ງານລ້ຽງ ຍ່ອມມີວັນເລີກລາ!(5)
-----------------------------------------------------------------------------------------------------------------
ມື້ນີ້(ວັນທີ1ກັນຍາປີ2008)ຄະນະນັກຂ່າວຕ່າງປະເທດຂອງCRIທີ່ປະກອບດ້ວຍຜູ້ຊ່ຽວຊານຂອງພະແນກພາສາລາວ ມະເລເຊຍ ຕັງຊານີ ມົງໂກລີ ອັງກິດ ເຢຍລະມັນ ອິນເດຍແລະສາທາລະນະລັດເຊັກອອກສູ່ສະໜາມບິນນະຄອນກຸ້ຍຢາງເພື່ອເດີນທາງກັບປັກກິ່ງແຕ່6ໂມງ.
ຕະຫຼອດ4ຄືນ5ມື້ທີ່ພວກເຮົາມີວາດສະໜາໄດ້ມາທ່ຽວກຸ້ຍຢາງ, ນະຄອນຕາກອາກາດໃນລະດູຮ້ອນທີ່ດີທີ່ສຸດຂອງຈີນ, ເມືອງແຫ່ງນີ້ອາກາດເຢັນສະບາຍແຫ່ງນີ້ ທຸກສິ່ງທຸກຢ່າງລ້ວນແຕ່ປະທັບໃຈ ບໍ່ວ່າຈະເປັນສາຍລົມທີ່ອ່ອນໄຫວ ແສງແດດທີ່ອົບອຸ່ນ, ສາຍຝົນທີ່ຊຸ່ມເຢັນ, ອາກາດທີ່ສົດຊື່ນເຢັນສະບາຍ ຢູ່ກຸ້ຍຢາງໃນລະດູຮ້ອນສູງສຸດກໍ່ມີແຕ່24ອົງສາ, ສ່ວນລະດູໜາວຕ່ຳສຸດກໍ່ພຽງແຕ່4ອົງສາ, ສະນັ້ນຄຳເວົ້າລາວຄຳໜຶ່ງວ່າ"ໝີຮ້ອນມາເພິ່ງເຢັນ"ແມ່ນໝາະທີ່ສຸດທີ່ຈະໃຊ້ກັບນະຄອນກຸ້ຍຢາງແຫ່ງນີ້, ສີຂຽວຂອງຕົວເມືອງແລະຊົນນະບົດເຮັດໃຫ້ພວກເຣົາສະບາຍຕາທີ່ສຸດ, ແຫຼ່ງທ່ອງທ່ຽວທຳມະຊາດພູຜາຖ້ຳຫ້ວຍນ້ຳລຳ ລວມໄປເຖິງນ້ຳຕົກຕາດທີ່ໜ້າອັດສະຈັນ; ການພັດທະນາໃຫ້ເປັນຕົວເມືອງທີ່ທັນສະໄໝໄປຄຽງຄູ່ກັບການອະນຸລັກສິ່ງແວດລ້ອມທຳມະຊາດທີ່ດີເລີດ; ອະນຸລັກວິຖີການດຳລົງຊີວິດທີ່ລຽບງ່າຍບໍ່ວຸ້ນວາຍ, ແລະຮີດຄອງປະເພນີຂອງຊົນເຜົ່າທີ່ດີງາມ, ການເຮັດໃຫ້ມະນຸດກັບທຳມະຊາດຢູ່ຮ່ວມກັນຢ່າງເປັນມິດ, ການອະນຸລັກຮ່ອງຮອຍປະຫວັດສາດໃຫ້ແກ່ຄົນລຸ້ນຫຼັງໄດ້ຄົ້ນຄວ້າສຶກສາຫຼືຊີວິດການເປັນຢູ່ທີ່ຜາສຸກຂອງປະຊາຊົນບໍ່ວ່າຕົວເມືອງກໍ່ຄືຊົນນະບົດ ຊ່າງສ້າງພາບປະທັບໃຈໃຫ້ແກ່ຄະນະພວກເຮົາໄປອີກນານແສນນານ. ລາກ່ອນກຸ້ຍຢາງ ນະຄອນທີ່ນ້ຳໄຫຼໄຟສະຫວ່າງ ຫົນທາງດີທຸກທົ່ວຫົນແຫ່ງ! ເມື່ອໄປຢ້ຽມຢາມວັດຫຼືສະຖານທີ່ສັກສິດທີ່ຄົນທ້ອງຖິ່ນໃຫ້ຄວາມເຄົາລົບແລະສັກກາລະບູຊາໃນແຕ່ລະບ່ອນນັ້ນ, ພວກເຮົາກໍ່ໄດ້ແຕ່ອະທິຖານຂໍໃຫ້ໄດ້ມີໂອກາດກັບມາຢາມກຸ້ຍຢາງອີກ. ມື້ນີ້ຄະນະພວກເຮົາຈາກໄປພ້ອມກັບຫອບຫິ້ວເອົາພາບແຫ່ງຄວາມປະທັບໃຈໄປນຳ. ສຳລັບທ່ານຜູ້ອ່ານບັນທອກການເດີນທາງມາທັງໝົດ5ບົດ5ມື້ນີ້, ຢາກໄປສຳຜັດກັບຄວາມໜ້າປະທັບໃຈທີ່ກ່າວມາ, ທ່ານກໍ່ເດີນທາງໄປໄດ້ຢ່າງສະດວກ, ບໍ່ວ່າຈະເປັນຖ້ຽວບິນໂດຍກົງຈາກປັກກິ່ງ, ຈາກຄຸນມິງ, ຈາກໜານໜິງຫຼືນະຄອນອື່ນໆຂອງຈີນມາກຸ້ຍຢາງກໍ່ມີຢ່າງປົກກະຕິ, ລົດໄຟຫຼືລດເມຈາກຄຸນມິງແລະໜານໜິງມາກຸ້ຍຢ່າງກໍ່ມີເໝືອນກັນ. ມາເທາະ, ມາທ່ຽວກຸ້ຍຢາງແລ້ວທ່ານຈະຫຼົງອຸທານອອກມາວ່າ" ໂອ່! ນີ້ຄືສະຫວັນເມືອງຄົນ". ກຸ້ຍຢາງປຽບສະເໝືອນນາງສາວທີ່ຫວານໜ້າຮັກ, ເມື່ອທ່ານຕົກໃຈຫຼຸມຮັກຂອງນາງແລ້ວທ່ານຈະຖອນຕົວບໍ່ຂຶ້ນ! ລາກ່ອນ ກຸ້ຍຢາງທີ່ຮັກ! ຂ້ອຍຈະຄິດຮອດເຈົ້າຕະຫຼອດ ຂ້ອຍຈະບໍ່ມີວັນລືມເຈົ້າແລະຂໍສັນຍາວ່າຂ້ອຍຈະກັບມາຫາເຈົ້າອີກແນ່ນອນ! (ຈົບ)