ພິທີໃຫຍ່ໂຕມະໂຫລານ60ປີເປັນພິຍານຂອງຜົນສຳເລັດຈີນ
-----------------------------------------------------------------------------------------------------------------
ສຳລັບຄົນຈີນ,ວັນທີ1 ຕຸລາບໍ່ແມ່ນວັນທຳມະດາ.ວັນທີ1 ຕຸລາປີ1949,ຢູ່ເທິງຫໍທ່ຽນອ່ານເມີນ ໃຈກາງຂອງນະຄອນຫຼວງປັກກິ່ງ,ທ່ານມາວເຈີຕົງ ຜູ່ນຳທີ່ເຖິງແກ່ກຳໄປແລ້ວຂອງຈີນປະກາດການກຳເນີດຂອງປະເທດຈີນໃໝ່ໃຫ້ທົ່ວໂລກໄດ້ຮັບຮູ້.ມື້ດຽວກັນຫຼັງ60ປີຈາກນັ້ນ,ຢູ່ສະຖານທີ່ເກົ່າ,ຈີນໄດ້ຈັດພິທີສວນສະໜາມສແລະເດີນຖະບວນຂອງມວນຊົນ,ເພື່ອລະລຶກວັນດັ່ງກ່າວຢ່າງຍິງໃຫຍ່.
ເວລາ10ໂມງຂອງວັນທີ1 ຕຸລານີ້ຕາມເວລາປັກກິ່ງ,ຄຽງຄູ່ກັບສຽງປືນກຽດຕິຍົດດັງຂຶ້ນ60ນັດ,ພິທີສະເຫຼີມສະຫຼອງສ.ປຈີນສ້າງຕັ້ງຂຶ້ນຄົບຮອບ60ປີໄດ້ເລີ່ມຂຶ້ນຢ່າງເປັນທາງການຢູ່ສະໜາມຫຼວງທ່ຽນອ່ານເມີນ.
ທ່ານຫູຈີນທ່າວ ປະທານປະເທດຈີນຂີ່ລົດເກງຍີ່ຫໍທຸງທີ່ຈີນຜະລິດອອກຈາກຂົວຈີ່ນສຸຍຢູ່ໜ້າປະຕູຫໍທ່ຽນອ່ານເມີນ,ເລີ່ມກວດແຖວທະຫານແຕ່ທິດຕາເວັນຕົກຫາທິດຕາເວັນອອກ.
ພາຍຫຼັງກວດແຖວແລ້ວ,ກອງກກຽດຕິຍົດ3ເຫຼົ່າທັບໄດ້ເຊີນທຸງຂອງກອງທັບປົດປ່ອຍປະຊາຊົນຈີນ,ແລະນຳໜ້າ56ກ້ອນກຳລັງເດີນສວນສະໜາມ,ຜ່ານເຂດໃຈກາງສະໜາມຫຼວງທ່ຽນອ່ານເມີນຕາມລຳດັບ,ເປັນອັນວ່າການເດີນຂະບວນສວນສະໜາມເທື່ອທີ14ຂອງປະເທດຈີນໃໝ່ໄດ້ເລີ່ມຂຶ້ນຢ່າງເປັນທາງການ.
ກ້ອນກຳລັງອາວຸດຍຸດໂທປະກອນ 30 ກ້ອນ,ກ້ອນກຳລັງເທິງອາກາດ 12 ກ້ອນ,ໄດ້ສ້າງສະຖິຕິໃໝ່ດ້ານຈຳນວນແລະຄຸນນະພາບໃນປະຫວັດການເດິນສວນສະໜາມຂອງຈີນ.ໄດ້ສະແດງອາວຸດຍຸດໂທປະກອນ 52 ລຸ້ນ,ລ້ວນແຕ່ແມ່ນຈີນຜະລິດເອງ.ອາວຸດຍຸດໂທປະກອນເຕັກໂນໂລຊີຂໍ້ມູນຂ່າວສານທີ່ກ້າວໜ້າເຊັ່ນຍົນເຕືອນໄພເທິງອາກາດ ລົດສູ້ຮົບລຸ້ນໃໝ່ ຣາດາລຸ້ນໃໝ່ ຍົນສອດແນມບໍ່ມີຄົນຂັບແລະສື່ສານທີ່ຜ່ານດາວທຽມເປັນຕົ້ນໄດ້ນຳອອກສະແດງໝົດ,ເກືອບ 90%ແມ່ນເຂົ້າຮ່ວມການເດິນສວນສະໜາມເປັນເທື່ອທຳອິດ.
ສະໜາມຫລວງທຽນອານເມິນໃນມື້ນີ້ບໍ່ພຽງແຕ່ແຕ່ມີສວນສະໜາມເທົ່ານັ້ນ,ຍັງແມ່ນສະຖານທີ່ທີ່ມ່ວນຊື່ນຟົດຟື້ນທີ່ສຸດ.
