ທ່ານທັກສິນ ຊິນນະວັດ,ອະດີດນາຍົກໄທເດີນທາງໄປເຖິງພະນົມເປັນ,ການພົວພັນລະຫວ່າງໄທກັບກຳປູເຈຍເຮັດໃຫ້ຫຼາຍຝ່າຍເປັນຫ່ວງນຳ.
-----------------------------------------------------------------------------------------------------------------
ທີ່ນີ້ ວິທະຍຸສາກົນແຫ່ງປະເທດຈີນ, ສະບາຍດີ ທ່ານຜູ່ຟັງທີ່ໂຄລົບ, ໂດຍຕອບສະຫນອງຕາມຄຳເຊີນຂອງທ່ານຮຸນແຊນ, ນາຍົກລັດຖະມົນຕີກຳປູເຈຍ, ຕອນເຊົ້າວັນທີ 10 ພະຈິກນີ້, ທ່ານທັກສິນ ຊິນນະວັດ,ອະດີດນາຍົກລັດຖະມົນຕີໄທທີ່ໄປອາໄສຢູ່ຕ່າງປະເທດນັ້ນໄດ້ເດີນທາງໄປເຖິງນະຄອນຫຼວງພະນົມເປັນຂອງກຳປູເຈຍ, ເພື່ອໄປຖ່າຍທອດປະສົບການແກ່ວົງການເສດຖະກິດກຳປູເຈຍ. ການກະທຳດັ່ງກ່າວຂອງທ່ານທັກສິນຖືກຖືເປັນສັນຍະລັກທີ່ຮັບເອົາຕຳແຫນ່ງເປັນທີ່ປຶກສາເສດຖະກິດ ຂອງລັດຖະບານກຳປູເຈຍ, ດ້ວຍເຫດນີ້, ການພົວພັນລະຫວ່າງໄທກັບກຳປູເຈຍທີ່ເຄັ່ງຕຶງຂຶ້ນຢູ່ແລ້ວນັ້ນຍິ່ງເຄັ່ງຕຶງຂຶ້ນຕື່ມອີກ.
ວັນທີ 4 ພະຈິກນີ້, ຢູ່ທີ່ນະຄອນຫຼວງພະນົມເປັນ, ທ່ານຮຸນແຊນ,ນາຍົກລັດຖະມົນຕີກຳປູເຈຍໄດ້ແຕ່ງຕັ້ງທ່ານທັກສິນ ຊິນນະວັດເປັນທີ່ປຶກສາສ່ວນຕົວຂອງທ່ານ ແລະເປັນທີ່ປຶກສາດ້ານເສດຖະກິດຂອງລັດຖະ ບານລາຊະອານາຈັກກຳປູເຈຍ. ພາຍຫຼັງການແຕ່ງຕັ້ງດັ່ງກ່າວມີຂຶ້ນ ກໍ່ເກີດມີສຽງຄັດຄ້ານຢ່າງຮຸນແຮງທັນທີຈາກຝ່າຍໄທ, ເພື່ອປະທ້ວງການກະທຳດັ່ງກ່າວ ຂອງກຳປູເຈຍ, ໃນວັນທີ 5ພະຈິກນີ້ ໄທໄດ້ຮຽກເອກອັກຄະລັດຊະທູດຂອງຕົນ ທີ່ປະຈຳຢູ່ກຳປູເຈຍກັບຄືນປະເທດ, ເພື່ອເປັນການຕອບໂຕ້ຄືນ ກຳປູເຈຍກໍ່ໄດ້ຮຽກເອກອັກຄະລັດຊະທູດຂອງຕົນກັບຄືນປະເທດເຊັ່ນກັນ. ທ່ານ ອະພິສິດ ເວດຊາຊີວະ, ນາຍົກລັດຖະມົນຕີໄທ ກ່າວໃນມື້ດຽວກັນວ່າ, ຈະພິຈາລະນາຄືນກ່ຽວກັບການພົວພັນທາງການທູດລະຫວ່າງສອງປະເທດ, ແລະຈະຕິດຕາມສະຖານະການ ແລ້ວຈຶ່ງຕັດສິນໃຈວ່າຄວນຈະສືບຕໍ່ຫຼຸດລະດັບການພົວພັນຂອງສອງປະເທດລົງຫຼືບໍ່, ໃນຂະນະດຽວກັນທ່ານໄດ້ປະກາດວ່າ, ຈະຢຸດຕິໂຄງການຮ່ວມມືລະຫວ່າງສອງປະເທດ ແລະໂຄງການຊ່ວຍເຫຼືອຕໍ່ ກຳປູເຈາຍເປັນການຊົ່ວຄາວ, ຫວັງວ່າກຳປູເຈຍຈະທົບທວນຄືນການກະທຳຂອງຕົນເອງວ່າ ຖືກຕ້ອງກັບນະໂຍບາຍການຕ່າງປະເທດຂອງສອງປະເທດ ທີ່ຍຶດໝັ້ນມິດຕະພາບ ແລະສະຖຽນລະພາບມາໂດຍຕະຫຼອດຫຼືບໍ່.
