ທ່ານໂຈ່ວຢົງຄ່າງພົບປະລັດຖະມົນຕີຕ່າງປະເທດຂອງບຣູໄນ
-----------------------------------------------------------------------------------------------------------------
ຕາມຂ່າວສານຊິນຮວາ:ຕອນຄ່ຳວັນທີ9 ພະຈິກນີ້ຕາມເວລາທ້ອງຖິ່ນ,ຢູ່ປັນດາເຊຣີເບກາວັນ,ທ່ານໂຈ່ວຢົງຄ່າງ ກຳມະການປະຈຳກົມການເມືອງສູນກາງພັກກອມມູນິດຈີນ,ເລຂາຄະນະພັກຄະນະກຳມະການການເມືອງແລະກົດໝາຍສູນກາງທີ່ແວ່ຢ້ຽມຢາມບຣູໄນໄດ້ພົບປະເຈົ້າຊາບໂມຮາເມດ ໂບເກຍ ລັດຖະມົນຕີວ່າການກະຊວງການຕ່າງປະເທດແລະການຄ້າຂອງບຣູໄນ.
ທ່ານໂຈ່ວຢົງຄ່າງກ່າວວ່າ,ແຕ່ສ້າງສາຍສຳພັນການທູດ17ປີມານີ້,ການພົວພັນມິດຕະພາບລະຫວ່າງຈີນກັບບຣູໄນຂະຫຍາຍຕົວເປັນຢ່າງດີຕະຫຼອດມາ.ໂດຍສະເພາະໃນບໍ່ເທົ່າໃດປີມານີ້,ການພົວພັນຮ່ວມມືມິດຕະພາບຮອບດ້ານລະຫວ່າງສອງປະເທດໄດ້ເພີ່ມທະວີຢ່າງບໍ່ຢຸດຢັ້ງ.ບຣູໄນໃນຖານະທີ່ເປັນປະເທດຜູ້ປະສານງານຂອງອາຊຽນກັບຈີນ,ໄດ້ເສີມຂະຫຍາຍບົດບາດອັນສຳຄັນເພື່ອລົງເລິກການພົວພັນຄູ່ຮ່ວມມືຍຸດທະສາດລະຫວ່າງຈີນກັບອາຊຽນ.
ເຈົ້າຊາບໂມຮາເມດ ໂບເກຍໄດ້ຕາງໜ້າຊຸນຕານບຣູໄນອວຍພອນຢ່າງສຸດໃຈຕໍ່ຈີນທີ່ໄດ້ຈັດງານໂອລິມປິກປັກກິ່ງແລະກອງປະຊຸມຜູ່ນຳສຸດຍອດອາຊີເອີລົບຢ່າງສຳເລັດຜົນ.ທ່ານກ່າວວ່າ,ບຣູໄນສະໜັບສະໜູນຈີນເສີມຂະຫຍາຍບົດບາດນັບມື້ນັບສຳຄັນໃນວຽກງານພາກພື້ນແລະສາກົນ,ຍິນດີຮ່ວມມືຢ່າງໃກ້ຊິດກັບຈີນ,ບັນລຸການພັດທະນາຮ່ວມກັນ.
