ເປັນຫຍັງຮ່າງສັນຍາກ່ຽວກັບກອງທະຫານອາເມລິກາປະຈຳອີຣັກຈຶ່ງໄດ້ຖືກຮັບຮອງ?
-----------------------------------------------------------------------------------------------------------------
ນັກວິເຄາະເຫັນວ່າ,ສັນຍາສະບັບນີ້ສາມາດຖືກຮັບຮອງໄດ້ໃນທີ່ສຸດ,ແມ່ນຍ້ອນລັດຖະບານບຸສຖືກບັງຄັບໃຫ້ຍອມເຫັນດີໃນບັນຫາສຳຄັນຈຳນວນໜຶ່ງ.ຕາມເຈົ້າໜ້າທີ່ອາວຸໂສຂອງລັດຖະບານອີຣັກທີ່ບໍ່ປະສົງອອກນາມກ່າວວ່າ,ຮ່າງສັນຍາສະບັບນີ້ມີການປ່ຽນແປງອັນໃຫຍ່ຫຼວງໃນ3ເນື້ອໃນ.ອັນທີໜຶ່ງແມ່ນປ່ຽນຊື່ຂອງສັນຍາ,ຈາກ "ສັນຍາຄວາມປອດໄພລະຫວ່າງອາເມລິກາກັບອີຣັກ" ແລະ"ສັນຍາກອງທະຫານອາເມລິກາປະຈຳອີຣັກ"ໃນເບື້ອງຕົ້ນມາເປັນ "ສັນຍາຖອນທະຫານອາເມລິກາ".ອັນທີສອງແມ່ນຕົກລົງຕາຕະລາງເວລາທີ່ຖອນກອງທະຫານອາເມລິກາອອກຈາກອີຣັກ,ກຳນົດວ່າກອງທະຫານອາເມລິກາຈະປະຈຳອີຣັກອີກເປັນເວລາ3ປີຫຼັງວັນທີ12ປີນີ້ທີ່ກອງທະຫານອາເມລິກາໄດ້ມອບສິດຢູ່ສະຫະປະຊາຊາດ,ຄືຖອນອອກຈາກອີຣັກຫຼັງປີ2011.ແລະອັນທີສາມແມ່ນໄດ້ຕື່ມຂໍ້ຫ້າມບໍ່ໃຫ້ກອງທະຫານອາເມລິກາໃຊ້ດິນແດນອີຣັກໄປຮຸກຮານປະເທດໃກ້ຄຽງຂອງອີຣັກໃສ່ໃນຮ່າງສັນຍາ.
ການດັດແປງ 3 ຂໍ້ດັ່ງກ່າວສຳລັບອາເມລິກາແລ້ວແມ່ນຜ່ອນສັ້ນຜ່ອນຍາວຢ່າງຫຼວງຫຼາຍ. ກ່ອນອື່ນໝົດ, ຮ່າງສັນຍາສະບັບນີ້ໄດ້ກຳນົດວ່າເວລາອາເມລິກາຖອນທະຫານແມ່ນປີ 2011, ສຳລັບລັດຖະບານບຸສ໌ທີ່ກ່າວວ່າບໍ່ຕັ້ງຕາຕະລາງເວລາຖອນທະຫານຢ່າງເດັດຂາດນັ້ນແມ່ນຜ່ອນສັ້ນຜ່ອນຍາວຫຼາຍແລ້ວ. ເຖິງຢ່າງໃດກໍຕາມ, ເປົ້າໝາຍແທ້ຈິງໜຶ່ງທີ່ລັດຖະບານບຸສກໍ່ສົງຄາມອີຣັກແມ່ນຕ້ອງການຄົງທະຫານຢູ່ອີຣັກເປັນເວລາຍາວນານ, ແລະນາບຂູ່ເຊຣີແລະອີຣານດ້ວຍອາວຸດ. ຖ້າວ່າສອງຝ່າຍເຊັນສັນຍາດັ່ງກ່າວໃນທີ່ສຸດ, ແຜນການດັ່ງກາວຂອງອາເມລິກາກໍຈະໝົດປະໂຫຍດໄປທັນທີ.
ອັນທີສອງ, ກ່ຽວກັບບັນຫາທະຫານແລະນັກທຸລະກິດຮັບເໝົາຂອງອາເມລິກາມີສິດຍົກເວັ້ນຢູ່ອີຣັກ, ອາເມລິກາກໍໄດ້ຜ່ອນສັ້ນຜ່ອນຍາວບໍ່ໜ້ອຍ. ຕາມຮ່າງສັນຍາສະບັບນີ້, ອີຣັກມີສິດຕັດສິນທະຫານອາເມລິກາທີ່ລະເມີດກົດໝາຍຢູ່ອີຣັກໃນກໍລະນີບໍ່ເກີດສົງຄາມ.ຍ້ອນການຜ່ອນສັ້ນຜ່ອນຍາວດັ່ງກ່າວຂອງອາເມລິກາ, ຮ່າງສັນຍາສະບັບນີ້ທີ່ລັດຖະບານອີຣັກຮັບຮອງນັ້ນໄດ້ສິ້ນສຸດການເຈລະຈາລະຫວ່າງອາເມລິກາກັບອີຣັກທີ່ດຳເນີນເປັນ 8 ເດືອນ. ປະຈຸບັນ, ທ່ານມຸກທາຕາ ອາຊາເຕີ ຜູ້ນຳສາສະໜານິກາຍຊີອະແລະພັກຝ່າຍການເມືອງອື່ນໆທີ່ຕໍ່ຕ້ານອາເມລິກາຍັງຄັດຄ້ານສັນຍາສະບັບດັ່ງກ່າວຍັງເດັດຂາດ, ຮຽກຮ້ອງໃຫ້ອາເມລິກາຖອນອອກຈາກອີຣັກໃນທັນທີ. ສະນັ້ນ, ຮ່າງສັນຍາຈະຜ່ານໄດ້ຫຼືບໍ່ນັ້ນຍັງເປັນເລື່ອງທີ່ບໍ່ທັນແນ່ນອນເທື່ອ
