ເປັນຫຍັງອິນເດຍເກີດເຫດການຫຼອນໂຈມຕີກໍ່ການຮ້າຍເລື່ອຍໆ
-----------------------------------------------------------------------------------------------------------------
ຕາມຂ່າວCRI:ເລີ່ມແຕ່ຕອນຄ່ຳວັນທີ26ພະຈິກນີ້,ນະຄອນມຸມບາຍ ສູນກາງເສດຖະກິດຂອງອິນເດຍທີ່ຕັ້ງຢູ່ຝັ່ງທະເລຕາເວັນຕົກຖືກປົກຄຸມດ້ວຍເງົາມືດຂອງການກໍ່ການຮ້າຍອີກເທື່ອໜຶ່ງ.ເກືອບ10ບ່ອນທີ່ຢູ່ໃຈກາງນະຄອນມຸມບາຍ ຄື ສະຖານີລົດໄຟ ໂຮງແຮມ ໂຮງຮູບເງົາ ອົງການລັດຖະບານແລະບ່ອນອື່ນໆໄດ້ຖືກກຸ່ມປະກອບອາວຸດຫຼອນໂຈມຕີ.ນັບມາຮອດຕອນເຊົ້າວັນທີ28ພະຈິກນີ້,ໄດ້ພາໃຫ້ມີ132ຄົນເສຍຊີວິດ,300ກວ່າຄົນບາດເຈັບ.ກ່ອນໜ້ານີ້,ນະຄອນຫຼວງນິວເດັນລີແລະທ້ອງຖິ່ນອື່ນໆຂອງອິນເດຍກໍ່ໄດ້ເກີດເຫດການລະເບີດກໍ່ການຮ້າຍຫຼາຍເທື່ອລຽນຕິດ.ນັບແຕ່ຕົ້ນປີນີ້ມາ,ອິນເດຍໄດ້ເກີດເຫດການກໍ່ການຮ້າຍເກືອບ800ເທື່ອ,ຫຼາຍກວ່າຈຳນວນເຫດການກໍ່ການຮ້າຍທີ່ເກີດຂຶ້ນໃນ3ປີຜ່ານມາ.
ກ່ຽວກັບສາເຫດທີ່ພາໃຫ້ອິນເດຍເກີດເຫດການກໍ່ການຮ້າຍເລື່ອຍໆ,ນັກວິເຄາະເຫັນວ່າ,ມີສາເຫດຫຼາຍດ້ານດັ່ງນີ້:
ກ່ອນອື່ນ, ຄວາມຂັດແຍ່ງກັນລະຫວ່າງຫຼາຍຊົນເຜົ່າແລະຫຼາຍສາສະຫນາຂອງອິນເດຍໄດ້ຮຸນແຮງຂຶ້ນ. ອິນເດຍແມ່ນປະເທດທີ່ມີຫຼາຍຊົນເຜົ່າ ເຊື້ອຊາດແລະສາສະຫນາ.ປະຊາຊົນຫຼາຍກວ່າ 80% ແມ່ນສາສະນິກກະຊົນສາດສະຫນາຣິນດູ, ແຕ່ວ່າ ສາສະຫນາທັງຫມົດທີ່ສຳຄັນໃນທົ່ວໂລກກໍ່ມີແມ່ນຢູ່ໃນອິນເດຍຄືກັນ, ໂດຍສະເພາະແມ່ນມີຜູ່ຖືສາສະຫນາມູສລິມທີ່ກວມປະມານ 12% ມີບົດບາດສຳຄັນຢູ່ອິນເດຍ. ໃນປະຫວັດການພັດທະນາຂອງອິນເດຍມາຫຼາຍພັນປີ ,ການປະທະກັນຢ່າງນອງເລືອດລະຫວ່າງຜູ່ຖືສາສະຫນາຕ່າງກັນເກີດຂຶ້ນຄຽງຄູ່ກັບການພັດທະນາຂອງສັງຄົມອິນເດຍຕະຫຼອດມາ.ອັງກິດເຄີຍປົກຄອງອະນຸທະວີບອາຊີໃຕ້ໃນໄລຍະຫນຶ່ງ, ອິນເດຍທີ່ເຄີຍເປັນຫົວເມືອງອັງກິດໃນເມື່ອກ່ອນ ລວມທັງ3ປະເທດຄື:ອິນເດຍ ປາກີສະຖານແລະບັງກາລາເດັດ. ພວກລ່າເມືອງຂຶ້ນອັງກິດໄດ້ຕົກລົງໃຫ້ອິນເດຍແລະປາກີສະຖານແຍກອອກປົກຄອງຕົນເອງແລະກໍ່ສົງຄາມອິນເດຍປາກີສະຖານທີ່ເກີດຂຶ້ນພາຍຫຼັງມາ,ເຮັດໃຫ້ຄວາມຂັດແຍ່ງລະຫວ່າງສອງສາສະຫນາໃຫຍ່ຄືສາສະຫນາຣິນດູແລະມຸສລິມຮຸນແຮງຂຶ້ນກວ່າເກົ່າ. ພ້ອມກັນນັ້ນ,ອິດທິກຳລັງທີ່ຮຽກຮ້ອງຢາກເປັນເອກະລາດແລະແຍກອອກຈາກກັນກໍ່ແມ່ນກົກເຄົ້າຫນຶ່ງຂອງບັນຫາໃຊ້ຄວາມຮຸນແຮງ ພາຍໃນປະເທດອິນເດຍ ເລື້ອຍໆ.
