ທ່ານດີມີຕຼີ ເມດເວເດັຟຖະແຫຼງບົດລາຍງານສະພາບການຂອງລັດ
-----------------------------------------------------------------------------------------------------------------
ຕາມຂ່າວcri:ວັນທີ5 ພະຈິກນີ້,ທ່ານດີມີຕຼີເມດເວເດັຟ ປະທານາທິບໍດີຣັດເຊຍໄດ້ຖະແຫຼງບົດລາຍງານສະພາຍການຂອງລັດປະຈຳປີໃຫ້ສອງສະພາຂອງລັດຖະສະພາສະຫະລັດຣັດເຊຍ.ນີ້ແມ່ນທ່ານເມດເວເດຟຖະແຫຼງບົດລາຍງານສະພາບການຂອງລັດເປັນເທື່ອທຳອິດນັບແຕ່ທ່ານຂຶ້ນຮັບຕຳແໜ່ງເປັນປະທານາທິບໍດີເປັນຕົ້ນມາ,ພາຍຫຼັງການປະທະກັນລະຫວ່າງຣັດເຊຍກັບຊັອກຊີໃນປີນີ້,ການພົວພັນລະຫວ່າງຣັດເຊຍກັບຝ່າຍຕາເວັນຕົກນັບມື້ນັບຊຸດໂຊມລົງ,ແລະພາຍໃຕ້ເປື້ອງຫຼັງທີ່ສະພາບການເງິນສາກົນໃນປັດຈຸບັນປັ່ນປ່ວນຢ່າງຕໍ່ເນື່ອງ,ທ່ານເມດເວເດັຟຖະແຫຼງບົດລາຍງານສະພາບການຂອງລັດເທື່ອນີ້ໄດ້ດູດດຶງຄວາມເອົາໃຈໃສ່ຂອງຝ່າຍຕ່າງໆເປັນພິເສດ.
ຜູ່ແທນ800ກວ່າຄົນລວມທັງທ່ານວຼາດີເມຍ ປູຕິນ ນາຍົກລັດຖະມົນຕີຣັດເຊຍ,ທ່ານເຊີເກ ມີໂຣໂນຟ ປະທານຄະນະກຳມະການສະຫະພັນຫຼືສະພາສູງ,ທ່ານໂບຣິສ ກຣິສໂລຟ ປະທານສະພາດູມາຫຼືສະພາຕ່ຳເປັນຕົ້ນໄດ້ເຂົ້າຟັງບົດລາຍງານສະພາບການຂອງລັດ.
ເບິ່ງຈາກເນື້ອໃນຂອງບົດລາຍງານສະພາບການຂອງລັດແລ້ວ,ວິກິດການການເງິນແລະສະຖານະການສາກົນພາຍຫຼັງການປະທະກັນລະຫວ່າງຣັດເຊຍກັບຊັອກຊີທີ່ວົງການພາຍນອກເອົາໃຈໃສ່ໂດຍທົ່ວໄປກໍ່ແມ່ນຈຸດສຳຄັນຂອງບົດລາຍງານສະພາບການຂອງລັດເທື່ອນີ້.
ເພື່ອແກ້ໄຂວິກິດການການເງິນທີ່ປັ່ນປ່ວນຢ່າງຕໍ່ເນື່ອງໃນປັດຈຸບັນ,ທ່ານເມດເວເຈັຟກ່າວໃນບົດລາຍງານສະພາບການຂອງລັດວ່າ,ຕ້ອງດຳເນີນການປະຕິຮູບລະບົບການເມືອງແລະເສດຖະກິດສາກົນໃນປັດຈຸບັນຢ່າງເຖິງຖອງ.ຣັດເຊຍຈະສ້າງສູນການທະນາຄານສາກົນໂດຍຜ່ານກົດໝາຍກົດບັນຍັດເປັນລະບົບ.ທ່ານຍັງມີເຈດຈຳນົງໃຫ້ງົບບັນຊີດ້ວຍເງິນລຸບໃນການຄ້ານ້ຳມັນເຊື້ອໄຟແລະອາແກັສທຳມະຊາດ.ທ່ານເມັດເວເດຟຍັງກ່າວວ່າ,ຣັດເຊຍຈະຜ່ານຜ່າຜົນສະທ້ອນຂອງວິກິດການເສດຖະກິດສາກົນ,ແລະກາຍເປັນປະເທດທີ່ເຂັ້ມແຂງກວ່າເກົ່າ.
ກ່ຽວກັບການປະທະກັນລະຫວ່າງຣັດເຊຍກັບຊອກຊີໃນເດືອນສິງຫາປີນີ້, ທ່ານເມັດເວເດັບໄດ້ຕິຕຽນອາເມລິກາແລະນາໂຕປະຕິບັດນະໂຍບາຍສອງດ້ານໃນບັນຫາໂກໂສໂວແລະບັນຫາໂອເຊເທຍໃຕ້, ຕິຕຽນອາເມລິກາແລະນາໂຕແຜ່ຂະຫຍາຍອິດທິກຳລັງໄປທິດຕາເວັນອອກແລະຕິດຕັ້ງລະບົບປ້ອງກັນລູກສອນໄຟນຳວິຖີຢູ່ເອີລົບຕາເວັນອອກ. ທ່ານກ່າວວ່າ, ຣັດເຊຍຈະໃຊ້ມາດຕະການທີ່ສົມຄູ່ກັນ. ທ່ານຍັງກ່າວວ່າ, ຣັດເຊຍຈະຕິດຕັ້ງລູກສອນໄຟນຳວິຖີ"ອິສຄານເດີ"ຢູ່ລັດກາລິນີນກຼາດສກາຢາ, ເພື່ອຮັບມືກັບລະບົບປ້ອງກັນລູກສອນໄຟນຳວິຖີທີ່ອາເມລິກາຕິດຕັ້ງຢູ່ເອີລົບຕາເວັນອອກ. ນອກນີ້, ທ່ານເມັດເວເດັບກ່າວວ່າ, ຄວນສ້າງລະບົບການພົວພັນສາກົນທີ່ມີຫຼາຍຂົ້ວ, ບໍ່ຄວນໃຫ້ປະເທດດຽວຄວບຄຸມໂລກ.
ໃນເວລາກ່າວເຖິງບັນຫາການພົວພັນຣັດເຊຍອາເມລິກາ, ທ່ານເມັດເວເດັບກ່າວວ່າ, ຫວັງວ່າຜູ້ນຳອາເມລິກາທີ່ຮັບເລືອກຕັ້ງໃໝ່ຈະປັບປຸງການພົວພັນກັບຣັດເຊຍໃຫ້ດີຂຶ້ນ.
ໃນບົດລາຍງານ, ທ່ານເມັດເວເດັບຍັງໄດ້ລົງເລິກບັນລະຍາຍບັນຫາຕ້ານການສໍ້ລາດບັງຫຼວງ.
ໃນການຖະແຫຼງທີ່ດຳເນີນເກືອບ90ນາທີ, ທ່ານປະທານາທິບໍດີເມັດເວເດັບຍັງໄດ້ປະກອບຄວາມຄິດຄວາມເຫັນຢ່າງເລິກເຊິ່ງຫຼາຍດ້ານ, ເຊັ່ນ ການສ້າງລະບອບກົດໝາຍແຫ່ງລັດ ການສ້າງກອງທັບ ການພົວພັນລະຫວ່າງສູນກາງກັບທ້ອງຖິ່ນ ການສຶກສາ ສາທາລະນະສຸກແລະສະຫວັດດີການສັງຄົມເປັນຕົ້ນ.
