ໜັງສືພິມຂອງ​ສິງ​ກະ​ໂປ​ຂຽນ​ວ່າ, ງານ​ໂອ​ລິມ​ປິກ​ປັກ​ກິ່ງ​ຈະ​ຖືກ​ບັນ​ທຶກ​ເຂົ້າ​ໃນ​ປື້ມ​ປະ​ຫວັດ​ສາດ

ຕາມ​ຂ່າວສານ​ຊີ​ນຮວາ: ວັນ​ທີ 29 ກໍລະກົດ​ນີ້, ໜັງສືພິມ"ລຽນ​ເຫີ​ຈາວ​ປ້າວ"ຂອງ​ສິງກະ​ໂປ​ໄດ້​ພິມ​ບົດ​ຄວາມ​ຂອງ​ທ່ານ​ຢູຊຸ້ຍ ສາ​ສະ​ດາ​ຈານ​ຂອງ​ສູນ​ຄົ້ນຄວ້າ​ໂລກ​ປັດຈຸບັນ​ຂອງ​ຈີນ, ​ເຫັນ​ວ່າ, ງານ​ກິລາ​ໂອ​ລິ​ມປິກ​ປັກ​ກິ່ງ​​ຈະ​ສົ່ງ​ເສີມນ້ຳ​ໃຈ​ໂອ​ລິ​ມປິກ, ສະ​ແດງ​ໃຫ້​ເຫັນ​ເອກະລັກ​ຂອງ​ຈີນ​, ​ແລະ​ຈະ​ຖືກ​ບັນທຶກ​ເຂົ້າ​ໃນ​ປຶ້ມ​ປະຫວັດສາດ​ດ້ານ​ການ​ກິລາ​ຂອງ​ມວນ​ມະນຸດ​ດ້ວຍ​ຄວາມ​ສະ​ຫງ່າລາສີ​ທີ່​ມີ​ເອກະລັກ​ພິ​ເສດຂອງ​ຕົນ.

ບົດ​ຄວາມ​ຂຽນ​ວ່າ, ອີກ​ບໍ່​ທໍ່​ໃດ​ມື້, ງານ​ກິລາ​ໂອ​ລິ​ມປິກ​ຄັ້ງທີ 29 ທີ່​ດຶງ​ດູດ​ສາຍຕາ​ຊາວ​ໂລກ​ຈະ​ເປີດ​ສາກ​ຢູ່​ປັກ​ກິ່ງ​ດ້ວຍ​ນ້ຳ​ໃຈສັນຕິພາບ ມິດຕະພາບ​ແລະ​ຄວາມ​ກ້າວໜ້າ. ລັດຖະບານ​ແລະ​ປະຊາຊົນຈີນ​ຈະ​ບໍ່​ເຮັດ​ໃຫ້​ຊາວ​ໂລກ​ຜິດ​ຫວັງ, ​ໄດ້​ເຮັດ​ວຽກກະກຽມ​ມາ​ໄດ້ 7 ປີ​ແລ້ວດ້ວຍ​ຄວາມ​ພະຍາຍາມຢ່າງ​ສຸດຂີດ, ກະກຽມ​ດ້ວຍ​ຄວາມມານະ​ອົດທົນ.

ບົດ​ຄວາມ​ຊີ້​ອອກ​ວ່າ, ທຸກປະ​ເທດ​ເຈົ້າພາບຂອງ​ງານ​ກິລາ​ໂອ​ລິ​ມປິກກໍ່​ລ້ວນ​ແຕ່ຢາກ​ສະ​ແດງ​ພາບ​ພົດ​ຂອງ​ຕົນ​ຕໍ່​ທົ່ວ​ໂລກ, ຈີນ​ແມ່ນ​ຈັດ​ງານ​ກິລາ​ໂອ​ລິ​ມປິກ​ເປັນຄັ້ງທຳ​ອິດ, ​ໃນ​ຂະນະ​ທີ່​ສະ​ແດງ​ຄວາມ​ກະຕືລືລົ້ນຂອງ​ຕົນ​ນັ້ນ, ຊາວ​ຈີນຈະ​ເປັນ​ເຈົ້າພາບ​ທີ່​ດີ, ປະຕິບັດ​ໜ້າ​ທີ່​ຮັບຜິດຊອບ​ທາງ​ສາກົນ, ພະຍາຍາມ​ສຸດ​ຂີດ​ເຮັດ​ວຽກ​ຕ່າງໆ​ດຳ​ເນີນ​ໄປ​ໂດຍ​ດີ.