ທ່ານຫລີຊາງຊຸ່ນຢ້ຽມຢາມມຽນມາຈະຊຸກຍູ້ການພົວພັນລະຫວ່າງສອງຝ່າຍພັດທະນາ----ສຳພາດເອກອັກຄະລັດຖະທູດມຽນມາປະຈຳຈີນ
-----------------------------------------------------------------------------------------------------------------
ໂດຍຕອບສະຫນອງຕາມການເຊີນຂອງພົນເອກຕິຮາດູຣາຕິງອັອງມຽນອູ ເລຂາທິຫນຶ່ງຂອງຄະນະກຳມະການສັນຕິພາບແລະການພັດທະນາມຽນມາ, ນັບແຕ່ວັນທີ25ຫາວັນທີ 29 ມີນານີ້,ທ່ານຫລີຊາງຊຸ່ນ,ກຳມະການກົມການເມືອງສູນກາງພັກກອມມູນິດຈີນໄດ້ຢ້ຽມາມມຽນມາ.ວັນທີ23ມີນານີ້ ທ່ານເທນຫວິນ ເອກອັກຄະລັດຖະທູດມຽນມາປະຈຳຈີນໄດ້ໃຫ້ສຳພາດຕໍ່ນັກຂ່າວ CRI,ທ່ານເວົ້າວ່າ,ທ່ານຫລີຊາງຊຸນໄປຢ້ຽມຢາມມຽນມາເທື່ອນີ້ຈະຊຸກຍູ້ໃຫ້ການພົວພັນລະຫວ່າງສອງປະເທດພັດທະນາ.ມຽນມາກັບຈີນແມ່ນປະເທດບ້ານໃກ້ເຮືອນຄຽງທີ່ມີພູຜາແມ່ນ້ຳຕິດຈອດກັນແລະມີມິດຕະພາບຕໍ່ກັນ,ປະຊາຊົນສອງປະເທດມັກເອີ້ນກັນເປັນ"ປາວໂປ" ແປວ່າ ອ້າຍນ້ອງກັນ.ເມື່ອໄດ້ພົບນັກຂ່າວ, ທ່ານເທນຫວິນກໍ່ເວົ້າດ້ວຍຄວາມສະຫນິດສະຫນົມວ່າ, ໃນເວລາທ່ານຮູ້ຂ່າວກ່ຽວກັບຜູ່ນຳລະດັບສູງຂອງຈີນຈະໄປຢ້ຽມຢາມມຽນມາ,ທ່ານກໍ່ດີໃຈຫລາຍ.ທ່ານບອກວ່າ:ຂອບໃຈວິທະຍຸCRIສ້າງໂອກາດໃຫ້ຂ້າພະເຈົ້າໄດ້ແລກປ່ຽນກັບຜູ່ຟັງຈີນ.
"ປີຫນ້າແມ່ນປີທີ່ມຽນມາກັບຈີນສ້າງສາຍພົວພັນທາງການທູດຄົບຮອບ 60 ປີ.ຂ້າພະເຈົ້າຍິນດີຕ້ອນຮັບທ່ານຫລີຊາງຊຸນໄປຢ້ຽມຢາມມຽນມາ.ການຢ້ຽມຢາມເທື່ອນີ້ຈະຊຸກຍູ້ໃຫ້ການພົວພັນລະຫວ່າງສອງປະເທດຂະຫຍາຍຕົວ.ຂ້າພະເຈົ້າຫວັງວ່າຜູ່ນຳຈີນຈະໄດ້ເຫັນການພັດທະນາຂອງມຽນມາຢ່າງໃກ້ຊິດ,ແລະໄປສຳຜັດກັບວັດທະນະທຳພື້ນເມືອງຂອງມຽນມາແລະຄວາມຮັກແຂກແພງຄົນຂອງປະຊາຊົນມຽນມາ.ຂ້າພະເຈົ້າເຫັນວ່າ,ຈີນຄວນນຳໃຊ້ກາລະໂອກາດໃນປະຈຸບັນ, ເພື່ອເຮັດໃຫ້ວິກິດການການເງິນເທື່ອນີ້ ກາຍເປັນໂອກາດທີ່ດີ.ຈີນແມ່ນປະເທດທີ່ໂຊກດີທີ່ສຸດ.ເປັນຫຍັງຈຶ່ງເວົ້າແບບນີ້? ເພາະວ່າໃນເວລາທີ່ປະເທດອື່ນຂາດເຂີນເງິນທຶນແລະມີຄວາມຫຍຸ້ງຍາກດ້ານເສດຖະກິດຍ້ອນວິກິດການເທື່ອນີ້, ແຕ່ ຍ້ອນຈີນໄດ້ທຳຄວາມພະຍາຍາມແລະສະສົມໃນຫຼາຍປີມານີ້,ສະນັ້ນ,ຈຶ່ງມີເງິນທຶນທີ່ແຮໄວ້ຢ່າງພຽງພໍ,ແລະລະບົບການທະນາຄານຂອງຈີນຍັງພັດທະນາເປັນຢ່າງດີ. ຂ້າພະເຈົ້າເຊຶ່ອວ່າ,ຖ້າຈີນນຳໃຊ້ໂອກາດທີ່ດີທີ່ສຸດໃນປະຈຸບັນ,ເລັ່ງລັດເພີ່ມການລົງທຶນໃຫ້ຫຼາຍຂຶ້ນຢູ່ຕ່າງປະເທດ ແລະວາງແຜນການພັດທະນາຂອງລັດຕາມຫຼັກວິທະຍາສາດ,ຫຼັງຈາກວິກິດການການເງິນຜ່ານໄປແລ້ວ, ເສດຖະກິດຈີນອາດຈະຈາກອັນດັບທີ 3 ໃນໂລກໃນປະຈຸບັນ ກາຍເປັນອັນດັບທີຫນຶ່ງໃນໂລກ."
