ຈີນຈະຮັບປະກັນໃຫ້ເງິນແລະເຄື່ອງຊ່ວຍເຫຼືອທີ່ບໍລິຈາກໃຫ້ໄປເຖິງມືປະຊາຊົນທີ່ປະສົບໄພຢ່າງແທ້ຈິງ
-----------------------------------------------------------------------------------------------------------------
ວັນທີ 4 ມິຖຸນານີ້,ຫ້ອງການຖະແຫຼງຂ່າວລັດຖະບານຈີນໄດ້ຈັດກອງປະຊຸມຂ່າວ,ຖະແຫຼງສະພາບກ່ຽວກັບຈີນຮັບເອົາຄວາມຊ່ວຍເຫຼືອຈາກສາກົນພາຍຫຼັງແຜ່ນດິນໄຫວແຂວງເສສວນ.ໃນກອງປະຊຸມຂ່າວ,ເຈົ້າໜ້າທີ່ຈີນກ່າວວ່າ,ຈີນຈະໃຊ້ມາດຕະການ,ຮັບປະກັນໃຫ້ເຄື່ອງຂອງແລະເງິນຊ່ວຍເຫຼືອທີ່ພາຍໃນປະເທດແລະຕ່າງປະເທດບໍລິຈາກນັ້ນໃຫ້ໄປເຖິງມືປະຊາຊົນທີ່ປະສົບໄພຢ່າງແທ້ຈິງ;ພ້ອມກັນນັ້ນ,ຈີນຊົມເຊີຍປະຊາຄົມໂລກຊ່ວຍເຫຼືອແລະສະໜັບສະໜູນການສ້າງບ້ານແປງເມືອງຄືນໃໝ່ຢູ່ເຂດປະສົບໄພ.
ໃນກອງປະຊຸມຂ່າວທີ່ຈັດຂຶ້ນໃນວັນທີ 4 ມິຖຸນານີ້,ທ່ານວາງຈື້ນຢ້າວ ຫົວໜ້າກົມກູ້ໄພກະຊວງການປົກຄອງແລະປະຊາສົງເຄາະຈີນກ່າວວ່າ,ມາຮອດເວລາ 12 ໂມງວັນທີ 4 ມິຖຸນານີ້,ນັບລວມແລ້ວ,ຈີນໄດ້ຮັບເຄື່ອງຂອງແລະເງິນຊ່ວຍເຫຼືອເຂດປະສົບໄພຈາກພາຍໃນປະເທດແລະຕ່າງປະເທດຫຼາຍກວ່າ 43 ຕື້ 600 ລ້ານຢວນ,ໃນນັ້ນ,ປະຊາຄົມໂລກໄດ້ບໍລິຈາກເຄື່ອງຂອງແລະເງິນຊ່ວຍເຫຼືອລວມມີມູນຄ່າປະມານ 4 ຕື້ 700 ລ້ານຢວນ.
ທ່ານວາງຈື້ນຢ້າວກ່າວວ່າ,ເພື່ອຮັບປະກັນໃຫ້ການຄຸ້ມຄອງແລະນຳໃຊ້ເຄື່ອງຂອງແລະເງິນຊ່ວຍເຫຼືອທັງໝົດມີຄວາມເປັນລະບຽບຮຽບຮ້ອຍກວ່າເກົ່າ,ກະຊວງການປົກຄອງແລະປະຊາສົງເຄາະຈີນໄດ້ປະກາດວິທີຄຸ້ມຄອງແລະນຳໃຊ້ເຄື່ອງຂອງແລະເງິນຊ່ວຍເຫຼືອ,ໄດ້ສ້າງລະບຽບການທີ່ເຂັ້ມງວດ,ຮັບປະກັນໃຫ້ການຈົດທະບຽນ ແຈກຢາຍມີຄວາມໂປ່ງໃສ ເປີດເຜີຍແລະມີການບັນທຶກທາງລາຍລັກອັກສອນຢ່າງຄັກແນ່.ທ່ານຍັງກ່າວວ່າ:
"ປະເທດຕ່າງໆ,ລວມທັງອົງການປະຊາຊົນປະເພດຕ່າງໆຂອງຈີນແລະຜູ້ບໍລິຈາກທັງຫຼາຍ,ຖ້າເຂົາເຈົ້າຢາກຕິດຕາມການແຈກຢາຍເຄື່ອງຂອງຊ່ວຍເຫຼືອຢ່າງໃກ້ຊິດ,ພາກສ່ວນປະຊາສົງເຄາະກໍ່ຈະອຳນວຍຄວາມສະດວກຢ່າງເຕັມທີ່.ພວກເຮົາຕັ້ງຄວາມຫວັງຢ່າງຈິງໃຈວ່າຕ້ອງເຮັດໃຫ້ຜູ້ບໍລິຈາກພໍໃຈ."
