ຄະນະກຳມະການຈັດຕັ້ງໂອລິມປິກສາກົນຍ້ອງຍໍພິທີໄຂງານກິລາໂອລິມປິກປັກກິ່ງ
-----------------------------------------------------------------------------------------------------------------
ຕາມຂ່າວCRI: ຕອນຄຳວັນທີ 8 ສີງຫານີ້, ພິທີໄຂງານກິລາໂອລິມປິກລະດູຮ້ອນຄັ້ງທີ 29 ໄດ້ຈັດຂຶ້ນຢ່າງເປັນທາງການຢູ່"ຮັງນົກ" ສະໜາມກິລາແຫ່ງຊາດປັກກິ່ງ. ພາຍຫຼັງພິທີໄຂງານສິ້ນສຸດລົງແລ້ວ, ທ່ານຊາກຣົກເກ ປະທານຄະນະກຳມະການໂອລິມປິກສາກົນຍ້ອງຍໍວ່າງານຊຸມນຸມອັນມະໂຫລານດັ່ງກ່າວຈະ"ເຮັດໃຫ້ຄົນບໍ່ລືມຈັກເທື່ອ".
ທ່ານຣົກເກກ່າວວ່າ, ພິທີໄຂງານໂອລິມປິກປັກກິ່ງໄດ້ສະແດງໃຫ້ເຫັນຄວາມສາມາດທາງດ້ານຈິນຕະນາການ ລັກສະນະປະດິດສ້າງເຄຫະສະຖານແລະພະລັງແຮງຂອງຄົນຈີນຢ່າງສົມບູນ; ສະໜາມກິລາ"ຮັງນົກ"ຍິ່ງແມ່ນເຄຫະສະຖານອັດສະຈັນໃໝ່ອ່ຽມຂອງໂລກອີກແຫ່ງໜຶ່ງ, ເຂົ້າກັນດີກັບພິທີໄຂງານໂອລິມປິກທີ່ດີເລີດ; ພິທີມີເຮັດໃຫ້ຄົນຕື້ນຕັນໃຈແລະບໍ່ມີວັນລືມ, ນີ້ແມ່ນຂອງຂວັນອັນລ້ຳຄ່າທີ່ມອບໃຫ້ນັກກິລາຂອງທົ່ວໂລກແລະນ້ຳໃຈໂອລິມປິກ, ຜູ້ຊົມທົ່ວໂລກລ້ວນແຕ່ເປັນພິຍານໃຫ້ແກ່ສິ່ງທັງໝົດເຫຼົ່ານີ້.
ທ່ານເຮັນ ເວີບຼູເກນ ປະທານຄະນະປະສານງານກັບງານໂອລິມປິກປັກກິ່ງຂອງຄະນະກຳມະການໂອລິມປິກສາກົນຊີ້ອອກວ່າ, ຄວາມສຳເລັດຜົນຂອງພິທີໄຂງານໂອລິມປິກປັກກິ່ງບອກໃຫ້ຮູ້ລ່ວງໜ້າວ່າວຽກງານຈັດຕັ້ງການແຂ່ງຂັນໃນຂັ້ນຕໍ່ໄປກໍຈະດຳເນີນຢ່າງສະດວກທີ່ສຸດ, ເຖິງວ່າທ່ານໄດ້ເບິ່ງການຊ້ອມສະແດງມາກ່ອນກໍຕາມ, ແຕ່ສະພາບອັນໂຫຍ່ໂຕຄຶກຄື້ນຂອງພິທີໄຂງານກໍໄດ້ລື່ນກາຍການຄາດຄິດຂອງທ່ານ; ບໍ່ວ່າເວົ້າສຳລັບຄົນຈີນຫຼືວ່າປະຊາຊົນໃນທົ່ວໂລກແລ້ວ, ຄ່ຳຄືນມື້ນີ້ລ້ວນແຕ່ຈະເຮັດໃຫ້ຄົນຈື່ຈຳໄວ້ຢ່າງຍາວນານ.