ຄະນະກຳມະການໂອລິມປິກສາກົນສະແດງຄວາມເພິ່ງພໍໃຈຕໍ່ງານໂອລິມປິກປັກກິ່ງໄດ້ດຳເນີນຢ່າງສະດວກ
-----------------------------------------------------------------------------------------------------------------
ຕາມຂ່າວCRI: ວັນທີ 13 ສີງຫານີ້, ທ່ານກິວເບີດ ຫົວໜ້າບໍລິການງານໂອລິມປິກຂອງຄະນະກຳມະການໂອລິມປິກສາກົນກ່າວວ່າ, ພາຍຫຼັງໄດ້ປະເມີນຕໍ່ການແຂ່ງຂັນໃນ 5 ມື້ທຳອິດຂອງງານໂອລິມປິກປັກກິ່ງ, ຄະນະກຳມະການໂອລິມປິກສາກົນສະແດງຄວາມເພິ່ງພໍໃຈທີ່ສຸດຕໍ່ງານໂອລິມປິກປັກກິ່ງດຳເນີນຢ່າງສະດວກໃນດ້ານການແຂ່ງຂັນແລະດ້ານບໍລິການ.
ໃນງານຖະແຫຼງຂ່າວທີ່ຈັດຂຶ້ນຢູ່ສູນຂ່າວຫຼັກຂອງານໂອລິມປິກປັກກິ່ງທີ່ຈັດຂຶ້ນໃນວັນທີ 13 ສີງຫານີ້, ທ່ານກິວເບີກ່າວວ່າ, ງານໂອລິມປິກປັກກິ່ງຈັດພິທີໄຂຢ່າງສຳເລັດຜົນ, ນັກກິລາປະເທດຕ່າງໆລ້ວນແຕ່ຍ້ອງຍໍສິ່ງກໍ່ສ້າງແລະບໍລິການຂອງບ້ານໂອລິມປິກ, ແລະພໍໃຈຫຼາຍຕໍ່ການແຂ່ງຂັນ ສະໜາມຝຶກຊ້ອມແລະການເດີນທາງ; ນັກກິລາໄດ້ສະແດງຄວາມສາມາດທີ່ດີເດັ່ນໃນໄລຍະງານໂອລິມປິກປັກກິ່ງ, ໄດ້ເສີມຂະຫຍາຍສູ່ລະດັບສູງ, ສິ່ງເຫຼົ່ານີ້ລ້ວນແຕ່ສະແດງໃຫ້ເຫັນວ່າງານໂອລິມປິກປັກກິ່ງໄດ້ດຳເນີນຢ່າງສະດວກ.
"ຕອນເຊົ້າມື້ນີ້ປະທານຊາກຣົກເກໄດ້ກິນເຂົ້າເຊົ້າຢູ່ແຈໜຶ່ງຂອງບ້ານໂອລິມປິກ, ເພື່ອບໍ່ໃຫ້ຄົນໃຫ້ຄວາມສົນໃຈທ່ານ, ແຕ່ຍັງມີນັກກິລາຈຳນວນໜຶ່ງໄດ້ເຫັນທ່ານ, ແລະເວົ້າຕໍ່ທ່ານວ່າຂອບໃຈນຳທ່ານ, ພວກເຮົາບໍ່ເຄີຍເຫັນບ້ານໂອລິມປິກດີຄືບ້ານນີ້ແລະເງື່ອນໄຂການແຂ່ງຂັນດີແບບນີ້."
ທ່ານກິວເບີກ່າວວ່າ, ວຽກງານຈັດຕັ້ງຂອງງານໂອລິມປິກປັກກິ່ງກໍດີຫຼາຍ, ຄະນະກຳມະການຈັດຕັ້ງງານໂອລິມປິກປັກກິ່ງໄດ້ສະໜອງການແຂ່ງຂັນແລະສະພາບແວດລ້ອມເຮັດວຽກຂອງສື່ມວນຊົນທີ່ມີລະດັບແລະຄຸນນະພາບສູງ.
