ເຂດປະສົບແຜ່ນດິນໄຫວແຂວງເສສວນຈີນຖືການຈັດສັນເຮືອນຢູ່ເປັນໜ້າທີ່ຮີບດ່ວນກວ່າໝູ່
-----------------------------------------------------------------------------------------------------------------
ຕາມຂ່າວCRI: ວັນທີ19 ສິງຫານີ້, ຢູ່ທີ່ປັກກິ່ງ, ທ່ານນາງຮວງຢ້ານຢົງ ຮອງເຈົ້າແຂວງເສສວນຈີນກ່າວວ່າ, ໃນເວລາຊຸກຍູ້ການສ້າງສາເຂດປະສົບໄພຄືນໃໝ່, ແຂວງເສສວນຖືການຈັດສັນເຮືອນຢູ່ຂອງປະຊາຊົນໃນເຂດປະສົບໄພເປັນໜ້າທີ່ຮີບດ່ວນກວ່າໝູ່ຕະຫຼອດມາ.
ທ່ານນາງຮວງຢ້ານຢົງກ່າວວ່າ, ເປົ້າໝາຍການຈັດສັນເຮືອນຢູ່ແມ່ນ: ຢູ່ຊົນນະບົດ,ຕັ້ງເປົ້າໝາຍໃຊ້ເວລາ1ປີເຄິ່ງ ສຳເລັດໜ້າທີ່ກໍ່ສ້າງເຮືອນຢູ່ຂອງຊາວກະສິກອນທີ່ເພພັງ ແລະ ຖືກທຳລາຍຮ້າຍແຮງໃນໄພແຜ່ນດິນໄຫວຄືນໃໝ່ຢ່າງຮອບດ້ານ,ສ່ວນຢູ່ຕົວເມືອງ,ຕັ້ງເປົ້າໝາຍໃຊ້ເວລາ2ປີເຄິ່ງ ສຳເລັດການສ້າງສາເຮືອນຢູ່ໃນຕົວເມືອງຄືນໃໝ່ຢ່າງຮອບດ້ານ. ນາງແຈ້ງວ່າ, ແຂວງເສສວນໄດ້ເລິ່ມກໍ່ສ້າງເຮືອນຢູ່ແບບຖາວອນຢູ່ຊົນນະບົດກ່ອນໝູ່. ນັບມາຮອດວັນທີ12 ສິງຫານີ້, ທົ່ວແຂວງເສສວນໄດ້ເລິ່ມສ້າງເຮືອນຢູ່ແບບຖາວອນຫຼັງໄພພິບັດຢູ່ຊົນນະບົດໃຫ້ແກ່ປະຊາຊົນ1ແສນ9ໝື່ນກວ່າຄອບຄົວ,ແລະເກືອບ2ໝື່ນຄອບຄົວໄດ້ສ້າງສຳເລັດ, ການກໍ່ສ້າງເຮືອນຢູ່ຂອງຕົວເມືອງກໍ່ຈະເລິ່ມດຳເນີນໂດຍໄວ.
ໃນເວລາບໍ່ຮອດ3ເດືອນຫຼັງໄພ, 4ລ້ານ4ແສນກວ່າຄອບຄົວ ແລະ ປະຊາຊົນຫຼາຍກວ່າ10ລ້ານຄົນໃນເຂດປະສົບແຜ່ນດິນໄຫວແຂວງເສສວນໄດ້ເຂົ້າພັກຢູ່ໃນເຮືອນຊົ່ວຄາວແລ້ວ.
