ທ່ານຫູຈິນທາວສຳຫຼວດວຽກງານກະກຽມງານກິລາໂອລິມປິກແລະສະພາບການພັດທະນາເສດຖະກິດຂອງນະຄອນຊິງຕາວແຂວງຊ່ານຕຸ່ງ
-----------------------------------------------------------------------------------------------------------------
ຕາມຂ່າວCRI,ວັນທີ20ກໍລະກົດນີ້,ທ່ານຫູຈິນທາວ ປະທານປະເທດຈີນໄດ້ເດີນທາງໄປນະຄອນຊິງຕາວ ແຂວງຊ່ານຕຸ່ງ,ເພື່ອສຳຫຼວດການກະກຽມການແຂ່ງຂັນເຮືອໃບຂອງງານກິລາໂອລິມປິກປັກກິ່ງແລະສຳຫຼວດກວດກາສະພາບການຜະລິດແລະທຸລະກິດຂອງວິສາຫະກິດໃນປັດຈຸບັນ.
ນະຄອນຊິງຕາວແມ່ນເມືອງຊ່ວຍຈັດງານກິລາໂອລິມປິກປັກກິ່ງ,ຮັບພາລະກຽມຈັດການແຂ່ງຂັນເຮືອໃບໂອລິມປິກ.ນັບແຕ່ກາງເດືອນມິຖຸນາແລ້ວນີ້ເປັນຕົ້ນມາ,ໄຄນ້ຳຈຳນວນຫຼວງຫຼາຍໄດ້ໄຫຼເຂົ້າໄປຮອດເຂດທະເລໃກ້ນະຄອນຊິງຕາວ,ທ່ານຫູຈິນທາວໄດ້ອອກຄຳສັ່ງສຳຄັນຫຼາຍເທື່ອ,ຮຽກຮ້ອງໃຫ້ຂ້ຽວເລັ່ງກຳຈັດໄຄນ້ຳ.ປັດຈຸບັນ,ວຽກງານນີ້ໄດ້ຮັບໄຊຊະນະຢ່າງຢ່າງເດັດຂາດແລ້ວ.
ທ່ານຫູຈິນທາວຍັງໄດ້ສຳຫຼວດລະບົບບັນຊາການດຳເນີນການແຂ່ງຂັນເຮືອໃບໂອລິມປິກ.ທ່ານກ່າວວ່າ,ແຕ່ດຽວນີ້ຮອດມື້ໄຂງານກິລາໂອລິມປິກປັກກິ່ງຍັງເຫຼືອພຽງແຕ່19ວັນເທົ່ານັ້ນ,ຫວັງວ່າທຸກຄົນຈົງມີນ້ຳໃຈຄວາມຮັບຜິດຊອບເພີ່ມຂຶ້ນແລະຮູ້ສຶກ ຮີບດ່ວນກວ່າເກົ່າ,ລົງເລິກເຮັດວຽກກະກຽມທຸກດ້ານໃຫ້ລະອຽດຮອບຄອບ,ຮັບປະກັນການແຂ່ງຂັນເຮືອໃບໂອລິມປິກໄດ້ຮັບຜົນສຳເລັດຢ່າງຈົບງາມ,ປະກອບສ່ວນຢ່າງຕັ້ງໜ້າເພື່ອຈັດງານກິລາໂອລິມປິກທີ່ມີສີສັນພິເສດແລະມີລະດັບສູງ.
