຊົມວິຖີຊິວິດຂອງຄົນຊົນນະບົດຢູ່ເມືອງຂ່າຍຢາງທີ່ຕັ້ງຢູ່ຫ່າງຈາກນະຄອນກຸ້ຍຢາງໄປທາງທິດຕາມເວັນອອກສຽງເໜືອ 50 ກິໂລແມັດ, ພວກເຮົານັ່ງລົດບັດສ໌ພິເສດທີ່ເຈົ້າພາບຈັດໃຫ້ເດີນທາງໄປກິນເວລາຊົ່ວໂມງປາຍໜ້ອຍໜຶ່ງຈິ່ງຮອດເມືອງຂ່າຍຢ່າງ. ຕົວເມືອງນີ້ຕັ້ງຢູ່ຕາມຮ່ອມພູແລະເປັນພູມີນ້ຳຊິງຫຼຸງໄຫຼຜ່ານ. ນ້ຳສາຍນີ້ກໍ່ບໍ່ໃຫຍ່ບໍ່ນ້ອຍ, ທຽບຢູ່ລາວແລ້ວກໍ່ຊ່ຳໆກັບນ້ຳຊອງຢູ່ເມືອງວັງວຽງແຂວງວຽງຈັນນັ້ນລະ. ກ່ອນຈະໄປທ່ຽວບ້ານຊົນເຜົ່າ 2 ບ້ານຕາມແຜນເດີນທາງສຳລັບມື້ນີ້, ເຈົ້າພາບພາພວກເຮົາຂີ່ລົດບັດສ໌ຂຶ້ນໄປເ່ງພູສູງເພື່ອໄປຊົມວິວຂອງຊົນນະບົດທີ່ໜ້າປະທັບໃຈ; ຂຶ້ນໄປຮອດຈຸດຊົມວິວທີ່ສູງຈາກລະດັບນ້ຳທະເລ 800 ກວ່າແມັດນັ້ນ, ຫຼຽວລົງໄປທາງລຸ່ມໄກໆມັນຊ່າງງາມອີ່ຫຼີ, ສົມວ່າເປັນເຂດທີ່ດິນດຳນ້ຳຊຸ່ມແທ້ໆ. ຢູ່ຜົ້ງທີ່ມີພູອ້ອມຮອບນັ້ນມີສາຍນ້ຳຊິງຫຼຸງໄຫຼກ້ຽວກອດທົ່ງນາທີ່ເຂົ້າຫາກໍ່ຖອກຮວງໃໝ່ຂຽວທົ່ວທົ່ງເບິ່ງແລ້ວຄືມັງກອນໂຕໃຫຍ່ເລືອກ້ຽວກອດດິນແດນທີ່ອຸດົມສົມບູນແຫ່ງນີ້. ດ້ວຍຄວາມກະຕືລືລົ້ນທີ່ຈີນໄດ້ເປັນເຈົ້າພາບໂອລິມປິກ 2008, ຊາວນາໄດ້ປູກພືດທີ່ເປັນສີເຂັ້ມມ່ວງໜ້ອຍໜຶ່ງເພື່ອໃຫ້ສີຕັດກັບສີຂຽວຂອງທົ່ງນາທີ່ກວ້າງໃຫຍ່; ເຂົາເຈົ້າປູກພືດທີ່ວ່ານັນໃຫ້ເປັນຮູບ 5 ບ້ວງໂອລິມປິກຂະໜາດໃຫຍ່ຢູ່ກາງທົ່ງ, ຫຼຽງລົງໄປຈາກຈຸດຊົມວິວເຫັນໄດ້ຢ່າງຈະແຈ້ງຕາມທີ່ຜູ້ຂຽນໄດ້ຖ່າຍພາບມາແບິ່ງປັນຄວາມງາມໃຫ້ເບິ່ງນຳກັນນີ້ລະ.