ທ່ານວາງຈື້ນຢ້າວກ່າວວ່າ,ສຳລັບເງິນບໍລິຈາກທີ່ຜູ້ບໍລິຈາກມີເປົ້າໝາຍສະເພາະ,ພາກສ່ວນທີ່ກ່ຽວຂ້ອງຈະເຄົາລົບຄວາມຕ້ອງການຂອງພວກເພິ່ນຢ່າງແນ່ນອນ;ສຳລັບເງິນບໍລິຈາກທີ່ບໍ່ມີເປົ້າໝາຍສະເພາະ,ເວົ້າໃນດ້ານຫຼັກການແລ້ວ,ຈະສົ່ງເສີມໃຫ້ໃຊ້ເຂົ້າໃນການສ້າງບ້ານແປງເມືອງຄືນໃໝ່ຢູ່ເຂດປະສົບໄພ.ທ່ານກ່າວວ່າ,ພາກສ່ວນປະຊາສົງເຄາະຈະສະໜອງການບໍລິການການຄຸ້ມຄອງການບໍລິຈາກທີ່ດີກວ່າເກົ່າ,ດູດດຶງສັງຄົມມາເຂົ້າຮ່ວມຫຼາຍກວ່າເກົ່າ,ພະຍາຍາມເຮັດໃຫ້ປະຊາຊົນໃນສັງຄົມຮູ້ສຶກພໍໃຈໂດຍພື້ນຖານຕໍ່ການນຳໃຊ້ເຄື່ອງຂອງແລະເງິນບໍລິຈາກເຫຼົ່ານີ້.
ໃນກອງປະຊຸມຂ່າວ,ທ່ານຈ່າງເຄີ້ນີງ ຫົວໜ້າກົມສາກົນກະຊວງການຄ້າຈີນກ່າວວ່າ,ການກະທຳຂອງລັດຖະບານຈີນທີ່ເປີດເຜີຍ ໂປ່ງໃສແລະຮ່ວມມືຢ່າງຕັ້ງໜ້າໃນການຮັບເອົາຄວາມຊ່ວຍເຫຼືອຈາກສາກົນເທື່ອນີ້,ໄດ້ຮັບການຕີລາຄາສູງຈາກພາຍໃນແລະຕ່າງປະເທດ.ໃນການສ້າງບ້ານແປງເມືອງຄືນໃໝ່ໄລຍະຕໍ່ໜ້ານີ້,ຈີນຈະສືບຕໍ່ຍິນດີຕ້ອນຮັບການຊ່ວຍເຫຼືອແລະການສະໜັບສະໜູນຈາກປະຊາຄົມໂລກດ້ວຍທ່າທີທີ່ເປີດເຜີຍແລະຕາມຄວາມຕ້ອງການຂອງເຂດປະສົບໄພ.ທ່ານກ່າວວ່າ,ຈີນຈະແຈ້ງສະພາບສ້າງບ້ານແປງເມືອງຄືນໃໝ່ຢູ່ເຂດປະສົບໄພແລະຄວາມຕ້ອງການຊ່ວຍເຫຼືອໃຫ້ປະຊາຄົມໂລກຊາບຢ່າງທັນການ.
"ຕົວຢ່າງວ່າ, ການສ້າງພື້ນຖານໂຄງລ່າງຄືນໃໝ່ຢູ່ເຂດປະສົບໄພໃນອະນາຄົດ, ລວມທັງໂຮມໝໍ ໂຮງຮຽນ ສິ່ງກໍ່ສ້າງສະຫວັດດີການແລະຂົງເຂດສົ່ງແວດລ້ອມ, ລ້ວນແຕ່ແມ່ນຂົງເຂດທີ່ພິຈາລະນາກ່ອນພວກຂ້າພະເຈົ້າກັບອົງການຊ່ອຍເຫຼືອສອງຝ່າຍຫຼືຫຼາຍຝ່າຍສາກົນ. ພວກຂ້າພະເຈົ້າຢາກໃຫ້ໃນການຮ່ວມມືລະຫວ່າງໃນຂະບວນການສ້າງບ້ານແປງເມືອງຄືນໃໝ່ຫຼັງໄພແຜ່ນດິນໄຫວ, ນຳໃຊ້ການຊ່ອຍເຫຼືອເຫຼົ່ານີ້ຢ່າງເຕັມທີ່, ປະກອບສ່ວນເຂົ້າໃນການຟື້ນຟູແລະພັດທະນາຂົງເຂດການສຶກສາແລະການປິ່ນປົວຂອງເຂດປະສົບໄພ."
ນອກຈາກບໍລິຈາກເງິນແລະເຄື່ອງຂອງໃຫ້ເຂດປະສົບໄພແລ້ວ, ຫຼາຍປະເທດແລະເຂດແຄວ້ນຍັງໄດ້ສົ່ງໜ່ວຍຊ່ອຍກູ້ໄພດ່ວນແລະໜ່ວຍແພດ. ທ່ານຊິນກາງ ໂຄສົກກະຊວງການຕ່າງປະເທດຈີນກ່າວໃນງານຖະແຫຼງຂ່າວວ່າ, ຈີນສະແດງຄວາມຂອບອົກຂອບໃຈຕໍ່ພວກເຂົາເຈົ້າ, ແລະຍິນດີສືບຕໍ່ດຳເນີນການຮ່ວມມືກັບປະເທດອື່ນໆໃນການຕ້ານແລະກູ້ໄພ.