ຫລັງຈາກພິທີສວນສະໜາມເປັນເວລາ 66 ນາທີແລ້ວ,ກອງກຽດຕິຍົດທີ່ປະກອບດ້ວຍກ້ອນກຳລັງທຸງຊາດແລະກ້ອນກຳລັງວັນຊາດ ປ້າຍປີ1949ຊ2009ປີແລະເຄື່ອງໝາຍປະຈຳຊາດໄດ້ເປີດສາກການເດີນຂະບວນຂອງມວນຊົນ.ຄຽງຄູ່ກັບສຽງດົນຕີສັນລະເສີນທຸງແດງ,ຊາວໜຸ່ມ 1949 ຄົນໄດ້ຊູທຸງແດງຫ້າດາວທີ່ເປັນທຸງຊາດຈີນທີ່ໃຫຍ່ກວ່າໝູ່ໃນປະຫວັດສາດເດິນຂະບວນສະຫລອງວັນຊາດຍ່າງນຳໜ້າຂອງຂະບວນກ້ອນກຳລັງ.ມວນຊົນວົງການຕ່າງໆໜຶ່ງແສນຄົນ ລົດປະດັບ 60 ຄັນໄດ້ຜ່ານເຂດໃຈກາງສະໜາມຫລວງທຽນອານເມິນຕາມລຳດັບ,ສົມທົບກັບຮູບເບື້ອງຫລັງທີ່ປະກອບດວ້ຍຊາວໜຸ່ມເຍົາວະຊົນ 8 ແສນຄົນໃນສະໜາມຫລວງ,ໄດ້ສະແດງວິວັດທະນາການປະຫວັດສາດຂອງສາທາລະນະລັດ.ຢູ່ສະໜາມຫລວງໄດ້ຮ້ອງເພງສັນລະເສີນປະເທດຊາດຢ່າງກືກກ້ອງ.
ພິທີສວນສະໜາມແລະການເດິນຂະບວນຂອງມວນຊົນຢູ່ສະໜາມຫລວງທຽນອານເມິນແມ່ນພິທີໃຫຍ່ໂຕມະໂຫລານສະຫລອງວັນສ້າງຕັ້ງປະເທດຈີນໃໝ່ຄົບຮອບ 60 ປີ,ແລະຍັງແມ່ນພິທີໃຫຍ່ໂຕມະໂຫລານຂອງປະຊາຊົນຈີນທຸກຖ້ວນໜ້າ.
ບໍ່ຕ້ອງສົງໄສເລີຍວ່າ,ຄົນຈີນທີ່ສາມາດເບິ່ງພິທີສະຫລອງວັນຊາດທີ່ໃຫຍ່ໂຕມະໂຫລານຢ່ສະຖານທີ່ຕົວຈິງນັ້ນແມ່ນກຸ່ມຄົນທີ່ໂຊກດີທີ່ສຸດ.
ໃນແທ່ນຊົມຂອງແຂກຜູ້ມີກຽດ, ທ່ານເວີ້ຍຈິ່ນເສິ່ງ, ທີ່ປຶກສາລັດຖະບານຈີນເບິ່ງລົດບັນທຸກອາວຸດຍຸດໂທປະກອນແບບໃໝ່ແລ່ນຜ່ານຄັນແລ້ວຄັນອີກ, ທ່ານຮູ້ສຶກພາກພູມໃຈທີ່ສຸດຕໍ່ກຳລັງປ້ອງກັນປະເທດທີ່ສະແດງໃນການເດີນສວນສະໜາມເທື່ອນີ້.
"ກອງທັບປົດປ່ອຍປະຊາຊົນພວກເຮົາເຂັ້ມແຂງຫຼາຍ, ໄວ້ໃຈໄດ້, ສາມາດປົກປັກຮັກສາປະເທດຊາດຂອງພວກເຮົາ, ພ້ອມກັນນັ້ນກໍ່ແມ່ນກຳລັງທີ່ໄວ້ໃຈໄດ້ໃນການປົກປັກຮັກສາສັນຕິພາບຂອງໂລກ."
ປະຊາຊົນຈີນສ່ວນຫຼາຍທີ່ສຸດແມ່ນໄດ້ຊົມພິທີສະເຫຼີມສະຫຼອງທີ່ຈັດຂຶ້ນຢູ່ສະໜາມຫຼວງທ່ຽນອານເມີນໂດຍຜ່ານການຖ່າຍທອດສົດທາງໂທລະພາບ, ການກະຈາຍສຽງແລະອິນເຕີເນັດ. ເຖິງວ່າບໍ່ໄດ້ຢູ່ບ່ອນຈັດພິທີກໍ່ຕາມ, ແຕ່ກໍ່ມີຄວາມປິຕິຊົມຊື່ນຄືກັນ. ໃນຮ້ານຄ້າແຫ່ງໜຶ່ງຂອງປັກກິ່ງ, ນັກຂ່າວໄດ້ສຳພາດທ່ານລີເຕີຢູ້, ຊາວເມືອງປັກກິ່ງທີ່ເບິ່ງຈໍໃຫຍ່ຊົມການສວນສະໜາມແລະການເດີນຂະບວນຂອງມວນຊົນ.