ອັນທີ່ສອງ, ແມ່ນຄວາມຫຼຸດໂຕນກັນລະຫວ່າງຜູ້ຮັງກັບຜູ້ທຸກໜັກໜ່ວງຫຼາຍ. ຍ້ອນສາເຫດປະຫວັດສາດແລະສັງຄົມອັນສັບສົນ, ຄວາມຫຼຸດລື່ນກັນລະຫວ່າງຜູ້ທຸກແລະຜູ້ຮັງຂອງອິນເດຍຍັງປົນກັນກັບປັດໄຈທາງສະໜາແລະເຊື້ອຊາດອີກ; ພ້ອມກັນນັ້ນ, ປະກົດການທີ່ບໍ່ສະເໝີພາບທາງດ້ານເສດຖະກິດແບບນີ້ຍັງປະສານກັນກັບປັດໄຈສາກົນທີ່ສົບສົນກວ່າເກົ່າ, ສະນັ້ນໄດ້ສ້າງເງື່ອນໄຂອັນເໝາະສົມໃຫ້ແກ່ການກຳເນີດແລະເຕີບໂຕຂອງລັດທິກໍ່ການຮ້າຍແລະເກີດເຫດການໃຊ້ຄວາມຮຸນແຮງເລື້ອຍໆ.
ນອກນັ້ນ, ໃນຂະນະທີ່ປະເຊີນໜ້າກັບລັດທິກໍ່ການຮ້າຍທີ່ນັບມື້ນັບຮ້າຍແຮງ, ແຕ່ມາດຕະການຕ້ານລັດທິກໍ່ການຮ້າຍຂອງອິນເດຍພັດບໍ່ມີປະສິດທິພາບ, ການຕໍ່ຕ້ານລັດທິກໍ່ການຮ້າຍບໍ່ມີປະສິດທິພາບກໍແມ່ນສາເຫດໂດຍກົງອັນໜຶ່ງທີ່ເຮັດໃຫ້ແຫ່ງຕ່າງໆຂອງອິນເດຍເກີດເຫດການຫຼອນໂຈມຕີຂອງລັດທິກໍ່ການຮ້າຍຢ່າງບໍ່ຢຸດຢັ້ງ. ໃນຫຼາຍປີມານີ້, ເຖິງວ່າມີອົງການຫົວຮຸນແຮງອອກມາປະກາດຄວາມຮັບຜິດຊອບຕໍ່ເຫດການໂຈມຕີເລື້ອຍໆກໍຕາມ, ແຕ່ຈົນມາຮອດປະຈຸບັນນີ້, ໜ່ວຍງານຮັກສາຄວາມປອດໄພຂອງອິນເດຍກໍ່ຍັງບໍ່ສາມາດຈັບຕົວພວກລັດທິກໍ່ການຮ້າຍ. ທ່ານມານໂມຮັນ ຊິງ ນາຍົກ ລັດຖະມົນຕີອິນເດຍກ່າວວາ, ລັດຖະບານອິນເດຍຈະປະຕິຮູບແລະເພີ່ມຄວາມເຂັ້ມແຂງຂອງຕຳຫຼວດແລະຂ່າວລັບ, ແລະຈະສ້າງອົງການສຳຫຼວດທີ່ມີປະສິທິພາບສູງຂຶ້ນມາ, ຮັບຜິດຊອບຕໍ່ຕ້ານລັດທິກໍ່ການຮ້າຍໂດຍສະເພາະ.