ທ່ານເທນຫວິນກ່າວວ່າ,ວິກິດການການເງິນທີ່ເກີດຂຶ້ນໃນທົ່ວໂລກໃນປະຈຸບັນນີ້ແມ່ນການທ້າທາຍອັນໃຫຍ່ຕໍ່ຈີນກໍຄືຕໍ່ໂລກ.ຢູ່ຕໍ່ໜ້າຄວາມຫຍຸ້ງຍາກ,ຜູ້ນຳຂອງຈີນບໍ່ພຽງແຕ່ສະແດງໃຫ້ເຫັນການເຫັນກວ້າງມອງໄກທໍ່ນັ້ນ,ຍັງເອົາໃຈໃສ່ນຳປະຊາຊົນ,ວາງນະໂຍບາຍມາດຕະການຕ່າງໆເພື່ອເຮັດໃຫ້ເສດຖະກິດຈະເລີນແລະຊຸກຍູ້ໃຫ້ສັງຄົມມີສະຖຽນລະພາບ.ທ່ານກ່າວວ່າ:"ລັດຖະບານຈີນໄດ້ວາງມາດຕະການຢ່າງຫຼວງຫຼາຍເພື່ອກະຕຸ້ນເສດຖະກິດແລະປົກປ້ອງລັດທິຜົນປະໂຫຍດຂອງປະຊາຊົນ.ຕົວຢ່າງຄື,ໄດ້ເພີ່ມງົບປະມານດ້ານການສ້າງສາພື້ນຖານໂຄງລ່າງ,ການຮັກສາສຸຂະພາບ ແລະການສຶກສາເປັນຕົ້ນ;ລັດຖະບານຍັງໄດ້ວາງນະໂຍບາຍທີ່ຕ່າງກັນຕາມກຸ່ມຄົນທີ່ຕ່າງກັນແລະໜ້າວຽກຕ່າງກັນ,ສ້າງໂອກາດປະກອບວິຊາຊີບຫຼາຍກວ່າເກົ່າ,ແລະຈັດຊຸດອົບຮົມສີມືອາຊີບເປັນຕົ້ນ,ຂ້າພະເຈົ້າຄຶດວ່າ,ການກະທຳຕົວຈິງເຫຼົ່ານີ້ເປັນຕາຖອດຖອນບົດຮຽນນຳ.ປະຈຸບັນນີ້,ສະຖານະການເສດຖະກິດໃນທົ່ວໂລກບໍ່ຈະເລີນປານໃດ,ກຳມະ ກອນຜູ້ຫວ່າງງານພໍດີສາມາດໃຊ້ເວລານີ້ໄປຍົກລະດັບສີມືຈຳນວນໜຶ່ງ,ເມື່ອຮອດເວລາທີ່ເສດຖະກິດດີຄືນໃໝ່,ພວກເຂົາເຈົ້າກໍ່ມີຄວາມຮູ້ແລະສີມືຢ່າງພຽງພໍໄປເຮັດວຽກງານທີ່ມີຄວາມຮຽກຮ້ອງສູງກວ່າເກົ່າ."