"ເທື່ອນີ້ງາມຫຼາຍ, ເປັນການປຸກລະດົມກຳລັງໃຈປະຊາຊົນທົ່ວປະເທດຢ່າງຫຼວງຫຼາຍ".
ຈາກປີ 1949 ຫາປີ 2009, ບໍ່ພຽງແຕ່ແມ່ນການຂ້າມຜ່ານຂອງເວລາເທົ່ານັ້ນ, ຍັງແມ່ນການກ້າວກະໂດດອັນໃຫຍ່ຫຼວງຂອງກຳລັງແຮງຕົວຈິງຂອງຊາດ. ປະເທດຈີນໃໝ່ໃນເວລາຫາກໍ່ສ້າງຕັ້ງຂຶ້ນ, ຍັງແມ່ນປະເທດກະສິກຳທີ່ຫຼ້າຫຼັງຄື"ລົດຄັນໜຶ່ງກໍ່ບໍ່ສາມາດຜະລິດອອກໄດ້", ຜ່ານການພັດທະນາມາ 60 ປີ, ຈີນໄດ້ພັດທະນາເປັນອົງກອນເສດຖະກິດໃຫຍ່ອັນດັບ 3 ຂອງໂລກແລ້ວ.
ສາມາດເວົ້າໄດ້ວ່າ, ເຕັກນິກທາງການທະຫານຂອງປະເທດໃດກ້າວໜ້າທັນສະໄໝ, ມັນກໍ່ສະແດງໃຫ້ເຫັນກຳລັງແຮງສັງລວມຂອງປະເທດນັ້ນຍົກສູງຂຶ້ນ. ສະນັ້ນ, ພິທີສະຫຼອງທີ່ຈັດຂຶ້ນໃນສະໜາມຫຼວງທ່ຽງອານເມີນໃນວັນທີ 1 ຕຸລານີ້, ມີຄວາມໝາຍເລິກເຊິ່ງຍາວໄກກວ່າເກົ່າ. ທ່ານສິນສຽວອີ່ງ, ນັກວິຊາການທີ່ມີຊື່ສຽງຊີ້ອອກວ່າ:
"ການເດີນຂະບວນທີ່ລະລຶກສາທາລະນະລັດປະຊາຊົນຈີນສ້າງຕັ້ງຂຶ້ນຄົບຮອບ 60 ປີ, ມີລັກສະນະພິເສດອັນໜຶ່ງຄືຖືຄົນເປັນກົກ, ມີບົດບາດທີ່ເຕົ້າໂຮມຈິດໃຈ, ປຸກລະດົມຈິດໃຈເພື່ອໃຫ້ຈີນສືບຕໍ່ພັດທະນາຢ່າງແຂງແຮງໃນອະນາຄົດຢ່າງໃຫຍ່ຫຼວງ."
ຄົນຈີນຄວນຮູ້ສຶກພາກພູມໃຈຍ້ອນປະເທດຊາດສ້າງຕັ້ງຂຶ້ນຄົບຮອບ 60 ປີ. ໃນ 60 ປີມານີ້, ຈີນໄດ້ບັນລຸການປ່ຽນແປງຈາກປະເທດອ່ອນແອກາຍເປັນປະເທດໃຫຍ່ທີ່ສຳຄັນໃນໂລກ, ໄດ້ເດີນຕາມເສັ້ນທາງອັນຍິ່ງໃຫຍ່ທີ່ຟື້ນຟູຄວາມຈະເລີນຮຸ່ງເຮືອງ. ຜົນສະທ້ອນຂອງຈີນຕໍ່ທົ່ວໂລກກໍນັບມື້ນັບເດັ່ນຊັດຂຶ້ນ. ລັດຖະບານຈີນພວມຫວນຄືນໝາກຜົນແລະບົດຮຽນໃນ 60 ປີຜ່ານມາ, ໂລກກໍ່ພວມຄອງຄອຍເບິ່ງອະນາຄົດຂອງຈີນ.
ກໍຄືຜູ້ນຳຈີນໄດ້ເວົ້າວ່າ, ຈີນບໍ່ສາມາດແຍກອອກຈາກໂລກ, ໂລກກໍຕ້ອງການຈີນຄືກັນ. ປະທານຫູຈີນທ່າວໄດ້ໃຫ້ຄຳໝັ້ນສັນຍາຢູ່ເທິງເວທີຄະນະປະທານທີ່ຖ່ຽນອ່ານເໝີນວ່າ, ການສຳເລັດຜົນຂອງຈີນໃນອະນາຄົດຈະສ້າງຜົນປະໂຫຍດຫຼາຍກວ່າເກົ່າຕໍ່ທົ່ວໂລກ.
"ປະຊາຊົນຈີນມີຄວາມໝັ້ນໃຈແລະຄວາມສາມາດສ້າງສາປະເທດຂອງຕົນໃຫ້ດີຂຶ້ນ, ກໍມີຄວາມໝັ້ນໃຈແລະຄວາມສາມາດປະກອບສ່ວນເທົ່າທີ່ຄວນຂອງຕົນຕໍ່ໂລກ."
