ທ່ານຫູຈິນທາວກ່າວວ່າປະຊາຊົນຈີນມີຄວາມໝັ້ນໃຈແລະມີຄວາມສາມາດສ້າງປະເທດຂອງຕົນໃຫ້ດີ
-----------------------------------------------------------------------------------------------------------------
ຕາມຂ່າວCRI,ເວລາ10ໂມງວັນທີ1ຕຸລານີ້,ຢູ່ນະຄອນຫຼວງປັກກິ່ງໄດ້ຈັດພິທີສະເຫຼີມສະຫຼອງວັນສະຖາປະນາສາທາລະນະລັດປະຊາຊົນຈີນຄົບຮອບ60ປີຢູ່ສະໜາມຫຼວງທ່ຽນອ່ານເມີນ.ທ່ານຫູຈິນທາວ ເລຂາທິການໃຫຍ່ສູນກາງພັກກອມມູນິດຈີນ,ປະທານປະເທດຈີນ,ປະທານຄະນະກຳມະການການທະຫານສູນກາງຈີນກ່າວຄຳປາໃສສຳຄັນ.ທ່ານກ່າວວ່າ,ປະຊາຊົນຈີນມີຄວາມໝັ້ນໃຈແລະມີຄວາມສາມາດສ້າງປະເທດຂອງຕົນໃຫ້ດີ,ແລະກໍ່ມີຄວາມໝັ້ນໃຈແລະຄວາມສາມາດປະກອບສ່ວນຕາມຄວາມສາມາດຂອງຕົນເພື່ອໂລກ.
ທ່ານຫູຈິນທາວກ່າວວ່າ,ນັບແຕ່ປະເທດຈີນໃໝ່ສ້າງຕັ້ງຂຶ້ນ60ປີມານີ້,ປະຊາຊົນຈີນໄດ້ຜ່ານຜ່າຄວາມຫຍຸ້ງຍາກລຳບາກແລະຄວາມທົດສອບຕ່າງໆນາໆ,ຍາດໄດ້ຜົນສຳເລັດອັນຍິ່ງໃຫຍ່ທີ່ປະຈັກຕາຊາວໂລກ.ໃນຕໍ່ໜ້າ,ຈີນຈະສືບຕໍ່ປະຕິບັດນະໂຍບາຍການຕ່າງປະເທດສັນຕິພາບທີ່ເປັນເອກະລາດ,ເປັນເຈົ້າຕົນເອງ,ຍຶດໝັ້ນເດີນຕາມເສັ້ນທາງພັດທະນາໂດຍສັນຕິ,ປະຕິບັດຍຸດທະສາດໄຂປະຕູສູ່ພາຍນອກທີ່ຕ່າງຝ່າຍຕ່າງມີຜົນປະໂຫຍດ,ຂະຫຍາຍມິດຕະພາບແລະການຮ່ວມມືກັບທຸກປະເທດບົນພື້ນຖານຫຼັກ5ປະການຢູ່ຮ່ວມກັນໂດຍສັນຕິ,ຊຸກຍູ້ການສ້າງໂລກທີ່ກົມກຽວກັນທີ່ມີສັນຕິພາບຖາວອນ,ແລະຈະເລີນຮຸ່ງເຮືອງພ້ອມກັນ.
ທ່ານຫູຈິນທາວຍັງຮຽກຮ້ອງໃຫ້ກອງທັບແລະກອງຕຳຫຼວດປະກອບອາວຸດ ຂອງຈີນປະຕິບັດພາລະໜ້າທີ່ຢ່າງແທ້ຈິງ,ສຸມໃສ່ການປົກປັກຮັກສາອະທິປະໄຕ,ຄວາມປອດໄພແລະຜືນແຜ່ນດິນອັນຄົບຖ້ວນຂອງຊາດແລະສັນຕິພາບຂອງໂລກ.
