ລັດຖະບານສ.ເກົາຫຼີໃຊ້ມາດຕະການເພີ່ມຄວາມຫມັ້ນໃຈຕໍ່ຕະຫຼາດ
-----------------------------------------------------------------------------------------------------------------
ຕາມຂ່າວCRI: ວັນທີ 27 ຕຸລານີ້, ທະນາຄານສ.ເກົາຫຼີ ເຊິ່ງເປັນ ທະນາຄານກາງຂອງສ.ເກົາຫຼີໄດ້ປະກາດຢ່າງບໍ່ນຶກບໍ່ຝັນວ່າ, ຫຼຸດອັດຕາດອກເບ້ຍຈາກ 5% ໃນເມື່ອກ່ອນລົງຮອດ 4,25%.ສື່ມວນຊົນສ.ເກົາຫຼີຊີ້ອອກວ່າ,ນີ້ແມ່ນທະນາຄານກາງສ.ເກົາຫຼີຫຼຸດອັດຕາດອກເບ້ຍລົງ 0,75% ເປັນເທື່ອທຳອິດ, ນີ້ສະແດງໃຫ້ເຫັນຄວາມຕັດສິນໃຈຂອງສ.ເກົາຫຼີເພື່ອເຮັດໃຫ້ຕະຫຼາດການເງິນຢູ່ພາຍໃນປະເທດທີ່ປັ່ນປ່ວນຢ່າງຕໍ່ເນື່ອງນັ້ນໃຫ້ມີຄວາມຫມັ້ນທ່ຽງແລະປ້ອງກັນບໍ່ໃຫ້ເສດຖະກິດຮູບປະທຳຫຼຸດລົງຢ່າງຫຼວງຫຼາຍ.
ນີ້ແມ່ນທະນາຄານກາງສ.ເກົາຫຼີຫຼຸດອັດຕາດອກເບ້ຍໃຫ້ຫນ້ອຍລົງເປັນເທື່ອທີ 2 ພາຍໃນເດືອນນີ້ວັນທີ 9 ຕຸລານີ້,ທະນາຄານກາງສ.ເກົາຫຼີປະກາດວ່າ ຫຼຸດອັດຕາດອກເບ້ຍມາດຖານພື້ນຖານທະນາຄານຈາກ5,25% ລົງຮອດ 5%. ນີ້ແມ່ນທະນາຄານກາງສ.ເກົາຫຼີຫຼຸດອັດຕາດອກເບ້ຍເປັນເທື່ອທຳອິດຕັ້ງແຕ່ເດືອນພະຈິກປີ 2004 ເປັນຕົ້ນມາ.ທ່ານຫຼີເຊີງທາຍ ຜູ່ວ່າການທະນາຄານກາງສ.ເກົາຫຼີກ່າວໂດຍທາງອ້ອມວ່າ, ຍ້ອນພິຈາ ລະນາເຖິງປັດໄຈຕ່າງໆເຊັ່ນ:ຄວາມຕ້ອງການຢູ່ພາຍໃນປະເທດນັບມື້ນັບຫນ້ອຍລົງ, ການສົ່ງອອກອາດຈະຄ່ອຍໆຊ້າລົງແລະຕະຫຼາດການເງິນປັ່ນປ່ວນເປັນຕົ້ນ,ທະນາຄານກາງອາດຈະຫຼຸດອັດຕາດອກເບ້ຍອີກ.ຂະນະດຽວກັນນີ້,ທະນາຄານກາງກໍ່ຈະຕິດຕາມຢ່າງໃກ້ຊິດຕໍ່ຄວາມສ່ຽງດ້ານໄພເງິນເຟີ້ຈະເພີ່ມຂຶ້ນ.
