ລັດຖະມົນຕີການຕ່າງປະເທດຈີນກ່າວວ່າຈີນໄດ້ເສີມຂະຫຍາຍບົດບາດນັບມື້ນັບສຳຄັນເທິງເວທີສາກົນໃນ 60 ປີມານີ້
-----------------------------------------------------------------------------------------------------------------
ປີນີ້ແມ່ນປີສ້າງຕັ້ງປະເທດຈີນໃຫມ່ຄົບຮອບ 60 ປີ,ແລະກໍ່ແມ່ນ 60 ປີທີ່ປະເທດຈີນໃຫມ່ດຳເນີນວຽກງານການຕ່າງປະເທດ.ທ່ານຢາງເຈຊື,ລັດຖະມົນຕີການຕ່າງປະເທດຈີນກ່າວວ່າ, ໃນ 60 ປີມານີ້, ຈີນໄດ້ຮ່ວມມືກັບປະເທດຕ່າງໆຢ່າງແຫນ້ນແຟ້ນ,ໄດ້ເຂົ້າຮ່ວມການຊຳແລະແກ້ໄຂການ ວິວາດກັນຕ່າງໆໃນສາກົນດ້ວຍທ່າທີຮັບຜິດຊອບ,ໄດ້ປະກອບສ່ວນຢ່າງສຳຄັນໃນການຊຸກຍູ້ສັນຕິພາບ,ການພັດທະນາແລະວຽກງານຮ່ວມມືຂອງໂລກ.
ວັນທີ 1 ຕຸລາປີ 1949,ຢູ່ປັກກິ່ງ, ທ່ານປະທານເຫມົາເຈີຕົງໄດ້ປະກາດສະຖາປານາສາທາລະນະລັດປະຊາຊົນຈີນ,ແລະປະກາດວ່າ, ຈີນຍິນດີສ້າງການພົວພັນກັບລັດຖະບານຂອງປະເທດຕ່າງໆທີ່ເຄົາລົບຄວາມສະເຫມີພາບກັນ, ຕ່າງຝ່າຍຕ່າງມີຜົນປະໂຫຍດ, ເຄົາລົບຜືນແຜ່ນດິນຄົບຖ້ວນແລະອະທິປະໄຕຂອງປະເທດອື່ນ.ໃນ 60 ປີມານີ້, ປະເທດທີ່ສ້າງການພົວພັນທາງການທູດກັບຈີນນັ້ນໄດ້ຈາກ 18 ປະເທດເພີ່ມຂຶ້ນຮອດ171 ປະເທດ,ຈໍ່ຕົວເປັນສະພາບການທີ່ມີເພື່ອນຢູ່ທົ່ວທຸກແຫ່ງຫົນໃນໂລກ.
ໃນເວລາໃຫ້ສຳພາດຕໍ່ນັກຂ່າວ,ທ່ານຢາງເຈຊື,ລັດຖະມົນຕີວ່າການກະຊວງການຕ່າງປະເທດຈີນກ່າວວ່າ, ໃນ 60 ປີມານີ້, ການພົວພັນລະຫວ່າງຈີນກັບປະເທດໃຫຍ່ຕ່າງໆ,ເວົ້າຈາກດ້ານກວມລວມແລ້ວແມ່ນໄດ້ຂະຫຍາຍໄປຫນ້າຢ່າງບໍ່ຢຸດຢັ້ງເຊັ່ນ:ຈີນກັບຣັດເຊຍໄດ້ສ້າງການພົວພັນຄູ່ຮ່ວມມືຍຸດທະສາດ,ແລະໄດ້ຂະຫຍາຍຕົວຢ່າງປອດໃສແລະຫມັ້ນທ່ຽງໃນລະດັບສູງ;ການພົວພັນຈີນອາເມລິກາພວມຂະຫຍາຍໄປສູ່ທິດທີ່ຖືກຕ້ອງ,ແລະໄດ້ກຳນົດວ່າໃຫ້ສ້າງການພົວພັນຈີນອາເມລິກາທີ່ຮ່ວມມືຢ່າງຮອບດ້ານແລະຕັ້ງຫນ້າໃນສັດຕະວັດທີ 21;ຈີນກັບສະຫະພາບເອີລົບໄດ້ສ້າງກາພົວພັນຄູ່ຮ່ວມມືຍຸດທະສາດຮອບດ້ານ;ທັງໄດ້ສ້າງການພົວພັນຍຸດທະສາດຕ່າງຝ່າຍຕ່າງມີຜົນປະໂຫຍດກັບຍີ່ປຸ່ນ.
