ເຈົ້າໜ້າທີ່ປັກກິ່ງກ່າວວ່າ,ພາຍຫຼັງງານໂອລິມປິກປັກກິ່ງ,ຈະສືບຕໍ່ປະຕິບັດ ມາດຕະການປັບປຸງສິ່ງແວດລ້ອມ
-----------------------------------------------------------------------------------------------------------------
ຕາມຂ່າວcri:ວັນທີ23 ສິງຫານີ້,ຢູ່ປັກກິ່ງ,ທ່ານດູ້ຊ້າວຈົ່ງ ຮອງຫົວໜ້າແລະໂຄສົກຂອງພະແນກອະນຸລັກສິ່ງແວດລ້ອມປັກກິ່ງກ່າວວ່າ,ພາຍຫຼັງງານໂອລິມປິກປັກກິ່ງ, ປັກກິງຈະສືບຕໍ່ປະຕິບັດມາດຕະການທີ່ປັບປຸງສິ່ງແວດລ້ອມ.
ໃນງານຖະແຫຼງຂ່າວ,ທ່ານດູ້ຊ້າວຈົ່ງກ່າວວ່າ,ຈະສືບຕໍ່ປະຕິບັດມາດຕະການຫຼຸດການລະບາຍມົນລະພິດຊົ່ວຄາວໃນໄລຍະງານໂອລິມປິກ,ເພື່ອເລັ່ງລັດປັບປຸງຄຸນນະພາບສິ່ງແວດລ້ອມຂອງປັກກິ່ງໃຫ້ດີຂຶ້ນຕື່ມອີກ.ທ່ານກ່າວວ່າ,ປັກກິ່ງຈະເລັ່ງລັດຊຳລະລົດຍົນທີ່ປ່ອຍຄວັນໜັກແລະຄວບຄຸມຂີ້ຝຸ່ນທີ່ເກີດຈາກການກໍ່ສ້າງ.ຕໍ່ວິສາຫະກິດທີ່ລະບາຍມົນລະພິດໜັກແລະບໍ່ໄດ້ມາດຕະຖານ,ຈະໃຫ້ຢຸດຜະລິດແລະຈຳກັດການຜະລິດ.
ນອກນີ້,ພະແນກອະນຸລັກສິ່ງແວດລ້ອມປັກກິ່ງຈະຖອດຖອນບົດຮຽນຂອງງານໂອລິມປິກ,ຈັດຕັ້ງອາສາສະໝັກອະນຸລັກສິ່ງແວດລ້ອມຕົວເມືອງມາເຂົ້າຮ່ວມການຄຸ້ມຄອງອະນຸລັກສິ່ງແວດລ້ອມປະຈຳວັນພາຍຫຼັງງານໂອລິມປິກ.ໃນຂະນະດຽວກັນ,ຍັງຈະສືບຕໍ່ດຳເນີນການເຄື່ອນໄຫວສາທາລະນະປະໂຫຍດທີ່ອະນຸລັກສິ່ງແວດລ້ອມໂດຍການໃຫ້ລາງວັນແກ່ຜູ່ລາຍງານເປັນຕົ້ນ.