ເຖິງວ່າປະເຊີນກັບການປະທ້ວງຢ່າງຮຸນແຮງແລະມາດຕະການຕ່າງໆຈາກໄທ, ແຕ່ກຳປູເຈຍກໍ່ຍັງຍຶດໝັ້ນຫຼັກໝັ້ນຂອງຕົນ. ວັນທີ 8 ພະຈິກນີ້ຢູ່ພະນົມເປັນ, ທ່ານຮຸນແຊນ, ນາຍົກລັດຖະ ມົນຕີກຳປູເຈຍກ່າວວ່າ, ທ່ານທັກສິນຈະຢ້ຽມຢາມກຳປູເຈຍໃນວັນທີ 12 ພະຈິກນີ້ຕາມຄຳເຊີນ, ແລະຖ່າຍທອດບົດຮຽນໃຫ້ຜູ້ຊ່ຽວຊານດ້ານເສດຖະກິດຂອງກຳປູເຈຍ. ແຕ່ທ່ານທັກສິນໄດ້ເດີນທາງເຖິງສະໜາມບິນສາກົນພະນົມເປັນໃນຕອນເຊົ້າວັນທີ 10 ພະຈິກ, ໄວກວ່າເວລາກຳນົດ 2 ວັນ, ທ່ານຮຸນແຊນກ່າວວ່າກຳປູເຈຍຍິນດີຕ້ອນຮັບທ່ານທັກສິນຫຼາຍ.
ນັກວິເຄາະເຫັນວ່າ, ເຖິງວ່າທ່ານທັກສິນຢ້ຽມຢາມກຳປູເຈຍເທື່ອນີ້ມີເວລາບໍ່ດົນ, ແຕ່ໄດ້ສະແດງໃຫ້ເຫັນວ່າທ່ານຍິນດີຮັບຕຳແໜ່ງເປັນທີ່ປຶກສາເສດຖະກິດຂອງລັດຖະບານກຳປູເຈຍ, ເລື່ອງນີ້ຈະເຮັດໃຫ້ການພົວພັນລະຫວ່າງສອງປະເທດທີ່ຍັງບໍ່ທັນຟື້ນຟູຈາກການປະທະກັນຢູ່ຊາຍແດນນັ້ນຊຸດໂຊມລົງເຖິງຈຸດຕ່ຳສຸດ.
ລັດຖະບານໄທກ່າວວ່າ, ຖ້າວ່າມີການຢືນຢັນວ່າທ່ານທັກສິນໄປຮອດກຳປູເຈຍແລ້ວ, ຈະອີງຕາມສັນຍາສົ່ງຄົນຮ້າຍຂ້າມແດນທີ່ສອງຝ່າຍເຊັນກັນນັ້ນຮຽກຮ້ອງໃຫ້ກຳປູເຈຍສົ່ງຕົວທ່ານທັກສິນໃຫ້ໄທ. ແຕ່ວ່າກຳປູເຈຍຍັງຍຶດໝັ້ນຈະບໍ່ສົ່ງຕົວທ່ານທັກສິນໃຫ້ໄທຄືເກົ່າ.
ນັກວິເຄາະເຫັນວ່າ,ເທື່ອນີ້,ກຳປູເຈຍໃຊ້ຫຼັກໝັ້ນແຂງກະດ້າງປານນີ້ໃນບັນຫາທັກສິນ,ແລະສ້າງຄວາມຂັດແຍ່ງກັບລັດຖະບານໄທ,ແມ່ນພິຈາລະນາເຖິງຜົນປະໂຫຍດທາງສອງດ້ານ,ຄື:ການເມືອງແລະເສດຖະກິດ.ກ່ອນອື່ນ,ແຕ່ຕົ້ນປີນີ້ມາ,ກອງທະຫານຂອງໄທແລະກຳປູເຈຍເປັນປໍລະປັກກັນຍ້ອນມີຄວາມຂັດແຍ່ງກັນກ່ຽວກັບດິນແດນຢູ່ອ້ອມຜາສາດພະວິ ຫານ,ຈົນຮອດຊູ່ມື້ນີ້ການເຈລະຈາກ່ຽວກັບເລື່ອງນີ້ກໍ່ບໍ່ໄດ້ຮັບຄວາມຄືບໜ້າລັກສະນະທາດແທ້ຫຍັງ.ສະນັ້ນ,ວົງການພາຍນອກທວາຍເບິ່ງວ່າ,ທ່າທີແລະການຕັດສິນຂອງກຳປູເຈຍແມ່ນຢາກໃຊ້ແຮງກົດດັນຕໍ່ລັດຖະບານໄທ,ແລະໃຊ້ເປັນໂຕ້ນຊີງໃນການເຈລະຈາກ່ຽວກັບການປະທະກັນບັນຫາຊາຍແດນລະຫວ່າງສອງປະເທດ.ນອກນີ້,ລັດຖະບານທັກສິນເຄີຍຊ່ວຍເຫຼືອກຳປູເຈຍສ້າງທາງຫຼວງຢ່າງໜ້ອຍ4ສາຍ,ສະນັ້ນ,ທ່ານຮຸນແຊນສະໜັບສະໜູນທ່ານທັກສິນຢ່າງແຂງແຮງ,ຄືຊິຢາກດຶງດູດທ່ານທັກສິນລົງທຶນຢູ່ກຳປູເຈຍ,ເຊິ່ງລວມທັງໂຄງການພັດທະນາຊັບພະຍາກອນນ້ຳມັນແລະອາຍແກັສທຳມະຊາດເທິງທະເລ.
ວົງການພາຍນອກເຫັນໂດຍທົ່ວໄປວ່າ,ກ່ຽວກັບເລື່ອງທີ່ກຳປູເຈຍຈະສົ່ງທ່ານທັກສິນກັບຄືນໄທຫຼືບໍ່,ສົງຄາມດ້ານການຕ່າງປະເທດລະຫວ່າງໄທກັບກຳປູເຈຍຍັງຈະເລື່ອນຂັ້ນອີກ,ໄທຈະໃຊ້ມາດຕະການການຕ່າງປະເທດແນວໃດຂຶ້ນຢູ່ກັບທ່າທີຂອງກຳປູເຈຍ,ອະນາຄົດຂອງການພົວພັນສອງປະເທດຈຶ່ງເຫັນໄປໃນແງ່ດີບໍ່ໄດ້ດ້ວຍເຫດນີ້.
