ກຸ່ມ 20 ປະເທດມີຄວາມເຫັນເປັນເອກະສັນກັນກ່ຽວກັບທົ່ວໂລກຮ່ວມມືກັນຮັບມືກັບວິກິດການການເງິນ

(GMT+08:00) 2008-11-10 14:57:12 cri
-----------------------------------------------------------------------------------------------------------------

ວັນທີ 9 ພະຈິກນີ້, ຢູ່ເມືອງຊາວເປົາໂລແຫ່ງເບຼຊິນ, ກອງປະຊຸມປະຈຳປີ2008 ຂອງລັດຖະມົນຕີການເງິນແລະຜູ້ວ່າການທະນາຄານແຫ່ງຊາດຂອງກຸ່ມ 20 ປະເທດທີ່ດຳເນີນມາເປັນເວລາ 2 ວັນໄດ້ອັດລົງແລ້ວ. ທີ່ປະຊຸມມີຄວາມເຫັນເປັນເອກະສັນກັນກ່ຽວກັບທົ່ວໂລກຮ່ວມກັນຮັບມືກັບວິກິດການການເງິນ. ແຕ່ກອງປະຊຸມບໍ່ໄດ້ວາງມາດຕະການລະອຽດໃນການຮັບມືກັບວິກິດການການເງິນ, ພຽງແຕ່ຈະສະເໜີບັນຫາເຫຼົ່ານີ້ຕໍ່ກອງປະຊຸມປະມຸກລັດຂອງກຸ່ມ 20 ປະເທດທີ່ຈະຈັດຂຶ້ນຢູ່ວໍຊິງຕັນໃນວັນທີ 15 ພະຈິກນີ້.

ໃນກອງປະຊຸມ, ປະເທດສະມາຊິກຂອງກຸ່ມ 20 ປະເທດເຫັນດີໃຊ້ມາດຕະການເຊັ່ນ: ເພີ່ມການລົງທຶນແລະຫຼຸດພາສາອາກອນ, ເພື່ອຫຼີກເວັ້ນບໍ່ໃຫ້ເສດຖະກິດຕົກຕ່ຳລົງຢ່າງຮຸນແຮງ. ປະເທດສະມາຊິກຂອງກຸ່ມ 20 ປະເທດເຫັນດີເຮັດໃຫ້ລະບຽບການທາງການເງິນເຂົ້າສູ່ລະບົບຕື່ມອີກ, ໂດຍສະເພາະແມ່ນອົງການການເງິນທີ່ບໍ່ແມ່ນທະນາຄານຈຳນວນໜຶ່ງເຊັ່ນ"ກອງທຶນຫຼຸດຜ່ອນຄວາມສ່ຽງດ້ານການເງິນ"ເປັນຕົ້ນ.

ໃນກອງປະຊຸມຂ່າວທີ່ຈັດຂຶ້ນຫຼັງປະຊຸມ, ທ່ານກູອີໂດ ແມນເຕກາ ລັດຖະມົນຕີວ່າການກະຊວງການເງິນຂອງເບຼຊີນເປີດເຜີຍໃຫ້ຮູ້ວ່າ, ຈະວາງຕາຕະລາງເວລາຂອງມາດຕະການລະອຽດເພື່ອຮັບມືກັບວິກິດການການເງິນພາຍໃນ 2 ຫາ 3 ເດືອນຫຼັງຈາກກອງປະຊຸມສຸດຍອດທີ່ຈັດຂຶ້ນຢູ່ວໍຊິງຕັນສິ້ນສຸດລົງ.

ກ່ອນຫນ້ານີ້, ຝຣັ່ງທີ່ເປັນປະເທດປະທານຫມູນວຽນຂອງສະຫະພາບເອີລົບຄາດວ່າ, ສະຫະພາບເອີລົບຕ້ອງໃຊ້ເວລາ 100 ວັນເພື່ອດຳເນີນການເຄື່ອນໄຫວ, ເພື່ອຫຼີກເວັ້ນບໍ່ໃຫ້ວິກິດການເງິນກູ້ສິນເຊື່ອຮອບໃຫມ່ເກີດຂຶ້ນ. ກ່ຽວກັບເລື່ອງນີ້, ທ່ານກູອີໂດກໍ່ກ່າວວ່າ, ຕ້ອງພະຍາຍາມວາງແຜນການພາຍໃນ 100 ວັນ, ແຕ່ທ່ານເຫັນວ່າ ,ເລື່ອງນີ້ສຳລັບອາເມລິກາມີຄວາມຫຍຸ້ງຍາກໃນລະດັບໃດຫນຶ່ງ, ເພາະວ່າອາເມລິກາພວມຢູ່ໃນໄລຍະ ລັດຖະບານຊຸດໃຫມ່ຈະເຂົ້າແທນລັດຖະບານເກົ່າ.