ທ່ານເທນຫວິນ ມີຄວາມໝັ້ນໃຈຫຼາຍຕໍ່ການພັດທະນາຂອງເສດຖະກິດຈີນ,ທ່ານເຫັນວ່າ, ຈີນຍ່ອມຈະໄດ້ບັນລຸເປົ້າໝາຍທີ່ຄາດໄວ້ ຄືເສດຖະກິດແຫ່ງຊາດຈີນເຕີບໂຕ8%ໃນປີນີ້.ທ່ານກ່າວວ່າ,ລະບົບເສດຖະກິດຂອງຈີນອາໄສການສົ່ງອອກຫຼາຍເກີນໄປ,ດຽວນີ້ຕະຫຼາດສົ່ງອອກສາກົນຫຼຸດໜ້ອຍລົງ,ພໍດີແມ່ນໂອກາດດີເພື່ອປັບປຸງໂຄງປະກອບຂອງຈີນ.
ທ່ານເທນ ຫວິນ ຍັງຊີ້ອອກວ່າ, ເມື່ອທຽບກັບປະເທດອື່ນ, ວິກິດການການເງິນທົ່ວໂລກເທື່ອນີ້ເຮັດໃຫ້ເສດຖະກິດມຽນມາໄດ້ຮັບຜົນກະທົບບໍ່ຫຼາຍປານໃດ. ແຕ່ຍ້ອນໄດ້ຮັບຜົນກະທົບຈາກລາຄາສິນຄ້າໃນຕະຫຼາດສາກົນທີ່ຫຼຸດຕ່ຳລົງ, ການສົ່ງອອກຂອງມຽນມາທີ່ຖືການສົ່ງອອກຜະລິດຕະພັນກະສິກຳເປັນຫຼັກນັ້ນ ກໍ່ມີຄວາມເສຍຫາຍຢ່າງຫຼວງຫຼາຍ. ບວກກັບອັດຕາຫວ່າງງານເພີ່ມຂຶ້ນຢ່າງບໍ່ຢຸດຢັ້ງ, ເສດຖະກິດຂອງ ມຽນມາພວມປະເຊີນກັບສິ່ງທ້າທາຍຕ່າງໆ.ທ່ານຫວັງຢາກໃຫ້ຈີນພີ່ມການລົງທຶນໃຫ້ຫຼາຍຂຶ້ນຢູ່ມຽນມາ.ທ່ານເທນ ຫວິນ ກ່າວວ່າ: "ມຽນມາມີຊັບພະຍາກອນທຳມະຊາດອຸດົມສົມບູນທີ່ສຸດ,ມີຫຼາຍຂົງເຂດຕ້ອງການພັດທະນາ. ແຕ່ວ່າໃນປັດຈຸບັນຈີນຍັງບໍ່ແມ່ນປະເທດທີ່ລົງທຶນຢູ່ມຽນມາຫຼາຍກວ່າໝູ່.ມຽນມາມີຊັບພະຍາກອນແຮງງານທີ່ດີເດັ່ນ, ແຮງງານເຫຼົ່ານີ້ໄດ້ຮັບຕີລາຄາຢ່າງດີໃນຂົງເຂດປຸງແຕ່ງຂອງໂລກ. ປັດຈຸບັນຈີນມີກຳລັງແຮງສັງລວມທີ່ເຂັ້ມແຂງ, ຄວນນຳໃຊ້ໂອກາດທີ່ດີໃນປັດຈຸບັນເພີ່ມການລົງທຶນຢູ່ມຽນມາ,ຈະເຮັດໃຫ້ສອງປະເທດໄດ້ຮັບຜົນປະໂຫຍດຮ່ວມກັນຢ່າງແນ່ນອນ."ໃນເວລາທ່ານຫຼີ້ສາງຊຸນໄປຢ້ຽມຢາມມຽນມາເທື່ອນີ້,ສອງປະເທດຄາດວ່າຈະເຊັນສັນຍາ5ສະບັບກ່ຽວກັບການເພີ່ມທະວີການຮ່ວມມືດ້ານເສດ ຖະກິດ,ກ່ຽວພັນເຖິງການຜະລິດໄຟຟ້າພະລັງນ້ຳ,ການພັດທະນານ້ຳມັນເຊື້ອໄຟແລະອາຍແກັສທຳມະຊາດ,ການຂົນສົ່ງແລະໂຄງການກໍ່ສ້າງເປັນຕົ້ນ. ທ່ານເທນຫວິນກ່າວວ່າ, ຫວັງໃຫ້ການຢ້ຽມຢາມເທື່ອນີ້ຈະສາມາດເຮັດໃຫ້ຈີນເຂົ້າໃຈມຽນມາຫຼາຍກວ່າເກົ່າ, ແລະເຮັດໃຫ້ໂລກເຂົ້າໃຈການພັດທະນາແລະການປ່ຽນແປງຂອງມຽນມາໃນປັດຈຸບັນ.