ການພົວພັນກັບປະເທດອ້ອມຂ້າງແມ່ນວຽກງານທີ່ສຳຄັນກວ່າເພິ່ນໃນການຕ່າງປະເທດຂອງຈີນ,ທ່ານຢາງເຈຍສື ກ່າວວ່າ, ໃນ 60 ປີມານີ້, ການພົວພັນຮ່ວມມືມິດຕະພາບລະຫວ່າງຈີນກັບປະເທດອ້ອມຂ້າງໄດ້ຂະຫຍາຍ ຕົວຢ່າງບໍ່ຢຸດຢັ້ງ. ທ່ານກ່າວວ່າ:
ຈີນຕັ້ງຢູ່ທະວີບອາຊີ,ພວກເຮົາໄດ້ຖືການແກ້ໄຂການຂະຫຍາຍການພົວພັນກັບປະເທດໃກ້ຄຽງໃຫ້ດີ ໄວ້ຢູ່ໃນຖານະທີ່ສຳຄັນອັນດັບຫນຶ່ງຕະຫຼອດມາ.ໃນຊຸມປີ1950,ຈີນກັບມຽນມາແລະອິນເດຍ ກໍ່ໄດ້ຮ່ວມກັນສະເຫນີຫຼັກ 5 ປະການຢູ່ຮ່ວມກັນໂດຍສັນຕິ, ປະຈຸບັນ, ຫຼັກການເຫຼົ່ານີ້ໄດ້ກາຍເປັນຫຼັກການທົ່ວໄປຂອງປະຊາຄົມໂລກແລ້ວ. ໃນຫຼາຍປີມານີ້, ພວກເຮົາ ຍັງໄດ້ສະເຫນີຫຼັກການການຕ່າງປະເທດທີ່ວ່າມີໄມຕີຈິດຕໍ່ປະເທດໃກ້ຄຽງແລະຖືປະເທດໃກ້ຄຽງເປັນເພື່ອນ.
ທ່ານຢາງເຈຍສື ກ່າວວ່າ,ປະຈຸບັນ, ຈີນກັບຣັດເຊຍແລະປະເທດອາຊີກາງ ໄດ້ຮ່ວມກັນລິເລີ່ມສ້າງຕັ້ງອົງການຮ່ວມມືຊຽງໄຮ້,ຈັດການສົນທະນາກັບປະເທດຕ່າງໆຂອງອາຊຽນແລະເຂົ້າຮ່ວມການສົນທະນາລະຫວ່າງອາຊຽນກັບຈີນ,ຍີ່ປຸ່ນແລະສາທາລະນະລັດເກົາຫຼີ, ການຕິດຕໍ່ພົວພັນດ້ານເສດຖະກິດການຄ້າລະຫວ່າງຈີນກັບປະເທດອ້ອມຂ້າງນັບມື້ນັບແຫນັ້ນແຟ້ນ.