ໃນກອງປະຊຸມປະຈຳປີເທື່ອນີ້, ປະເທດຕ່າງໆເຊັ່ນເບຼຊິນເປັນຕົ້ນໄດ້ສະເຫນີໃຫ້ປະຕິຮູບສະຖາບັນການເງິນໃນທົ່ວໂລກ, ເພື່ອເຮັດໃຫ້ປະເທດທີ່ຕະຫຼາດຈະເລີນໃຫມ່ມີສິດເຂົ້າຮ່ວມຫຼາຍກວ່າເກົ່າ. ຕາມເອກະສານສະບັບສຸດທ້າຍທີ່ປະກາດຫຼັງກອງປະຊຸມ, ຖ້າກອງທຶນເງິນຕາສາກົນຫຼືIMF ຜ່ານຈາກການປະຕິຮູບ, ເພື່ອໃຫ້ຫຼາຍປະເທດກວ່າເກົ່າມີສິດເປັນຕົວແທນ, ສະນັ້ນ ອົງການນີ້ກໍຖືກເຫັນວ່າສາມາດເປັນອົງການປະສານງານໃນການເຄື່ອນໄຫວຮ່ວມ.

ຢ່າງໃດກໍ່ຕາມ,ການເພິ່ມທະວີບົດບາດຂອງກຸ່ມ20ປະເທດ ແລະ ການດຳເນີນການປະຕິຮູບອົງການການເງິນສາກົນໄດ້ກາຍເປັນຄວາມຮັບຮູ້ທີ່ເປັນເອກະສັນກັນຂອງຜູ່ຮ່ວມປະຊຸມ, ເບຼຊິນຍັງສະເໜີໃຫ້ຍົກລະດັບກອງປະຊຸມກຸ່ມ20ປະເທດທີ່ມີແຕ່ລັດຖະມົນຕີການເງິນ ແລະ ຜູ່ວ່າການທະນາຄານເຂົ້າຮ່ວມນັ້ນໃຫ້ສູງຂຶ້ນເປັນລະດັບປະມຸກລັດ,ເພື່ອຍົກສູງຄວາມສາມາດປະສານງານຂອງອົງການດັ່ງກ່າວ.ແຕ່ກອງປະຊຸມບໍ່ໄດ້ຫາລືວິທີດຳເນີນການປະຕິຮູບຢ່າງເລິກເຊິ່ງ.ທີ່ເປັນໜ້າເວົ້ານັ້ນແມ່ນ, ມາດຕະການທີ່ຈີນໃຊ້ເພື່ອຕ້ານວິກິດການການເງິນສາກົນນັ້ນໄດ້ຮັບຄວາມຕີລາຄາສູງຈາກຜູ່ຮ່ວມປະຊຸມ. ວັນທີ8 ພະຈິກນີ້, ໃນກອງປະຊຸມຂ່າວ, ທ່ານໂຣເບີດ ໂຊເອວລິກ ຜູ່ວ່າການທະນາຄານໂລກກ່າວວ່າ, ລັດຖະບານຈີນໄດ້ຖືໂອກາດທີ່ດີໃນສະພາບການການເງິນສາກົນເມື່ອຫຼາຍປີກ່ອນຢ່າງສຳເລັດຜົນ,ຜ່ານຈາກການນຳເຂົ້າທຶນຕ່າງປະເທດຈຳນວນຫຼວງຫຼາຍມາປັບປຸງພື້ນຖານໂຄງລ່າງໃຫ້ດີຂຶ້ນ,ນີ້ແມ່ນ"ນະໂຍບາຍທີ່ສະຫຼາດຫຼາຍ".

ທ່ານຊີ້ອອກວ່າ,ຈີນໄດ້ຫ້າງຫາເງິນຕ່າງປະເທດເປັນຈຳນວນຫຼວງຫຼາຍ ເຮັດໃຫ້ຈີນມີຄວາມສາມາດທີ່ແຂງແຮງກວ່າປະເທດອື່ນໆໃນການຕ້ານວິກິດການການເງິນໃນປະຈຸບັນ,ມີເງື່ອນໄຂໃນການປະຕິບັດນະໂຍບາຍເສດຖະກິດແບບແຜ່ຂະຫຍາຍໃນເວລາຖືກຜົນກະທົບຈາກວິກິດການການເງິນຢ່າງຮຸນແຮງ,ເພື່ອເສີມຂະຫຍາຍບົດບາດໃນການຮັບປະກັນເສດຖະກິດໃຫ້ພັດທະນາຢ່າງໝັ້ນທ່ຽງ.

ຫາງສຽງເຫັນວ່າ,ວິກິດການການເງິນຍັງບໍ່ທັນສິ້ນສຸດລົງ,ຕ້ອງຮ່ວມມືກັບປະຊາຄົມໂລກຢ່າງສະໜິດແໜ້ນເພື່ອຮັບມືກັບວິກິດການການເງິນທີ່ບໍ່ມີຕົວຢ່າງມາກ່ອນໃນປະຫວັດສາດຮອບນີ້.ກໍ່ຄ້າຍຄືກັນກັບທ່ານລູອິສ ອີນາຊີໂອ ລູລາດາຊິນວາເວົ້າໃນງານໄຂພິທີຂອງກອງປະຊຸມຄັ້ງນີ້ວ່າ,ມາດຕະການຝ່າຍດຽວອັນໃດກໍ່ບໍ່ສາມາດແກ້ໄຂວິກິດການການເງິນສາກົນໃນປະຈຸບັນນີ້ໄດ້,ປະເທດຕ່າງໆຕ້ອງປະສານສົມທົບເປັນເອກະສັນກັນ,ສະເພາະປະເທດທີ່ຈະເລີນແລ້ວຕ້ອງເສີມຂະຫຍາຍບົດບາດນຳໜ້າ.

ຂ່າວ-ບົດທີ່ກ່ຽວຂ້ອງ

ຄຳເຫັນ