ນັບແຕ່ເດືອນກັນຍາປີນີ້ເປັນຕົ້ນມາ, ໂດຍໄດ້ຮັບການກະຫນ່ຳຈາກວິກິດການທາງດ້ານການເງິນອາເມລິກາ,ຕະຫຼາດການເງິນຂອງສ.ເກົາຫຼີໄດ້ເກີດການປັ່ນປ່ວນຢ່າງຮ້າຍແຮງ,ຕະຫຼາດບັດຫຸ້ນສ່ວນແລະຕະຫຼາດ ແລກປ່ຽນເງິນຕາຕ່າງປະເທດຕ່ຳລົງຢ່າງໃຫຍ່ຫຼວງ.ໃນ9ເດືອນທຳອິດປີນີ້,ຍ້ອນໄດ້ຮັບຜົນສະທ້ອນຈາກລາຄານ້ຳມັນເຊື້ອໄຟແລະລາຄາວັດຖຸດິບສາກົນໄດ້ແພງຂຶ້ນ, ການຄ້າກັບຕ່າງປະເທດຂອງສ.ເກົາຫຼີໄດ້ເສຍປຽບດຸນເຖິງ 14ຕື້600ລ້ານໂດລາ.ທະນາຄານກາງສ.ເກົາຫຼີເຫັນວ່າ,ເສດຖະກິດຮູບປະທຳແທ້ໄດ້ຮັບຜົນສະທ້ອນແລ້ວ.
ເພື່ອເຮັດໃຫ້ຕະຫຼາດການເງິນພາຍໃນປະເທດໝັ້ນທ່ຽງ,ຊຸກຍູ້ການພັດທະນາເສດຖະກິດ,ລັດຖະບານສ.ເກົາຫຼີໄດ້ໃຊ້ມາດຕະການຫຼາຍຢ່າງ ຄື:ເພື່ອຜ່ອນຄາຍບັນຫາຂາດເຂີນໂດລາສະຫະລັດທີ່ຈໍລະຈອນໃນຕະຫຼາດການເງິນສ.ເກົາຫຼີ,ຈະສະໜອງການຮັບປະກັນຈ່າຍເງິນ100ຕື້ໂດລາທີ່ເປັນເວລາສາມປີໃຫ້ແກ່ໜີ້ສິນເງິນຕາຕ່າງປະເທດທີ່ທະນາຄານຂອງປະເທດຕົນຕິດກ່ອນເດືອນມິຖຸນາປີ2009;ໃຊ້ຄັງສຳຮອງເງິນຕາຕ່າງປະເທດສະໜອງການສະໜັບສະໜູນດ້ານເງິນທຶນ30ຕື້ໂດລາໃຫ້ແກ່ທະນາຄານແລະວິສາຫະກິດຂະໜາດກາງຂະໜາດນ້ອຍຢູ່ພາຍໃນປະເທດ;ວັນທີ21ຕຸລານີ້,ລັດຖະບານສ.ເກົາຫຼີໄດ້ປະກາດແຜນການສະໜັບສະໜູນຂະແໜງການກໍ່ສ້າງທີ່ກວມGDP20%ນັ້ນຢ່າງຂະໜາດໃຫຍ່,ລັດຖະບານຈະຊື້ທີ່ດິນແລະເຮືອນຢູ່ທີ່ບໍ່ໄດ້ຂາຍອອກຂອງບໍລິສັດກໍ່ສ້າງທີ່ຕົກຢູ່ສະພາບຫຍຸ້ງຍາກ.ລັດຖະບານສ.ເກົາ ຫຼີຍັງຈະເພີ່ມເງິນກູ້ດອກເບ້ຍຕ່ຳໃຫ້ແກ່ວິສາຫະກິດຂະໜາດກາງຂະໜາດນ້ອຍ.
ວັນທີ27ຕຸລານີ້,ໃນເວລາອະທິບາຍງົບປະມານສົກ2009ຕໍ່ລັດຖະສະພາ,ທ່ານຫຼີມີງບັກ ປະທານາທິບໍດີສ.ເກົາຫຼີກ່າວວ່າ,ລັດຖະບານຈະໃຊ້ມາດຕະການຕ່າງໆ ຄືຫຼຸດອາກອນ ຜ່ອນຄາຍຂໍ້ກຳນົດຕ່າງໆ ການເງິນເພີ່ມການລົງທຶນແລະຜ່ອນຄາຍການຂາດເຂີນເງິນຕາໃນການຈໍລະຈອນເປັນຕົ້ນເພື່ອຟື້ນຟູຄວາມໝັ້ນໃຈຂອງຜູ້ລົງທຶນ.