ປະຈຸບັນ, ການຕິດຕໍ່ພົວພັນລະຫວ່າງຈີນກັບປະຊາຄົມໂລກນັບມື້ນັບແຫນ້ນແຟ້ນ, ຖານະແລະອິດທິພົນຂອງຈີນຢູ່ໃນໂລກກໍ່ ເປີດກວ້າງແລະຍົກສູງຂຶ້ນເທື່ອລະກ້າວຢູ່. ໂດຍສະເພາະແມ່ນຫຼັງຈາກເກີດວິກິດການການເງິນສາກົນເທື່ອນີ້ແລ້ວ, ຈຸດຢືນສຳຄັນຫຼາຍຢ່າງທີ່ຈີນວາງອອກ ໄດ້ຮັບຄວາມເອົາໃຈໃສ່ແລະຄວາມຍ້ອງຍໍຊົມເຊີຍໂດຍທົ່ວໄປໃນໂລກ, ທ່ານຢາງເຈຍສືກ່າວວ່າ
ປະທານຫູຈີນທ່າວໄດ້ເຂົ້າຮ່ວມກອງປະຊຸມສຸດຍອດຕ່າງໆຂອງG20, ນາຍົກລັດຖະມົນຕີເວີນເຈ່ຍປາວໄດ້ເຂົ້າຮ່ວມກອງປະຊຸມສຸດຍອດອາຊີເອີລົບແລະການພົບປະເຈລະຈາຜູ່ນຳຈີນເອີລົບ, ຜູ່ນຳຈີນແລະຜູ່ນຳຂອງປະເທດຕ່າງໆໃນໂລກຕັ້ງໜ້າພິຈາລະນາຄົ້ນຄວ້າຈະເຮັດແນວໃດຊຸກຍູ້ໃຫ້ເສດຖະກິດໂລກຟື້ນຟູຄືນໃໝ່, ເຮັດແນວໃດດຳເນີນການປະຕິຮູບລະບົບການເງິນສາກົນ. ພວກເຮົາຍັງໄດ້ເຂົ້າຮ່ວມການຮັບມືກັບພະຍາດໄຂ້ຫວັດໃຫຍ່ສາຍພັນໃໝ່A/H1N1ແລະຮັບມືການທ້າທາຍຂອງການປ່ຽນແປງຂອງດິນຟ້າອາກາດໃນທົ່ວໂລກ, ສະນັ້ນເສດຖະກິດຈີນຮັກສາການເຕີບໂຕຢ່າງໝັ້ນທ່ຽງແລະໄວສົມຄວນ, ແລະຈີນພະຍາຍາມເຂົ້າຮ໋ວມການຕັ້ງໜ້າຮັບມືກັບວິກິດການການເງິນສາກົນ, ໄດ້ສ້າງຄວາມໝັ້ນໃຈໃຫ້ແກ່ປະຊາຄົມໂລກໃນຕົວຈິງ, ໄດ້ປະກອບສ່ວນສຳຄັນຕໍ່ການຊຸກຍູ້ໃຫ້ເສດຖະກິດໂລກຟື້ນຕົວຄືນໃໝ່.
ເມື່ອຈ້ອງມອງເບິ່ງອະນາຄົດ, ທ່ານຢາງເຈສືມີຄວາມໝັ້ນໃຈເຕັມປ່ຽມຕໍ່ວຽກງານການຕ່າງປະເທດຂອງຈີນ. ທ່ານກ່າວວ່າ, ຈີນຈະຍຶດໝັ້ນເດີນຕາມເສັ້ນທາງພັດທະນາໂດຍສັນຕິ, ປະຕິບັດຍຸດທະສາດເປີດປະຕູສູ່ພາຍນອກທີ່ຕ່າງຝ່າຍຕ່າງໆໄດ້ຮັບຜົນປະໂຫຍດນຳກັນ, ທຳຄວາມພະຍາຍາມຢ່າງບໍ່ລົດລະໃຫ້ແກ່ການກໍ່ສ້າງໂລກກົມກຽວກັນທີ່ມີສັນຕິພາບຍາວນານແລະຈະເລີນຮຸ່ງເຮືອງຮ່ວມກັນ.
